Tikronika Ta Vumbirhi
12 Loko vuhosi bya Rehobuwama byi sungula ku tiya,+ ivi a va ni matimba, yena ni tiko hinkwaro ra Israyele va fularhele Nawu wa Yehovha.+ 2 Hi lembe ra vuntlhanu ra ku fuma ka Hosi Rehobuwama, Hosi Xixaka+ wa le Egipta a ta, a ta hlasela muti wa Yerusalema hikuva a va dyohele Yehovha. 3 A a ri ni makalichi ya 1 200, vagadi va tihanci va 60 000 ni masocha yo tala swinene lawa a teke na wona hi le Egipta—Valibiya, Vasukimi ni Vaetiyopiya.+ 4 U teke miti leyi biyeriweke ya Yuda, kukondza a ya fika ni le Yerusalema.
5 Muprofeta Xemaya+ u ye eka Rehobuwama ni tihosana ta Yuda leti a ti hlengeletane eYerusalema hikwalaho ka Xixaka, a fika a ku eka tona: “Yehovha u ri, ‘Leswi mi ndzi tshikeke na mina ndza mi tshika+ evokweni ra Xixaka.’” 6 Hiloko tindhuna ta Vaisrayele ni hosi ya tona va tisola+ kutani va ku: “Yehovha hi lonene.” 7 Loko Yehovha a vona leswaku va tisorile, hiloko Yehovha a byela Xemaya a ku: “Va tisorile. A ndzi nge he va lovisi+ naswona ku nga ri khale ndzi ta va ponisa. Ndzi ta sirhelela muti wa Yerusalema eka Xixaka, a ndzi nge he wu hlundzukeli. 8 Kambe va ta va malandza yakwe, leswaku va tiva ku hambana exikarhi ka loko va tirhela mina ni loko va tirhela tihosi ta mifumo ya matiko man’wana.”
9 Hiloko Hosi Xixaka wa Egipta a hlasela muti wa Yerusalema. A teka xuma endlwini ya Yehovha+ ni le ndlwini ya hosi. A teka swilo hinkwaswo ku katsa ni switlhangu swa nsuku leswi Solomoni a swi endleke.+ 10 Kutani Hosi Rehobuwama a endla switlhangu swa koporo ku siva leswi tekiweke, a swi nyika tindhuna ta varindzi lava rindzaka nyangwa ya yindlu ya hosi. 11 Nkarhi ni nkarhi loko hosi yi ta endlwini ya Yehovha, varindzi a va fika va swi rhwala, endzhaku ka sweswo a va swi tlherisela endlwini ya varindzi. 12 Leswi hosi yi tisoleke, Yehovha a nga ha yi hlundzukelanga+ naswona a nga ha va lovisanga hi ku helela.+ Ku engetela kwalaho, a ku ri ni swiendlo swo karhi leswinene eka vanhu va Yuda.+
13 Hosi Rehobuwama a tiyisa vuhosi byakwe eYerusalema naswona u ye emahlweni a fuma; Rehobuwama a a ri ni malembe ya 41 loko a va hosi naswona u fume malembe ya 17 eYerusalema, muti lowu Yehovha a wu hlawuleke eka tinyimba hinkwato ta Israyele leswaku a veka vito ra yena kona. Vito ra mana wakwe a ku ri Nayama wa Muamoni.+ 14 Kambe u endle leswo biha hikuva a a nga tiyimiselanga embilwini yakwe ku lava Yehovha.+
15 Matimu hinkwawo ya Rehobuwama, ku sukela eku sunguleni ku ya fikela emakumu, ma tsariwe hi muprofeta Xemaya+ na Ido+ muvoni wa swivono eka nxaxamelo wa swivongo. Rehobuwama na Yerobuwamu+ a va tshamela ku lwa. 16 Hi ku famba ka nkarhi Rehobuwama a fa a lahliwa ni vakokwa wakwe eMutini wa Davhida;+ kutani Abiya+ n’wana wakwe a va hosi.