YOXUWA

1 Endzhaku ka loko Muxe nandza wa Yehovha a file, Yehovha a byela Yoxuwa*+ n’wana wa Nuni, loyi a a ri nandza+ wa Muxe a ku: 2 “Muxe nandza wa mina u file.+ Sweswi suka u yima u tsemakanya Yordani, wena ni vanhu lava hinkwavo, mi nghena etikweni leri ndzi va nyikaka rona, vanhu va Israyele.+ 3 Ndhawu yin’wana ni yin’wana leyi mi nga ta hundza eka yona ndzi ta mi nyika yona, hilaha ndzi tshembiseke Muxe hakona.+ 4 Tiko leri ndzi nga ta mi nyika rona ri ta sukela emananga ku ya fika eLebanoni ni ku ya enambyeni lowukulu, nambu wa Yufrata, tiko hinkwaro ra Vaheti+ ni ku ya fika eLwandle Lerikulu* leri nga evupeladyambu.+ 5 A nga kona loyi a nga ta ku tiyela vutomi bya wena hinkwabyo.+ Ndzi ta va na wena hilaha ndzi veke na Muxe hakona.+ A ndzi nge ku tshiki kumbe ku ku fularhela.+ 6 Vana ni xivindzi, u tiya,+ hikuva hi wena u nga ta endla leswaku vanhu lava va dya ndzhaka ya tiko leri ndzi hlambanyeleke vakokwa wa vona ku va nyika rona.+

7 “Ntsena vana ni xivindzi u tiya swinene, u yingisa Nawu hinkwawo lowu Muxe nandza wa mina a ku leriseke wona. U nga hambuki eka wona u ya exineneni kumbe eximatsini,+ leswaku u ta endla swilo hi vutlhari kun’wana ni kun’wana laha u yaka kona.+ 8 Buku leyi ya Nawu a yi fanelanga yi suka enon’wini wa wena+ naswona u fanele u yi hlaya hi rito ra le hansi* vusiku ni nhlikanhi, leswaku u ta landzela hinkwaswo leswi tsariweke eka yona;+ loko u endla tano swi ta ku fambela kahle naswona u ta tlhariha.+ 9 Xana a ndzi ku lerisanga? Vana ni xivindzi, u tiya. U nga chuhi kumbe u chava, hikuva Yehovha Xikwembu xa wena u na wena kun’wana ni kun’wana laha u yaka kona.”+

10 Hiloko Yoxuwa a lerisa tindhuna ta vanhu a ku: 11 “Yanani emixaxeni hinkwayo mi lerisa vanhu mi ku, ‘Tilunghiseleleni swakudya hikuva mi ta pela Yordani endzhaku ka masiku manharhu, mi ya teka tiko leri Yehovha Xikwembu xa n’wina a mi nyikaka rona leswaku ri va ra n’wina.’”+

12 Kutani Yoxuwa a byela va ka Rhuveni, va ka Gadi ni hafu ya nyimba ya Manase a ku: 13 “Tsundzukani leswi Muxe nandza wa Yehovha a mi leriseke swona a ku:+ ‘Yehovha Xikwembu xa n’wina wa mi wisisa naswona u mi nyike tiko leri. 14 Vasati va n’wina, vana va n’wina ni swifuwo swa n’wina swi ta sala etikweni leri Muxe a mi nyikeke rona etlhelweni* leri ra Yordani,+ kambe n’wina hinkwenu tinhenha ta nyimpi+ mi fanele mi pela nambu mi famba ni vamakwenu mi hlomile.+ Mi fanele mi va pfuna 15 ku fikela loko Yehovha a wisisa vamakwenu ku fana na n’wina a mi wisiseke, kutani na vona va teka tiko leri Yehovha Xikwembu xa n’wina a va nyikaka rona. Endzhaku ka sweswo mi nga tlhelela etikweni leri mi nyikiweke ku tshama eka rona ni ku ri teka, tiko leri Muxe nandza wa Yehovha a mi nyikeke rona evuxeni bya Yordani.’”+

16 Va hlamula Yoxuwa va ku: “Hinkwaswo leswi u hi leriseke swona hi ta swi endla naswona hi ta ya kun’wana ni kun’wana laha u nga ta hi rhuma kona.+ 17 Hi ta ku yingisa hilaha hi yingiseke hinkwaswo leswi vuriweke hi Muxe. Onge Yehovha Xikwembu xa wena a nga va na wena hilaha a veke na Muxe hakona.+ 18 Munhu un’wana ni un’wana loyi a xandzukelaka xileriso xa wena naswona a nga yingisi xileriso xin’wana ni xin’wana lexi u n’wi nyikaka xona, u ta dlayiwa.+ Ntsena vana ni xivindzi, u tiya.”+

2 Kutani Yoxuwa n’wana wa Nuni a rhuma vavanuna vambirhi swi nga tiviwi ku suka eXitimi,+ va ri tinhlori. A va byela a ku: “Fambani mi ya kambela tiko, ngopfungopfu muti wa Yeriko.” Hiloko va famba va ya fika endlwini ya wansati la nga nghwavava, vito rakwe a a ri Rahava,+ va fika va tshama kwalaho. 2 Hosi ya le Yeriko yi byeriwa leswi: “Waswivo! Ku ni vavanuna va Vaisrayele lava teke laha madyambu lawa ku ta kambela tiko.” 3 Hiloko hosi ya le Yeriko yi rhumela vanhu eka Rahava yi ku: “Humesa vavanuna lava teke lava tshamaka endlwini ya wena hikuva va tele ku ta kambela tiko hinkwaro.”

4 Kambe Rahava a tumbeta vavanuna volavo vambirhi. Kutani a ku: “Vavanuna va tile eka mina kambe a ndzi nga swi tivi leswaku va huma kwihi. 5 Naswona nimadyambu loko tigede ta muti ti ri kusuhi ni ku pfariwa, vavanuna lavaya va humile. A ndzi swi tivi leswaku va ye kwihi kambe loko mo va sala endzhaku hi ku hatlisa, mi ta va kuma.” 6 (Kambe, a a va tumbete ehansi ka tinhlanga leti a a ti aneke ehenhla ka lwangu.) 7 Hiloko va sala vavanuna volavo hi le ndzhaku, va kongoma enambyeni+ wa Yordani laha a ku nga entanga ngopfu naswona tigede ta muti ti sale ti pfariwa loko vavanuna lava rhumiweke hi hosi va humile.

8 Loko vavanuna lavaya va nga si etlela, Rahava a ya eka vona elwangwini. 9 A fika a ku eka vona: “Ndza swi tiva leswaku Yehovha u ta mi nyika tiko+ leri nileswaku ku ni ku chava lokukulu ehenhla ka hina hikwalaho ka n’wina.+ Vaakatiko hinkwavo va hele matimba hikwalaho ka n’wina,+ 10 hikuva hi twe ndlela leyi Yehovha a omiseke mati ya Lwandle ro Tshwuka ha yona emahlweni ka n’wina loko mi huma eEgipta,+ ni leswi mi swi endleke eka tihosi timbirhi ta Vaamori, Sihoni+ na Ogo,+ leti mi ti loviseke entsungeni* wa Yordani. 11 Loko hi swi twa, hi sungule ku chava naswona a nga kona loyi a nga ni xivindzi hikwalaho ka n’wina, hikuva Yehovha Xikwembu xa n’wina i Xikwembu ematilweni ni le misaveni.+ 12 Sweswi ndzi kombela mi ndzi hlambanyela hi Yehovha, leswaku leswi ndzi mi khomeke hi musa na n’wina mi ta khoma vandyangu wa tatana hi musa; naswona mi fanele mi ndzi nyika xikombiso lexi tshembekaka. 13 Mi fanele mi ponisa tatana na manana, vamakwerhu va xinuna ni va xisati ni maxaka ya vona hinkwawo, mi fanele mi hi ponisa leswaku hi nga fi.”+

14 Hiloko vavanuna lava va ku eka yena: “Swi nga antswa ku fa hina ematshan’weni ya n’wina! Loko wo ka u nga paluxi xihundla xa hina, hi ta ku khoma hi musa hi tlhela hi tshembeka eka wena loko Yehovha a hi nyika tiko leri.” 15 Endzhaku ka sweswo, a va humesa hi ntambhu hi le fasitereni hikuva yindlu yakwe a yi ri ekhumbini ra muti. Entiyisweni, a a tshama hi le khumbini.+ 16 Hiloko a ku eka vona: “Yanani endhawini ya tintshava mi ya tumbela kona masiku manharhu, leswaku lava mi lavaka va nga mi kumi. Loko se va vuyile mi nga muka.”

17 Vavanuna lava va ku eka yena: “Xihlambanyo lexi u hi hlambanyiseke xona xi ta hi boha ntsena+ 18 loko hi vuya hi kuma u bohe ntambhu leyi yo tshwuka efasitereni leri u hi humeseke hi rona. U fanele u vitana tata wa wena, mana wa wena, vamakwenu ni vandyangu wa tata wa wena hinkwavo mi hlengeletana endlwini leyi.+ 19 Loko un’wana o huma endlwini ya wena a ya ehandle, ngati yakwe yi ta va enhlokweni ya yena naswona hina a hi nge vi na nandzu. Kambe loko ko humelela khombo eka un’wana wa lava va nga na wena endlwini, ngati yakwe yi ta va etinhlokweni ta hina. 20 Kambe loko wo paluxa xihundla xa hina,+ hi ta tshunxeka eka xihlambanyo lexi u hi hlambanyiseke xona.” 21 A va hlamula a ku: “A swi endleke hilaha mi vulaka hakona.”

Hiloko a va tshika va famba kutani va khoma ndlela. Endzhaku ka sweswo, a boha ntambhu yo tshwuka efasitereni. 22 Xisweswo va suka va ya endhawini ya tintshava va tshama kwalaho masiku manharhu, kukondza lava a va va lava va vuya. A va hlotana na vona etindleleni hinkwato kambe a va va kumanga. 23 Hiloko vavanuna lava vambirhi va suka endhawini ya tintshava va pela nambu va tlhelela eka Yoxuwa n’wana wa Nuni. Va fika va n’wi rungulela swilo hinkwaswo leswi va humeleleke. 24 Hiloko va byela Yoxuwa va ku: “Yehovha u hi nyike tiko hinkwaro.+ Kahlekahle, vaakatiko hinkwavo va hele matimba hikwalaho ka hina.”+

3 Hiloko Yoxuwa a pfuka nimpundzu swinene, kutani yena ni Vaisrayele hinkwavo va suka eXitimi+ va ya fika eYordani. Va hete vusiku hinkwabyo kwalaho va nga si pela nambu.

2 Endzhaku ka masiku manharhu, tindhuna+ ti ya emixaxeni hinkwayo 3 ti lerisa vanhu ti ku: “Loko mi vona areka ya ntwanano wa Yehovha Xikwembu xa n’wina yi rhwariwe hi vaprista lava nga Valevhi,+ mi fanele mi suka endhawini ya n’wina mi yi landzela. 4 Kambe a ku ve ni mpfhuka wa timitara ta kwalomu ka 890,* exikarhi ka n’wina na yona; mi nga tshineli eka yona, leswaku mi ta tiva ndlela leyi mi nga ta famba ha yona, hikuva a mi si tshama mi famba hi ndlela yoleyo.”

5 Kutani Yoxuwa a byela vanhu a ku: “Tihlawulekiseni+ hikuva mundzuku Yehovha u ta endla swilo swo hlamarisa exikarhi ka n’wina.”+

6 Hiloko Yoxuwa a byela vaprista a ku: “Rhwalani areka+ ya ntwanano mi rhangela vanhu.” Kutani va teka areka ya ntwanano va rhangela vanhu.

7 Kutani Yehovha a byela Yoxuwa a ku: “Namuntlha ndzi ta ku tlakusa ematihlweni ya Vaisrayele hinkwavo,+ leswaku va ta swi tiva leswaku ndzi ta va na wena+ hilaha ndzi veke na Muxe hakona.+ 8 U fanele u lerisa vaprista lava rhwalaka areka ya ntwanano u ku: ‘Loko mi fika laha mati ya nambu wa Yordani ma sungulaka kona, mi fanele mi yima mi nga tsekatseki eYordani.’”+

9 Hiloko Yoxuwa a byela Vaisrayele a ku: “Tanani haleno mi ta twa marito ya Yehovha Xikwembu xa n’wina.” 10 Yoxuwa a tlhela a ku: “Hikwalaho ka leswi, mi ta swi tiva leswaku Xikwembu lexi hanyaka xi le xikarhi ka n’wina+ nileswaku xi ta hlongola Vakanana, Vaheti, Vahivhi, Vaperezi, Vagirgaxa, Vaamori ni Vayebusi+ emahlweni ka n’wina. 11 Vonani! Areka ya ntwanano wa Hosi ya misava hinkwayo yi ta hundza emahlweni ka n’wina yi ya eYordani. 12 Sweswi hlawulani vavanuna va 12 eka tinyimba ta Israyele, wanuna un’we eka nyimba ha yin’we,+ 13 xikan’wekan’we loko mikondzo ya milenge ya vaprista lava rhwaleke Areka ya Yehovha Hosi ya misava hinkwayo yi khumba mati ya Yordani, mati lama khulukaka ku suka ehenhla ka nambu wa Yordani ma ta yima ma fana ni damu.”*+

14 Hikwalaho loko vanhu va suka ematendeni ya vona, va ri kusuhi ni ku pela Yordani, vaprista lava rhwaleke areka+ ya ntwanano va fambe emahlweni ka vanhu. 15 Xikan’wekan’we loko vaprista lava rhwaleke Areka va fika eYordani, va peta milenge ya vona ematini (nambu wa Yordani wu va wu tele ngopfu+ masiku hinkwawo ya nkarhi wa ntshovelo), 16 hiloko mati lawa a ma khuluka ma huma hala henhla ka nambu ma yima. Ma yime ku fana ni damu* le kule ngopfu eAdamu, muti lowu nga etlhelo ka Saretana, kasi mati lama khulukaka ma ya eLwandle ra Araba, Lwandle ra Munyu,* ma omile. Ma khawukile kutani vanhu va tsemakanya va ya etlhelo leri langutaneke na Yeriko. 17 Hi nkarhi wolowo vaprista lava rhwaleke areka ya ntwanano wa Yehovha va ye emahlweni va yima laha ku omeke+ exikarhi ka nambu wa Yordani, Vaisrayele hinkwavo va tsemakanye emisaveni leyi omeke,+ ku fikela loko tiko hinkwaro ri heta ku tsemakanya Yordani.

4 Xikan’wekan’we loko tiko hinkwaro ri hetile ku pela Yordani, Yehovha a byela Yoxuwa a ku: 2 “Hlawula vavanuna va 12 exikarhi ka vanhu, wanuna un’we eka nyimba ha yin’we,+ 3 kutani u va lerisa u ku: ‘Tekani maribye ya 12 exikarhi ka nambu wa Yordani, endhawini leyi vaprista va yimeke eka yona,+ kutani mi famba na wona mi ya ma veka laha mi nga ta etlela kona.’”+

4 Hiloko Yoxuwa a vitana vavanuna va 12 lava a va hlawuleke eka Vaisrayele, wanuna un’we eka nyimba ha yin’we, 5 Yoxuwa a ku eka vona: “Hundzani Areka ya Yehovha Xikwembu xa n’wina mi ya exikarhi ka Yordani, ha un’we wa n’wina u fanele a tlhandleka ribye ekatleni rakwe, hi ku ya hi nhlayo ya tinyimba ta Vaisrayele, 6 leswaku ma va xikombiso exikarhi ka n’wina. Loko vana va n’wina vo mi vutisa enkarhini lowu taka va ku, ‘Maribye lawa mi nga na wona i ya yini?’+ 7 mi fanele mi va byela mi ku: ‘Hikuva mati ya Yordani ma khawukile emahlweni ka areka+ ya ntwanano wa Yehovha. Loko yi pela Yordani, mati ya Yordani ma khawukile. Maribye lawa ma ta va xitsundzuxo eka Vaisrayele hilaha ku nga heriki.’”+

8 Kutani Vaisrayele va endla hilaha Yoxuwa a va leriseke hakona. Va teka maribye ya 12 exikarhi ka Yordani hilaha Yehovha a leriseke Yoxuwa hakona, leswaku ma ringana ni nhlayo ya tinyimba ta Vaisrayele. Va famba na wona laha a va ta etlela kona va fika va ma veka kwalaho.

9 Yoxuwa na yena a veka maribye ya 12 exikarhi ka Yordani laha vaprista lava a va rhwale areka ya ntwanano a va yime kona+ naswona ma ha ri kwalaho ninamuntlha.

10 Vaprista lava rhwaleke Areka va yime exikarhi ka Yordani kukondza ku hetiwa hinkwaswo leswi Yehovha a leriseke Yoxuwa ku swi byela vanhu leswaku va swi endla, hi ku landza hinkwaswo leswi Muxe a swi leriseke Yoxuwa. Hi nkarhi wolowo, vanhu a va ri karhi va tsemakanya. 11 Hi ku hatlisa loko vanhu hinkwavo va hetile ku tsemakanya, Areka ya Yehovha ni vaprista va tsemakanya va ri karhi va langutiwe hi vanhu.+ 12 Kutani va ka Rhuveni, va ka Gadi ni hafu ya nyimba ya Manase, va tsemakanya va lunghekele nyimpi+ emahlweni ka Vaisrayele lavan’wana, hilaha Muxe a va leriseke hakona.+ 13 Masocha ya kwalomu ka 40 000 lama hlomeleke nyimpi, ma hundza emahlweni ka Yehovha ma ya emananga lama nga eYeriko.

