Ezekiyele
3 Hiloko a ku eka mina: “N’wana wa munhu, dyana leswi nga emahlweni ka wena.* Dyana buku* leyi, u famba u ya vulavula ni Vaisrayele.”+
2 Kutani ndzi pfula nomu, a ndzi dyisa buku* leyi. 3 A ya emahlweni a ku: “N’wana wa munhu, dyana buku* leyi ndzi ku nyikaka yona, u tata khwiri ra wena.” Hiloko ndzi sungula ku yi dya naswona a yi tsokombela ku fana ni vulombe.+
4 Kutani a ku eka mina: “N’wana wa munhu, famba u ya eka Vaisrayele u fika u va byela leswi ndzi swi vuleke. 5 Hikuva a wu rhumiwi eka vanhu lava vulavulaka ririmi leri swi tikaka ku ri twisisa kumbe lava vulavulaka ririmi leri u nga ri tiviki, kambe u rhumiwa eka Vaisrayele. 6 A wu rhumiwi eka vanhu lava vulavulaka ririmi leri swi tikaka ku ri twisisa kumbe lava vulavulaka ririmi leri u nga ri tiviki, leri marito ya rona u nga ma twisisiki. Loko a ndzi ku rhuma eka vona a va ta ku yingisa.+ 7 Kambe Vaisrayele va ta ala ku ku yingisa hikuva a va swi lavi ku ndzi yingisa.+ Hinkwavo ka vona va ome tinhloko naswona timbilu ta vona ta nonon’hwa.+ 8 Ndzi endle xikandza xa wena xi tiya ku fana ni swikandza swa vona ni mombo wa wena ndzi wu endle wu nonon’hwa ku fana ni mimombo ya vona.+ 9 Ndzi endle mombo wa wena wu fana ni dayimani, wu tiya ku tlula ribye ro tiya.+ U nga va chavi kumbe u chavisiwa hi swikandza+ swa vona hikuva i vanhu lava xandzukeke.”
10 A ya emahlweni a ku eka mina: “N’wana wa munhu, yingisa marito hinkwawo lawa ndzi ku byelaka wona u tlhela u ma veka embilwini ya wena. 11 Yana eka vanhu+ va rixaka ra wena lava nga evuhlongeni u fika u vulavula na vona. U va byela u ku, ‘Leswi hi leswi Yehovha Hosi Leyi Tlakukeke a swi vulaka,’ hambi va yingisa kumbe va ala ku yingisa.”+
12 Hiloko moya wu ndzi tlakula+ kutani ndzi twa mpfumawulo lowukulu endzhaku ka mina wu ku: “Onge ku vangama ka Yehovha ku nga dzunisiwa endhawini yakwe.” 13 A ku twala mpfumawulo wa timpapa ta swivumbiwa leswi hanyaka loko swi khumbana,+ mpfumawulo wa mavhilwa lawa a ma ri etlhelo ka swona,+ a ndzi tlhela ndzi twa mpfumawulo lowukulu. 14 Hiloko moya wu ndzi tlakula wu famba na mina, ndzi fambe ndzi ri ni gome naswona ndzi hlundzukile kutani matimba* ya Yehovha ma sungula ku tirha swinene eka mina. 15 Hiloko ndzi ya eka vanhu lava nga evuhlongeni eTela-vhivhi, lava a va tshama ekusuhi ni nambu wa Kebari,+ ndzi fika ndzi tshama na vona kwalaho; ndzi tshama na vona masiku ya nkombo ndzi pfilunganyekile.+
16 Endzhaku ka masiku ya nkombo Yehovha a vulavula na mina a ku:
17 “N’wana wa munhu, ndzi ku hlawule leswaku u va murindzi wa Vaisrayele;+ naswona loko ndzi ku byela swo karhi u fanele u ndzi lemukisela vona.+ 18 Loko ndzi byela lowo homboloka ndzi ku, ‘U ta fa’ kambe wena u nga n’wi lemukisi, u nga n’wi byeli leswaku a cinca ndlela yakwe yo biha leswaku a nga fi,+ u ta fa hikwalaho ka xihoxo xakwe hikuva u hombolokile,+ kambe ngati yakwe ndzi ta yi lava eka wena.*+ 19 Kambe loko u lemukisa lowo homboloka kutani a nga tshiki ku endla swilo swo biha ni ndlela yakwe yo homboloka, u ta fa hikwalaho ka xihoxo xa yena kambe wena u ta va u ponise vutomi bya wena.+ 20 Kambe loko lowo lulama a tshika ku endla leswi lulameke a endla swo biha, ndzi ta n’wi vekela swihinga endleleni yakwe naswona u ta fa.+ Loko u nga n’wi lemukisanga u ta fela xidyoho xakwe naswona swilo leswinene leswi a swi endleke a swi nge tsundzukiwi, kambe ngati yakwe ndzi ta yi lava eka wena.*+ 21 Kambe loko u lemukise lowo lulama leswaku a nga dyohi, kutani a nga dyohi, a nge fi hikuva u lemukisiwile,+ u ta va u ponise vutomi bya wena.”
22 Matimba* ya Yehovha ma sungule ku tirha eka mina kwalaho, kutani a ku eka mina: “Suka u yima u ya endhawini leyi nga rivala ndzi ta vulavula na wena kwalaho.” 23 Hiloko ndzi suka ndzi yima ndzi ya endhawini leyi nga rivala kutani ndzi vona ku vangama ka Yehovha kwalaho,+ ku fana ni ku vangama loku ndzi ku voneke ekusuhi ni nambu wa Kebari,+ hiloko ndzi wa xikandza xa mina xi languta ehansi. 24 Kutani moya wu nghena eka mina wu ndzi yimisa hi milenge+ ivi a vulavula na mina a ku:
“Famba u ya tipfalela endlwini ya wena. 25 Loko ku ri wena n’wana wa munhu, va ta ku bohelela hi tintambhu leswaku u nga fambafambi exikarhi ka vona. 26 Ndzi ta endla leswaku ririmi ra wena ri namarhela malaka ya wena, u ta va mbheveve, a wu nge swi koti ku va tshinya hikuva i vanhu lava xandzukeke. 27 Kambe loko ndzi vulavula na wena ndzi ta pfula nomu wa wena, u ta va byela u ku,+ ‘Leswi hi leswi Yehovha Hosi Leyi Tlakukeke a swi vulaka.’ Loyi a yingisaka a a yingise+ ni loyi a alaka ku yingisa a nga yingisi hikuva i vanhu lava xandzukeke.+