Tikronika Ta Vumbirhi
34 Yosiya+ a a ri ni malembe ya nhungu loko a va hosi naswona u fume malembe ya 31 eYerusalema.+ 2 U endle leswinene eka Yehovha naswona u fambe etindleleni ta Davhida kokwa wakwe, a nga hambukanga emahanyelweni yakwe lamanene.
3 Hi lembe ra vunhungu ra ku fuma kakwe loko a ha ri mufana, u sungule ku lavisisa Xikwembu xa Davhida kokwa wakwe+ naswona hi lembe ra vu-12 u sungule ku basisa muti wa Yuda ni wa Yerusalema+ hi ku susa tindhawu leti tlakukeke+ ni timhandzi ta Axera,* swifaniso leswi vatliweke+ ni leswi endliweke hi nsimbhi. 4 Ku tlula kwalaho, va mbundzumuxa tialtari ta swifaniso swa Bali a swi langutile naswona u tseme swo tlhandleka murhi wo nun’hwela leswi a swi ri ehenhla ka tona. A tlhela a tshovelela timhandzi ta Axera,* swifaniso leswi vatliweke ni leswi endliweke hi nsimbhi, a swi sila swi va mapa ivi mapa ya kona a ma haxa eswilahlweni swa lava a va swi endlela magandzelo.+ 5 A hisa marhambu ya vaprista ehenhla ka tialtari ta vona+ kutani a basisa muti wa Yuda ni wa Yerusalema.
6 Emitini ya Manase, Efrayimi,+ Simiyoni ku ya fika ni le ka Neftali ni le marhumbini ya vona, 7 a mbundzumuxa tialtari kutani a tshovelela timhandzi ta Axera* ni swifaniso leswi vatliweke,+ a swi sila swi va mapa; a tlhela a tsema ni swo tlhandleka murhi wo nun’hwela hinkwaswo etikweni hinkwaro ra Israyele,+ endzhaku ka sweswo a tlhelela eYerusalema.
8 Hi lembe ra vu-18 ra ku fuma kakwe loko a basise tiko ni tempele, u rhume Xafani+ n’wana wa Azaliya, Maseya ndhuna ya muti na Yowa n’wana wa Yowahazi mutsari wa matimu leswaku va lunghisa yindlu ya Yehovha Xikwembu xakwe.+ 9 Va ye eka muprista lonkulu Hilkiya kutani va n’wi nyika mali leyi a yi tisiwe endlwini ya Xikwembu, leyi Valevhi lava a va rindza tinyangwa va yi hlengeleteke eka va ka Manase, va ka Efrayimi ni le tikweni hinkwaro ra Israyele,+ ku katsa ni le Yuda, Benjamini ni le ka lava tshamaka eYerusalema. 10 Kutani va yi nyika lava hlawuriweke ku langutela ntirho endlwini ya Yehovha. Vatirhi vona va yi tirhisele ku lunghisa swilo leswi onhakeke endlwini ya Yehovha. 11 A va yi nyika lava tivaka ntirho wa mavoko ni vaaki leswaku va xava maribye lama vatliweke ni timhandzi to tshega ni ku tirhisa tin’wana ku aka tiyindlu leti tihosi ta Yuda ti nga ti tshika ti hlakala.+
12 Vavanuna volavo a va endla ntirho hi ku tshembeka.+ Ku hlawuriwe Valevhi ku nga Yahatana na Obadiya, lava a va ri Vamerari,+ Zakariya na Mexulama, lava a va ri Vakohata+ leswaku va langutela ntirho. Valevhi, hinkwavo lava a va ri ni vuswikoti byo yimbelela,+ 13 a va langutela vatirhi ni vanhu hinkwavo lava a va endla mitirho yo hambanahambana; naswona Valevhi van’wana a va ri vamatsalana, tindhuna ni varindzi va tigede.+
14 Loko va ri karhi va humesa mali leyi tisiweke endlwini ya Yehovha,+ muprista Hilkiya u kume buku ya Nawu+ wa Yehovha leyi tsariweke hi Muxe.+ 15 Hiloko Hilkiya a byela matsalana Xafani a ku: “Ndzi kume buku ya Nawu endlwini ya Yehovha.” Kutani Hilkiya a yi nyika Xafani. 16 Hiloko Xafani a yisa buku eka hosi a fika a ku: “Malandza ya wena ma le ku endleni ka ntirho hinkwawo lowu u ma aveleke wona. 17 Ma humese mali leyi a yi ri endlwini ya Yehovha, ma yi nyika vavanuna lava hlawuriweke ni lava endlaka ntirho.” 18 Matsalana Xafani a tlhela a byela hosi a ku: “Ku ni buku leyi ndzi nyikiweke hi muprista Hilkiya.”+ Kutani Xafani a sungula ku yi hlayela hosi.+