14 Hi siku rero Yehovha a tlakusa Yoxuwa ematihlweni ya Vaisrayele+ hinkwavo xisweswo va n’wi xixime* swinene vutomi byakwe hinkwabyo, hilaha a va n’wi xixima hakona Muxe.+

15 Hiloko Yehovha a ku eka Yoxuwa: 16 “Lerisa vaprista lava rhwaleke areka+ ya Vumbhoni leswaku va huma eYordani.” 17 Kutani Yoxuwa a lerisa vaprista a ku: “Humani eYordani.” 18 Loko vaprista lava rhwaleke areka+ ya ntwanano wa Yehovha va huma exikarhi ka Yordani kutani mikondzo ya milenge ya vona yi kandziya laha ku omeke, mati ya Yordani ma tlhela ma sungula ku khuluka ku fana ni le ku sunguleni.+

19 Vanhu va tsemakanye Yordani hi siku ra vukhume ra n’hweti yo sungula, kutani va dzima mixaxa eGiligala+ endzilakaneni wa le vuxeni bya Yeriko.

20 Kutani Yoxuwa a teka maribye ya 12 lawa va nga ma teka eYordani, a ma veka eGiligala.+ 21 Hiloko a byela Vaisrayele a ku: “Loko vana va n’wina va vutisa vatata wa vona enkarhini lowu taka va ku, ‘Xana maribye lawa ma vula yini?’+ 22 mi fanele mi byela vana va n’wina mi ku: ‘Vaisrayele va tsemakanye nambu wa Yordani endhawini leyi omeke+ 23 loko Yehovha Xikwembu xa n’wina a yimise mati ya Yordani emahlweni ka vona ku fikela loko va tsemakanyile, hilaha Yehovha Xikwembu xa n’wina a endleke hakona eLwandle ro Tshwuka loko a ri omisa emahlweni ka hina kukondza hi ri tsemakanya.+ 24 U endle tano leswaku vanhu hinkwavo emisaveni va ta swi tiva leswaku voko ra Yehovha ri ni matimba,+ nileswaku mi ta chava Yehovha Xikwembu xa n’wina mikarhi hinkwayo.’”

5 Xikan’wekan’we loko tihosi hinkwato ta Vaamori,+ leti a ti ri etlhelweni* ra le vupeladyambu bya Yordani ni tihosi hinkwato ta Vakanana+ leti a ti ri ekusuhi ni lwandle, ti twa leswaku Yehovha u yimise mati ya nambu wa Yordani leswaku Vaisrayele va hundza, ti tsemeka nhlana+ lerova ti hela matimba hikwalaho ka Vaisrayele.+

2 Hi nkarhi wolowo Yehovha a byela Yoxuwa a ku: “Endla mikwana hi maribye u tlhela u yimbisa+ vavanuna va Israyele ra vumbirhi.” 3 Hiloko Yoxuwa a endla mikwana hi maribye kutani a yimbisa vavanuna va Israyele eGibeyati-haraloti.*+ 4 Xivangelo lexi endleke Yoxuwa a va yimbisa hi lexi: Vavanuna hinkwavo lava humeke eEgipta, vavanuna hinkwavo va nyimpi, va fele emananga endleleni loko va humile eEgipta.+ 5 Vanhu hinkwavo lava humeke eEgipta a va yimbile, kambe vanhu hinkwavo lava velekeriweke emananga endzhaku ko huma eEgipta a va nga yimbanga. 6 Vaisrayele a va hete malembe ya 40+ va ri karhi va famba emananga ku fikela loko tiko hinkwaro ri file, ku nga vavanuna va nyimpi lava humeke eEgipta lava nga yingisangiki rito ra Yehovha.+ Yehovha a a va hlambanyerile leswaku a nge va pfumeleli va vona tiko+ leri Yehovha a a hlambanyele vakokwa wa vona leswaku u ta hi nyika rona,+ tiko leri khulukaka ntswamba ni vulombe.+ 7 Kutani a hlawula vana va vona ematshan’weni ya vona.+ Vana lava hi vona lava Yoxuwa a va yimbiseke; a va nga yimbanga hikuva a va kalanga va yimbisiwa endleleni.

8 Loko va heta ku yimbisa tiko hinkwaro, a va sukanga laha a va ri kona ku fikela loko va horile.

9 Kutani Yehovha a byela Yoxuwa a ku: “Namuntlha ndzi suse ndzhukano wa Egipta eka n’wina.” Hikwalaho ndhawu yoleyo yi vitaniwa Giligala*+ ku fikela ninamuntlha.

10 Vaisrayele va ya emahlweni va tshama eGiligala, kutani va endla Paseka hi siku ra vu-14 ra n’hweti,+ nimadyambu emananga ya Yeriko. 11 Hiloko va sungula ku dya swakudya leswi va swi tshoveleke etikweni hi siku leri landzeleke Paseka, swinkwa leswi nga riki na comela+ ni mbhacha, hi siku rero. 12 Kutani manna yi hela hi siku leri landzeleke leri va dyeke swakudya leswi va swi tshoveleke etikweni; Vaisrayele+ a va ha tlhelanga va kuma manna, kambe va sungule ku dya leswi va swi tshoveleke etikweni ra Kanana hi lembe rero.+

13 Loko Yoxuwa a ri ekusuhi ni muti wa Yeriko, a tlakusa matihlo kutani a vona munhu+ a yime emahlweni ka yena a khome banga.+ Hiloko Yoxuwa a n’wi tshinelela a fika a n’wi vutisa a ku: “Xana u yima na hina kumbe u yima ni valala va hina?” 14 Yena a ku: “E-e, kambe ndzi tile tanihi hosana ya vuthu ra Yehovha.”+ Kutani Yoxuwa a khinsama a khumba ehansi hi mombo, a ku eka yena: “Xana hosi yanga yi lava ku n’wi byela yini nandza wa yona?” 15 Hosana ya vuthu ra Yehovha yi hlamula Yoxuwa yi ku: “Hluvula maphaxani ya wena hikuva ndhawu leyi u yimeke eka yona ya kwetsima.” Xikan’wekan’we Yoxuwa a endla tano.+

6 Muti wa Yeriko a wu gogiwile hikwalaho ka Vaisrayele; a ku nga ri na munhu loyi a humaka, kumbe loyi a nghenaka.+

2 Kutani Yehovha a byela Yoxuwa a ku: “Waswivo, ndzi nyikete muti wa Yeriko swin’we ni hosi ya wona ni tinhenha ta wona eka wena.+ 3 N’wina vavanuna hinkwenu va nyimpi mi fanele ku rhendzeleka hi muti, mi rhendzeleka hi muti kan’we. Mi fanele mi endla tano ku ringana masiku ya tsevu. 4 A ku ve ni vaprista va nkombo lava nga ta khoma timhondzo ta nkombo ta makhuna va famba emahlweni ka Areka. Kambe hi siku ra vunkombo mi fanele mi rhendzeleka hi muti ka nkombo naswona vaprista va fanele va chaya timhondzo.+ 5 Kutaku loko ku chayiwa rimhondzo ra khuna, hi ku hatlisa loko mi twa mpfumawulo wa rimhondzo, vanhu hinkwavo va fanele va ba hungwe lerikulu ra nyimpi. Kutani khumbi ra muti ri ta wela ehansi+ naswona vanhu va fanele va tlhandluka, un’wana ni un’wana a wu kongoma.”

6 Hiloko Yoxuwa n’wana wa Nuni a vitana vaprista a va byela a ku: “Tlakulani areka ya ntwanano naswona vaprista va nkombo va fanele va khoma timhondzo ta nkombo ta makhuna emahlweni ka Areka ya Yehovha.”+ 7 Kutani a byela vanhu a ku: “Fambani, rhendzelani muti naswona mavuthu lama hlomeke+ ma fanele ma famba emahlweni ka Areka ya Yehovha.” 8 Un’wana ni un’wana u yingise xileriso xa Yoxuwa, vaprista va nkombo lava a va khome timhondzo ta nkombo ta makhuna emahlweni ka Yehovha va rhangile va chaya timhondzo naswona areka ya ntwanano wa Yehovha a yi va landzela. 9 Kutani mavuthu lama hlomeke ma famba emahlweni ka vaprista lava a va chaya timhondzo naswona varindzi a va landzela Areka hi le ndzhaku timhondzo ti ri karhi ti chayiwa.

10 Loko ku ri Yoxuwa a a lerise vanhu a ku: “Mi nga tshuki mi huwelela kumbe mi ba huwa. Ku nga tshuki ku huma rito emilon’wini ya n’wina ku fikela siku leri ndzi nga ta mi byela ndzi ku, ‘Huwelelani!’ Kutani mi ta huwelela.” 11 A lerisa leswaku Areka ya Yehovha yi rhendzeleka hi muti, yi rhendzeleka hi wona kan’we, endzhaku ka sweswo va tlhelela laha a va dzime mixaxa kona va etlela kwalaho.

12 Hi siku leri landzelaka, Yoxuwa a pfuka ka ha ri mixo kutani vaprista va rhwala Areka+ ya Yehovha, 13 vaprista va nkombo lava a va khome timhondzo ta nkombo ta makhuna a va famba emahlweni ka Areka ya Yehovha va ri karhi va chaya timhondzo teto. Mavuthu lama hlomeke a ma famba emahlweni ka vona, kasi varindzi a va landzela Areka ya Yehovha hi le ndzhaku timhondzo ti ri karhi ti chayiwa. 14 Va rhendzeleke hi muti kan’we hi siku ra vumbirhi, endzhaku ka sweswo va tlhelela laha a va dzime mixaxa kona. Va endle tano ku ringana masiku ya tsevu.+

15 Hi siku ra vunkombo va vindzuka, hi ku hatlisa loko vurhonga byi tsuvukile, va rhendzeleka hi muti hi ndlela leyi fanaka ku ringana ka nkombo. Ko va siku rero ntsena va rhendzelekeke hi muti ka nkombo.+ 16 Loko va rhendzeleka ra vunkombo, vaprista va chaya timhondzo, kutani Yoxuwa a byela vanhu a ku: “Huwelelani,+ hikuva Yehovha u mi nyike muti! 17 Muti ni hinkwaswo leswi nga eka wona swi fanele swi lovisiwa;+ hinkwaswo i swa Yehovha. Ku ta pona Rahava+ lowa nghwavava ntsena ni hinkwavo lava nga na yena endlwini, hikuva u fihle vavanuna lava hi va rhumeke.+ 18 Kambe mi nga tshineli eka swilo leswi faneleke swi lovisiwa+ leswaku mi nga naveli swilo leswi faneleke swi lovisiwa kutani mi swi teka,+ mi endla nxaxa wa Israyele wu va nchumu lowu faneleke wu lovisiwa hi ku wu tisela khombo.+ 19 Kambe silivhere hinkwayo ni nsuku ni swilo swa koporo ni nsimbhi swa kwetsima eka Yehovha.+ Swi fanele swi nghenisiwa laha ku hlayisiwaka xuma xa Yehovha.”+

20 Hiloko vanhu va huwelela endzhaku ka loko ku chayiwe timhondzo.+ Hi ku hatlisa loko vanhu va twe mpfumawulo wa rimhondzo naswona va be hungwe lerikulu ra nyimpi, khumbi ri wela ehansi.+ Endzhaku ka sweswo vanhu va tlhandlukela emutini va wu kongoma kutani va teka muti. 21 Va lovisa hinkwaswo leswi a swi ri emutini hi banga, vavanuna ni vavasati, lavatsongo ni lavakulu, nkuzi, nyimpfu ni mbhongolo.+

22 Yoxuwa a byela vavanuna vambirhi lava kambeleke tiko a ku: “Yanani endlwini ya wansati lowa nghwavava, mi ya teka wansati ni hinkwavo lava nga na yena, hilaha mi n’wi hlambanyeleke hakona.”+ 23 Kutani majaha lawa ya tinhlori ma nghena ma humesa Rahava swin’we ni tata wakwe, mana wakwe, vamakwavo ni hinkwavo lava nga va yena; ma humese ndyangu hinkwawo wa yena,+ ma va yisa ehandlenyana ka mixaxa ya Vaisrayele.

24 Hiloko va hisa muti ni hinkwaswo leswi a swi ri eka wona hi ndzilo. Kambe silivhere, nsuku ni swilo swa koporo ni nsimbhi swi vekiwa endlwini ya Yehovha laha ku vekiwaka xuma xa yena.+ 25 I Rahava ntsena lowa nghwavava ni vandyangu wa tata wakwe ni hinkwavo lava a va ri va yena lava Yoxuwa a va siyeke;+ naswona wa ha tshama eIsrayele ku fikela ninamuntlha,+ hikuva u fihle vavanuna lava a va rhumiwe hi Yoxuwa ku ya kambela muti wa Yeriko.+

26 Kutani Yoxuwa a vula xihlambanyo* lexi a ku: “A a rhukaniwe emahlweni ka Yehovha munhu loyi a nga ta pfuxa muti lowu wa Yeriko. U ta feriwa hi n’wana wakwe wa mativula loko a sungula ku aka, u ta tlhela a feriwa hi rikotse rakwe loko a hoxa tinyangwa ta wona.”+

27 Hi ndlela yoleyo Yehovha a va na Yoxuwa+ kutani ndhuma yakwe yi hangalaka emisaveni hinkwayo.+

7 Kambe Vaisrayele a va tshembekanga emhakeni ya swilo leswi a swi fanele swi lovisiwa, hikuva Akani+ n’wana wa Karimi, n’wana wa Zabidi, n’wana wa Zara wa nyimba ya Yuda, u teke swilo leswi a swi fanele swi lovisiwa.+ Hiloko Yehovha a hlundzukela Vaisrayele swinene.+

2 Kutani Yoxuwa a rhuma vavanuna va suka eYeriko va ya emutini wa Ayi,+ lowu nga ekusuhi na Beta-avheni, evuxeni bya Bethele,+ a va byela a ku: “Tlhandlukani mi ya kambela tiko.” Hiloko vavanuna va famba va ya kambela tiko ra Ayi. 3 Loko va tlhelela eka Yoxuwa va ku eka yena: “Ku nga tlhandluki vanhu hinkwavo. Vanhu va kwalomu ka 2 000 kumbe 3 000 ntsena va nga wu hlula muti wa Ayi. Ku nga yi hinkwavo, wisisa van’wana hikuva vanhu va le Ayi a va talanga.”

4 Hiloko ku ya vavanuna va kwalomu ka 3 000, kambe va baleka emahlweni ka vavanuna va le Ayi.+ 5 Vavanuna va le Ayi va dlaya vavanuna va kwalomu ka 36, kutani va va hlongorisa ku suka egedeni ya muti ku ya fika eXebarimi,* va ya emahlweni va va dlaya ku ya fika endhawini leyi rhelelaka. Hiloko xivindzi xa vanhu xi n’oka xi khuluka ku fana ni mati.

6 Kutani Yoxuwa a handzula swiambalo swakwe, a wa, xikandza xakwe xi khumba ehansi emahlweni ka Areka ya Yehovha ku fikela nimadyambu, yena ni vakulukumba va Israyele, va ya emahlweni va tichela misava etinhlokweni. 7 Hiloko Yoxuwa a ku: “Yo, Yehovha Hosi Leyi Tlakukeke, hikwalaho ka yini u perise vanhu lava nambu wa Yordani leswaku u hi nyiketa eka Vaamori va hi lovisa? Loko a hi lo titshamela entsungeni* wa Yordani! 8 Yehovha Xikwembu xanga, ndzi rivalele, ndzi ta ku yini leswi Israyele a balekeke emahlweni ka valala vakwe? 9 Loko Vakanana ni vaaki hinkwavo va tiko va twa mhaka leyi, va ta hi rhendzela va susa vito ra hina emisaveni, xana u ta endla yini hi vito ra wena lerikulu?”+

10 Hiloko Yehovha a hlamula Yoxuwa a ku: “Pfuka! Hikwalaho ka yini u we hi xikandza? 11 Vaisrayele va dyohile. Va tlule ntwanano+ lowu ndzi va leriseke leswaku va nga wu tluli. Va teke swilo swin’wana leswi a swi fanele swi lovisiwile,+ va swi yivile+ va ya swi fihla enhundzwini ya vona.+ 12 Hikwalaho, Vaisrayele a va nge he swi koti ku lwa ni valala va vona. Va ta baleka emahlweni ka valala va vona hikuva va hundzuke nchumu lowu faneleke wu lovisiwa. A ndzi nge he tlheli ndzi va na n’wina handle ka loko mo susa leswi faneleke swi lovisiwa exikarhi ka n’wina.+ 13 Pfuka u basisa vanhu!+ Va byele u ku, ‘Tibasiseleni mundzuku, hikuva Yehovha Xikwembu xa Israyele u ri: “Ku ni nchumu lowu faneleke wu lovisiwa exikarhi ka n’wina, n’wina Vaisrayele. A mi nge swi koti ku hlula valala va n’wina ku fikela loko mi suse nchumu lowu faneleke wu lovisiwa exikarhi ka n’wina. 14 Mi ta hlengeletana nimixo, nyimba hi nyimba, kutani nyimba leyi Yehovha a nga ta yi hlawula+ yi ta tshinela emahlweni ka yena, ndyangu hi ndyangu naswona ndyangu lowu Yehovha a nga ta wu hlawula wu ta tshinela, muti hi muti, muti lowu Yehovha a nga ta wu hlawula wu ta tshinela, munhu hi munhu. 15 Loyi a nga ta kumiwa ni swilo leswi faneleke swi lovisiwa u ta hisiwa hi ndzilo,+ yena ni swilo swa yena hinkwaswo, hikwalaho ka leswi a tluleke ntwanano+ wa Yehovha ni hikwalaho ka leswi a endleke nchumu lowu nyenyetsaka eIsrayele.”’”

