Tikronika Ta Vumbirhi
28 Akazi+ a a ri ni malembe ya 20 loko a va hosi naswona u fume eYerusalema malembe ya 16. A nga endlanga leswinene emahlweni ka Yehovha ku hambana na Davhida kokwa wakwe.+ 2 Kambe u tekelele mahanyelo yo biha ya tihosi ta Israyele+ naswona u tlhele a endla swifaniso swa nsimbhi+ swa Bali. 3 Ku tlula kwalaho, u endle magandzelo eNkoveni wa N’wana wa Hinomu,* a hisa vana vakwe hi ndzilo+ a endla magandzelo ha vona, a landzela mikhuva leyi nyenyetsaka ya matiko+ lawa Yehovha a ma hlongoleke emahlweni ka Vaisrayele. 4 U tlhele a endla magandzelo yo hisiwa etindhawini leti tlakukeke,+ eswintshabyanini ni le hansi ka murhi wun’wana ni wun’wana lowukulu.+
5 Hiloko Yehovha Xikwembu xakwe a n’wi nyiketa eka hosi ya Siriya+ leyi n’wi hluleke ivi yi teka vanhu vo tala yi va yisa evuhlongeni eDamaska.+ U tlhele a endla leswaku a hluriwa hi hosi ya Israyele leyi dlayeke vanhu vo tala swinene va yena. 6 Peka+ n’wana wa Remaliya u dlaye tinhenha ta 120 000 hi siku rin’we eYuda, hinkwavo ku ri vavanuna va vurhena, hikwalaho ka leswi va fularheleke Yehovha Xikwembu xa vakokwa wa vona.+ 7 Zikiri loyi a a ri nhenha ya Muefrayimi, u dlaye Maseya n’wana wa hosi na Azirikamu, loyi a a langutela yindlu ya hosi na Elkana loyi a a ri xandla xa hosi. 8 Ku tlula kwalaho, Vaisrayele va khome vamakwavo va 200 000 va va yisa evuhlongeni, vavasati, vana va majaha ni va vanhwanyana; va tlhele va phanga nhundzu yo tala va yi yisa eSamariya.+
9 Kambe kwalaho a ku ri na Odedi muprofeta wa Yehovha. Hiloko a ya emahlweni ka vuthu leri a ri ya eSamariya a ku eka rona: “Yingisani! Yehovha Xikwembu xa vakokwa wa n’wina a a hlundzukele tiko ra Yuda, hi yona mhaka leyi a ri tshikeke+ mi ri dlaya hi ndlela yo vava lerova swi kala swi twala ni le tilweni. 10 Sweswi mi tiyimisele ku endla vanhu va Yuda na Yerusalema mahlonga ya n’wina ya xinuna ni ya xisati.+ Nilokoswiritano, xana n’wina a mi na nandzu emahlweni ka Yehovha Xikwembu xa n’wina? 11 Ndzi yingiseni mi tshunxa vanhu lava mi va tekeke eka vamakwenu mi va endla mahlonga, hikuva Yehovha u mi hlundzukerile swinene.”
12 Hiloko tindhuna tin’wana ta Vaefrayimi, Azariya n’wana wa Yehohanani, Berakiya n’wana wa Mexilemoti, Yehizikiya n’wana wa Xalumu na Amasa n’wana wa Hadilayi, va holovela lava humaka enyimpini, 13 va ku eka vona: “Mi nga tisi mahlonga laha hikuva hi ta va ni nandzu eka Yehovha. Leswi mi swi endlaka swi ta engetela swidyoho swa hina ni nandzu wa hina, hikuva hi ni swidyoho swo tala naswona Xikwembu xi ri hlundzukele ngopfu tiko ra Israyele.” 14 Hiloko masocha lama hlomeke ma teka mahlonga ni nhundzu leyi phangiweke+ ma swi yisa eka tihosana ni le ka vanhu hinkwavo. 15 Kutani vavanuna lava hlawuriweke hi mavito va teka mahlonga hinkwawo lawa a ma nga ambalanga, va ma nyika swiambalo eka nhundzu leyi phangiweke. Va ma ambexa ni ku ma nyika maphaxani, swakudya ni swakunwa, va ma nyika ni mafurha leswaku ma tola. Ku engetela kwalaho, lava nga kotiki ku famba va va khandziyisa timbhongolo va va yisa eka vamakwavo eYeriko, muti lowu nga ni mirhi ya micindzu. Endzhaku ka sweswo, va tlhelela eSamariya.
16 Hi nkarhi wolowo, Hosi Akazi a kombela tihosi ta Asiriya leswaku ti n’wi pfuna.+ 17 Vaedomu va tlhela va hlasela tiko ra Yuda, va khoma van’wana va vona va va endla mahlonga. 18 Vafilista+ va tlhela va hlasela miti ya Xefela+ na Negebu wa Yuda, va teka Beta-xemexe,+ Ayaloni,+ Gederoti, Soko ni swimitana leswi nga ekusuhi, Timna+ ni swimitana leswi nga ekusuhi na Gimzo ni swimitana leswi nga ekusuhi; va tshama kwalaho. 19 Yehovha a xupula tiko ra Yuda hikwalaho ka Hosi Akazi wa Israyele hikuva u tshike Vayuda va dyoha, leswi nga endla leswaku va nga tshembeki eka Yehovha.
20 Eku heteleleni Hosi Tiglata-pilinezere+ wa Asiriya a fika a n’wi lwisa, a n’wi dyisa mbitsi+ ematshan’weni yo n’wi pfuna. 21 Hikuva Akazi a a teke swilo hinkwaswo leswi nga endlwini ya Yehovha ni le ndlwini ya hosi+ ni le tindlwini ta tihosana kutani a swi nyika hosi ya Asiriya swi va nyiko; kambe sweswo a swi n’wi pfunanga nchumu. 22 Hi nkarhi wa maxangu yakwe, Hosi Akazi u dyohele Yehovha swinene. 23 U sungule ku endlela swikwembu leswi n’wi hluleke+ swa le Damaska+ magandzelo a tlhela a ku: “Leswi swikwembu swa tihosi ta Siriya swi ti pfunaka, ndzi ta swi endlela magandzelo leswaku na mina swi ta ndzi pfuna.”+ Kambe sweswo swi n’wi dyohisile yena ni tiko hinkwaro ra Israyele. 24 Ku tlula kwalaho, Akazi a hlengeleta swibya swa yindlu ya Xikwembu xa ntiyiso; kutani a tsemelela swibya swa yindlu ya Xikwembu xa ntiyiso,+ a pfala tinyangwa ta yindlu ya Yehovha,+ a tiendlela tialtari ekhonweni yin’wana ni yin’wana eYerusalema. 25 Emitini hinkwayo ya Yuda, a endla tindhawu leti tlakukeke leswaku a endlela swikwembu swin’wana magandzelo,+ a tlhela a hlundzukisa Yehovha Xikwembu xa vakokwa wakwe.
26 Loko ku ri matimu yakwe hinkwawo, hinkwaswo leswi a swi endleke ku sukela eku sunguleni ku ya emakumu, swi tsariwe eBukwini ya Tihosi ta Yuda ni ta Israyele.+ 27 Hiloko Akazi a fa a lahliwa ni vakokwa wakwe, va n’wi lahla emutini, eYerusalema, kambe a va n’wi lahlanga eswilahlweni swa tihosi ta Israyele.+ Kutani Hezekiya n’wana wakwe a va hosi.