19 Loko hosi yi twa marito ya Nawu, yi handzula swiambalo swa yona.+ 20 Hiloko hosi yi lerisa Hilkiya, Ahikama+ n’wana wa Xafani, Abidoni n’wana wa Mikiya, matsalana Xafani na Asaya nandza wa hosi yi ku: 21 “Fambani mi ya ndzi vutisela eka Yehovha, mi vutisela ni lava saleke eIsrayele ni le Yuda mayelana ni leswi tsariweke ebukwini leyi kumiweke; hikuva vukarhi bya Yehovha lebyi nga ta chuluriwa ehenhla ka hina i byikulu hikwalaho ka leswi vakokwa wa hina va nga n’wi yingisangiki Yehovha hi ku tsandzeka ku endla hinkwaswo leswi tsariweke ebukwini leyi.”+
22 Hiloko Hilkiya ni lava rhumiweke hi hosi va ya eka muprofeta wa xisati Hulida.+ A a ri nsati wa Xalumu n’wana wa Tikwa n’wana wa Harasi loyi a a ri muhlayisi wa swiambalo naswona a a tshama eXifundzheni Lexintshwa xa Yerusalema; va fika va vulavula na yena kwalaho.+ 23 Hulida a ku eka vona: “Yehovha Xikwembu xa Israyele u ri, ‘Fambani mi ya byela loyi a mi rhumeke eka mina mi ku: 24 “Yehovha u ri, ‘Ndzi ta tisa khombo endhawini leyi ni le ka vaaki va yona,+ mindzhukano hinkwayo leyi tsariweke ebukwini+ leyi va yi hlayeleke hosi ya Yuda yi ta humelela. 25 Hikwalaho ka leswi va ndzi fularheleke+ naswona va hiselaka swikwembu swin’wana magandzelo leswaku va ndzi hlundzukisa+ hi mitirho ya mavoko ya vona hinkwayo, vukarhi bya mina byi ta pfurhela ndhawu leyi, a byi nge timeriwi.’”+ 26 Kambe eka hosi ya Yuda leyi mi rhumeke ku ta vutisa Yehovha, mi fanele mi ku eka yona, “Hi leswi, leswi Yehovha Xikwembu xa Israyele a swi vulaka: ‘Mayelana ni leswi u swi tweke,+ 27 hikwalaho ka leswi mbilu ya wena yi oloveke u tlhela u titsongahata eka Xikwembu loko u twa leswi xi swi vuleke hi ndhawu leyi ni vaaki va yona kutani u handzula swiambalo swa wena u sungula ku rila emahlweni ka mina, ndzi ku twile,+ ku vula Yehovha. 28 Kutani u ta lahliwa ni vakokwa wa wena hi ku rhula, a wu nge ma voni makhombo hinkwawo lawa ndzi nga ta ma tisa endhawini leyi ni le ka vaaki va yona.’”’”+
Hiloko va yisa nhlamulo eka hosi. 29 Hiloko hosi yi rhumela rito leswaku ku ya vitaniwa vakulukumba hinkwavo va le Yuda ni va le Yerusalema.+ 30 Endzhaku ka sweswo, hosi yi ya endlwini ya Yehovha ni vavanuna hinkwavo va le Yuda, vaakatiko hinkwavo va le Yerusalema, vaprista, Valevhi, vanhu hinkwavo, ku sukela eka lontsongo ku ya eka lonkulu. Yi hlayela vanhu marito hinkwawo ya buku ya ntwanano leyi kumiweke endlwini ya Yehovha.+ 31 Hosi yi yima endhawini ya yona yi endla ntwanano+ emahlweni ka Yehovha leswaku yi ta tirhela Yehovha yi tlhela yi hlayisa swileriso swakwe, switsundzuxo swakwe ni milawu yakwe hi mbilu hinkwayo ni hi vutomi bya yona hinkwabyo+ hi ku landzela marito ya ntwanano lowu, lama tsariweke ebukwini leyi.+ 32 Ku tlula kwalaho, yi khutaze hinkwavo lava a va ri eYerusalema ni le ka Benjamini leswaku va seketela ntwanano lowu. Vaaki va le Yerusalema va wu seketerile ntwanano wa Xikwembu xa vakokwa wa vona.+ 33 Hiloko Yosiya a susa swilo hinkwaswo swo nyenyetsa* etikweni hinkwaro ra Vaisrayele+ naswona u pfune vanhu hinkwavo eIsrayele leswaku va gandzela Yehovha Xikwembu xa vona. A va tshikanga ku gandzela Yehovha Xikwembu xa vakokwa wa vona enkarhini wakwe.