16 Kutani Yoxuwa a pfuka nimixo hi siku leri landzelaka, a vitana Vaisrayele hi ku ya hi tinyimba ta vona kutani ku hlawuriwa nyimba ya Yuda. 17 Hiloko a vitana mindyangu ya Yuda kutani ku hlawuriwa ndyangu wa Vazara,+ endzhaku ka sweswo a vitana ndyangu wa Vazara, munhu hi munhu kutani ku hlawuriwa Zabidi. 18 Eku heteleleni a vitana muti wa Zabidi, munhu hi munhu kutani ku hlawuriwa Akani n’wana wa Karimi, n’wana wa Zabidi, n’wana wa Zara, wa nyimba ya Yuda.+ 19 Yoxuwa a ku eka Akani: “N’wananga, ndzi kombela u vangamisa Yehovha Xikwembu xa Israyele hi ku boxa swidyoho swa wena. Ndzi kombela u ndzi byela leswi u nga swi endla. U nga ndzi fihleli nchumu.”

20 Akani a hlamula Yoxuwa a ku: “Ku vula ntiyiso hi mina ndzi dyoheleke Yehovha Xikwembu xa Israyele, leswi ndzi swi endleke hi leswi. 21 Loko ndzi vona xiambalo xo saseka lexi hlawulekeke lexi humaka eXinara+ ni swiphemu* swa silivhere swa 200 ni xitina xa nsuku lexi tikaka 570 wa tigiramu* exikarhi ka swilo leswi phangiweke,* ndzi swi naverile kutani ndzi swi teka. Ndzi swi fihle ehansi ka tende ra mina ni mali ehansi ka swona.”

22 Hi ku hatlisa Yoxuwa a rhuma vanhu va tsutsuma va ya etendeni kutani va kuma xiambalo xi fihliwe kwalaho ni mali ehansi ka xona. 23 Kutani va swi humesa etendeni va swi yisa eka Yoxuwa ni le ka Vaisrayele hinkwavo, ivi va swi veka emahlweni ka Yehovha. 24 Hiloko Yoxuwa ni Vaisrayele hinkwavo va teka Akani+ n’wana wa Zara, silivhere, xiambalo xo hlawuleka ni xitina xa nsuku,+ swin’we ni vana vakwe va majaha ni va vanhwanyana, tinkuzi takwe, timbhongolo takwe, swifuwo swakwe hinkwaswo, tende rakwe ni swilo hinkwaswo leswi a a ri na swona va swi yisa eNkoveni wa Akora.+ 25 Yoxuwa a ku: “Hikwalaho ka yini u hi vangele khombo?+ Yehovha u ta ku tisela khombo namuntlha.” Hiloko Vaisrayele hinkwavo va n’wi khandla hi maribye,+ endzhaku ka sweswo va va hisa hi ndzilo.+ Hi ndlela yoleyo va va khandle hi maribye hinkwavo ka vona. 26 Hiloko va hlengeleta nhulu leyikulu ya maribye ehenhla ka yena, ma ha ri kona ninamuntlha. Kutani vukarhi bya Yehovha byi vohla.+ Hi yona mhaka leyi ndhawu yoleyo yi vitaniwaka Nkova wa Akora* ku ta fikela namuntlha.

8 Hiloko Yehovha a byela Yoxuwa a ku: “U nga chavi kumbe u chuha.+ Teka vavanuna hinkwavo va nyimpi u tlhandluka u ya lwa na Ayi. Waswivo, hosi ya Ayi, vanhu va yona, muti wa yona ni tiko ra yona ndzi swi nyikete eka wena.+ 2 Endla eka Ayi ni hosi ya wona hilaha u endleke hakona eka Yeriko ni hosi ya wona,+ kambe eka Ayi mi nga titekela rifuwo ni swifuwo swa wona. Tumbelelani vanhu va muti endzhaku ka wona.”

3 Kutani Yoxuwa ni vavanuna hinkwavo va nyimpi va tlhandluka va ya lwa na Ayi. Yoxuwa a hlawula vavanuna va 30 000 lava nga tinhenha, a va rhuma nivusiku. 4 A va lerisa a ku: “Yingisani, mi ta tumbelela vanhu va muti endzhaku ka wona. Mi nga yi ekule ni muti naswona hinkwenu mi fanele mi lungheka. 5 Mina ni vanhu hinkwavo lava nga na mina hi ta tshinela ekusuhi ni muti naswona loko va huma va ta lwa na hina ku fana ni le ku sunguleni+ hi ta baleka. 6 Loko va hi hlongorisa, hi ta va wongela ekule ni muti hikuva va ta ku, ‘Va hi baleka ku fana ni le ku sunguleni.’+ Kutani hi ta baleka. 7 Kutani mi fanele mi huma laha mi tumbeleke kona mi teka muti; Yehovha Xikwembu xa n’wina u ta wu nyiketa eka n’wina. 8 Hi ku hatlisa loko se mi teke muti, mi fanele mi wu hisa.+ Mi fanele mi endla hilaha Yehovha a vuleke hakona. Maswivo, se ndzi mi nyikile swiletelo.”

9 Hiloko Yoxuwa a va rhuma kutani va ya laha a va ta tumbela kona; va fika va tumbela exikarhi ka muti wa Bethele ni wa Ayi hi le vupeladyambu bya Ayi, loko ku ri Yoxuwa a a sale ni vanhu lavan’wana vusiku byebyo.

10 Endzhaku ka loko Yoxuwa a pfuke nimixo swinene a hlengeleta vanhu lava hlomeke, yena ni vakulukumba va Israyele va rhangela vanhu volavo va ya eAyi. 11 Vavanuna hinkwavo va nyimpi+ lava a va ri na yena va gwirima va tlhandluka va ya emahlweni ka muti. Va fika va dzima mixaxa en’walungwini wa Ayi laha a ku ri ni nkova exikarhi ka vona ni muti wa Ayi. 12 Hi nkarhi wolowo, a a hlawule vavanuna va kwalomu ka 5 000 a va veka va tumbela+ exikarhi ka muti wa Bethele+ ni wa Ayi ku ya evupeladyambu bya muti. 13 Kutani vanhu lava vumbaka nxaxa lowukulu va ya tshama hi le n’walungwini wa muti+ kasi varindzi va ya tshama hi le vupeladyambu bya muti,+ vusiku byebyo Yoxuwa a ya exikarhi ka nkova.

14 Hi ku hatlisa loko hosi ya Ayi yi vona leswi, yona ni vavanuna va muti va huma nimpundzu swinene va ya lwa ni Vaisrayele endhawini yo karhi leyi langutaneke ni mananga. Kambe a yi nga swi tivi leswaku ku ni vanhu lava yi tumbeleleke endzhaku ka muti. 15 Loko vavanuna va Ayi va sungula ku va hlasela, Yoxuwa ni Vaisrayele hinkwavo va baleka hi ndlela ya le mananga.+ 16 Kutani vanhu hinkwavo lava a va ri emutini va vitaniwa leswaku va va hlongorisa; loko va ri karhi va hlongorisa Yoxuwa va wongeriwe ekule ni muti. 17 A ku nga salanga munhu ni un’we eAyi ni le Bethele la nga humangiki a ya hlongorisa Israyele. Va siye muti wu pfulekile va hlongorisa Israyele.

18 Kutani Yehovha a byela Yoxuwa a ku: “Tlakusa tlhari leri u ri khomeke u kombetela muti wa Ayi,+ hikuva ndzi ta wu nyiketa eka wena.”+ Hiloko Yoxuwa a kombetela muti hi tlhari. 19 Kuteloko a tlakusa voko, vavanuna lava a va tumbelerile va huma hi ku hatlisa laha a va tumbele kona, va tsutsumela emutini va wu teka. Va hatlisa va hisa muti hi ndzilo.+

20 Loko vanhu va le Ayi va hundzuluka, va vona musi emutini wu ri karhi wu tuvika naswona a ku nga ha ri na laha a va ta balekela kona. Hiloko vanhu lava a va balekela emananga va hundzukela lava a va va hlongorisa. 21 Loko Yoxuwa ni Vaisrayele hinkwavo va vona leswaku vanhu lava a va tumberile va teke muti naswona va vona musi wa muti wu ri karhi wu tuvika, va hundzuluka va hlasela vanhu va le Ayi. 22 Kutani vanhu lavan’wana va huma emutini leswaku va ta hlangana na vona, lerova vanhu va le Ayi va tikuma va phasekile exikarhi, Vaisrayele van’wana a va ri etlhelo leri kasi van’wana a va ri etlhelo lerin’wana, va va dlayetela kukondza ku nga sali munhu la poneke kumbe la balekeke.+ 23 Kambe hosi ya Ayi+ va yi khoma ya ha hanya va yi yisa eka Yoxuwa.

24 Endzhaku ka loko Vaisrayele va hete ku dlaya vaaki hinkwavo va Ayi enhoveni, emananga lawa va va hlongoriseleke eka wona, naswona un’wana ni un’wana wa vona a dlayiwe hi banga, Vaisrayele hinkwavo va tlhelela eAyi va dlaya vanhu lava saleke. 25 Hinkwavo lava dlayiweke esikwini rero, ku sukela eka wanuna ku ya eka wansati a va ri 12 000, vanhu hinkwavo va le Ayi. 26 Yoxuwa u ye emahlweni a tlakusa voko rakwe leri a a khome tlhari+ hi rona ku fikela loko a lovise vaaki hinkwavo va le Ayi.+ 27 Kambe Vaisrayele va titekela swifuwo ni rifuwo ra muti wolowo, hilaha Yehovha a a lerise Yoxuwa hakona.+

28 Hiloko Yoxuwa a hisa muti wa Ayi wu sala wu ri rhumbi,+ wa ha ri rhumbi ninamuntlha. 29 A hayeka hosi ya Ayi emhandzini* ku fikela nimadyambu, loko dyambu se ri ya eku peleni, Yoxuwa a lerisa vanhu leswaku va hawula ntsumbu wa yona emhandzini.+ Hiloko va wu lahlela egedeni ya muti va wu funengeta hi nhulu ya maribye, lawa ma ha riki kona ninamuntlha.

30 Lowu hi wona nkarhi lowu Yoxuwa a akeleke Yehovha Xikwembu xa Israyele altari, eNtshaveni ya Ebali,+ 31 hilaha Muxe nandza wa Yehovha a leriseke Vaisrayele hakona ni hi ku landza leswi tsariweke ebukwini ya Nawu+ wa Muxe: “Altari leyi akiweke hi maribye lama nga si tshamaka ma kovotliwa.”+ Va endlela Yehovha magandzelo yo hisiwa ni ya ku kombela ku rhula eka yona.+

32 Kutani a tsala emaribyeni wolawo marito ya Nawu+ lowu Muxe a a wu tsalele Vaisrayele.+ 33 Vaisrayele hinkwavo, vakulukumba va vona, tindhuna ni vaavanyisi va vona a va yime ematlhelo ya Areka emahlweni ka vaprista lava nga Valevhi lava a va rhwale areka ya ntwanano wa Yehovha. Valuveri a va ri kwalaho swin’we ni Vaisrayele.+ Hafu ya vona a va yime emahlweni ka Ntshava ya Gerizimu naswona hafu leyin’wana a yi yime emahlweni ka Ntshava ya Ebali+ (hilaha Muxe nandza wa Yehovha a a lerise hakona),+ leswaku ku ta katekisiwa Vaisrayele. 34 Endzhaku ka sweswo, a hlaya marito hinkwawo ya Nawu+ hi rito leri twalaka, mikateko+ ni mindzhukano,+ hi ku ya hi swilo hinkwaswo leswi tsariweke ebukwini ya Nawu. 35 A ku na rito na rin’we eka marito hinkwawo lawa Muxe a ma leriseke leri Yoxuwa a nga ri hlayangiki emahlweni ka Vaisrayele+ hinkwavo, ku katsa ni vavasati ni vana ni valuveri+ lava a va tshama na vona.+

9 Loko tihosi hinkwato leti a ti ri etlhelweni ra le vupeladyambu bya Yordani+ ti twa leswi humeleleke, leti nga endhawini ya tintshava, eXefela, eribuweni hinkwaro ra Lwandle Lerikulu*+ ni le mahlweni ka Lebanoni, Vaheti, Vaamori, Vakanana, Vaperezi, Vahivhi ni Vayebusi,+ 2 ti hlengeletana leswaku ti ta lwa na Yoxuwa ni Vaisrayele.+

3 Vaaki va le Gibiyoni+ na vona va swi twile leswi Yoxuwa a swi endleke eYeriko+ ni le Ayi.+ 4 Hiloko va luka mano, va teka timbuva va ti chela emasakeni yo hlakala va ma rhwexa timbhongolo ta vona, swin’we ni magula ya khale ya vhinyo lawa a ma boxekile ma tlhela ma rhungeleriwa; 5 va tlhela va ambala maphaxani yo hlakala lama rhungeleriweke naswona a va ambale swiambalo swo hlakala. Xinkwa hinkwaxo lexi a va xi longile a xi omile xi tlhela xi hlanhlekela. 6 Hiloko va ya eka Yoxuwa enxaxeni eGiligala,+ kutani va fika eka yena ni le ka vavanuna va Israyele va ku: “Hi huma etikweni ra le kule swinene. Endlani ntwanano na hina sweswi.” 7 Kambe vavanuna va Israyele va byela Vahivhi+ va ku: “Kumbexana mi tshama ekusuhi na hina. Kutani hi nga wu endla njhani ntwanano na n’wina?”+ 8 Va hlamula Yoxuwa va ku: “Hi malandza* ya n’wina.”

Kutani Yoxuwa a ku: “Hi n’wina vamani naswona mi huma kwihi?” 9 Hiloko va n’wi hlamula va ku: “Malandza ya wena ma huma etikweni ra le kule swinene,+ hi tile hikwalaho ka ku xixima vito ra Yehovha Xikwembu xa wena, hikuva hi yi twile ndhuma ya yena ni hinkwaswo leswi a swi endleke eEgipta+ 10 ni leswi a swi endleke eka tihosi timbirhi ta Vaamori leti a ti ri entsungeni* wa Yordani, Hosi Sihoni+ wa le Hexiboni na Hosi Ogo+ wa le Baxani, loyi a ri eAxitaroti. 11 Hikwalaho vakulukumba va hina ni vaaki hinkwavo va tiko ra hina va hi byele va ku, ‘Tekani timbuva mi famba mi ya hlangana na vona. Mi fika mi ku: “Hi ta va malandza ya n’wina;+ kutani endlani ntwanano na hina.”’+ 12 Xinkwa lexi a xi hisa loko hi suka na xona ekaya, kambe sweswi ma xi vona xi omile naswona xa hlanhleka.+ 13 Magula lawa ya vhinyo a ma ha ri mantshwa loko hi ma chela vhinyo, kambe sweswi se ma boxekile.+ Swiambalo ni maphaxani ya hina se swi hlakarile hikwalaho ko famba mpfhuka wo leha swinene.”

14 Hiloko vavanuna va teka tin’wana ta timbuva ta vona va ti kambisisa, kambe a va n’wi vutisanga Yehovha.+ 15 Kutani Yoxuwa a endla ntwanano wa ku rhula na vona+ wa leswaku a va nge dlayiwi, ni tindhuna ta vanhu ti va hlambanyerile.+

16 Endzhaku ka masiku manharhu, loko se va endle ntwanano na vona, va swi twa leswaku vavanuna lava a va nga tshami ekule. 17 Hiloko Vaisrayele va rhuma vanhu emitini ya vona naswona va fike endzhaku ka masiku manharhu; miti ya vona a ku ri Gibiyoni,+ Kefira, Beroti na Kiriyati-yeyarimi.+ 18 Kambe Vaisrayele a va va hlaselanga, hikuva tindhuna ta vona a ti va hlambanyerile hi Yehovha+ Xikwembu xa Israyele. Kutani vanhu hinkwavo va sungula ku gungulela tindhuna. 19 Hiloko tindhuna hinkwato ti byela vanhu ti ku: “Leswi hi va hlambanyeleke hi Yehovha Xikwembu xa Israyele, a hi pfumeleriwanga ku va vavisa. 20 Hi ta endla hi ndlela leyi: Hi ta va tshika va hanya hikwalaho ka xihlambanyo lexi hi va endleleke xona,+ leswaku Xikwembu xi nga hi hlundzukeli.” 21 Tindhuna ti tlhela ti ku: “Va tshikeni va hanya, kambe va ta va varhoteri va tihunyi ni vaki va mati va vanhu hinkwavo.” Sweswo hi leswi tindhuna ti va tshembiseke swona.

