Tikronika Ta Vumbirhi
9 Hosi ya xisati ya le Xeba+ yi twa xiviko mayelana na Solomoni, hiloko yi ta eYerusalema leswaku yi ta vutisa Solomoni swivutiso swo tika swinene. A yi famba ni malandza ni tindhuna ta yona ni tikamela leti rhwaleke mafurha ya balsama ni nsuku wo tala+ swinene ku katsa ni maribye ya risima. Yi fika yi vutisa Solomoni hinkwaswo leswi a yi lava ku swi tiva.+ 2 Kutani Solomoni a swi hlamula hinkwaswo swivutiso swa yona. A xi kona ni xin’we lexi Solomoni a tsandzekeke ku yi hlamula xona.
3 Loko hosi ya xisati ya le Xeba yi vone vutlhari bya Solomoni,+ yindlu leyi a yi akeke,+ 4 swakudya etafuleni rakwe,+ ndlela leyi malandza yakwe a ma tshama ha yona etafuleni, matirhelo ya vaphameri vakwe ni maambalelo ya vona, vacheri va swakunwa ni maambalelo ya vona ni magandzelo yo hisiwa lawa a a ma endla endlwini ya Yehovha+ nkarhi ni nkarhi, yi namba yi hela matimba hi ku hlamala. 5 Hiloko yi ku eka hosi: “Leswi ndzi swi tweke etikweni ra mina mayelana ni mitirho ya wena ni vutlhari bya wena i ntiyiso. 6 Hambiswiritano, a ndzi swi tshembanga leswi ndzi swi tweke ku fikela loko ndzi ta tivonela hi lawa ya ka mina.+ Kambe waswivo, leswi ndzi byeriweke swona hi vutlhari bya wena lebyikulu a swi tati ni xandla.+ U swi tlula ekule leswi ndzi byeriweke swona.+ 7 Va tsaka vavanuna va wena, ma tsaka ni malandza ya wena lama yimaka emahlweni ka wena nkarhi ni nkarhi ma yingisa vutlhari bya wena! 8 A ku dzunisiwe Yehovha Xikwembu xa wena, loyi a ku rhandzeke kutani a ku veka exiluvelweni xa yena u va muyimeri wa Yehovha Xikwembu xa wena. Hikuva Xikwembu xa wena xi rhandza tiko ra Israyele+ leswaku ri ta va kona hilaha ku nga heriki, hi yona mhaka leyi xi ku vekeke tanihi hosi ya rona leswaku u avanyisa ni ku fuma hi ndlela leyinene.”
9 Hiloko hosi leyi ya xisati yi nyika hosi titalenta* ta nsuku+ ta 120 ni mafurha ya balsama yo tala ngopfu ni maribye ya risima. A ka ha tlhelanga ku tisiwa mafurha yo tala ku fana ni lawa hosi ya xisati ya le Xeba yi ma nyikeke Hosi Solomoni.+
10 Handle ka sweswo, malandza ya Hiramu ni malandza ya Solomoni lama tiseke nsuku wa le Ofiri+ ma tlhele ma ta ni timhandzi ta mirhi ya algama ni maribye ya risima.+ 11 Hosi yi tirhise timhandzi ta murhi wa algama ku endla switepisi swa yindlu ya Yehovha+ ni swa yindlu ya hosi*+ ni ku endla tiharipa ni switende swa vayimbeleri.+ A ku nga si tshama ku voniwa timhandzi to fana na tona etikweni ra Yuda.
