Tikronika Ta Vumbirhi
10 Rehobuwama a ya eXikeme,+ hikuva tiko hinkwaro ra Israyele a ri te eXikeme leswaku ri n’wi endla hosi.+ 2 Kuteloko Yerobuwamu+ n’wana wa Nebati a twa mhaka leyi (a a ha ri eEgipta hikuva a a balekile hikwalaho ko chava Hosi Solomoni),+ Yerobuwamu a vuya hi le Egipta. 3 Hiloko va rhumela vanhu leswaku va n’wi landza kutani Yerobuwamu ni ntshungu hinkwawo wa Israyele va ya eka Rehobuwama va fika va ku: 4 “Tata wa wena a a hi tikisela vutomi.+ Kambe loko wo hi twela vusiwana u hi vevukisela ndzhwalo lowu tata wa wena a hi rhwexeke wona, hi ta va malandza ya wena.”
5 A va hlamula a ku: “Vuyani eka mina endzhaku ka masiku manharhu.” Kutani vanhu va famba.+ 6 Endzhaku ka sweswo, Hosi Rehobuwama a vutisa vakulukumba* lava a va tirhela tata wakwe Solomoni loko a ha hanya, a ku: “Xana mi ri yini hi mhaka leyi, ndzi nga va hlamula njhani vanhu lava?” 7 Va n’wi hlamula va ku: “Loko wo va khoma kahle vanhu lava, u va tsakisa ni ku va endlela leswi va swi kombelaka u tlhela u va hlamula kahle, va ta tshama va ri malandza ya wena.”
8 Hambiswiritano, a tshika xitsundzuxo lexi vakulukumba* va n’wi nyikeke xona, a ya vutisa majaha lawa a ma ri tintangha takwe, lawa se a ma n’wi tirhela.+ 9 A ma vutisa a ku: “Xana ndzi nga va hlamula njhani vanhu lava, lava ndzi kombeleke va ku, ‘Hi vevukisele ndzhwalo lowu tata wa wena a hi rhwexeke wona’?” 10 Hiloko tintangha takwe ti n’wi hlamula ti ku: “U ta byela vanhu lava ku kombeleke va ku, ‘Tata wa wena a a hi tikisela vutomi, hi kombela u hi vevukisela’; va hlamule u ku, ‘Xintihwana xa mina xi ta bumbula ku tlula masenge ya tatana. 11 Tatana u mi rhwexe ndzhwalo wo tika, kambe mina ndzi ta wu engetela. Tatana a a mi ba hi minkhavi yinene, kambe mina ndzi ta mi ba hi minkhavi ya mitwa.’”
12 Yerobuwamu ni vanhu hinkwavo va tlhelela eka Rehobuwama hi siku ra vunharhu, hilaha hosi yi vuleke hakona yi ku: “Vuyani eka mina hi siku ra vunharhu.”+ 13 Kambe hosi yi va hlamula hi tihanyi. Hi ndlela yoleyo Hosi Rehobuwama a tshika xitsundzuxo lexi a xi kumeke eka vakulukumba.* 14 A va hlamula hi ku landza xitsundzuxo xa majaha, a ku: “Ndzi ta tikisa ndzhwalo wa n’wina naswona ndzi ta mi engetela wona. Tatana a a mi ba hi minkhavi yinene kambe mina ndzi ta mi ba hi minkhavi ya mitwa.” 15 Hosi a yi va yingisanga vanhu, mhaka leyi yi ve tano hikwalaho ka Xikwembu xa ntiyiso,+ leswaku ku ta endleka leswi Yehovha a swi byeleke Yerobuwamu n’wana wa Nebati hi ku tirhisa Ahiya+ wa le Xilo.
16 Loko Vaisrayele hinkwavo va vona leswaku hosi a yi va yingisanga, va yi hlamula va ku: “Davhida a hi hosi ya hina, a hi na ndzhaka eka n’wana wa Yese. N’wina Vaisrayele, un’wana ni un’wana a a tlhelele eka swikwembu swakwe! Sala ni yindlu ya wena n’wini, wena Davhida.”+ Hiloko Vaisrayele hinkwavo va muka.+
17 Kambe Rehobuwama a ya emahlweni a fuma Vaisrayele lava a va tshama emitini ya Yuda.+
18 Kutani Hosi Rehobuwama a rhuma Hadorama,+ loyi a a ri ndhuna ya mahlonga, kambe Vaisrayele va n’wi khandla hi maribye a fa. Kavaloko Hosi Rehobuwama a khandziya kalichi yakwe a balekela eYerusalema.+ 19 Ku sukela kwalaho, Vaisrayele va pfukele yindlu ya Davhida ku ta fikela namuntlha.