22 Kutani Yoxuwa a va vitana a ku eka vona: “Hikwalaho ka yini mi hi kanganyisile mi ku, ‘Hi huma ekule swinene,’ kasi mi tshama ekusuhi na hina?+ 23 Ku sukela sweswi mi rhukaniwile,+ mi ta tshama mi ri mahlonga, mi ri varhoteri va tihunyi ni vaki va mati ya yindlu ya Xikwembu xa mina.” 24 Va hlamula Yoxuwa va ku: “A ku ri hikwalaho ka leswi malandza ya wena ma byeriweke kahle leswaku Yehovha Xikwembu xa n’wina u lerise Muxe nandza wakwe ku mi nyika tiko hinkwaro ni ku lovisa vaaki hinkwavo va rona.+ Hikwalaho a hi chava leswaku mi ta hi dlaya,+ hi yona mhaka hi endleke leswi.+ 25 Sweswi hi le mavokweni ya n’wina. Endlani xin’wana ni xin’wana lexi mi xi vonaka xi ri xinene hi hina.” 26 U endle hi ndlela yoleyo; u va ponisile emavokweni ya Vaisrayele, a va va dlayanga. 27 Kambe hi siku rero Yoxuwa a va endla varhoteri va tihunyi ni vaki va mati ya ntshungu+ ni ya altari ya Yehovha endhawini leyi A nga ta yi hlawula,+ va ha endla tano ninamuntlha.+

10 Hi ku hatlisa loko Hosi Adoni-zedeki wa Yerusalema a twa leswaku Yoxuwa u teke muti wa Ayi a wu lovisa kutani a endla muti wa Ayi ni hosi ya wona+ leswi a swi endleke emutini wa Yeriko ni hosi ya wona,+ ni ndlela leyi vaaki va le Gibiyoni va endleke ntwanano wa ku rhula ni Vaisrayele+ ha yona naswona va tshama exikarhi ka vona, 2 a chava swinene+ hikuva muti wa Gibiyoni a wu ri wukulu, ku fana ni wun’wana wa miti ya le vuhosini. A wu ri wukulu eka muti wa Ayi+ naswona vavanuna va wona hinkwavo a va ri tinhenha. 3 Hikwalaho Adoni-zedeki hosi ya Yerusalema a rhuma vanhu eka Hohamu hosi ya Hebroni,+ Piramu hosi ya Yaramutu, Yafiya hosi ya Lakixi na Debiri hosi ya Egiloni a ku:+ 4 “Tanani mi ta ndzi pfuna, a hi hlaseleni Vagibiyoni hikuva va endle ntwanano wa ku rhula na Yoxuwa ni Vaisrayele.”+ 5 Hiloko tihosi ta ntlhanu ta Vaamori,+ hosi ya Yerusalema, hosi ya Hebroni, hosi ya Yaramutu, hosi ya Lakixi ni hosi ya Egiloni, ti hlengeletana ni mavuthu ya tona ti gwirima, ti gova ti rhendzela Gibiyoni leswaku ti lwa na wona.

6 Kutani vavanuna va le Gibiyoni va rhumela rito eka Yoxuwa enxaxeni eGiligala+ va ku: “U nga rivali malandza ya wena.+ Tana hi ku hatlisa! Hi lamulele, hi pfune! Tihosi hinkwato ta Vaamori leti humaka endhawini ya tintshava ti hlengeletanile leswaku ti ta lwa na hina.” 7 Hiloko Yoxuwa a suka eGiligala a ri ni vavanuna hinkwavo va nyimpi ni tinhenha ta matimba.+

8 Kutani Yehovha a byela Yoxuwa a ku: “U nga va chavi,+ hikuva ndzi va nyikete eka wena.+ Ku hava ni un’we wa vona loyi a nga ta jamelana na wena.”+ 9 Yoxuwa a fika eka vona hi xitshuketa endzhaku ko famba vusiku hinkwabyo ku suka eGiligala. 10 Yehovha a va pfilunganya emahlweni ka Israyele+ kutani va dlaya vanhu vo tala eGibiyoni, va va hlongorisa hi ndlela leyi khupukaka ya le Beta-horoni, va va dlaya ku ya fika eAzeka ni le Makeda. 11 Loko va ri karhi va balekela Vaisrayele va rhelela eBeta-horoni, Yehovha a va nisela xihangu lexikulu ku ya fika eAzeka, kutani xi va dlaya. Kahlekahle lava dlayiweke hi xihangu a va tele ku tlula lava dlayiweke hi banga ra Vaisrayele.

12 A ku ri hi siku rero leri Yehovha a nyiketeke Vaamori eka Vaisrayele loko Yoxuwa a vulavula na Yehovha emahlweni ka Vaisrayele a ku:

13 Hiloko dyambu ri yima ni n’weti wu yima wu nga fambi kukondza tiko ri tirihisela eka valala va rona. Xana a swi tsariwanga ebukwini ya Yaxara?+ Dyambu ri yima ri nga peli exikarhi ka matilo naswona a ri hatliselanga ku pela kwalomu ka siku hinkwaro. 14 A ku si tshama ku va ni siku leri fanaka ni siku rero, emahlweni ka rona kumbe endzhaku ka rona, laha Yehovha a yingiseke rito ra munhu,+ hikuva Yehovha a a lwela Israyele.+

15 Endzhaku ka sweswo, Yoxuwa ni Vaisrayele hinkwavo va tlhelela enxaxeni eGiligala.+

16 Hi hala tlhelo, tihosi ta ntlhanu ti baleka ti ya tumbela ebakweni eMakeda.+ 17 Kutani Yoxuwa a vikeriwa va ku: “Tihosi ta ntlhanu ti kumiwe ti tumbele ebakweni eMakeda.”+ 18 Hikwalaho Yoxuwa a ku: “Khunguluxelani maribye lamakulu enon’wini wa bako, mi hlawula vavanuna va va rindza. 19 Kambe n’wina van’wana, mi nga yimi. Hlongorisani valala va n’wina, mi va hlasela hi le ndzhaku.+ Mi nga va pfumeleli va nghena emitini ya vona, hikuva Yehovha Xikwembu xa n’wina u va nyikete emavokweni ya n’wina.”

20 Endzhaku ka loko Yoxuwa ni Vaisrayele va dlaye vanhu vo tala swinene, lerova va va heta hinkwavo ku sala ntsena lava balekeke va nghena emitini leyi biyeriweke, 21 vanhu hinkwavo va tlhelela eka Yoxuwa enxaxeni eMakeda va hlayisekile. A nga kona loyi a veke ni xitiyanhlana xo sukela Vaisrayele. 22 Hiloko Yoxuwa a ku: “Susani maribye enon’wini wa bako mi humesa tihosi leta ntlhanu mi ti tisa haleno.” 23 Kutani va n’wi tisela tihosi leta ntlhanu leti va ti humeseke ebakweni: hosi ya Yerusalema, hosi ya Hebroni, hosi ya Yaramutu, hosi ya Lakixi ni hosi ya Egiloni.+ 24 Loko va tise tihosi teto eka Yoxuwa, a vitana vavanuna hinkwavo va Vaisrayele, kutani a byela tindhuna ta vavanuna va nyimpi leti a ti fambe na yena a ku: “Tshinelani. Vekani milenge ya n’wina etinhan’wini ta tihosi leti.” Hiloko va tshinela va veka milenge ya vona etinhan’wini ta tona.+ 25 Kutani Yoxuwa a ku eka vona: “Mi nga chavi kumbe ku chuha.+ Vanani ni xivindzi mi tiya, hikuva Yehovha u ta endla hi ndlela yoleyo eka valala va n’wina hinkwavo lava mi lwaka na vona.”+

26 Endzhaku ka sweswo Yoxuwa a ti tlhava a ti dlaya a ti hayeka etimhandzini* ta ntlhanu naswona ti tshame kwalaho ku fikela nimadyambu. 27 Loko dyambu ri pela, Yoxuwa a lerisa leswaku ti hawuriwa etimhandzini,+ ti lahliwa ebakweni leri a ti tumbele eka rona. Hiloko ku vekiwa maribye lamakulu enon’wini wa bako naswona maribye lawa ma ha ri kona ninamuntlha.

28 Yoxuwa a teka Makeda+ hi siku rero kutani a wu hlasela hi banga. A dlaya hosi ya wona ni vaakatiko va wona hinkwavo, a ku ponanga munhu.+ Hosi ya Makeda+ u yi endle hilaha a endleke hosi ya Yeriko hakona.

29 Ku suka kwalaho Yoxuwa ni Vaisrayele hinkwavo va suka eMakeda va ya eLibna va fika va lwa na Libna.+ 30 Na wona Yehovha u wu nyikete eka Vaisrayele ni hosi ya wona+ kutani va wu hlasela hi banga swin’we ni hinkwavo lava nga eka wona, a va siyanga munhu. Hosi ya muti lowu va yi endle leswi va swi endleke hosi ya Yeriko.+

31 Endzhaku ka sweswo Yoxuwa ni Vaisrayele hinkwavo va suka eLibna va ya eLakixi,+ va fika va dzima nxaxa kutani va lwa ni muti wolowo. 32 Yehovha a nyiketa Lakixi evokweni ra Israyele, va wu teka hi siku ra vumbirhi. Va wu hlasela hi banga swin’we ni hinkwavo lava nga eka wona,+ hilaha va endleke hakona eka Libna.

33 Kutani Horamu hosi ya Gezere+ a ya pfuna Lakixi kambe Yoxuwa a n’wi hlasela, a n’wi dlaya ni vanhu vakwe kukondza va hela hinkwavo.

34 Yoxuwa ni Vaisrayele hinkwavo va suka eLakixi va ya eEgiloni,+ va fika va dzima nxaxa va lwa ni muti wolowo. 35 Va wu teka hi siku rero, va wu hlasela hi banga. Va dlaya vanhu hinkwavo emutini wolowo hi siku rero, hilaha va endleke hakona eka Lakixi.+

36 Hiloko Yoxuwa ni Vaisrayele hinkwavo va suka eEgiloni va ya eHebroni+ va ya lwa na wona. 37 Va wu teka va wu hlasela hi banga, wona, hosi ya wona, swimitana swa wona ni vaakatiko va wona, a va siyanga munhu. Hilaha a endleke hakona eka Egiloni, u wu lovisile swin’we ni vanhu hinkwavo lava nga eka wona.

38 Eku heteleleni Yoxuwa ni Vaisrayele hinkwavo va ya eDebiri+ va ya lwa na wona. 39 A teka wona, hosi ya wona ni swimitana swa wona hinkwaswo, va va hlasela hi banga, va lovisa vanhu hinkwavo lava nga eka wona,+ a va siyanga munhu.+ U lovise muti wa Debiri ni hosi ya wona, hilaha a endleke hakona hi muti wa Hebroni ni wa Libna ni hosi ya wona.

40 Yoxuwa a hlula tiko hinkwaro leri nga endhawini ya tintshava, eNegebu, Xefela+ ni tindhawu leti nga le tlhelo ka tintshava ni tihosi ta kona hinkwato, a nga siyanga munhu; u lovise swilo hinkwaswo leswi hanyaka+ hilaha Yehovha Xikwembu xa Israyele a leriseke hakona.+ 41 Yoxuwa a va hlula ku sukela eKadexi-baniya+ ku ya eGaza,+ ni tiko hinkwaro ra Goxeni+ ni ku ya fika eGibiyoni.+ 42 Yoxuwa a hlula tihosi leti hinkwato ni tiko ra tona hi nkarhi wun’we, hikuva a ku ri Yehovha Xikwembu xa Israyele loyi a a lwela Israyele.+ 43 Hiloko Yoxuwa a tlhelela enxaxeni eGiligala+ ni Vaisrayele hinkwavo.

11 Hi ku hatlisa loko Yabini hosi ya le Hasora a swi twa, a rhumela rito eka Yobabu hosi ya Madoni+ ni le ka hosi ya Ximroni, hosi ya Akixafa,+ 2 tihosi leti a ti ri endhawini ya tintshava ya le n’walungwini, leti a ti ri erivaleni* edzongeni wa Kinereti, leti a ti ri eXefela ni le switsungeni swa Dori+ evupeladyambu, 3 Vakanana+ evuxeni ni le vupeladyambu, Vaamori,+ Vaheti, Vaperezi, Vayebusi endhawini ya tintshava ni Vahivhi+ ehansi ka Herimoni+ etikweni ra Mizpa. 4 Hiloko ti huma ni mavuthu ya tona hinkwawo, vanhu vo tala ku fana ni sava ra lwandle swin’we ni tihanci to tala swinene ni makalichi ya nyimpi. 5 Tihosi leti hinkwato ti twanane ku hlangana kutani ti fika ti dzima mixaxa ematini ya Meromi leswaku ti ta lwa ni Vaisrayele.

6 Hiloko Yehovha a byela Yoxuwa a ku: “U nga ti chavi,+ hikuva mundzuku hi nkarhi lowu, ndzi va nyiketa hinkwavo eka Israyele va file. Mi fanele mi tsema misiha ya milenge ya tihanci ta tona+ makalichi ya tona mi fanele mi ma hisa hi ndzilo.” 7 Yoxuwa ni vavanuna hinkwavo va nyimpi va ti hlasela ti nga swi langutelanga ematini ya Meromi. 8 Yehovha a va nyiketa evokweni ra Israyele,+ va va hlula va tlhela va va hlongorisa ku ya fika eSidoni Lowukulu+ ni le Misirefoto-mayimi+ ni le Nkoveni wa Mizpe evuxeni, va va dlaya hinkwavo kukondza ku nga ha sali munhu.+ 9 Endzhaku ka sweswo Yoxuwa a ti endla hilaha Yehovha a n’wi leriseke hakona; a tsema misiha ya milenge ya tihanci ta tona a tlhela a hisa ni makalichi ya tona hi ndzilo.+

10 Ku tlula kwalaho, Yoxuwa a tlhela a ya teka Hasora a dlaya hosi ya wona hi banga,+ hikuva khale muti wa Hasora a wu lawula mifumo leyin’wana hinkwayo. 11 Va dlaya vanhu hinkwavo lava a va ri eka wona hi banga, va va lovisa.+ A ku na nchumu lexi hefemulaka lexi saleke.+ Kutani a hisa muti wa Hasora hi ndzilo. 12 Yoxuwa a teka miti hinkwayo ya tihosi leti a tlhela a hlula tihosi ta yona hinkwato hi banga.+ A lovisa tihosi teto+ hilaha Muxe nandza wa Yehovha a leriseke hakona. 13 Hambiswiritano, Vaisrayele a va yi hisanga miti leyi a yi akiwe ehenhla ka swintshabyana swa yona handle ka Hasora; hi wona ntsena lowu Yoxuwa a wu hiseke. 14 Vaisrayele va titekele rifuwo hinkwaro ra miti leyi ni swifuwo swa yona.+ Kambe va hlasele munhu un’wana ni un’wana hi banga kukondza va va heta hinkwavo.+ A nga kona ni un’we la hefemulaka loyi va n’wi siyeke.+ 15 Ndlela leyi Yehovha a a lerise nandza wakwe Muxe ha yona, Muxe na yena u lerise Yoxuwa+ hi ndlela yoleyo, kutani Yoxuwa a endla tano. A xi kona na xin’we lexi a xi siyeke eka hinkwaswo leswi Yehovha a swi leriseke Muxe.+

16 Yoxuwa a hlula tiko leri hinkwaro, ndhawu ya tintshava, Negebu+ hinkwaro, tiko hinkwaro ra Goxeni, Xefela,+ Araba+ ni ndhawu ya tintshava ya Israyele ni Xefela* ya yona, 17 ku suka eNtshaveni ya Halaka, leyi tlhandlukelaka eSeyiri ni ku ya fika eBali-gadi+ eNkoveni wa Lebanoni ehansi ka Ntshava ya Herimoni+ a tlhela a khoma tihosi ta yona hinkwato a ti hlula, a ti dlaya. 18 Yoxuwa u hete nkarhi wo leha a ri karhi a lwa ni tihosi leti hinkwato. 19 A ku na muti wun’wana lowu endleke ku rhula ni Vaisrayele handle ka Vahivhi lava tshamaka eGibiyoni.+ Leyin’wana hinkwayo va yi hlule hi nyimpi.+ 20 I Yehovha loyi a tshikeke tihosi teto ti sihalala embilwini+ lerova ti lwa ni Vaisrayele, leswaku a ta ti lovisa ti nga tweriwi vusiwana.+ A ti fanele ti lovisiwa hilaha Yehovha a leriseke Muxe hakona.+

21 Hi nkarhi wolowo Yoxuwa a kukula Vaanaka+ hinkwavo lava a va tshama endhawini ya tintshava, ku suka eHebroni, Debiri, Anabu ni ndhawu hinkwayo ya tintshava ya Yuda ni ndhawu hinkwayo ya tintshava ya Israyele. Yoxuwa u va lovise hinkwavo ni miti ya vona.+ 22 Vaanaka a va nga ha ri kona etikweni ra Vaisrayele; a va sale+ eGaza+ ntsena, eGati+ ni le Axidodo.+ 23 Hiloko Yoxuwa a lawula tiko hinkwaro hilaha Yehovha a a tshembise Muxe+ hakona, Yoxuwa a ri nyika Vaisrayele ri va ndzhaka leswaku va avelana rona hi ku ya hi tinyimba ta vona.+ Kutani tiko ri va ni ku rhula ri nga ha lwi nyimpi.+

12 Hi leti tihosi ta tiko leti Vaisrayele va ti hluleke, leti va tekeke tiko ra tona evuxeni bya Yordani, ku suka eNkoveni wa Arinoni+ ku ya eNtshaveni ya Herimoni+ na Araba hinkwaro ku ya evuxeni:+ 2 Hosi Sihoni+ wa Vaamori, loyi a a tshama eHexiboni, a fuma ku suka eArowere+ lowu a wu ri eribuweni ra Nkova wa Arinoni,+ ni ku suka exikarhi ka nkova ni hafu ya tiko ra Giliyadi ku ya fika eNkoveni wa Yaboko, ndzilakana wa Vaamoni. 3 A a fuma ni le Araba ku ya fika eLwandle ra Kinereti*+ ku ya evuxeni ni ku ya eLwandle ra Araba, Lwandle ra Munyu,* ku ya fika evuxeni etlhelo ra Beta-yeximoto ni ku ya edzongeni laha ku nga ni switsunga swa Pisiga.+

4 Ni tiko ra Hosi Ogo+ wa le Baxani, loyi a ri un’wana wa masalela ya Varefayimi+ naswona a a tshama eAxitaroti ni le Edireyi, 5 loyi a a fuma eNtshaveni ya Herimoni, eSaleka ni le Baxani+ hinkwaro ku ya fika endzilakaneni wa Vagexura ni Vamukati+ ni hafu ya Giliyadi, ku ya fika etikweni ra Hosi Sihoni wa le Hexiboni.+

6 Va hluriwe hi Muxe nandza wa Yehovha ni Vaisrayele,+ endzhaku ka sweswo Muxe nandza wa Yehovha u teke tiko rolero a ri nyika va ka Rhuveni, va ka Gadi ni hafu ya nyimba ya Manase+ leswaku ri va tiko ra vona.

