Ezekiyele
29 Hi lembe ra vukhume, hi n’hweti ya vukhume, hi siku ra vu-12 ra n’hweti, Yehovha a vulavula na mina a ku: 2 “N’wana wa munhu, languta eka Faro hosi ya Egipta, u profeta ku lwa na yena ni tiko hinkwaro ra Egipta.+ 3 Vula marito lawa u ku: ‘Yehovha Hosi Leyi Tlakukeke u ri:
“Ndzi lwa na wena Faro, hosi ya Egipta,+
Xivandzana lexikulu xa le lwandle lexi vundzeke exikarhi ka migerho* ya Nayili,*+
Loyi a nga te, ‘Nambu wa Nayili i wa mina.
Ndzi tiendlele wona.’+
4 Kambe ndzi ta tlhoma swinjovo etinhlayeni ta wena, ndzi endla leswaku tihlampfi ta Nayili ti namarhela eka mahakatimba ya wena.
Ndzi ta ku humesa eNayili ni tihlampfi hinkwato ta Nayili leti namarheleke mahakatimba ya wena.
5 Ndzi ta ku tshika emananga, wena ni tihlampfi hinkwato ta Nayili.
U ta wela enhoveni naswona a ku na munhu loyi a nga ta ku rhwala a ya ku lahla.+
Ndzi ta endla leswaku u dyiwa hi swiharhi ni swinyenyana.+
6 Kutani vaaki hinkwavo va le Egipta va ta swi tiva leswaku hi mina Yehovha,
Hikuva a va nga ha va seketeli vanhu va Israyele ku fana ni rihlanga.+
7 Loko va ku khoma hi voko, u pfotlosekile,
U endle leswaku va tshoveka katla.
8 “‘Hikwalaho Yehovha Hosi Leyi Tlakukeke u ri: “Ndzi tisa banga ehenhla ka wena+ naswona ndzi ta dlaya munhu ni xiharhi eka wena. 9 Tiko ra Egipta ri ta va rhumbi ni ndhawu leyi onhakeke;+ va ta swi tiva leswaku hi mina Yehovha, hikuva u te, ‘Nambu wa Nayili i wa mina; wu endliwe hi mina.’+ 10 Hikwalaho ndzi lwa na wena na Nayili, ndzi ta endla tiko ra Egipta ri va ndhawu leyi onhakeke ni leyi omeke yi tlhela yi va rhumbi,+ ku suka eMigidoli+ ku ya eSeyene+ ni ku ya fika endzilakaneni wa Etiyopiya. 11 A ku nge tsemakanyi munhu kumbe xifuwo eka rona+ naswona a ku nge tshami munhu eka rona ku ringana malembe ya 40. 12 Ndzi ta endla tiko ra Egipta ri va rhumbi ku tlula matiko hinkwawo, miti ya rona yi ta va marhumbi ku tlula miti hinkwayo ku ringana malembe ya 40;+ ndzi ta hangalasa Vaegipta exikarhi ka matiko, ndzi va hangalasa etindhawini to hambanahambana.”+
13 “‘Hikuva Yehovha Hosi Leyi Tlakukeke u ri: “Endzhaku ka malembe ya 40 ndzi ta hlengeleta Vaegipta exikarhi ka vanhu lava nga ta va va hangalaseriwe eka vona;+ 14 ndzi ta tlherisela mahlonga ya Vaegipta etikweni ra Patirosi,+ etikweni leri va velekiweke eka rona, kwalaho va ta va mfumo lowu nga nyawuliki. 15 Egipta ri ta va ra xiyimo xa le hansi ku tlula mifumo leyin’wana naswona a ri nge he fumi matiko man’wana,+ ndzi ta va endla va va vatsongo lerova a va nge swi koti ku hlula matiko man’wana.+ 16 Vanhu va Israyele a va nge he tshembeli eka rona,+ kambe ri ta va tsundzuxa xihoxo xa vona hikwalaho ko lava mpfuno eka Vaegipta. Va ta swi tiva leswaku hi mina Yehovha Hosi Leyi Tlakukeke.”’”
17 Hi lembe ra vu-27, hi n’hweti yo sungula, hi siku ro sungula ra n’hweti, Yehovha a vulavula na mina a ku: 18 “N’wana wa munhu, Hosi Nebukadnetsara*+ wa le Babilona u endle leswaku masocha yakwe ma hlasela Tiri.+ Nhloko yin’wana ni yin’wana yi tsemetiwe mpandlha, katla rin’wana ni rin’wana ri tshwumukile. Kambe yena ni masocha yakwe a va hakeriwanga hikwalaho ka leswi va hlaseleke Tiri.
19 “Hikwalaho Yehovha Hosi Leyi Tlakukeke u ri, ‘Ndzi nyika Hosi Nebukadnetsara* wa le Babilona tiko ra Egipta,+ u ta teka rifuwo ra rona a tlhela a phanga swilo swo tala; swi ta va hakelo ya masocha yakwe.’
20 “‘Ndzi ta n’wi nyika tiko ra Egipta ri va hakelo hikwalaho ka leswi a n’wi* hlaseleke, hikuva va ndzi tirherile,’+ ku vula Yehovha Hosi Leyi Tlakukeke.
21 “Hi siku rero ndzi ta endla leswaku rimhondzo ri milela tiko ra Israyele,*+ ndzi ta ku nyika nkarhi wa ku vulavula exikarhi ka vona; va ta swi tiva leswaku hi mina Yehovha.”