12 Nakambe Hosi Solomoni a nyika hosi ya xisati ya le Xeba xin’wana ni xin’wana lexi yi xi naveleke ni lexi yi xi kombeleke, ku tlula swilo leswi yi teke na swona eka hosi. Hiloko hosi leyi ya xisati yi tlhelela eka rikwavo ni malandza ya yona.+
13 Ntiko wa nsuku lowu Solomoni a a tiseriwa wona hi lembe a ku ri titalenta ta nsuku+ ta 666, 14 ku nga hlayiwi lowu a wu tisiwa hi vaxavisi ni van’wamabindzu ni tihosi hinkwato ta Arabiya ni tindhunankulu ta tiko, lava a va tisa nsuku ni silivhere eka Solomoni.+
15 Hosi Solomoni a endla switlhangu leswikulu swa 200 hi nsuku+ lowu pfanganisiweke ni nsimbhi (xitlhangu ha xin’we a xi endliwe hi nsuku lowu pfanganisiweke ni nsimbhi lowu tikaka tikhilogiramu ta nkombo*)+ 16 ni switlhangu leswitsongo swa nsuku lowu pfanganisiweke ni nsimbhi swa 300, (xitlhangu ha xin’we a xi endliwe hi nsuku lowu tikaka tikhilogiramu timbirhi*). Hiloko hosi yi swi veka eNdlwini ya Khwati ra Lebanoni.+
17 Hosi yi tlhele yi endla xiluvelo lexikulu hi timhondzo ta tindlopfu yi xi nameka nsuku wo tenga.+ 18 A ku ri ni switepisi swa tsevu leswi yaka exiluvelweni naswona a ku ri ni xitulu lexitsongo xo veka milenge xa nsuku lexi a xi khomane ni xiluvelo nakambe a xi ri ni swo tshega mavoko matlhelo hamambirhi, a ku yime swifaniso swa tinghala+ timbirhi ematlhelo ka swo tshega mavoko. 19 A ku vekiwe swifaniso swa tinghala+ swa 12 ehenhla ka switepisi swa tsevu, xitepisi xin’wana ni xin’wana a xi ri ni nghala hala ni hala emakumu ka xona. A ku nga ri na mfumo wun’wana lowu a wu endle nchumu wo fana ni wolowo. 20 Swibya hinkwaswo swo nwa ha swona swa Hosi Solomoni a swi endliwe hi nsuku ni swibya hinkwaswo swa Yindlu ya Khwati ra Lebanoni a swi ri swa nsuku wo tenga. A ku nga ri na xibya lexi endliweke hi silivhere, hikuva silivhere a yi tekiwa yi nga ri nchumu hi nkarhi wa Solomoni.+ 21 Hikuva swikepe swa hosi a swi ya eTaraxixi+ swin’we ni malandza ya Hiramu.+ Swikepe leswi swa le Taraxixi a swi vuya kan’we endzhaku ka malembe manharhu swi rhwale nsuku, silivhere, timhondzo ta tindlopfu,+ tinkawu ni tiphikoko.
22 Hikwalaho Hosi Solomoni a a tlula tihosi hinkwato ta misava hi rifuwo ni vutlhari.+ 23 Naswona tihosi hinkwato ta misava a ti endzela Solomoni leswaku ti ta twa vutlhari byakwe lebyi Xikwembu xa ntiyiso xi n’wi nyikeke byona.+ 24 Lembe ni lembe a ti n’wi tisela tinyiko ta swilo swa silivhere, swilo swa nsuku, swiambalo,+ matlhari, mafurha ya balsama, tihanci ni timeyila. 25 Solomoni a a ri ni swivala swa 4 000 swa tihanci leti a ti koka makalichi yakwe naswona a a ri ni tihanci*+ ta 12 000, leswi a swi vekeke emitini ya makalichi ni le kusuhi ni hosi eYerusalema.+ 26 U fume tihosi hinkwato ku suka eNambyeni* ku ya etikweni ra Vafilista ni ku ya fika endzilakaneni wa Egipta.+ 27 Hosi yi endla leswaku silivhere yi tala ngopfu eYerusalema ku fana ni maribye, timhandzi ta mukedari na tona a ti tele ku fana ni mirhi ya makuwa leyi nga eXefela.+ 28 A ku ri ni lava a va tisa tihanci eka Solomoni ku suka eEgipta+ ni le matikweni man’wana.
29 Matimu hinkwawo ya Solomoni,+ ku sukela eku sunguleni ku ya fikela emakumu, xana a ma tsariwanga eka marito ya muprofeta Nathani+ ni le ka vuprofeta bya Ahiya+ wa le Xilo ni le ka rungula ra swivono swa Ido+ loyi a a vona swivono leswi khumbaka Yerobuwamu+ n’wana wa Nebati? 30 Solomoni u fume tiko hinkwaro ra Israyele a ri eYerusalema, ku ringana malembe ya 40. 31 Hiloko Solomoni a fa a lahliwa ni vakokwa wakwe eMutini wa Davhida tata wakwe.+ Kutani Rehobuwama n’wana wakwe a sungula ku fuma.+