7 Hi leti tihosi ta tiko leti Yoxuwa ni Vaisrayele va ti hluleke evupeladyambu bya Yordani, ku suka eBali-gadi+ eNkoveni wa Lebanoni+ ni ku ya fika eNtshaveni ya Halaka,+ leyi tlhandlukelaka eSeyiri,+ leti Yoxuwa a tekeke tiko ra tona a ri avela tinyimba ta Israyele endzhaku ko ti hlula,+ 8 endhawini ya tintshava, eXefela, eAraba, eswitsungeni, emananga ni le Negebu,+ tiko ra Vaheti, Vaamori,+ Vakanana, Vaperezi, Vahivhi ni Vayebusi:+

13 Yoxuwa se a a dyuharile naswona a a ri ni malembe yo tala.+ Kutani Yehovha a ku eka yena: “Se u dyuharile naswona u ni malembe yo tala; kambe ntirho wo teka tiko wa ha ri wukulu. 2 Hi lawa matiko lama ha saleke:+ swifundzha hinkwaswo swa Vafilista ni swa Vagexura+ 3 (ku suka exiphen’wini xa Nayili* evuxeni bya Egipta ku ya fika endzilakaneni wa Ekroni hi le n’walungwini, laha a ku tiveka tanihi tiko ra Vakanana)+ ku katsa ni swa tihosi ta ntlhanu ta Vafilista,+ Vagaza, Vaaxidodo,+ Vaaxikeloni,+ Vagati+ ni Vaekroni;+ swa Vaavhimi+ 4 ku ya edzongeni; tiko hinkwaro ra Vakanana; tiko ra Miyara, leri nga ra Vasidoni+ ku ya fika eAfeke, ni ku ya fika endzilakaneni wa Vaamori; 5 tiko ra Vagebali+ na Lebanoni hinkwaro hi le vuxeni, ku suka eBali-gadi ehansi ka Ntshava ya Herimoni ku ya fika eLebo-hamati;*+ 6 hinkwavo lava tshamaka endhawini ya tintshava, ku suka eLebanoni+ ku ya eMisirefoto-mayimi;+ ni Vasidoni+ hinkwavo. Ndzi ta va hlongola emahlweni ka Vaisrayele.+ Ntsena u fanele u avela Vaisrayele tiko rolero ri va ndzhaka ya vona hilaha ndzi ku leriseke hakona.+ 7 Sweswi u fanele u ava tiko leri ri va ndzhaka ya tinyimba ta kaye ni hafu ya nyimba ya Manase.”+

8 Hafu leyin’wana ya nyimba ya Manase, va ka Rhuveni ni va ka Gadi va teke ndzhaka ya vona leyi Muxe a va nyikeke yona evuxeni bya Yordani, hilaha Muxe nandza wa Yehovha a va nyikeke hakona:+ 9 ku suka eArowere+ lowu nga eribuweni ra Nkova wa Arinoni,+ ni muti lowu nga exikarhi ka nkova ni tiko hinkwaro leri nga rivala leri nga eMedeba ku ya fika eDiboni; 10 ni miti hinkwayo ya Hosi Sihoni wa Vaamori loyi a a fuma eHexiboni, ku ya fika endzilakaneni wa Vaamoni;+ 11 na Giliyadi ni tiko ra Vagexura ni Vamukati+ ni Ntshava ya Herimoni hinkwayo na Baxani+ hinkwaro ku ya fika eSaleka;+ 12 ndhawu hinkwayo leyi lawuriwaka hi Ogo eBaxani, loyi a a fuma eAxitaroti ni le Edireyi. (A a ri un’wana wa masalela ya Varefayimi.)+ Vona va hluriwe hi Muxe a tlhela a va hlongola.+ 13 Kambe Vaisrayele a va va hlongolanga+ Vagexura ni Vamukati, hikuva Gexura na Makati va ha tshama ni Vaisrayele ku fikela ninamuntlha.

14 I nyimba ya Valevhi ntsena leyi a nga yi nyikangiki ndzhaka.+ Magandzelo lama endliwaka hi ndzilo eka Yehovha Xikwembu xa Israyele i ndzhaka ya vona,+ hilaha a va tshembiseke hakona.+

15 Kutani Muxe a nyika nyimba ya vana va Rhuveni ndzhaka hi ku ya hi mindyangu ya vona, 16 tiko ra vona a ri sukela eArowere, lowu nga eribuweni ra Nkova wa Arinoni ni muti lowu nga exikarhi ka nkova, ni tiko hinkwaro leri nga rivala eMedeba; 17 Hexiboni ni swimitana swa wona+ hinkwaswo leswi nga etikweni leri nga rivala, Diboni, Bamoti-bali, Beta-bali-meyoni,+ 18 Yahasa,+ Kedemoti,+ Mefati,+ 19 Kiriyatayimi, Sibma+ na Sereta-xahara leyi nga erivaleni leri nga ehansi ka ntshava, 20 Beta-peyori, switsunga swa Pisiga,+ Beta-yeximoto,+ 21 miti hinkwayo leyi nga endhawini leyi nga rivala ni tiko hinkwaro leri lawuriwaka hi Hosi Sihoni wa Vaamori, loyi a a fuma eHexiboni.+ Muxe u n’wi hlurile+ a hlula ni tindhuna ta Vamidiyani, ku nga Evhi, Rekemu, Suru, Huru, Reba,+ leti a ku ri tindhuna* ta Sihoni leti a ti tshama etikweni. 22 Balama+ n’wana wa Beyori, lowa mungoma+ hi un’wana wa lava dlayiweke hi Vaisrayele hi banga swin’we ni lavan’wana hinkwavo lava dlayiweke. 23 Nambu wa Yordani a wu ri ndzilakana wa va ka Rhuveni; naswona tiko leri a ri ri ndzhaka ya va ka Rhuveni hi ku ya hi mindyangu ya vona, ni miti ni swimitana swa vona laha a va tshama kona.

24 Ku tlula kwalaho, Muxe a nyika nyimba ya Gadi ndzhaka, va ka Gadi hi ku ya hi mindyangu ya vona, 25 ndhawu ya vona a yi katsa Yazere+ ni miti hinkwayo ya Giliyadi ni hafu ya tiko ra Vaamoni+ ku ya fika eArowere, lowu langutaneke na Rhaba;+ 26 ni ku suka eHexiboni+ ku ya eRamati-mispa na Bethonimi ni ku suka eMahanayimi+ ku ya endzilakaneni wa Debiri; 27 ni le nkoveni wa Beta-harama, Beta-nimura,+ Sukoti+ na Safoni, tiko hinkwaro leri lawuriwaka hi Hosi Sihoni wa Hexiboni,+ ndzilakana wa kona ku ri Yordani ku sukela emakumu ya Lwandle ra Kinereti*+ hi le vuxeni bya Yordani. 28 Leyi a ku ri ndzhaka ya va ka Gadi hi ku ya hi mindyangu ya vona, ni miti ni swimitana swa vona laha a va tshama kona.

29 Ku tlula kwalaho, Muxe a nyika hafu ya nyimba ya Manase ndzhaka, eka hafu ya nyimba ya Manase hi ku ya hi mindyangu ya vona.+ 30 Ndhawu ya vona a yi sukela eMahanayimi+ ku ya emutini hinkwawo wa Baxani, ni tiko hinkwaro leri a ri fumiwa hi Hosi Ogo wa Baxani, ni swimitana hinkwaswo swa matende swa Yayiri+ eBaxani, miti ya 60. 31 Kutani hafu ya Giliyadi na Axitaroti na Edireyi,+ miti leyi a yi fumiwa hi Ogo eBaxani yi nyikiwe vana va Makiri+ n’wana wa Manase, hafu ya vana va Makiri hi ku ya hi mindyangu ya vona.

32 Leyi i ndzhaka leyi Muxe a va aveleke yona emananga ya Mowabu entsungeni wa Yordani hi le vuxeni bya Yeriko.+

33 Kambe Muxe a nga yi nyikanga nyimba ya Valevhi ndzhaka.+ Yehovha Xikwembu xa Israyele i ndzhaka ya vona, hilaha a va tshembiseke hakona.+

14 Leyi i ndzhaka leyi Vaisrayele va averiweke yona etikweni ra Kanana, leyi muprista Eliyazara na Yoxuwa n’wana wa Nuni ni varhangeri va tinyimba ta Israyele va va aveleke yona.+ 2 Ndzhaka ya vona va averiwe yona hi ku tirhisa vuhlolotwana,*+ hilaha Yehovha a leriseke Muxe hakona eka tinyimba ta kaye ni hafu.+ 3 Muxe u avele tinyimba letin’wana timbirhi ni hafu ndzhaka ya tona entsungeni* wa Yordani,+ kambe Valevhi a nga va nyikanga ndzhaka.+ 4 Vana va Yosefa a va tekiwa va ri tinyimba timbirhi,+ Manase na Efrayimi;+ kambe Valevhi a va averiwanga tiko, handle ka miti+ yo tshama eka yona ni madyelo ya yona ni nhundzu ya vona.+ 5 Kutani Vaisrayele va ava tiko hilaha Yehovha a leriseke Muxe hakona.

6 Hiloko vavanuna van’wana va ka Yuda va ya eka Yoxuwa eGiligala,+ kutani Kalebe+ n’wana wa Yefune loyi a nga Mukenizi a ku eka yena: “U swi tiva kahle leswi Yehovha a swi byeleke+ Muxe nandza wa Xikwembu xa ntiyiso+ hi mina na wena eKadexi-baniya.+ 7 A ndzi ri ni malembe ya 40 loko Muxe nandza wa Yehovha a ndzi rhuma ndzi suka eKadexi-baniya ndzi ya kambela tiko+ naswona ndzi vuye ni xiviko lexinene.+ 8 Hambileswi vamakwerhu lava ndzi fambeke na vona va heteke vanhu matimba, mina ndzi landzele Yehovha Xikwembu xa mina hi mbilu hinkwayo.+ 9 Muxe u hlambanyile hi siku rero a ku: ‘Tiko leri u fambeke eka rona ri ta va ndzhaka ya wena ni vana va wena hilaha ku nga heriki, hikuva u landzele Yehovha Xikwembu xa mina hi mbilu hinkwayo.’+ 10 Hilaha a tshembiseke hakona,+ Yehovha u ndzi hlayisile ndzi hanya+ malembe lawa ya 45 ku sukela loko Yehovha a endle xitshembiso lexi eka Muxe loko Vaisrayele va ri emananga;+ ndza ha hanya ninamuntlha naswona se ndzi ni malembe ya 85. 11 Ninamuntlha ndza ha ri ni matimba ku fana ni siku leri Muxe a ndzi rhumeke ha rona. Matimba ya mina lawa a ndzi ri na wona enkarhini wolowo, ndza ha ri na wona ni sweswi leswaku ndzi lwa nyimpi ni ku endla mitirho yin’wana. 12 Hikwalaho, ndzi nyike ndhawu leyi ya tintshava leyi Yehovha a ndzi tshembiseke yona hi siku rero. Hambileswi hi siku rero u swi tweke leswaku ku ni Vaanaka+ kwalaho lava nga ni miti leyikulu leyi biyeleriweke,+ ndza tshemba leswaku Yehovha u ta va na mina+ ndzi ta va hlongola, hilaha Yehovha a tshembiseke hakona.”+

13 Hiloko Yoxuwa a katekisa Kalebe n’wana wa Yefune kutani a n’wi nyika muti wa Hebroni leswaku wu va ndzhaka yakwe.+ 14 Hi yona mhaka Hebroni wu ri ndzhaka ya Kalebe n’wana wa Yefune loyi a nga Mukenizi ku fikela ninamuntlha, hikwalaho ka leswi a yingiseke Yehovha Xikwembu xa Israyele hi mbilu hinkwayo.+ 15 Eku sunguleni muti wa Hebroni a wu vitaniwa Kiriyati-araba+ (Araba a a ri nhenha ya Vaanaka). Kutani tiko ri va ni ku rhula ri nga ha lwi nyimpi.+

15 Tiko leri averiweke nyimba ya Yuda hi ku ya hi mindyangu ya vona hi ku tirhisa vuhlolotwana*+ a ri fika endzilakanini wa Edomu,+ emananga ya Zini, ku ya eNegebu emakumu ka yona hi le dzongeni. 2 Ndzilakana wa rona wa le dzongeni a wu sukela eLwandle ra Munyu,*+ eka xiyenge lexi languteke etlhelo ra le dzongeni. 3 Kutani wu hundza wu ya etlhelo ra le dzongeni exitsungeni xa Akrabimi,+ wu hundzela ni le Zini, wu famba ku suka edzongeni wu ya eKadexi-baniya+ ku ya fika eHezroni ni le Adara wu ya ni le Karika. 4 Wu hundza wu ya fika ni le Azimoni+ ni le Nkoveni wa Egipta+ naswona a wu helela eLwandle.* Lowu a ku ri ndzilakana wa vona wa le dzongeni.

5 Ndzilakana wa le vuxeni a ku ri Lwandle ra Munyu* ku ya fika emakumu ka nambu wa Yordani naswona ndzilakana lowu nga en’walungwini a wu sukela elwandle, laha nambu wa Yordani wu helelaka kona.+ 6 Ndzilakana a wu ya ni le Beta-hogila+ wu hundza hi le n’walungwini wa Beta-araba+ naswona a wu hundza hi le ribyeni ra Bohani+ n’wana wa Rhuveni. 7 Ndzilakana a wu ya ni le Debiri eNkoveni wa Akora+ kutani wu jikela en’walungwini wu ya eGiligala,+ lowu nga emahlweni ka switsunga swa Adumimi, ku nga edzongeni wa nkova, wu tlhela wu hundzela ematini ya Eni-xemexi,+ wu helela eEni-rogele.+ 8 Ndzilakana a wu hundzela ni le Nkoveni wa N’wana wa Hinomu,+ eswitsungeni swa Vayebusi+ hi le dzongeni, eYerusalema,+ wu tlhela wu ya ehenhla ka ntshava leyi langutaneke ni Nkova wa Hinomu hi le vupeladyambu, lowu nga le makumu ka Nkova wa Refayimi en’walungwini. 9 Ndzilakana lowu a wu funghiwile ku suka ehenhla ka ntshava ku ya exihlobyeni xa Nefitowa,+ wu ya fika emitini ya Ntshava ya Efroni; naswona a wu funghiwe ku ya fika ni le Bala, ku nga Kiriyati-yeyarimi.+ 10 Ndzilakana a wu hundza eBala wu ya eNtshaveni ya Seyiri evupeladyambu kutani wu hundzela exitsungeni xa Ntshava ya Yeyarimi hi le n’walungwini, ku nga Kesaloni, wu tlhela wu ya eBeta-xemexe+ wu tlulela ni le Timna.+ 11 Ndzilakana a wu hundzela ni le xitsungeni xa Ekroni+ en’walungwini naswona a wu funghiwile ku ya fika eXikeroni kutani wu hundza wu ya eNtshaveni ya Bala ni le Yabinele naswona a wu helela elwandle.

12 Ndzilakana wa le vupeladyambu a wu ri eLwandle Lerikulu.*+ Lowu a wu ri ndzilakana wa vana va Yuda hi ku ya hi mindyangu ya vona hi matlhelo hinkwawo.

13 Yoxuwa a avela Kalebe+ n’wana wa Yefune ndhawu exikarhi ka vana va Yuda hilaha Yehovha a leriseke Yoxuwa hakona, ku nga muti wa Kiriyati-araba (Araba a a ri tata wa Anaka), ku nga Hebroni.+ 14 Hiloko Kalebe a hlongola vana vanharhu va Anaka kwalaho:+ Sexayi, Ahimani na Talimayi+ rixaka ra Anaka. 15 Ku suka kwalaho u ye a ya hlasela vaaki va Debiri.+ (Vito ra khale ra Debiri a ku ri Kiriyati-sefere.) 16 Kutani Kalebe a ku: “Wanuna loyi a nga ta hlasela muti wa Kiriyati-sefere a wu hlula, ndzi ta n’wi nyika Akisa n’wana wa mina a va nsati wakwe.” 17 Kutani Otiniyele+ n’wana wa Kenazi,+ makwavo wa Kalebe a hlula muti wolowo. Hiloko Kalebe a n’wi nyika Akisa+ n’wana wakwe a va nsati wakwe. 18 Loko Akisa a ri karhi a muka, u byele Otiniyele leswaku a kombela nsimu eka Kalebe tata wakwe. Hiloko Akisa a chika embhongolweni yakwe.* Kalebe a n’wi vutisa a ku: “U lava yini?”+ 19 Akisa a ku: “Ndzi kombela u ndzi nyika nyiko, hikuva u ndzi nyike ndhawu ya le dzongeni;* ndzi nyike na Guloti-mayima.”* Hiloko a n’wi nyika Guloti ya le Henhla ni Guloti ya le Hansi.

