Tihosi Ta Vumbirhi
1 Endzhaku ka ku fa ka Akabu, Vamowabu+ va sungula ku pfukela Vaisrayele.
2 A ku ri hi nkarhi wolowo loko Ahaziya a wa a vaviseka a ri ekamareni ra le henhla ra yindlu yakwe eSamariya. Hiloko a rhuma vanhu a ku: “Fambani mi ya ndzi vutisela eka Bali-zebule xikwembu xa Ekroni+ loko ndzi ta hola eka ku vaviseka ka mina.”+ 3 Kambe ntsumi ya Yehovha yi byela Eliya*+ wa le Tixibe yi ku: “Famba u ya hlangana ni vanhu lava hosi ya Samariya yi va rhumeke u fika u ku eka vona, ‘Xana a ku na Xikwembu eIsrayele leswi mi yaka mi ya vutisa Bali-zebule xikwembu xa Ekroni?+ 4 Hikwalaho Yehovha u ri: “A wu nge pfuki esangwini leri u etleleke eka rona, hikuva kunene u ta fa.”’” Endzhaku ka sweswo Eliya a famba.
5 Loko varhumiwa va tlhelela eka yena, a namba a va vutisa a ku: “Swi lo yini leswi mi tlhelaka mi vuya?” 6 Kutani va n’wi hlamula va ku: “Ku ni munhu loyi a teke ku ta hi hlanganisa naswona u te eka hina, ‘Tlhelelani eka hosi leyi mi rhumeke, mi fika mi ku, “Yehovha u ri: ‘Xana a ku na Xikwembu eIsrayele leswi u rhumaka vanhu va ya vutisa Bali-zebule xikwembu xa Ekroni? Hikwalaho, a wu nge pfuki esangwini leri u etleleke eka rona, hikuva kunene u ta fa.’”’”+ 7 Loko a twa sweswo a va vutisa a ku: “Xana munhu loyi a teke a ta mi hlanganisa a tlhela a mi byela marito lawa a a languteka njhani?” 8 Kutani va ku eka yena: “A ku ri wanuna loyi a a ambale xiambalo lexi endliweke hi voya+ a tlhela a boha bandhi ra dzovo.”+ Xikan’wekan’we hosi yi ku: “I Eliya wa Mutixibe.”
9 Kutani hosi yi rhumela ndhuna ya masocha ya 50 eka Eliya ni masocha ya yona ya 50. Loko ndhuna yi fika eka yena, a a tshame ehenhla ka ntshava. Kutani yi ku eka yena: “Munhu wa Xikwembu xa ntiyiso,+ hosi yi ri, ‘Rhelela.’” 10 Kambe Eliya a hlamula ndhuna ya masocha ya 50 a ku: “Loko ndzi ri munhu wa Xikwembu, a ku hume ndzilo hi le tilweni+ wu ku herisa ni masocha ya wena ya 50.” Hiloko ku huma ndzilo hi le tilweni, wu herisa ndhuna ni masocha ya yona ya 50.
11 Kutani hosi yi tlhela yi rhuma ndhuna yin’wana ya masocha ya 50 ni masocha ya yona ya 50 eka yena. Hiloko yi fika yi ku eka yena: “Munhu wa Xikwembu xa ntiyiso, hosi yi ri, ‘Hatlisa u rhelela.’” 12 Kambe Eliya a va hlamula a ku: “Loko ndzi ri munhu wa Xikwembu xa ntiyiso, a ku hume ndzilo hi le tilweni wu ku herisa ni masocha ya wena ya 50.” Hiloko ku huma ndzilo wa Xikwembu hi le tilweni, wu herisa ndhuna ni masocha ya yona ya 50.
13 Kutani hosi yi tlhela yi rhuma ndhuna yin’wana ya vunharhu ya masocha ya 50 ni masocha ya yona ya 50. Kambe ndhuna leyi ya vunharhu yi tlhandluka yi fika yi khinsama emahlweni ka Eliya, yi sungula ku n’wi xavelela yi ku: “Munhu wa Xikwembu xa ntiyiso, ndzi kombela u tsetselela vutomi bya mina ni bya malandza lawa ya wena ya 50. 14 Ana se ku hume ndzilo hi le tilweni wu herisa tindhuna timbirhi ta masocha ya 50 ni masocha ya tona ya 50, kambe sweswi ndzi kombela u tsetselela vutomi bya mina.”
15 Kutani ntsumi ya Yehovha yi byela Eliya yi ku: “Rhelela na yena. U nga n’wi chavi.” Hiloko a rhelela na yena a ya eka hosi. 16 Kutani Eliya a byela hosi a ku, “Yehovha u ri: ‘U rhume vanhu va ya vutisa Bali-zebule xikwembu xa Ekroni.+ Xana ko ka ku nga ri na Xikwembu eIsrayele?+ Hikwalaho ka yini u nga vutisanga xona? Hikwalaho, a wu nge pfuki esangwini leri u etleleke eka rona, hikuva kunene u ta fa.’” 17 Hiloko a fa, hi ku landza rito ra Yehovha leri Eliya a ri vuleke; kambe leswi a nga ri na n’wana wa jaha, Yehorama*+ a va hosi hi lembe ra vumbirhi ra ku fuma ka Yehorama+ n’wana wa Yehoxafati hosi ya Yuda.
18 Loko ku ri matimu ya Ahaziya+ hinkwawo ni leswi a swi endleke, xana a swi tsariwanga ebukwini ya matimu ya tihosi ta Israyele?