Ezekiyele
8 Hi lembe ra vutsevu, hi n’hweti ya vutsevu, hi siku ra vuntlhanu ra n’hweti, loko ndza ha tshamile endlwini ya mina naswona vakulukumba va Yuda va tshame emahlweni ka mina, matimba* ya Yehovha Hosi Leyi Tlakukeke ma sungule ku tirha eka mina. 2 Loko ndzi languta ndzi vona nchumu lowu fanaka ni munhu onge hi loko a rhendzeriwe hi ndzilo; ehansi ka nchumu lowu langutekaka ku fana ni masenge yakwe a ku ri ni ndzilo+ naswona ku sukela emasengeni yakwe ku ya ehenhla a ku ri ni nchumu lowu a wu vangama ku fana ni ku hatima ka nsuku lowu hlanganisiweke ni silivhere.+ 3 Hiloko a tlakusa nchumu lowu fanaka ni voko a ndzi khoma hi misisi, kutani moya wu ndzi teka wu ndzi yisa empfhukeni wu ndzi tisa eYerusalema hi ku tirhisa swivono leswi humaka eka Xikwembu, egedeni ya le ndzeni+ leyi languteke en’walungwini wa tempele, laha a ku ri ni xifaniso lexi hlundzukisaka Xikwembu.+ 4 Nakambe ku vangama ka Xikwembu xa Israyele a ku ri kwalaho,+ ku fana ni xivumbeko lexi ndzi xi voneke endhawini leyi nga rivala.+
5 Hiloko a ku eka mina: “N’wana wa munhu, ndzi kombela u languta en’walungwini.” Kutani ndzi languta etlhelo ra le n’walungwini naswona egedeni ya le n’walungwini ya altari a ku ri ni xifaniso lexi hlundzukisaka Xikwembu. 6 Kutani a ku eka mina: “N’wana wa munhu, xana wa swi vona swilo swo biha leswi nyenyetsaka leswi Vaisrayele va swi endlaka laha,+ swilo leswi endlaka leswaku ndzi va ekule swinene ni ndhawu ya mina yo kwetsima?+ Kambe wa ha ta vona swilo swo nyenyetsa leswi chavisaka swinene.”
7 Hiloko a ndzi yisa enyangweni ya xivava* kutani loko ndzi languta ndzi vona mbhovo ekhumbini. 8 Kutani a ku: “N’wana wa munhu, ndzi kombela u boxa khumbi.” Hiloko ndzi ri boxa, kutani ndzi vona nyangwa. 9 Kutani a ku: “Nghena u vona swilo swo biha leswi nyenyetsaka leswi va swi endlaka laha.” 10 Hiloko ndzi nghena kutani ndzi vona swifaniso swa mixaka hinkwayo ya swilo leswi kokovaka ni swiharhi leswi nyangatsaka+ ni swikwembu hinkwaswo leswi nyenyetsaka* swa ndyangu wa Israyele;+ a swi kovotliwe ekhumbini matlhelo hinkwawo. 11 Vakulukumba va 70 vandyangu wa Israyele a va yime emahlweni ka swona naswona Yazaniya n’wana wa Xafani+ a yime na vona. Un’wana ni un’wana a khome xibya xo hisela murhi wa risuna naswona a ku tuvika musi wa murhi wa risuna lowu nun’hwelaka.+ 12 A ku eka mina: “N’wana wa munhu, xana wa swi vona leswi vakulukumba vandyangu wa Israyele va swi endlaka emunyameni, un’wana ni un’wana ekamareni rakwe laha a vekeke swikwembu swakwe? Hikuva va ri, ‘Yehovha a nga hi voni. Yehovha u ri siyile tiko leri.’”+
13 A tlhela a ku eka mina: “U ta vona swilo leswi nyenyetsaka leswi chavisaka swinene leswi va swi endlaka.” 14 Hiloko a ndzi yisa egedeni ya le n’walungwini ya yindlu ya Yehovha, kutani ndzi fika ndzi vona vavasati va tshamile va ri karhi va rilela xikwembu lexi vuriwaka Tamuzi.
15 A ya emahlweni a ku eka mina: “Wena n’wana wa munhu, xana wa swi vona swilo leswi? U ta vona swilo leswi chavisaka swinene ku tlula leswi.”+ 16 Hiloko a ndzi yisa exivaveni xa vaprista xa yindlu ya Yehovha.+ Kwalaho enyangweni ya tempele ya Yehovha, exikarhi ka rikupakupa* ni altari, a ku ri ni vavanuna va kwalomu ka 25 va fularhele tempele ya Yehovha va langute evuxeni; a va khinsamela dyambu evuxeni.+
17 A ku eka mina: “N’wana wa munhu, xana wa swi vona swilo leswi? Tiko ra Yuda ri swi teka ku nga ri nchumu ku endla swilo leswi swo nyenyetsa, ri tata tiko hi madzolonga+ ni ku ya emahlweni ri ndzi hlundzukisa. Ri nghenisa rhavi* enhompfini ya mina. 18 Kutani ndzi ta teka goza ndzi karihile. A ndzi nge ri tweli vusiwana naswona a ndzi nge ri tsetseleli.+ Hambiloko ro huwelela hi rito lerikulu etindleveni ta mina, a ndzi nge ri yingisi.”+