Vaavanyisi

21 Vavanuna va Vaisrayele va hlambanyile eMizpa,+ va ku: “A hi nge va nyiki va ka Benjamini vana va hina va vanhwanyana leswaku va va vasati va vona.”+ 2 Hiloko vanhu va ya eBethele,+ va fika va tshama emahlweni ka Xikwembu xa ntiyiso va rila swinene ku fikela nimadyambu. 3 Va ku: “Yehovha Xikwembu xa Israyele, hikwalaho ka yini u pfumelele swilo leswi swi endleka eIsrayele? Hikwalaho ka yini nyimba yin’we yi fanele yi hela namuntlha eIsrayele?” 4 Hi siku leri landzelaka vanhu va pfuka nimpundzu swinene va aka altari kwalaho leswaku va ta endla magandzelo yo hisiwa ni magandzelo ya ku kombela ku rhula.+

5 Kutani Vaisrayele va ku: “I mani eka tinyimba hinkwato ta Israyele loyi a nga tangiki loko hi hlengeletana emahlweni ka Yehovha?” hikuva va endle xihlambanyo xa leswaku loyi a nga tangiki eka Yehovha le Mizpa, u fanele a dlayiwa. 6 Hiloko Vaisrayele va n’wi twela vusiwana Benjamini makwavo hikwalaho ka leswi swi n’wi humeleleke. Va ku: “Namuntlha nyimba yin’we yi tsemiwile eIsrayele. 7 Xana hi ta endla yini leswaku vandyangu wa ka Benjamini lava saleke va kuma vavasati, tanihi leswi se hi hlambanyeke eka Yehovha+ leswaku a hi nge va nyiki vana va hina va vanhwanyana va va vasati va vona?”+

8 Va vutisa va ku: “I vamani exikarhi ka tinyimba ta Israyele lava a va nga tanga emahlweni ka Yehovha le Mizpa?”+ Ku kumeke leswaku laha vanhu a va hlengeletane kona, vanhu vo huma eYabexe-giliyadi a va nga tanga. 9 Loko vanhu va hlayiwa, va kume leswaku vaaki va le Yabexe-giliyadi a va nga ri kona. 10 Hiloko Vaisrayele va rhumela tinhenha ta 12 000 kwalaho. Va va lerisa va ku: “Fambani mi ya dlaya vaaki va le Yabexe-giliyadi hi banga, ku katsa ni vavasati ni vana.+ 11 Mi fanele mi endla leswi: Dlayani vavanuna hinkwavo ni wansati un’wana ni un’wana loyi a tshameke a etlela ni wanuna.” 12 Exikarhi ka vaaki va le Yabexe-giliyadi va kume vanhwanyana va 400, lava a va nga si tshama va etlela ni wanuna. Kutani va va tisa emutini wa Xilo,+ lowu nga etikweni ra Kanana.

13 Hiloko ntshungu hinkwawo wu rhumela rito eka va ka Benjamini lava a va ri eribyeni ra Rimoni,+ ku ya va tivisa leswaku nyimpi yi herile. 14 Hi nkarhi wolowo va ka Benjamini va tlhelela etikweni ra vona. Kutani va va nyika vavasati lava nga va dlayangiki loko va dlaya vavasati va le Yabexe-giliyadi,+ kambe a va va ringananga. 15 Vaisrayele va va twela vusiwana va ka Benjamini+ hikwalaho ka leswi va humeleleke, hikuva Yehovha a a endle leswaku ku va ni ku avana exikarhi ka tinyimba ta Israyele. 16 Hiloko vakulukumba va ntshungu va ku: “Hi ta endla yini leswaku hi kumela vavanuna lava saleke vavasati, tanihi leswi vavasati hinkwavo va ka Benjamini va dlayiweke?” 17 Kutani va ku: “Vanhu lava saleke va nyimba ya Benjamini va fanele va va ni ndzhaka, leswaku ku nga vi ni nyimba leyi herisiwaka eIsrayele. 18 Kambe hina a hi pfumeleriwanga ku va nyika vana va hina va vanhwanyana va va vasati va vona, hikuva Vaisrayele va hlambanye va ku: ‘A ku rhukaniwe loyi a nga ta pfumela leswaku n’wana wakwe a tekiwa hi munhu wa ka Benjamini.’”+

19 Va tlhela va ku: “Lembe ni lembe ku ni nkhuvo wa Yehovha emutini wa Xilo,+ lowu nga en’walungwini wa Bethele, hi tlhelo ra vuxa ra gondzo lerikulu leri sukelaka eBethele ri ya eXikeme ni le dzongeni wa Lebona.” 20 Hiloko va lerisa vavanuna va ka Benjamini va ku: “Fambani mi ya tumbela emasin’wini ya madiriva. 21 Kutani loko mi vona vanhwanyana va le Xilo va ta ku ta cina,* mi fanele mi huma emasin’wini ya madiriva, mi titekela vavasati eka vanhwanyana va le Xilo, mi tlhelela etikweni ra Benjamini. 22 Kutani loko vatata wa vona kumbe vamakwavo va hi tengisa hi ta ku, ‘Hi kombela mi hi twela vusiwana hikuva a hi swi kotanga ku va tekela vavasati lava ringaneke enyimpini+ naswona a mi nga ta va nyika vana va n’wina va vanhwanyana handle ko tlula xihlambanyo lexi mi xi endleke.’”+

23 Hiloko vavanuna va ka Benjamini va endla tano, un’wana ni un’wana a titekela nsati eka vavasati lava a va ri eku cineni. Endzhaku ka sweswo va tlhelela etikweni leri nga ndzhaka ya vona va fika va pfuxa miti+ ya vona va tshama eka yona.

24 Hiloko Vaisrayele va hangalaka hi nkarhi wolowo, un’wana ni un’wana a ya enyimbeni ni le ndyangwini wakwe, etikweni leri nga ndzhaka yakwe.

25 Emasikwini wolawo a ku nga ri na hosi eIsrayele.+ Munhu un’wana ni un’wana a a endla leswi a vonaka swi lulamile eka yena.*