Tikronika Ta Vumbirhi

22 Kutani vanhu va le Yerusalema va veka Ahaziya rikotsa ra Yehorama ku va hosi, hikuva vuthu ra vaphangi leri teke ni Vaarabiya ri dlaye vana vakwe hinkwavo lavakulu.+ Hiloko Ahaziya n’wana wa Yehorama a sungula ku fuma eYuda.+ 2 Ahaziya a a ri ni malembe ya 22 loko a va hosi naswona u fume lembe rin’we eYerusalema. Vito ra mana wakwe a ku ri Ataliya+ ntukulu wa Omri.+

3 Na yena u tekelele mahanyelo yo biha ya ndyangu wa Akabu,+ hikuva mana wakwe a n’wi kucetela ku endla leswo biha. 4 U ye emahlweni a endla swo biha emahlweni ka Yehovha, ku fana ni ndyangu wa Akabu, hikuva a wu ri vatsundzuxi vakwe endzhaku ka rifu ra tata wakwe, leswi n’wi vangeleke khombo. 5 A landzela xitsundzuxo xa vona, kutani a famba na Yehorama n’wana wa Hosi Akabu wa Israyele va ya lwa na Hosi Hazayele+ wa Siriya eRhamoti-giliyadi,+ laha vacopi va nga vavisa Yehorama. 6 A tlhelela eYizriyele+ leswaku a ya hlakarhela eka timbanga leti va n’wi vangeleke tona eRhama loko a lwa na Hosi Hazayele wa Siriya.+

Ahaziya* n’wana wa Yehorama+ hosi ya Yuda u ye eYizriyele a ya pfuxela Yehorama+ n’wana wa Akabu, hikuva a a vavisekile.*+ 7 Kambe riendzo ra Ahaziya ra ku ya vona Yehorama ri endle leswaku Xikwembu xi n’wi dlaya; loko a fika, u fambe na Yehorama ku ya hlangana na Yehu+ ntukulu wa Nimxi, loyi Yehovha a a n’wi hlawule ku lovisa ndyangu wa Akabu.+ 8 Loko Yehu a sungula ku lovisa ndyangu wa Akabu, u kume tihosana ta Yuda, vana va vamakwavo va Ahaziya ni malandza ya Ahaziya, hiloko a va dlaya.+ 9 Kutani a famba a ya lava Ahaziya; hiloko va n’wi kuma laha a a tumbele kona eSamariya ivi va n’wi tisa eka Yehu. Va n’wi dlaya kutani va n’wi lahla+ hikuva va te: “I ntukulu wa Yehoxafati loyi a a gandzela Yehovha hi mbilu yakwe hinkwayo.”+ A ku nga ha ri na un’wana endyangwini wa Ahaziya loyi a a ri ni matimba yo fuma.

10 Loko Ataliya+ mana wa Ahaziya a vona leswaku n’wana wakwe u file, a dlaya vana hinkwavo va le vuhosini bya Yuda.+ 11 Hambiswiritano, Yehoxabati n’wana wa xisati wa hosi a teka Yehowaxi+ n’wana wa Ahaziya a n’wi yiva exikarhi ka vana va hosi lava a va ta dlayiwa kutani a n’wi tumbeta ekamareni ra le ndzeni swin’we ni wansati loyi a a n’wi hlayisa. Yehoxabati n’wana wa Hosi Yehorama,+ (a a ri nsati wa muprista Yoyada+ tlhelo makwavo wa xisati wa Ahaziya) u swi kotile ku n’wi tumbetela Ataliya leswaku a nga n’wi dlayi.+ 12 U tshame na vona ku ringana malembe ya tsevu a tumbetiwile endlwini ya Xikwembu xa ntiyiso, hi nkarhi lowu Ataliya a a fuma tiko.