Tikronika Ta Vumbirhi
11 Loko Rehobuwama a fika eYerusalema, xikan’wekan’we a hlengeleta yindlu hinkwayo ya Yuda ni ya Benjamini,+ ku huma tinhenha leti leteriweke ta 180 000, ti lunghekela ku ya lwa ni Vaisrayele leswaku mfumo wu ta tlhelela eka Rehobuwama.+ 2 Hiloko rito ra Yehovha ri fika eka Xemaya,+ nandza wa Xikwembu xa ntiyiso, ri ku: 3 “Byela Rehobuwama n’wana wa Solomoni hosi ya Yuda ni Vaisrayele hinkwavo lava nga emitini ya Yuda na Benjamini u ku, 4 ‘Yehovha u ri: “Mi nga yi mi ya lwa ni vamakwenu. Un’wana ni un’wana wa n’wina a a muke, hikuva leswi endlekeke i ku rhandza ka mina.”’”+ Hiloko va yingisa rito ra Yehovha va tlhela, a va yanga va ya lwa na Yerobuwamu.
5 Rehobuwama a a tshama eYerusalema naswona u ake miti leyi biyeriweke eYuda. 6 U pfuxe muti wa Betlehema,+ Etamu, Tekowa,+ 7 Beta-suru, Soko,+ Adulamu,+ 8 Gati,+ Marixa, Sifi,+ 9 Adorayimi, Lakixi,+ Azeka,+ 10 Sora, Ayaloni+ na Hebroni+ ku nga miti leyi biyeriweke leyi a yi ri eYuda na Benjamini. 11 Hiloko a tiyisa miti leyi biyeriweke ivi a veka tindhuna eka yona a tlhela a ti nyika swakudya, mafurha ni vhinyo, 12 a tlhela a nyika miti hinkwayo switlhangu leswikulu ni matlhari; a yi tiyisa swinene. Muti wa Yuda ni wa Benjamini yi tshame yi ri yakwe.
13 Vaprista ni Valevhi lava a va ri etikweni hinkwaro ra Israyele va n’wi seketerile ku suka etindhawini to hambanahambana. 14 Valevhi va siye madyelo ya vona ni miti ya vona+ va ya eYuda ni le Yerusalema, hikuva Yerobuwamu ni vana vakwe a va va hlongorile leswaku va nga ha vi vaprista va Yehovha.+ 15 Kutani Yerobuwamu a tihlawulela vaprista va tindhawu leti tlakukeke+ ni va madimona lama nga ni xivumbeko xa mbuti+ ni va marhole lawa a a ma endlile.+ 16 Naswona vanhu lava humaka eka tinyimba hinkwato ta Israyele lava a va tiyimisele ku gandzela Yehovha Xikwembu xa Israyele, va va landzerile eYerusalema leswaku va ta endlela Yehovha Xikwembu xa vakokwa wa vona magandzelo.+ 17 Va tiyise vuhosi bya Yuda ni ku seketela Rehobuwama n’wana wa Solomoni ku ringana malembe manharhu naswona va fambe endleleni ya Davhida na Solomoni ku ringana malembe manharhu.
18 Hiloko Rehobuwama a teka Mahalata n’wana wa Yerimoto n’wana wa Davhida na Abihayili n’wana wa Eliyabu+ n’wana wa Yese leswaku va va vasati vakwe. 19 Hi ku famba ka nkarhi a n’wi tswalela vana va majaha: Yewuxi, Xemariya na Zahama. 20 Endzhaku ka yena a teka Maka ntukulu wa Absalomu.+ Hi ku famba ka nkarhi a n’wi tswalela Abiya,+ Atayi, Ziza na Xelomiti. 21 Rehobuwama a a rhandza Maka ntukulu wa Absalomu ku tlula vasati vakwe lavan’wana hinkwavo ni vasati vakwe lavatsongo,+ hikuva a a teke vasati va 18 ni vasati lavatsongo va 60 naswona u ve ni vana va majaha va 28 ni va vanhwanyana va 60. 22 Hiloko Rehobuwama a veka Abiya n’wana wa Maka ku va ndhuna exikarhi ka vamakwavo, hikuva a a lava ku n’wi endla hosi. 23 Hambiswiritano, u endle swilo hi vutlhari kutani a rhumela van’wana va vana vakwe eswifundzheni hinkwaswo swa Yuda na Benjamini, emitini hinkwayo leyi biyeriweke,+ a va nyika swakudya swo tala a tlhela a va kumela vasati vo tala.