Samuwele Wo Sungula
9 A ku ri ni wanuna wa ka Benjamini loyi a vuriwaka Kixi,+ n’wana wa Abiyele, n’wana wa Serori, n’wana wa Bekorati, n’wana wa Afiya wa ndyangu wa Benjamini+ naswona a a fuwile swinene. 2 A a ri ni n’wana wa jaha loyi vito rakwe a ku ri Sawulo,+ a a ri ntsongo naswona a sasekile, a ku nga ri na wanuna exikarhi ka Vaisrayele loyi a a saseke ku n’wi tlula naswona a a lehile ku tlula vanhu hinkwavo.
3 Loko timbhongolo* ta Kixi tata wa Sawulo ti lahlekile, Kixi u byele Sawulo a ku: “Ndzi kombela u teka un’wana wa malandza ya mina mi famba mi ya lava timbhongolo.” 4 Va hundza endhawini ya tintshava ya Efrayimi ni le tikweni ra Xalixa, kambe a va ti kumanga. Va famba va ya fika etikweni ra Xalimi, kambe timbhongolo a ti nga ri kona. Va tsemakanya ni le tikweni hinkwaro ra va ka Benjamini, kambe a va ti kumanga.
5 Hiloko va fika etikweni ra Zufu, kutani Sawulo a byela nandza wakwe loyi a a ri na yena a ku: “A hi muke hikuva tatana a nga sungula ku vilela hi hina ematshan’weni yo vilela hi timbhongolo.”+ 6 Kambe nandza wakwe a ku: “Ku ni munhu wa Xikwembu emutini lowu, munhu loyi wa xiximiwa. Hinkwaswo leswi a swi vulaka swa endleka.+ A hi hatlisele kona. Kumbexana a nga hi byela leswaku hi ya kwihi.” 7 Hiloko Sawulo a byela nandza wakwe a ku: “Loko ho ya, hi ta n’wi nyika yini munhu yoloye? A hi na xinkwa emikwameni ya hina; a hi na nchumu lowu hi nga ta wu nyika nandza wa Xikwembu xa ntiyiso. Xana hi na yini?” 8 Hikwalaho nandza a tlhela a hlamula Sawulo a ku: “Vona, ndzi na kotara ya xikele ya silivhere* evokweni ra mina. Ndzi ta yi nyika nandza wa Xikwembu xa ntiyiso, kutani u ta hi byela leswaku hi ya kwihi.” 9 (Emikarhini ya khale eIsrayele, munhu a a ta vulavurisa xileswi loko a ya lava mpfuno eka Xikwembu: “Tanani, a hi yeni eka muvoni wa swivono.”+ Hikuva muprofeta a a vuriwa muvoni wa swivono emikarhini ya khale.) 10 Kutani Sawulo a byela nandza wakwe a ku: “Leswi u swi vulaka swa twala. A hi fambe.” Hiloko va ya emutini lowu nandza wa Xikwembu xa ntiyiso a a ri eka wona.
11 Loko va ri karhi va tlhandlukela emutini, va hlangana ni vanhwanyana lava a va ya eku keni ka mati. Kutani va va vutisa va ku: “Xana muvoni wa swivono+ u kona laha?” 12 Va hlamula va ku: “U kona. Hi luya. Hatlisani, u endzele muti lowu namuntlha, hikuva vanhu va endla gandzelo+ namuntlha endhawini leyi tlakukeke yo gandzela eka yona.+ 13 Hi ku hatlisa loko mi fika emutini, mi ta n’wi kuma a nga si ya endhawini leyi tlakukeke a ya dya. Vanhu a va nge dyi a nga si fika hikuva hi yena loyi a katekisaka gandzelo. Endzhaku ka sweswo lava rhambiweke va nga dya. Hatlisani, mi ta n’wi kuma.” 14 Hiloko va tlhandlukela emutini. Loko va ri exikarhi ka muti, Samuwele a huma a va hlanganisa leswaku va ya endhawini leyi tlakukeke.
