Tikronika Ta Vumbirhi
13 Hi lembe ra vu-18 ra ku fuma ka Hosi Yerobuwamu, Abiya a sungula ku fuma eYuda.+ 2 U fume malembe manharhu eYerusalema. Vito ra mana wakwe a ku ri Mikaya+ n’wana wa Uriyele wa le Gibiya.+ A ku ri ni nyimpi exikarhi ka Abiya na Yerobuwamu.+
3 Hiloko Abiya a ya enyimpini a ri na tinhenha ta matimba leti leteriweke ta 400 000.+ Yerobuwamu na yena a hlomela nyimpi a ri ni vavanuna lava leteriweke va 800 000, tinhenha ta matimba. 4 Kutani Abiya a yima ehenhla ka Ntshava ya Semarayima, leyi nga endhawini ya tintshava ya Efrayimi a ku: “Ndzi yingise, wena Yerobuwamu ni tiko hinkwaro ra Israyele. 5 Xana a mi swi tivi leswaku Yehovha Xikwembu xa Israyele u nyike Davhida mfumo wa Israyele ni vana+ vakwe hilaha ku nga heriki,+ hi ku landza ntwanano wa munyu?*+ 6 Kambe Yerobuwamu+ n’wana wa Nebati, nandza wa Solomoni n’wana wa Davhida, a suka a yima a xandzukela hosi yakwe.+ 7 Kutani vanhu lava nga pfuniki nchumu va sungula ku seketela Yerobuwamu. Hiloko va hetelela va va ni matimba ku tlula Rehobuwama n’wana wa Solomoni hikuva Rehobuwama a a ha ri ntsongo naswona a nga va tiyelanga.
8 “Sweswi mi ehleketa leswaku mi nga hlula mfumo wa Yehovha lowu rhangeriwaka hi vana va Davhida hikwalaho ka leswi mi nga tala naswona mi nga ni swikwembu swa marhole ya nsuku lawa mi endleriweke wona hi Yerobuwamu.+ 9 Xana a mi hlongolanga vaprista va Yehovha,+ vana va Aroni ni Valevhi naswona xana a mi tihlawulelanga vaprista ku fana ni vanhu va matiko laman’wana?+ Un’wana ni un’wana loyi a ta a khome xinkuzana ni makhuna ya nkombo a mi n’wi endla muprista wa leswi nga riki swikwembu. 10 Loko ku ri hina, Yehovha i Xikwembu xa hina,+ a hi n’wi fularhelanga; vaprista va hina, vana va Aroni, va tirhela Yehovha va ri karhi va pfuniwa hi Valevhi. 11 Va endlela Yehovha magandzelo yo hisiwa mixo wun’wana ni wun’wana ni madyambu man’wana ni man’wana,+ ku katsa ni mirhi yo nun’hwela,+ swinkwa swo hlawuleka*+ swi le henhla ka tafula leri endliweke hi nsuku wo tenga naswona va lumeka xo tlhoma timboni xa nsuku+ ni timboni ta xona madyambu man’wana ni man’wana,+ hi endla leswi hi faneleke hi swi endlela Yehovha Xikwembu xa hina; kambe n’wina mi n’wi fularherile. 12 Sweswi vonani, Xikwembu xa ntiyiso xi na hina, xa hi rhangela ni vaprista va xona lava khomeke timhalamhala leti chayiwaka hi nkarhi wa nyimpi. N’wina vavanuna va Israyele, mi nga lwi na Yehovha Xikwembu xa vakokwa wa n’wina, hikuva mi ta hluriwa.”+
13 Kambe Yerobuwamu a rhumela masocha man’wana leswaku ma va juma hi le ndzhaku, kutani man’wana ma va emahlweni ka Yuda, hiloko masocha ma va juma hi le ndzhaku. 14 Loko vanhu va Yuda va hundzuluka, va kuma leswaku va siveleriwile emahlweni ni le ndzhaku. Hiloko va sungula ku huwelela eka Yehovha,+ vaprista va ri karhi va chaya timhalamhala swinene. 15 Kutani vanhu va Yuda va ba hungwe ra nyimpi, loko va endla tano, Xikwembu xa ntiyiso xi hlula Yerobuwamu ni tiko hinkwaro ra Israyele emahlweni ka Abiya na Yuda. 16 Vaisrayele va baleka hi ku chava Vayuda, kutani Xikwembu xi pfuna Vayuda leswaku va hlula. 17 Abiya ni masocha yakwe va dlaya vanhu vo tala swinene, ku fa masocha ya Vaisrayele lama leteriweke nyimpi ya 500 000. 18 Hi ndlela yoleyo Vaisrayele va khomisiwa tingana hi siku rero, Vayuda va va hlurile hikuva a va tshemba Yehovha Xikwembu xa vakokwa wa vona.+ 19 Abiya a ya emahlweni a hlongorisa Yerobuwamu a n’wi tekela ni miti, ku nga Bethele+ ni swimitana leswi nga ekusuhi, Yexana ni swimitana leswi nga ekusuhi na Efurayini+ ni swimitana leswi nga ekusuhi. 20 Yerobuwamu a nga ha tlhelanga a va ni matimba hi nkarhi wa Abiya; hiloko Yehovha a n’wi xupula ivi a fa.+
21 Kambe Abiya a va ni matimba. Hi ku famba ka nkarhi a teka vasati+ va 14, a va ni vana va majaha va 22 ni vanhwanyana va 16. 22 Matimu ya Abiya, hinkwaswo leswi a swi endleke ni ku swi vula, swi tsariwe hi muprofeta Ido.+