20 Leyi a ku ri ndzhaka ya nyimba ya Yuda hi ku ya hi mindyangu ya vona.

21 Miti leyi nga edzongeni ya nyimba ya Yuda ku ya fika endzilakaneni wa Edomu+ a ku ri: Kabizele, Edere, Yaguru, 22 Kina, Demona, Adada, 23 Kedexi, Hasora, Itanana, 24 Sifi, Teleme, Beyaloto, 25 Hasora-hadata na Keriyoti-hezironi, ku nga Hasora, 26 Amamu, Xema, Mulada,+ 27 Hasara-gada, Heximoni, Beta-pelete,+ 28 Hasara-xuwala, Bera-xeba,+ Biziyotiya, 29 Bala, Ima, Esemu, 30 Elitolada, Kesili, Horma,+ 31 Sikilaga,+ Madimana, Sanisana, 32 Lebawoto, Xilihimi, Ayini na Rimoni;+ miti hinkwayo a yi ri 29, ku katsa ni swimitana swa yona.

33 EXefela+ a ku ri na: Exitawoli, Sora,+ Axina, 34 Zanowa, Eni-ganimu, Tapuwa, Enamu, 35 Yaramutu, Adulamu,+ Sokho, Azeka,+ 36 Xarayimi,+ Aditayimi na Gedera na Gederotayimi,* miti ya 14 ni swimitana swa yona.

37 Senana, Hadaxa, Migdali-gadi, 38 Dileyani, Mizpe, Yokitele, 39 Lakixi,+ Bosikata, Egiloni, 40 Kaboni, Lahimasi, Kitilixi, 41 Gederoti, Beta-dagoni, Nayama na Makeda,+ miti ya 16 ni swimitana swa yona.

42 Libna,+ Etere, Axani,+ 43 Ifuta, Axina, Nezibi, 44 Keyila, Akizibi na Marixa, miti ya kaye ni swimitana swa yona.

45 Ekroni ni miti leyi nga ekusuhi ni swimitana swa yona; 46 ku sukela evupeladyambu bya Ekroni ni tindhawu hinkwato leti nga etlhelo ka muti wa Axidodo ni swimitana swa wona.

47 Axidodo+ ni miti leyi nga ekusuhi ni swimitana swa wona; Gaza+ ni miti leyi nga ekusuhi ni swimitana swa wona, ku ya fika eNkoveni wa Egipta ni le Lwandle Lerikulu* ni xifundzha lexi nga ekusuhi.+

48 Endhawini ya tintshava, Xamiri, Yatiri,+ Sokho, 49 Dana, Kiriyati-sana, ku nga Debiri, 50 Anabu, Exitemo,+ Animi, 51 Goxeni,+ Holoni na Gilo,+ miti ya 11 ni swimitana swa yona.

52 Arabiya, Duma, Exa, 53 Yanimi, Beta-tapuwa, Afeka, 54 Humuta, Kiriyati-araba, ku nga Hebroni+ na Siyori, miti ya kaye ni swimitana swa yona.

55 Mawoni,+ Karimeli, Sifi,+ Yuta, 56 Yizriyele, Yokidiyama, Zanowa, 57 Kayina, Gibiya na Timna,+ miti ya khume ni swimitana swa yona.

58 Halahulu, Beta-suru, Gedori, 59 Marati, Beta-anoto na Elitekoni, miti ya tsevu ni swimitana swa yona.

60 Kiriyati-bali, ku nga Kiriyati-yeyarimi+ na Rhaba, miti yimbirhi ni swimitana swa yona.

61 Emananga, Beta-araba,+ Midini, Sikaka, 62 Nibixani, Muti wa Munyu na Eni-gedi,+ miti ya tsevu ni swimitana swa yona.

63 Loko ku ri Vayebusi,+ lava a va tshama eYerusalema,+ vavanuna va Yuda a va swi kotanga ku va hlongola,+ kutani Vayebusi va ya emahlweni va tshama ni vanhu va Yuda eYerusalema ku ta fikela namuntlha.

16 Tiko leri averiweke vana va Yosefa+ hi vuhlolotwana*+ a ri sukela eYordani eYeriko ku ya ematini lama nga evuxeni bya Yeriko, ri hundza hi le mananga ri tlhandluka ku suka eYeriko ri ya endhawini ya tintshava ya Bethele.+ 2 A ri suka eBethele lowu nga ekusuhi na Luzi ri ya fika endzilakaneni wa Vaariki eAtaroti, 3 ri ehla ri ya evupeladyambu ku ya fika endzilakaneni wa Vayafele ni ku ya fika endzilakaneni wa Beta-horoni+ wa le Hansi na Gezere+ kutani ri helela elwandle.

4 Hiloko mindyangu ya Manase na Efrayimi, ku nga vana va Yosefa,+ yi teka tiko leri yi averiweke rona.+ 5 Hi lowu ndzilakana wa vana va Efrayimi hi ku ya hi mindyangu ya vona: Muti wa Ataroti-ada+ a wu ri ndzilakana wa vona evuxeni ku ya fika eBeta-horoni wa le Henhla,+ 6 ndzilakana a wu fika elwandle. Muti wa Mikimetati+ a wu ri en’walungwini naswona ndzilakana a wu jikela evuxeni wu ya eTanata-xilo wu hundza wu ya evuxeni eYanowa. 7 Kutani wu suka eYanowa wu ya eAtaroti na le Nara naswona wu fika ni le Yeriko,+ wu hundzela eYordani. 8 Ku suka eTapuwa+ ndzilakana a wu ya evupeladyambu bya Nkova wa Kana kutani wu helela elwandle.+ Leyi i ndzhaka ya nyimba ya vana va Efrayimi hi ku ya hi mindyangu ya vona; 9 vatukulu va Efrayimi a va ri ni miti yin’wana exikarhi ka ndzhaka ya Manase,+ miti hinkwayo ni swimitana swa yona.

10 Kambe a va va hlongolanga Vakanana lava a va tshama eGezere+ naswona Vakanana va ha tshama exikarhi ka va ka Efrayimi ku fikela namuntlha,+ va hundzuriwe mahlonga.+

17 Kutani nyimba ya Manase+ yi averiwa tiko hi vuhlolotwana*+ hikuva a a ri mativula ya Yosefa.+ Leswi Makiri,+ mativula ya Manase, tata wa Giliyadi a a ri nhenha ya nyimpi, u nyikiwe Giliyadi na Baxani.+ 2 Vana lavan’wana va Manase va averiwa tiko hi vuhlolotwana* hi ku ya hi mindyangu ya vona, vana va Abi-ezere,+ vana va Heleke, vana va Asiriyele, vana va Xikeme, vana va Hefere ni vana va Xemida. Lava a ku ri vana va Manase n’wana wa Yosefa, vaxinuna hi ku ya hi mindyangu ya vona.+ 3 Kambe Selofehada+ n’wana wa Hefere, n’wana wa Giliyadi, n’wana wa Makiri, n’wana wa Manase, a a nga ri na vana va majaha, a a ri ni vana va vanhwanyana ntsena, mavito ya vona hi lawa: Mahela, Nowa, Hogila, Milka na Tirisa. 4 Hiloko va ya eka muprista Eliyazara,+ Yoxuwa n’wana wa Nuni ni tindhuna va ku: “Yehovha hi yena a leriseke Muxe leswaku a hi nyika ndzhaka exikarhi ka vamakwerhu.”+ Kutani a va nyika ndzhaka exikarhi ka vamakwavo va tata wa vona, hilaha Yehovha a n’wi leriseke hakona.+

5 A ku ri ni swiphemu swa khume swa tiko leswi weleke eka Manase handle ka tiko ra Giliyadi na Baxani, lawa a ma ri entsungeni* wa Yordani,+ 6 hikuva vana va vanhwanyana va Manase va nyikiwe ndzhaka swin’we ni vana vakwe va majaha naswona tiko ra Giliyadi ri nyikiwe vana lavan’wana va Manase.

7 Ndzilakana wa Manase a wu sukela eAxere wu ya fika eMikimetati,+ leyi nga ekusuhi na Xikeme+ naswona a wu famba wu ya fika edzongeni* etikweni ra vaaki va le Eni-Tapuwa. 8 Tiko ra Tapuwa+ ri ve ra Manase kambe tiko ra Tapuwa leri nga endzilakaneni wa Manase a ri ri ra vana va Efrayimi. 9 Ndzilakana a wu rhelela wu ya fika eNkoveni wa Kana, edzongeni wa nkova. A ku ri ni miti ya Efrayimi exikarhi ka miti ya Manase+ naswona ndzilakana wa Manase a wu ri en’walungwini wa nkova kutani wu helela elwandle.+ 10 Tlhelo ra le dzongeni a ku ri ra Efrayimi, ra le n’walungwini a ku ri ra Manase, lwandle a ri ri ndzilakana wa yena,+ en’walungwini va* fike eka Axere naswona evuxeni eka Isakara.

11 Etikweni ra Isakara na Axere, Manase u nyikiwe Beta-xeyani ni miti leyi nga ekusuhi, Ibileyamu+ ni miti leyi nga ekusuhi, vaaki va Dori+ ni miti leyi nga ekusuhi, vaaki va Eni-dori+ ni miti leyi nga ekusuhi, vaaki va Tanaka+ ni miti leyi nga ekusuhi ni vaaki va Megido ni miti leyi nga ekusuhi, tindhawu tinharhu leti tlakukeke.

12 Kambe vana va Manase a va swi kotanga ku teka miti leyi; Vakanana va ye emahlweni va tshama etikweni leri.+ 13 Loko Vaisrayele va va ni matimba, va hundzule Vakanana mahlonga,+ kambe a va va hlongolanga hi ku helela.+

14 Vatukulu va Yosefa va vutisa Yoxuwa va ku: “Hikwalaho ka yini u hi* avele tiko leritsongo hi vuhlolotwana?*+ Hina hi tele swinene hikuva Yehovha u hi katekisile ku fikela sweswi.”+ 15 Hiloko Yoxuwa a va hlamula a ku: “Loko mi tele swinene, fambani ekhwatini mi ya titsemela ndhawu etikweni ra Vaperezi+ ni Varefayimi,+ leswi ndhawu ya tintshava ya Efrayimi+ yi nga yitsongo swinene eka n’wina.” 16 Hiloko vatukulu va Yosefa va ku: “Ndhawu ya tintshava a yi hi ringani naswona Vakanana hinkwavo lava tshamaka etikweni ra le nkoveni va ni makalichi+ ya nyimpi lama nga ni swo tsema swa nsimbhi,* lava tshamaka eBeta-xeyani+ ni le swimitanini leswi nga ekusuhi ni lava tshamaka eNkoveni wa Yizriyele.”+ 17 Kutani Yoxuwa a byela va ka Efrayimi na Manase, lava nga va nyimba ya Yosefa a ku: “Mi tele swinene naswona mi ni matimba swinene. A mi nge averiwi ndhawu leyitsongo,*+ 18 kambe ni ndhawu ya tintshava yi ta va ya n’wina.+ Hambileswi ndhawu yoleyo yi nga khwati, mi ta yi tshetsha kutani yi ta va ndzilakana wa tiko ra n’wina. Hikuva mi ta hlongola Vakanana, hambileswi va nga ni matimba naswona va nga ni makalichi ya nyimpi lama nga ni swo tsema swa nsimbhi.”*+

18 Kutani ntshungu hinkwawo wa Vaisrayele wu hlengeletana eXilo,+ wu dzima tende ra nhlengeletano kwalaho,+ hikuva tiko se a va ri tekile.+ 2 Kambe a ka ha sale tinyimba ta nkombo ta Vaisrayele leti a ti nga si averiwa ndzhaka. 3 Hiloko Yoxuwa a vutisa Vaisrayele a ku: “Xana mi ta hlwela ku fikela rini ku teka tiko leri Yehovha Xikwembu xa vakokwa wa n’wina a mi nyikeke rona?+ 4 Ndzi hlawuleleni vavanuna vanharhu eka nyimba yin’wana ni yin’wana leswaku ndzi ta va rhuma; va fanele va rhendzeleka etikweni va ri pima hi ku ya hi ndzhaka ya vona. Loko va hetile va fanele va vuya eka mina. 5 Va fanele va avelana rona ri va swiphemu swa nkombo.+ Va ka Yuda va ta tshama endhawini ya vona edzongeni,+ kasi va ka Yosefa vona va ta tshama endhawini ya vona en’walungwini.+ 6 Loko ku ri n’wina, fambani mi ya pima tiko ri va swiphemu swa nkombo, mi vuya na swona eka mina, kutani mina ndzi ta mi hoxela vuhlolotwana*+ emahlweni ka Yehovha Xikwembu xa hina. 7 Kambe Valevhi a va nge nyikiwi tiko exikarhi ka n’wina,+ hikuva vuprista bya Yehovha i ndzhaka ya vona;+ loko ku ri va ka Gadi, va ka Rhuveni ni hafu ya nyimba ya Manase+ se va yi tekile ndzhaka ya vona evuxeni bya nambu wa Yordani, leyi va nyikiweke yona hi Muxe nandza wa Yehovha.”

8 Hiloko vavanuna va lunghekela ku famba, kutani Yoxuwa a lerisa lava a va ya pima tiko a ku: “Yanani etikweni mi rhendzeleka na rona hinkwaro, mi ri pima, ivi mi vuya eka mina, kutani ndzi ta mi hoxela vuhlolotwana* emahlweni ka Yehovha eXilo.”+ 9 Endzhaku ka sweswo vavanuna volavo va famba va rhendzeleka ni tiko hinkwaro, va ri pima hi ku ya hi miti ri va swiphemu swa nkombo kutani va swi tsala ebukwini. Loko va heta, va tlhelela eka Yoxuwa enxaxeni eXilo. 10 Hiloko Yoxuwa a va hoxela vuhlolotwana* eXilo emahlweni ka Yehovha.+ Kwalaho Yoxuwa a avela Vaisrayele tiko hi ku ya hi swiphemu swa vona.+

11 Vuhlolotwana* byi rhanga byi komba nyimba ya vana va Benjamini hi mindyangu ya vona naswona tiko leri va averiweke rona a ri ri exikarhi ka va ka Yuda+ ni va ka Yosefa.+ 12 Etlhelweni ra le n’walungwini, ndzilakana wa vona a wu sungula eYordani wu ya exitsungeni xa le Yeriko+ en’walungwini kutani wu tlhandluka ntshava wu ya evupeladyambu ku ya fika emananga ya Beta-avheni.+ 13 Ndzilakana wu hundza kwalaho wu ya eLuzi exitsungeni xa le dzongeni xa Luzi, ku nga eBethele;+ wu tlhela wu ya eAtaroti-ada+ entshaveni leyi nga edzongeni wa Beta-horoni wa le Hansi.+ 14 Ndzilakana a wu funghiwile etlhelweni ra le vupeladyambu wu tlhela wu jika wu ya edzongeni ku suka entshaveni leyi langutaneke na Beta-horoni hi le dzongeni; a wu helela eKiriyati-bali, ku nga Kiriyati-yeyarimi,+ muti wa va ka Yuda. Leri i tlhelo ra le vupeladyambu.

15 Hi le dzongeni a wu sukela emakumu ka Kiriyati-yeyarimi, wu ya evupeladyambu; a wu fika exihlobyeni xa mati ya Nefitowa.+ 16 Ndzilakana a wu ya emakumu ka ntshava leyi langutaneke ni Nkova wa N’wana wa Hinomu,+ lowu nga eNkoveni wa Refayimi+ en’walungwini, naswona a wu rhelela wu ya eNkoveni wa Hinomu, exitsungeni xa Vayebusi+ hi le dzongeni wu rhelela wu ya eEni-rogele.+ 17 A wu funghiwile en’walungwini wu lulama wu ya eEni-xemexi kutani wu huma wu ya eGeliloto, lowu nga emahlweni ka xitsunga xa Adumimi,+ ivi wu rhelela wu ya eribyeni+ ra Bohani+ n’wana wa Rhuveni. 18 Kutani wu hundzela exitsungeni lexi nga le n’walungwini emahlweni ka Araba ivi wu rhelela ku ya eAraba. 19 Ndzilakana wu hundzela exitsungeni lexi nga le n’walungwini wa Beta-hogila+ naswona ndzilakana a wu helela en’walungwini wa ribuwa ra Lwandle ra Munyu*+ emakun’wini ya le dzongeni wa Yordani. Lowu a ku ri ndzilakana wa le dzongeni. 20 Yordani a wu ri ndzilakana hi tlhelo ra le vuxeni. Leyi a ku ri ndzhaka ya va ka Benjamini hi mindyangu ya vona, hi ku ya hi mindzilakana ya kona matlhelo hinkwawo.

21 Miti ya nyimba ya Benjamini hi ku ya hi mindyangu ya vona a ku ri: Yeriko, Beta-hogila, Emeki-kesisi, 22 Beta-araba,+ Semarayima, Bethele,+ 23 Avhimi, Para, Ofira, 24 Kefari-amoni, Ofni na Geba,+ miti ya 12 ni swimitana swa yona.

25 Gibiyoni,+ Rhama, Beroti, 26 Mizpe, Kefira, Moza, 27 Rekemu, Iripele, Tarala, 28 Zela,+ Ha-elefe, Yebusi ku nga Yerusalema,+ Gibiya+ na Kiriyati, miti ya 14 ni swimitana swa yona.

Leyi a ku ri ndzhaka ya va ka Benjamini hi ku ya hi mindyangu ya vona.

