Tikronika Ta Vumbirhi
23 Hi lembe ra vunkombo, Yoyada a kanya mbilu a endla ntwanano ni tindhuna ta vanhu va madzana,+ ku nga Azariya n’wana wa Yerohamu, Iximayele n’wana wa Yehohanani, Azariya n’wana wa Obede, Maseya n’wana wa Adaya na Elixafati n’wana wa Zikiri. 2 Kutani va ya etikweni hinkwaro ra Yuda va fika va hlengeleta Valevhi+ ku suka emitini hinkwayo ya Yuda ni tindhuna ta mindyangu ya Israyele. Loko va fika eYerusalema, 3 hinkwavo lava a va hlengeletane kwalaho va endle ntwanano+ ni hosi endlwini ya Xikwembu xa ntiyiso, endzhaku ka sweswo Yoyada a ku:
“Yingisani! N’wana wa hosi hi yena loyi a nga ta fuma, hilaha Yehovha a tshembiseke Davhida+ ni vana vakwe hakona. 4 Mi ta endla leswi: Ntlawa wun’we eka mitlawa yinharhu ya vaprista ni ya Valevhi lava nga ta va va tirha+ hi Savata, wu ta rindza tinyangwa;+ 5 ntlawa lowun’wana wu ta va endlwini ya hosi,+ wa vunharhu wu ta va eGedeni ya Masungulo, kasi vanhu hinkwavo va ta va eswivaveni* swa yindlu ya Yehovha.+ 6 Mi nga pfumeleli munhu a nghena endlwini ya Yehovha handle ka vaprista ni Valevhi lava tirhaka kona.+ Vona va nga nghena hikuva i ntlawa wo kwetsima, kasi vanhu lavan’wana hinkwavo va ta endla leswi faneleke hi ku landza nawu wa Yehovha. 7 Valevhi va fanele va yima ematlhelo hinkwawo ya hosi, un’wana ni un’wana a khome tlhari rakwe. Loyi a nga ta nghena endlwini u ta dlayiwa. Fambani ni hosi hinkwako laha yi yaka kona.”
8 Valevhi ni tiko hinkwaro ra Yuda va endla leswi muprista Yoyada a va leriseke swona. Ndhuna ha yin’we yi teka varindzi va yona lava a va tirha hi Savata ni lava a va nga tirhi hi Savata,+ hikuva muprista Yoyada a a nga yi tshunxanga mitlawa+ entirhweni wa yona. 9 Muprista Yoyada a nyika tindhuna ta vanhu va madzana+ matlhari ni switlhangu leswitsongo swa xirhendzevutana, leswi a swi ri swa Hosi Davhida,+ leswi a swi ri endlwini ya Xikwembu xa ntiyiso.+ 10 Hiloko a yimisa vanhu hinkwavo, un’wana ni un’wana a khome tlhari rakwe, ku sukela etlhelweni ra xinene ra yindlu ku ya etlhelweni ra ximatsi ra yindlu, ekusuhi ni altari ni le kusuhi ni yindlu, va sirhelela hosi matlhelo hinkwawo. 11 Kutani va humesa n’wana wa hosi+ va n’wi tlhandleka harhi ya vuhosi ni buku ya Nawu+ kutani va n’wi endla hosi, hiloko Yoyada ni vana vakwe va n’wi chela mafurha. Kutani va ku: “Hosi a yi hanye hilaha ku nga heriki!”+
12 Loko Ataliya a twa swigingi swa vanhu lava tsutsumaka va ri karhi va hoyozela hosi, na yena a nghena hi ku hatlisa eka vanhu lava a va ri endlwini ya Yehovha.+ 13 Hiloko a vona hosi yi yime ekusuhi ni phuphu leyi nga le nyangweni. Tihosana+ ni vachayi va timhalamhala a va yime ekusuhi ni hosi, naswona vanhu hinkwavo va tiko a va tsakile+ va ri karhi va chaya timhalamhala naswona vayimbeleri lava khomeke swichayachayana a va rhangela eku dzuniseni. Kutani Ataliya a handzula swiambalo swakwe, a huwelela a ku: “Vaxengi! Vaxengi!” 14 Kambe muprista Yoyada a humesa tindhuna ta vanhu va madzana leti hlawuriweke ku rhangela enyimpini, a ku eka tona: “N’wi humeseni, loko ku ri ni loyi a yimaka na yena, n’wi dlayeni hi banga!” Hikuva muprista a a te: “Mi nga n’wi dlayeli endlwini ya Yehovha.” 15 Hiloko va n’wi khoma, kutani loko va fika eGedeni ya Tihanci ya yindlu ya hosi, va namba va n’wi dlayela kwalaho.
16 Kutani Yoyada a endla ntwanano exikarhi ka yena ni vanhu hinkwavo ni hosi leswaku va ta tshama va ri vanhu va Yehovha.+ 17 Endzhaku ka sweswo, vanhu hinkwavo va ya endlwini* ya Bali va fika va yi mbundzumuxa+ va tlhela va mbundzumuxa ni tialtari takwe ni swifaniso+ swakwe hinkwaswo, va tlhela va dlaya Matani muprista wa Bali+ emahlweni ka tialtari. 18 Hiloko Yoyada a veka vaprista ni Valevhi leswaku va langutela yindlu ya Yehovha, a va hlawuriwe hi Davhida leswaku va va valanguteri va yindlu ya Yehovha hi ku ya hi mitlawa ya vona, a va endlela Yehovha+ magandzelo yo hisiwa hi ku landza leswi tsariweke eNawini wa Muxe,+ a va swi endla va tsakile va ri karhi va yimbelela hilaha Davhida a va leriseke hakona. 19 U veke ni varindzi va tigede+ etigedeni ta yindlu ya Yehovha leswaku ku nga tshuki ku nghena munhu la nga basangiki. 20 Hiloko a teka tindhuna ta vanhu va madzana,+ varhangeri ni vanhu hinkwavo va tiko leswaku va famba ni hosi loko yi huma endlwini ya Yehovha. Kutani va nghena endlwini ya hosi hi nyangwa ya le henhla, hiloko hosi yi fika yi tshama exitulwini+ xa vuhosi.+ 21 Vanhu hinkwavo etikweni va tsaka hikuva se a ku ri ni ku rhula emutini hikwalaho ka leswi Ataliya a dlayiweke hi banga.