Tikronika Ta Vumbirhi

31 Loko va heta ku tlangela nkhuvo, Vaisrayele hinkwavo lava a va ri kwalaho va ye emitini ya Yuda, va fika va fayelela tiphuphu leti va ti hundzuleke swikwembu,+ va tsema timhandzi ta Axera,*+ va mbundzumuxa ni tindhawu leti tlakukeke+ ni tialtari+ etikweni hinkwaro ra Yuda, Benjamini na Efrayimi na Manase,+ kukondza va swi heta, endzhaku ka sweswo Vaisrayele hinkwavo va tlhelela emitini ya vona.

2 Kutani Hezekiya a ava vaprista ni Valevhi hi ku ya hi mitlawa+ ni mitirho ya vona+ leswaku va endla magandzelo yo hisiwa ni yo kombela ku rhula, leswaku va endla ntirho wa Xikwembu va tlhela va khensa ni ku dzunisa etigedeni ta swivava* swa yindlu ya Yehovha.+ 3 Ku endliwe magandzelo yo hisiwa+ hi swifuwo swin’wana swa hosi, ku katsa ni magandzelo ya nimixo ni ya nimadyambu,+ ni magandzelo yo hisiwa hi Tisavata,+ ya ku huma ka n’weti,+ ya mikhuvo+ hi ku ya hileswi tsariweke eNawini wa Yehovha.

4 U tlhele a byela vanhu lava a va tshama eYerusalema leswaku va nyika vaprista ni Valevhi+ leswi va faneleke va swi kuma leswaku va ta wu landzelela hi ku helela nawu wa Yehovha. 5 Loko va twa sweswo, Vaisrayele va tisa ntshovelo wo sungula wa mavele, vhinyo leyintshwa, mafurha,+ vulombe ni swilo hinkwaswo leswi va swi tshoveleke emasin’wini swi tele;+ va tise vukhume byo tala bya swilo hinkwaswo.+ 6 Vanhu va Israyele ni va Yuda lava a va tshama emitini ya Yuda, na vona va tise vukhume bya tihomu, tinyimpfu ni bya swilo swo kwetsima+ leswi nyikeriweke eka Yehovha Xikwembu xa vona. Va swi tisile va swi hlengeleta swi va tinhulu to tala. 7 Hi n’hweti ya vunharhu+ va sungula ku tisa minyikelo ya vona yi ri tinhulu; va heta hi n’hweti ya vunkombo.+ 8 Loko Hezekiya ni tihosana va fika va vona tinhulu, va dzunisa Yehovha va tlhela va katekisa vanhu vakwe ku nga Vaisrayele.

9 Hezekiya a vutisa vaprista ni Valevhi hi tinhulu teto, 10 hiloko Azariya muprista lonkulu wa ndyangu wa Sadoki a ku: “Ku sukela hi nkarhi lowu va sunguleke ha wona ku tisa minyikelo endlwini ya Yehovha,+ vanhu a va dya va xurha naswona ka ha sele swo tala, hikuva Yehovha u katekise vanhu vakwe naswona swilo leswi swo tala leswi u swi vonaka swi lo sala.”+

11 Hiloko Hezekiya a va byela leswaku va lulamisa makamara*+ yo hlayisela swilo eka wona endlwini ya Yehovha, kutani va ma lulamisa. 12 Va ya emahlweni va tisa minyikelo, vukhume+ ni swilo swo kwetsima hi ku tshembeka; Konaniya loyi a a ri Mulevhi a a langutela swilo leswi hinkwaswo naswona a a pfuniwa hi Ximeyi makwavo. 13 Yehiyele, Azaziya, Nahati, Asahele, Yerimoto, Yozabadi, Eliyele, Isimakaya, Mahata na Benaya a ku ri tindhuna leti a ti pfuna Konaniya ni makwavo Ximeyi, hi ku landza xileriso xa Hosi Hezekiya naswona Azariya a a ri ndhuna endlwini ya Xikwembu xa ntiyiso. 14 Kore n’wana wa Imina, Mulevhi loyi a a ri murindzi wa gede leyi nga evuxeni,+ a a langutela magandzelo ya ku tirhandzela+ ya Xikwembu xa ntiyiso naswona a a ava ni minyikelo leyi a yi humeseriwa Yehovha+ ni swilo swo kwetsima ngopfu.+ 15 A a pfuniwa hi Edeni, Miniyamini, Yexuwa, Xemaya, Amariya na Xekaniya, emitini ya vaprista,+ emitirhweni ya vona yo tshembeka leswaku va phakela vamakwavo hi ku ringana laha va tirhelaka kona,+ eka lonkulu ni lontsongo. 16 Leswi a swi engetela eka mphakelo lowu a wu nyikiwa vaxinuna lava sukelaka eka malembe manharhu ku ya ehenhla lava a va tsarisiwile hi ku ya hi swivongo, lava a va ta siku ni siku leswaku va ta tirha endlwini ya Yehovha ni ku endla mitirho leyi a va yi endla eka mitlawa ya vona.

17 Vaprista a va tsarisiwa hi ku ya hi swivongo swa vona+ ku fana ni Valevhi lava nga ni malembe ya 20 ku ya ehenhla,+ hi ku ya hi mitirho leyi a va yi endla eka mitlawa ya vona.+ 18 A ku tsarisiwe vana va vona hinkwavo, vasati va vona, vana va vona va majaha ni vana va vona va vanhwanyana, vanhu hinkwavo, hikuva a va tihlawulekisile hikwalaho ka ntirho wo kwetsima lowu a va wu endla hi ku tshembeka 19 ni vatukulu va Aroni, ku nga vaprista lava a va tshama emasin’wini lama nga endhawini leyi nga madyelo ekusuhi ni miti ya vona.+ Emitini hinkwayo, vavanuna a va xaxametiwe hi ku ya hi mavito ya vona leswaku va avela vavanuna hinkwavo lava nga vaprista swakudya ni hinkwavo lava tsarisiweke eka nxaxamelo wa swivongo swa Valevhi.

20 Hezekiya u endle leswi fanaka etikweni hinkwaro ra Yuda naswona u ye emahlweni a endla leswinene eka Yehovha Xikwembu xakwe. 21 Mitirho hinkwayo leyi a yi endleke leswaku a tirhela Xikwembu xakwe, hambi endlwini ya Xikwembu xa ntiyiso+ kumbe leyi fambisanaka ni Nawu ni xileriso, u yi endle hi mbilu yakwe hinkwayo naswona u humelerile.