19 Vuhlolotwana* bya vumbirhi+ byi komba Simiyoni, nyimba ya Simiyoni+ hi ku ya hi mindyangu ya vona. Ndzhaka ya vona a yi ri exikarhi ka ndzhaka ya Yuda.+ 2 Ndzhaka ya vona a ku ri Bera-xeba+ na Xeba, Mulada,+ 3 Hasara-xuwala,+ Baala, Esemu,+ 4 Elitolada,+ Bethuli, Horma, 5 Sikilaga,+ Beta-markaboto, Hasara-susa, 6 Beta-lebawoto+ na Xaruheni, miti ya 13 ni swimitana swa yona; 7 Ayini, Rimoni, Etere na Axani,+ miti ya mune ni swimitana swa yona; 8 ni swimitana hinkwaswo leswi a swi rhendzele miti leyi ku ya fika eBalata-bere, lowu a wu vitaniwa Rhama wa le dzongeni. Leyi a ku ri ndzhaka ya nyimba ya vana va Simiyoni hi ku ya hi mindyangu ya vona. 9 Ndzhaka ya vana va Simiyoni yi humesiwile etikweni ra va ka Yuda, hikuva va ka Yuda a va averiwe tiko lerikulu. Hikwalaho vana va Simiyoni va nyikiwe ndzhaka exikarhi ka ndzhaka ya vona.+

10 Endzhaku vuhlolotwana*+ bya vunharhu byi komba vana va Zebuloni+ hi ku ya hi mindyangu ya vona naswona ndzilakana wa ndzhaka ya vona a wu fika eSaridi. 11 Ndzilakana wa vona a wu tlhandlukela evupeladyambu ku fika eMariyala, kutani wu fika eDabexeti ivi wu ya enkoveni lowu nga emahlweni ka Yokiniyama. 12 Kutani a wu suka eSaridi evuxeni wu ya endzilakanini wa Kisiloti-tabori, wu hundzela eDaberata+ ivi wu tlhandlukela eYafiya. 13 Ku suka kwalaho a wu ya evuxeni wu ya fika eGati-hefere,+ wu ya eEti-kasini, wu hundzela eRimoni naswona a wu fika eNeya. 14 En’walungwini ndzilakana a wu jika wu ya eHanatoni wu ya helela eNkoveni wa Ifita-eli, 15 ni le Katati, Nahalala, Ximroni,+ Idala na Betlehema,+ miti ya 12 ni swimitana swa yona. 16 Leyi a ku ri ndzhaka ya vana va Zebuloni hi ku ya hi mindyangu ya vona.+ Leyi a ku ri miti ni swimitana swa yona.

17 Vuhlolotwana*+ bya vumune byi komba Isakara,+ vana va Isakara hi ku ya hi mindyangu ya vona. 18 Ndzilakana wa vona a ku ri Yizriyele,+ Kesuloti, Xunemi,+ 19 Hafarayimi, Xiyoni, Anaharati, 20 Rabiti, Kixiyoni, Ebeze, 21 Remeti, Eni-ganimu,+ Eni-hada na Beta-pasese. 22 Ndzilakana a wu fika eTaboro+ ni le Xahazuma ku katsa ni le Beta-xemexe naswona ndzilakana wa vona a wu helela eYordani, miti ya 16 ni swimitana swa yona. 23 Leyi a ku ri ndzhaka ya nyimba ya vana va Isakara hi ku ya hi mindyangu ya vona,+ miti ni swimitana swa yona.

24 Kutani vuhlolotwana*+ bya vuntlhanu byi komba nyimba ya vana va Axere+ hi ku ya hi mindyangu ya vona. 25 Ndzilakana wa vona a ku ri Helikati,+ Hali, Beteni, Akixafa, 26 Alameleke, Amadi na Mixali. A wu fika evupeladyambu wu ya eKarimeli+ ni le Xihoro-libanata, 27 wu tlhelela endzhaku evuxeni wu ya eBeta-dagoni wu fika eZebuloni ni le Nkoveni wa Ifita-eli ku ya en’walungwini, wu ya eBeta-emeke ni le Neyiyele, kutani wu hundzela eKabulu hi le ximatsini, 28 ni le Ebroni, Rehobo, Hamoni na Kana ku ya fika eMutini Lowukulu wa Sidoni.+ 29 Ndzilakana a wu tlhelela eRhama ku ya fika emutini lowu biyeleriweke wa Tiri.+ Kutani ndzilakana wu tlhelela eHosa kutani wu helela elwandle ra le xifundzheni xa Akizibi, 30 Uma, Afeke+ na Rehobo,+ miti ya 22 ni swimitana swa yona. 31 Leyi a ku ri ndzhaka ya nyimba ya vana va Axere hi ku ya hi mindyangu ya vona.+ Leyi a ku ri miti ni swimitana swa yona.

32 Vuhlolotwana* bya vutsevu+ byi komba vana va Neftali hi ku ya hi mindyangu ya vona. 33 Ndzilakana wa vona a wu sukela eHelefa, emurhini lowukulu eZananima+ ni le Adami-nekebi na Yabinele ku ya fika eLakumi; naswona a wu helela eYordani. 34 Ndzilakana a wu tlhelela evupeladyambu wu ya eAznoti-tabora wu ya fika eHukoko ni le Zebuloni hi le dzongeni ni le Axere hi le vupeladyambu, wu ya fika eYuda eYordani hi le vuxeni. 35 Miti leyi biyeleriweke a ku ri Sidimi, Sere, Hamata,+ Rakati, Kinereti, 36 Adama, Rhama, Hasora,+ 37 Kedexi,+ Edireyi, Eni-hazori, 38 Yironi, Migdali-eli, Horeme, Beta-anata na Beta-xemexe,+ miti ya 19 ni swimitana swa yona. 39 Leyi a ku ri ndzhaka ya nyimba ya vana va Neftali hi ku ya hi mindyangu ya vona,+ miti ni swimitana swa yona.

40 Vuhlolotwana* bya vunkombo+ byi komba nyimba ya vana va Dani+ hi ku ya hi mindyangu ya vona. 41 Ndzilakana wa ndzhaka ya vona a ku ri Sora,+ Exitawoli, Iri-xemexi, 42 Xalabini,+ Ayaloni,+ Itila, 43 Elone, Timna,+ Ekroni,+ 44 Eliteke, Gibetoni,+ Balata, 45 Yehudu, Bene-beraka, Gati-rimoni,+ 46 Me-yarikoni na Rakoni, lowu ndzilakana wa wona wu nga le mahlweni ka Yopa.+ 47 Kambe tiko ra va ka Dani a ri ri ritsongo eka vona.+ Hiloko va famba va ya hlasela muti wa Lexeme+ hi banga ivi va wu hlula. Va wu teka va tshama eka wona naswona va cinca vito ra muti wa Lexeme va wu vitana Dani ku nga vito ra kokwa wa vona Dani.+ 48 Leyi a ku ri ndzhaka ya nyimba ya Dani hi ku ya hi mindyangu ya vona. Leyi a ku ri miti ni swimitana swa yona.

49 Hiloko va heta ku ava tiko leswaku ri va ndzhaka hi ku ya hi tindhawu ta rona. Kutani Vaisrayele va nyika Yoxuwa n’wana wa Nuni ndzhaka exikarhi ka vona. 50 Va n’wi nyike muti lowu a wu kombeleke wa Timinata-sera+ hilaha Yehovha a leriseke hakona, lowu nga endhawini ya tintshava ya Efrayimi, kutani a wu pfuxa a tshama eka wona.

51 Leyi a ku ri ndzhaka leyi muprista Eliyazara, Yoxuwa n’wana wa Nuni ni tindhuna ta tinyimba ta Israyele va yi aveke+ hi ku tirhisa vuhlolotwana* eXilo+ emahlweni ka Yehovha, enyangweni ya tende ra nhlengeletano.+ Hiloko va heta ku ava tiko.

20 Kutani Yehovha a byela Yoxuwa a ku: 2 “Byela Vaisrayele u ku, ‘Hlawulani miti yo tumbela eka yona+ leyi ndzi vulavuleke na n’wina ha yona hi ku tirhisa Muxe, 3 leswaku loyi a nga ta tshuka a dlaya munhu, ku nga ri hi vomu a ta balekela kona. Yi ta va vutumbelo bya n’wina loko mi balekela murihiseri wa ngati.+ 4 U fanele a balekela eka wun’wana wa miti+ leyi kutani a fika a yima egedeni ya muti+ a byela vakulukumba va muti wolowo nandzu wakwe. Kutani va fanele va n’wi amukela emutini wolowo va tlhela va n’wi nyika ndhawu a tshama na vona. 5 Loko murihiseri wa ngati a n’wi hlongorisa, vakulukumba va muti a va fanelanga va nyiketa mudlayi yoloye eka yena, hikuva a nga dlayanga hi vomu naswona a a nga n’wi vengi munhu loyi a n’wi dlayeke.+ 6 U fanele a tshama emutini wolowo kukondza a yima emahlweni ka ntshungu ku tengiwa nandzu wakwe+ naswona u fanele a tshama kwalaho kukondza ku fa muprista lonkulu+ loyi a nga kona hi nkarhi wolowo. Endzhaku ka sweswo mudlayi a nga tlhelela emutini lowu a balekeke eka wona, a nga nghena emutini wa ka vona ni le ndlwini yakwe.’”+

7 Hiloko va hlawula muti wa Kedexi+ lowu nga eGaleliya endhawini ya tintshava ya Neftali, muti wa Xikeme+ lowu nga endhawini ya tintshava ya Efrayimi na Kiriyati-araba,+ ku nga Hebroni, endhawini ya tintshava ya Yuda. 8 Exifundzheni xa Yordani, evuxeni bya Yeriko, va hlawule muti wa Beseri+ lowu nga emananga etikweni leri nga rivala ra nyimba ya Rhuveni, muti wa Rhamoti+ eGiliyadi eka nyimba ya Gadi ni muti wa Golani+ eBaxani eka nyimba ya Manase.+

9 Leyi yi ve miti leyi hlawuleriweke Vaisrayele hinkwavo ni valuveri lava tshamaka na vona leswaku un’wana ni un’wana loyi a nga ta tshuka a dlaya munhu, ku nga ri hi vomu a ta balekela kona+ leswaku a nga dlayiwi hi murihiseri wa ngati, a nga si yima emahlweni ka ntshungu ku tengiwa nandzu wakwe.+

21 Hiloko tindhuna ta mindyangu ya Valevhi ti ya eka muprista Eliyazara,+ Yoxuwa n’wana wa Nuni ni le ka tindhuna hinkwato ta tinyimba ta Israyele, 2 ti fika ti vulavula na vona eXilo+ etikweni ra Kanana ti ku: “Yehovha hi ku tirhisa Muxe u lerise leswaku hi nyikiwa miti leyi hi nga ta tshama eka yona, swin’we ni madyelo ya yona leswaku swifuwo swa hina swi ta dya kona.”+ 3 Kutani Vaisrayele va nyika Valevhi miti+ leyi ni madyelo ya yona eka ndzhaka ya vona,+ hilaha Yehovha a va leriseke hakona.

4 Vuhlolotwana* byi komba mindyangu ya Vakohata,+ kutani Valevhi lava a va ri vana va muprista Aroni va nyikiwa miti ya 13 hi vuhlolotwana leyi humaka eka nyimba ya va ka Yuda,+ nyimba ya Simiyoni+ ni nyimba ya Benjamini.+

5 Loko ku ri Vakohata lavan’wana hinkwavo va averiwe miti ya khume hi vuhlolotwana* leyi humaka eka mindyangu ya nyimba ya Efrayimi,+ nyimba ya Dani ni le ka hafu ya nyimba ya Manase.+

6 Vagerixoni+ va averiwa miti ya 13 hi vuhlolotwana* leyi humaka eka mindyangu ya nyimba ya Isakara, nyimba ya Axere, nyimba ya Neftali ni le ka hafu ya nyimba ya Manase eBaxani.+

7 Eka Vamerari+ hi ku ya hi mindyangu ya vona, a ku ri ni miti ya 12 leyi a yi huma eka nyimba ya Rhuveni, nyimba ya Gadi ni nyimba ya Zebuloni.+

8 Xisweswo Vaisrayele va nyika Valevhi miti leyi ni madyelo ya yona hi ku tirhisa vuhlolotwana,* hilaha Yehovha a leriseke Muxe hakona.+

9 Hikwalaho eka nyimba ya Yuda ni nyimba ya Simiyoni, ku hlawuriwe miti leyi mavito ya yona ma longoloxiweke laha,+ 10 yi nyikiwa vana va Aroni va mindyangu ya Vakohata ya Valevhi hikuva vuhlolotwana* byi rhange byi komba vona. 11 Va va nyike Kiriyati-araba+ (Araba a a ri tata wa Anaka), ku nga Hebroni+ endhawini ya tintshava ya Yuda ni madyelo ya yona. 12 Kambe masimu ya muti ni swimitana swa wona va swi nyike Kalebe n’wana wa Yefune swi va ndzhaka ya yena.+

13 Va nyike vana va muprista Aroni muti wa vutumbelo lowu mudlayi a a ta balekela eka wona,+ ku nga Hebroni+ ni madyelo ya wona na Libna+ ni madyelo ya wona, 14 Yatiri+ ni madyelo ya wona, Exitemowa+ ni madyelo ya wona, 15 Holoni+ ni madyelo ya wona, Debiri+ ni madyelo ya wona, 16 Ayini+ ni madyelo ya wona, Yuta+ ni madyelo ya wona na Beta-xemexe ni madyelo ya wona, miti ya kaye leyi humaka eka tinyimba letimbirhi.

17 Eka nyimba ya Benjamini: Gibiyoni+ ni madyelo ya wona, Geba ni madyelo ya wona,+ 18 Anathoti+ ni madyelo ya wona, Alimoni ni madyelo ya wona, miti ya mune.

19 Miti hinkwayo leyi nyikiweke vatukulu va Aroni, ku nga vaprista a ku ri miti ya 13 ni madyelo ya yona.+

20 Mindyangu leyin’wana hinkwayo ya Vakohata exikarhi ka Valevhi yi averiwe miti leyi humaka eka nyimba ya Efrayimi hi vuhlolotwana.* 21 Va va nyike muti wa vutumbelo lowu mudlayi a a ta balekela eka wona,+ ku nga Xikeme+ ni madyelo ya wona endhawini ya tintshava ya Efrayimi, Gezere+ ni madyelo ya wona, 22 Kibizayimi ni madyelo ya wona na Beta-horoni+ ni madyelo ya wona, miti ya mune.

23 Eka nyimba ya Dani: Eliteke ni madyelo ya wona, Gibetoni ni madyelo ya wona, 24 Ayaloni+ ni madyelo ya wona, Gati-rimoni ni madyelo ya wona, miti ya mune.

25 Eka hafu ya nyimba ya Manase: Tanaka+ ni madyelo ya wona na Gati-rimoni ni madyelo ya wona, miti yimbirhi.

26 Miti hinkwayo ni madyelo ya yona leyi mindyangu leyin’wana ya Vakohata yi nyikiweke yona a yi ri khume.

27 Hafu ya nyimba ya Manase yi nyike Vagerixoni+ va mindyangu ya Valevhi muti wa vutumbelo wa mudlayi, ku nga Golani+ eBaxani ni madyelo ya wona na Bexitera ni madyelo ya wona, miti yimbirhi.

28 Eka nyimba ya Isakara:+ Kixiyoni ni madyelo ya wona, Daberata+ ni madyelo ya wona, 29 Yaramutu ni madyelo ya wona, Eni-ganimu ni madyelo ya wona, miti ya mune.

30 Eka nyimba ya Axere:+ Mixali ni madyelo ya wona, Abidoni ni madyelo ya wona, 31 Helikati+ ni madyelo ya wona na Rehobo+ ni madyelo ya wona, miti ya mune.

32 Eka nyimba ya Neftali: muti wa vutumbelo+ wa mudlayi, ku nga Kedexi+ eGaleliya ni madyelo ya wona, Hamati-dori ni madyelo ya wona na Karitani ni madyelo ya wona, miti yinharhu.

33 Miti hinkwayo ya Vagerixoni hi ku ya hi mindyangu ya vona a yi ri 13 ni madyelo ya yona.

34 Mindyangu ya Vamerari,+ ku nga Valevhi lavan’wana hinkwavo va nyikiwe miti leyi landzelaka yi huma eka nyimba ya Zebuloni:+ Yokiniyama+ ni madyelo ya wona, Karita ni madyelo ya wona, 35 Dimina ni madyelo ya wona na Nahalala+ ni madyelo ya wona, miti ya mune.

36 Eka nyimba ya Rhuveni: Beseri+ ni madyelo ya wona, Yahasa ni madyelo ya wona,+ 37 Kedemoti ni madyelo ya wona na Mefati ni madyelo ya wona, miti ya mune.

38 Eka nyimba ya Gadi:+ muti wa vutumbelo wa mudlayi, ku nga Rhamoti eGiliyadi+ ni madyelo ya wona, Mahanayimi+ ni madyelo ya wona, 39 Hexiboni+ ni madyelo ya wona na Yazere+ ni madyelo ya wona, miti ya mune.

40 Miti hinkwayo leyi averiweke Vamerari hi ku ya hi mindyangu ya vona, Valevhi lavan’wana hinkwavo a yi ri 12.

41 Miti hinkwayo ya Valevhi leyi a va averiwe yona yi huma eka Vaisrayele a yi ri 48 ku katsa ni madyelo ya yona.+ 42 Muti ha wun’we eka miti leyi a wu ri ni madyelo ya wona, miti hinkwayo a yi ri tano.