15 Loko ka ha sele siku leswaku Sawulo a ta, Yehovha a a byele* Samuwele a ku: 16 “Mundzuku hi nkarhi lowu, ndzi ta rhumela munhu eka wena loyi a humaka etikweni ra Benjamini.+ U fanele u n’wi chela mafurha leswaku a ta va murhangeri wa vanhu va mina, ku nga Vaisrayele,+ u ta ponisa vanhu va mina evokweni ra Vafilista. Hikuva ndzi vone maxangu ya vanhu va mina ni xirilo xa vona ndzi xi twile.”+ 17 Loko Samuwele a vona Sawulo, Yehovha a ku eka yena: “Hi loyi munhu loyi ndzi ku byeleke ha yena ndzi ku, ‘Hi yena loyi a nga ta fuma vanhu va mina.’”+
18 Kutani Sawulo a ya eka Samuwele exikarhi ka gede a ku: “Ndzi kombela u ndzi byela, yi kwihi yindlu ya muvoni wa swivono?” 19 Samuwele a hlamula Sawulo a ku: “Hi mina muvoni wa swivono. Rhanga u tlhandlukela endhawini leyi tlakukeke, u ta dya na mina namuntlha.+ U ta muka nimixo, ndzi ta ku byela hinkwaswo leswi u lavaka ku swi tiva.* 20 Mayelana ni timbhongolo leti a ti lahlekile masiku manharhu lama hundzeke,+ u nga ha karhateki ha tona hikuva ti kumiwile. Xana swilo hinkwaswo leswi navelekaka swa Israyele i swa mani? Xana a hi swa wena ni ndyangu hinkwawo wa tata wa wena?”+ 21 Hiloko Sawulo a n’wi hlamula a ku: “Xana a ndzi wa ka Benjamini lowu nga wutsongo eka tinyimba ta Israyele,+ xana ndyangu wa ka hina a hi lowu nga nyawuriki eka mindyangu hinkwayo ya va ka Benjamini? Kutani hikwalaho ka yini u vulavula na mina hi ndlela leyi?”
22 Endzhaku ka sweswo Samuwele a teka Sawulo ni nandza wakwe a va yisa eholweni yo dyela eka yona, a va tshamisa endhawini yo hlawuleka ya lava rhambiweke; a ku ri ni vavanuna va kwalomu ka 30. 23 Samuwele a byela musweki a ku: “Tisa nyama leyi ndzi ku nyikeke yona, leyi ndzi ku byeleke ndzi ku, ‘Yi vekele etlhelo.’” 24 Hiloko musweki a tlakula nyama ya nenge a yi veka emahlweni ka Sawulo. Kutani Samuwele a ku: “Leswi vekiweke etlhelo swi vekiwe emahlweni ka wena. Dyana hikuva va swi vekele wena leswaku u swi dya hi nkarhi lowu. Hikuva ndzi va byerile ndzi ku, ‘Ndzi rhambe vaendzi.’” Kutani Sawulo a dya na Samuwele siku rero. 25 Endzhaku ka sweswo va rhelela va suka endhawini leyi tlakukeke+ va ya emutini, kutani a ya emahlweni a vulavula na Sawulo va ri elwangwini ra yindlu. 26 Hiloko va pfuka nimixo swinene, kutani loko dyambu ri xa Samuwele a vitana Sawulo loyi a a ri elwangwini ra yindlu, a ku: “Lungheka leswaku ndzi ta ku tshika u famba.” Sawulo a lungheka, kutani yena na Samuwele va humela ehandle. 27 Loko va ri karhi va ehla ehandlenyana ka muti, Samuwele a byela Sawulo a ku: “Byela nandza+ wa wena leswaku a rhanga,” hiloko a rhanga. “Kambe wena, yima u nga fambi leswaku ndzi ta ku byela rito ra Xikwembu.”