Vakorinto Wo Sungula
10 Vamakwerhu, ndzi lava mi swi tiva leswaku vakokwa wa hina hinkwavo a va ri ehansi ka papa+ naswona hinkwavo va tsemakanye lwandle.+ 2 Hinkwavo va khuvuriwe va va valandzeri va Muxe hi papa ni hi lwandle. 3 Hinkwavo va dye swakudya leswi fanaka leswi humaka eka Xikwembu,+ 4 naswona hinkwavo va nwe swakunwa leswi fanaka leswi humaka eka Xikwembu.+ Hikuva a va nwa eribyeni leri a ri va landzelela, ribye rero a ri huma eka Xikwembu naswona a ri fanekisela Kreste.+ 5 Nilokoswiritano, Xikwembu a xi va tsakelanga vo tala va vona, hikwalaho ka sweswo va dlayiwile emananga.+
6 Swilo leswi swi ve swikombiso eka hina, leswaku hi nga naveli swilo swo biha tanihi leswi vona va swi naveleke.+ 7 Naswona mi nga vi vagandzeri va swikwembu swa hava, hilaha van’wana va vona va endleke hakona; tanihi laha ku tsariweke hakona va ku: “Vanhu va tshame ehansi va dya va tlhela va nwa. Kutani va suka va yima va titsakisa.”+ 8 Naswona hi nga hanyi hi ku tikhoma ko biha hi swa masangu,* tanihi leswi van’wana va vona va swi endleke kutani ku fa 23 000 wa vona hi siku rin’we.+ 9 Hi nga ringi Yehovha*+ hilaha van’wana va vona va n’wi ringeke hakona, kutani va lovisiwa hi tinyoka.+ 10 Naswona mi nga gunguli tanihi leswi van’wana va vona va gunguleke,+ kutani va lovisiwa hi mulovisi.+ 11 Swilo leswi swi va humelerile tanihi swikombiso naswona swi tsariwile leswaku swi va xitsundzuxo eka hina+ lava hanyaka emikarhini ya makumu.
12 Hikwalaho loyi a ehleketaka leswaku u yimile a a tivonele leswaku a nga wi.+ 13 A mi si weriwa hi ndzingo lowu hambaneke ni lowu welaka vanhu van’wana.+ Kambe Xikwembu xa tshembeka, a xi nge mi tshiki mi ringiwa hi ndzingo lowu mi nga ta tsandzeka ku wu tiyisela,+ kambe loko mi ringiwa xi ta mi nyika ndlela yo huma leswaku mi kota ku wu tiyisela.+
14 Hikwalaho, varhandziwa, papalatani* ku gandzela swikwembu swa hava.+ 15 Ndzi vulavula na n’wina tanihi vanhu lava nga ni ku twisisa; tiendleleni xiboho n’wina vini loko leswi ndzi swi vulaka swi ri ntiyiso kumbe swi nga ri ntiyiso. 16 Loko hi nwa eka xinwelo xa nkateko lexi hi xi khongelelaka, xana a hi vuyeriwi engatini ya Kreste?+ Loko hi dya xinkwa lexi hi xi phemaka, xana a hi vuyeriwi eka miri wa Kreste?+ 17 Hikwalaho ka leswi ku nga ni xinkwa xin’we, hina hambileswi hi nga tala, hi miri wun’we,+ hikuva hinkwerhu hi dya xinkwa xexo xin’we.
18 Anakanyani hi Vaisrayele: Xana lava dyaka magandzelo a va katseki eku gandzeleni ka Xikwembu ealtarini?+ 19 Xana ndzi vula yini hi leswi? Leswaku lexi nyikeriwaka eka xifaniso xa hava i xa nkoka, kumbe i xifaniso xa hava lexi nga xa nkoka? 20 E-e; kambe ndzi vula leswaku leswi vamatiko va endlaka magandzelo ha swona, va swi endlela madimona ku nga ri Xikwembu;+ kutani a ndzi lavi leswaku mi tihlanganisa ni madimona.+ 21 A mi nge nwi exinwelweni xa Yehovha* ni le xinwelweni xa madimona; a mi nge dyi “etafuleni ra Yehovha”*+ ni le tafuleni ra madimona. 22 Kumbe ‘xana hi endla leswaku Yehovha* a va ni mavondzo’?+ Xana hi ni matimba ku n’wi tlula?
23 Swilo hinkwaswo swa pfumeleleka,* kambe a hi hinkwaswo swi pfunaka. Swilo hinkwaswo swa pfumeleleka, kambe a hi hinkwaswo swi akaka.+ 24 Un’wana ni un’wana a a endle leswi pfunaka ni van’wana, ku nga ri leswi pfunaka yena ntsena.+
25 Dyanani hinkwaswo leswi xavisiwaka laha ku xavisiwaka nyama, mi nga vutisi nchumu hikwalaho ka ripfalo ra n’wina, 26 hikuva “misava ni swilo hinkwaswo leswi nga eka yona i swa Yehovha.”*+ 27 Loko munhu loyi a nga riki mupfumeri a mi rhamba, na n’wina mi swi tsakela ku ya, dyanani hinkwaswo leswi vekiweke emahlweni ka n’wina, mi nga vutisi nchumu hikwalaho ka ripfalo ra n’wina. 28 Kambe loko un’wana a ku eka n’wina, “Lowu i nchumu lowu ku phahliwaka timhamba ha wona,” mi nga dyi hikwalaho ka leswi a mi byeleke ni hikwalaho ka ripfalo.+ 29 A ndzi vuli ripfalo ra n’wina kambe ndzi vula ra munhu lowun’wana. Hikuva hikwalaho ka yini tshunxeko wa mina wu fanele wu avanyisiwa hi ripfalo ra munhu un’wana?+ 30 Loko ndzi dya ndzi tlhela ndzi khensa Xikwembu hikwalaho ka yini ndzi soriwa hi mhaka ya swakudya leswi ndzi swi khongeleleke?+
31 Hikwalaho, hambi mi dya kumbe mi nwa kumbe mi endla yini na yini, endlani hinkwaswo leswaku mi dzunisa Xikwembu.+ 32 Tivoneleni leswaku mi nga khunguvanyisi Vayuda, Magriki ni vandlha ra Xikwembu.+ 33 Hikuva ndzi ringeta ku tsakisa vanhu hinkwavo eka swilo hinkwaswo, a ndzi lavi leswi pfunaka mina ntsena+ kambe ndzi lava leswi pfunaka vo tala leswaku va ta ponisiwa.+