43 Hikwalaho Yehovha a nyika Vaisrayele tiko hinkwaro leri a ri hlambanyeleke vakokwa wa vona,+ kutani va ri teka va tshama eka rona.+ 44 Ku tlula kwalaho, Yehovha a va wisisa eka valala va vona hinkwavo hilaha a hlambanyeleke vakokwa wa vona hakona,+ a ku na munhu na un’we exikarhi ka valala va vona loyi a a ta jamelana na vona.+ Yehovha u nyikete valala va vona hinkwavo evokweni ra vona.+ 45 A ku na xitshembiso na xin’we lexi nga hetisekangiki eka switshembiso leswinene hinkwaswo leswi Yehovha a swi tshembiseke yindlu ya Israyele; hinkwaswo ka swona swi hetisekile.+

22 Kutani Yoxuwa a vitana va ka Rhuveni, va ka Gadi ni hafu ya nyimba ya Manase 2 a ku eka vona: “Mi endle hinkwaswo leswi Muxe nandza wa Yehovha a mi leriseke swona+ naswona mi yingise rito ra mina eka hinkwaswo leswi ndzi mi leriseke swona.+ 3 A mi va rivalanga vamakwenu nkarhi lowu hinkwawo, ku ta fikela namuntlha;+ naswona mi yingise xiboho xa xileriso xa Yehovha Xikwembu xa n’wina.+ 4 Sweswi Yehovha Xikwembu xa n’wina u wisise vamakwenu hilaha a va tshembiseke hakona.+ Kutani mi nga tlhelela emixaxeni ya n’wina etikweni leri Muxe nandza wa Yehovha a mi nyikeke rona leswaku ri va ndzhaka ya n’wina entsungeni* wa Yordani.+ 5 Ntsena mi tiyimisela swinene ku yingisa xileriso ni Nawu lowu Muxe nandza wa Yehovha a mi nyikeke wona,+ hi ku rhandza Yehovha Xikwembu xa n’wina,+ hi ku famba etindleleni ta yena hinkwato,+ hi ku yingisa swileriso swa yena,+ hi ku n’wi namarhela+ ni hi ku tlhela mi n’wi tirhela+ hi mbilu ya n’wina hinkwayo ni hi vutomi bya n’wina hinkwabyo.”+

6 Hiloko Yoxuwa a va katekisa kutani a va tshika va famba va ya emixaxeni ya vona. 7 Hafu ya nyimba ya Manase, Muxe a a yi nyike ndzhaka eBaxani,+ kasi hafu leyin’wana Yoxuwa u yi nyike tiko etlhelweni ra le vupeladyambu bya Yordani,+ swin’we ni vamakwavo. Ku tlula kwalaho, Yoxuwa a va katekisa loko a ri karhi a va tlhelerisela emixaxeni ya vona 8 a ku eka vona: “Tlhelelani emixaxeni ya n’wina ni rifuwo ro tala, swifuwo swo tala, silivhere ni nsuku, koporo ni nsimbhi ni swiambalo swo tala ngopfu.+ N’wina swin’we ni vamakwenu, fambani ni swilo leswi mi swi phangeke+ eka valala va n’wina.”

9 Endzhaku ka sweswo, va ka Rhuveni, va ka Gadi ni hafu ya nyimba ya Manase va suka exikarhi ka Vaisrayele lavan’wana, eXilo etikweni ra Kanana, va tlhelela etikweni ra Giliyadi,+ tiko leri nga ndzhaka ya vona, leri va tshameke eka rona hi ku landza xileriso xa Yehovha lexi a va nyikeke xona hi ku tirhisa Muxe.+ 10 Loko va fika ekusuhi ni nambu wa Yordani etikweni ra Kanana, va ka Rhuveni, va ka Gadi ni hafu ya nyimba ya Manase va aka altari kwalaho etlhelo ka Yordani, altari leyikulu yo saseka. 11 Hi ku famba ka nkarhi, Vaisrayele lavan’wana va swi twa+ va ku: “Vonani! Va ka Rhuveni, va ka Gadi ni hafu ya nyimba ya Manase va ake altari endzilakanini wa tiko ra Kanana ekusuhi ni nambu wa Yordani etlhelweni leri nga ra Vaisrayele.” 12 Loko Vaisrayele va swi twa, ntshungu hinkwawo wa Vaisrayele wu hlengeletana eXilo+ leswaku wu ya lwa na vona.      

13 Hiloko Vaisrayele va rhuma Finiyasi+ n’wana wa muprista Eliyazara eka va ka Rhuveni, va ka Gadi ni le ka hafu ya nyimba ya Manase etikweni ra Giliyadi, 14 a famba ni tindhuna ta khume, ndhuna ha yin’we a yi yimela nyimba yin’wana ni yin’wana ya Israyele, tindhuna hinkwato a ti ri varhangeri va mindyangu ya vatata wa vona exikarhi ka Vaisrayele hinkwavo.+ 15 Loko va fika eka va ka Rhuveni, va ka Gadi ni hafu ya nyimba ya Manase etikweni ra Giliyadi va ku eka vona:

16 “Ntshungu hinkwawo wa Yehovha wu ri: ‘I xiendlo muni lexi mi xi endleke leswi mi tshikeke ku tshembeka+ eka Xikwembu xa Israyele? Namuntlha mi tshike ku landzela Yehovha hi ku tiakela altari ni ku xandzukela Yehovha.+ 17 Xana se mi xi rivele xidyoho lexi hi xi endleke ePeyori? Ninamuntlha ha ha ri ni nandzu wa xona hambileswi vanhu va Yehovha va weriweke hi khombo hikwalaho ka xidyoho xolexo.+ 18 Xana n’wina mi tshika ku landzela Yehovha namuntlha! Loko mi xandzukela Yehovha namuntlha, mundzuku u ta hlundzukela ntshungu hinkwawo wa Vaisrayele.+ 19 Loko ku ri hileswaku tiko leri mi tshamaka eka rona a ri basanga, a hi fambeni etikweni ra ndzhaka ya Yehovha+ laha tabernakela ya Yehovha yi nga kona,+ mi ya tshama na hina, kambe mi nga xandzukeli Yehovha naswona mi nga hi endli vaxandzuki hi ku tiakela altari yin’wana ku engetela eka altari ya Yehovha Xikwembu xa hina.+ 20 Loko Akani+ n’wana wa Zara a nga tshembeki kutani a teka swilo leswi a swi fanele swi lovisiwile, xana vukarhi a byi welanga ntshungu hinkwawo wa Vaisrayele?+ A nga fanga a ri yexe hikwalaho ka xihoxo xa yena.’”+

21 Hiloko va ka Rhuveni, va ka Gadi ni hafu ya nyimba ya Manase va hlamula tindhuna ta magidi ta Vaisrayele va ku:+ 22 “Yehovha, Xikwembu lexi tlakukeke ku tlula swikwembu leswin’wana! Yehovha, Xikwembu lexi tlakukeke ku tlula swikwembu leswin’wana!+ Wa swi tiva naswona Vaisrayele na vona va ta swi tiva. Loko hi xandzukile naswona hi nga tshembekanga eka Yehovha, mi nga hi tsetseleli namuntlha. 23 Loko hi tiakele altari leswaku hi tshika ku landzela Yehovha ni leswaku hi endla magandzelo yo hisiwa, magandzelo ya mavele ni magandzelo yo kombela ku rhula eka yona, Yehovha u ta hi xupula.+ 24 Kambe hi endle leswi hikwalaho ka xivangelo xin’wana, hikuva hi te, ‘Enkarhini lowu taka, vana va n’wina va ta vutisa vana va hina va ku: “I yini lexi mi hlanganisaka na Yehovha Xikwembu xa Israyele? 25 Yehovha u endle leswaku nambu wa Yordani wu va ndzilakana exikarhi ka hina na n’wina va ka Rhuveni ni va ka Gadi. A xi kona lexi mi hlanganisaka na Yehovha.” Kutani vana va n’wina va ta sivela vana va hina ku gandzela* Yehovha.’

26 “Hikwalaho hi te, ‘A hi tekeni goza hi ku aka altari, ku nga ri ya magandzelo yo hisiwa, 27 kambe leswaku yi va vumbhoni exikarhi ka hina na n’wina+ ni le ka vatukulu va hina bya leswaku hi ta tirhela Yehovha emahlweni ka yena hi magandzelo ya hina yo hisiwa, magandzelo ya hina yo kombela ku rhula ni magandzelo man’wana,+ leswaku vana va n’wina va nga byeli vana va hina enkarhini lowu taka va ku: “A xi kona lexi mi hlanganisaka na Yehovha.”’ 28 Kutani hi te, ‘Loko vo vula sweswo eka hina ni le ka vatukulu va hina hi ta ku: “Hi leyi altari leyi fanaka ni ya Yehovha leyi vakokwa wa hina va yi endleke, a hi yo endlela magandzelo yo hisiwa eka yona, kambe i vumbhoni exikarhi ka n’wina na hina.”’ 29 A hi nge pfuki hi xandzukele Yehovha ni ku jikela Yehovha+ namuntlha hi nga ha n’wi landzeli hi ku aka altari ya magandzelo yo hisiwa ni ya magandzelo ya mavele ni magandzelo man’wana, ematshan’wini ya altari ya Yehovha Xikwembu xa hina leyi nga emahlweni ka tabernakela yakwe!”+

30 Loko muprista Finiyasi, tindhuna ta ntshungu ni tindhuna ta magidi ta Vaisrayele leti a ti ri na yena va twa leswi vuriweke hi vatukulu va ka Rhuveni, va ka Gadi ni va ka Manase, va tsaka.+ 31 Finiyasi n’wana wa muprista Eliyazara a byela vatukulu va Rhuveni, va Gadi ni va Manase a ku: “Namuntlha ha swi tiva leswaku Yehovha u le xikarhi ka hina, hikuva mi tshembekile eka Yehovha. Mi ponise Vaisrayele evokweni ra Yehovha.”

32 Endzhaku ka sweswo Finiyasi n’wana wa muprista Eliyazara ni tindhuna va suka eka va ka Rhuveni ni va ka Gadi etikweni ra Giliyadi va tlhelela etikweni ra Kanana, kutani va rungulela Vaisrayele lavan’wana leswi va byeriweke swona. 33 Xiviko lexi xi va tsakisile Vaisrayele. Hiloko Vaisrayele va sungula ku dzunisa Xikwembu, a va ha tlhelanga va vulavula hi ku ya lwa ni va ka Rhuveni ni va ka Gadi leswaku va lovisa tiko leri a va tshama eka rona.

34 Va ka Rhuveni ni va ka Gadi va thya altari* vito, hikuva “i vumbhoni exikarhi ka hina leswaku Yehovha i Xikwembu xa ntiyiso.”

23 Endzhaku ka masiku yo tala Yehovha a wisise Vaisrayele+ eka valala va vona lava va rhendzeleke, loko Yoxuwa a dyuharile naswona a ri ni malembe yo tala,+ 2 Yoxuwa a vitana Vaisrayele hinkwavo,+ vakulukumba va vona, varhangeri va vona, vaavanyisi va vona ni tindhuna ta vona+ a ku eka vona: “Se ndzi dyuharile; ndzi ni malembe yo tala. 3 Mi tivonele hi ya n’wina hinkwaswo leswi Yehovha Xikwembu xa n’wina a swi endleke eka matiko lawa hinkwawo hikwalaho ka n’wina, hikuva Yehovha Xikwembu xa n’wina hi yena loyi a a mi lwela.+ 4 Maswivo, ndzi mi avele tindhawu ta matiko lama saleke hi vuhlolotwana*+ leswaku ti va ndzhaka ya tinyimba ta n’wina+ swin’we ni matiko hinkwawo lawa ndzi ma loviseke,+ ku sukela eYordani ku ya eLwandle Lerikulu* hi le vupeladyambu. 5 Yehovha Xikwembu xa n’wina hi yena loyi a a tshamela ku ma susumeta emahlweni ka n’wina+ naswona u mi hlongolele wona, mi teka tiko ra wona hilaha Yehovha Xikwembu xa n’wina a mi tshembiseke hakona.+

6 “Sweswi mi fanele mi va ni xivindzi lexikulu xo yingisa ni ku endla hinkwaswo leswi tsariweke ebukwini ya Nawu+ wa Muxe hi ku ka mi nga pfuki mi hambukile mi ya exineneni kumbe eximatsini,+ 7 hi ku ka mi nga pfuki mi tihlanganisile ni matiko lawa+ lama saleke na n’wina. Mi nga tshuki mi vulavula hi mavito ya swikwembu swa wona+ kumbe mi hlambanya hi swona, naswona mi nga tshuki mi swi tirhela kumbe mi swi khinsamela.+ 8 Kambe mi fanele mi namarhela Yehovha Xikwembu xa n’wina,+ hilaha mi endleke hakona ku ta fikela namuntlha. 9 Yehovha u ta hlongola matiko lamakulu ni lama nga ni matimba emahlweni ka n’wina+ hikuva a ku na munhu loyi a koteke ku jamelana na n’wina ku ta fikela namuntlha.+ 10 Munhu un’we ntsena exikarhi ka n’wina u ta hlongorisa vanhu va gidi,+ hikuva Yehovha Xikwembu xa n’wina wa mi lwela+ hilaha a mi tshembiseke hakona.+ 11 Hikwalaho tshamani mi ri ni vuxiyaxiya+ hi ku rhandza Yehovha Xikwembu xa n’wina.+

12 “Kambe loko mo cinca mi namarhela leswi saleke swa matiko lawa mi saleke+ na wona, kutani mi endla ntwanano wa vukati+ na wona ni ku tlhela mi va vanghana va wona, 13 mi fanele mi swi tiva leswaku Yehovha Xikwembu xa n’wina a nge he yi emahlweni a mi hlongolela matiko lawa.+ Ma ta va xirimbana ni ntlhamu ni nkhavi ematsheveni ya n’wina,+ ni mitwa ematihlweni ya n’wina kukondza mi hela etikweni leri lerinene, leri Yehovha Xikwembu xa n’wina a mi nyikeke rona.

14 “Sweswi yingisani! Ndzi ta fa ku nga ri khale naswona mi swi tiva kahle hi mbilu ya n’wina hinkwayo ni hi vutomi bya n’wina hinkwabyo leswaku a ku wanga ni rito ni rin’we eka switshembiso leswinene hinkwaswo leswi Yehovha Xikwembu xa n’wina a mi tshembiseke swona. Hinkwaswo swi hetisekile eka n’wina. A ku wanga ni rito ni rin’we eka swona.+ 15 Kambe hilaha switshembiso hinkwaswo leswinene leswi Yehovha Xikwembu xa n’wina a mi byeleke swona swi endlekeke eka n’wina,+ hi ndlela leyi fanaka, Yehovha u ta tiyiseka leswaku makhombo hinkwawo lawa a mi tshembiseke wona ma ta ehenhla ka n’wina kukondza mi hela etikweni leri lerinene leri Yehovha Xikwembu xa n’wina a mi nyikeke rona.+ 16 Loko mi tshova ntwanano wa Yehovha Xikwembu xa n’wina lowu a mi leriseke leswaku mi wu hlayisa, ni loko mi famba mi ya tirhela swikwembu swin’wana ni ku swi khinsamela, Yehovha u ta mi hlundzukela swinene+ naswona mi ta hatla mi lova etikweni lerinene leri a mi nyikeke rona.”+

24 Kutani Yoxuwa a hlengeleta tinyimba hinkwato ta Israyele eXikeme, a vitana vakulukumba va Israyele, varhangeri va vona, vaavanyisi va vona ni tindhuna ta vona,+ hiloko va yima emahlweni ka Xikwembu xa ntiyiso. 2 Yoxuwa a byela vanhu hinkwavo a ku: “Yehovha Xikwembu xa Israyele u ri, ‘Khale+ vakokwa wa n’wina,+ Tera tata wa Abrahama na Nakori, a va tshama entsungeni wa Nambu,* naswona a va tirhela swikwembu swin’wana.+

3 “‘Hi ku famba ka nkarhi ndzi teke kokwa wa n’wina Abrahama+ entsungeni wa Nambu* ndzi n’wi fambisa etikweni hinkwaro ra Kanana, ndzi tlhela ndzi n’wi katekisa a va ni vana* vo tala.+ Ndzi n’wi nyike Isaka;+ 4 kutani Isaka ndzi n’wi nyika Yakobo na Esawu.+ Endzhakunyana Esawu ndzi n’wi nyike Ntshava ya Seyiri leswaku a tshama eka yona;+ Yakobo ni vana vakwe va ye eEgipta.+ 5 Hi ku famba ka nkarhi ndzi rhumele Muxe na Aroni,+ kutani ndzi hlasela Egipta hi leswi ndzi swi endleke exikarhi ka rona,+ hiloko ndzi mi humesa. 6 Loko ndzi ri karhi ndzi humesa vakokwa wa n’wina eEgipta+ kutani mi fika elwandle, Vaegipta a va hlongorisa vakokwa wa n’wina hi makalichi ya nyimpi ni vagadi va tihanci ku ya fika eLwandle ro Tshwuka.+ 7 Hiloko va sungula ku rilela Yehovha+ kutani a tisa munyama exikarhi ka n’wina ni Vaegipta, a va funengeta hi lwandle ri va khubumeta,+ naswona mi swi vone hi ya n’wina leswi ndzi swi endleke eEgipta.+ Endzhaku ka sweswo mi tshame emananga malembe* yo tala.+

8 “‘Kutani ndzi mi tise etikweni ra Vaamori lava a va tshama entsungeni* wa Yordani, hiloko va lwa na n’wina.+ Kambe ndzi va nyikete evokweni ra n’wina leswaku mi ta teka tiko ra vona ri va ra n’wina, naswona ndzi va herisile emahlweni ka n’wina.+ 9 Endzhaku ka sweswo Balaka n’wana wa Sipora, hosi ya Mowabu a lwa ni Vaisrayele. Hiloko a rhumela vanhu ku ya vitana Balama n’wana wa Beyori leswaku a ta mi rhukana.+ 10 Kambe a ndzi n’wi yingisanga Balama.+ Hiloko a mi katekisa hi ku phindhaphindha+ naswona ndzi mi ponisile evokweni rakwe.+

11 “‘Kutani mi pela nambu wa Yordani+ mi fika eYeriko.+ Hiloko varhangeri* va Yeriko, Vaamori, Vaperezi, Vakanana, Vaheti, Vagirgaxa, Vahivhi ni Vayebusi va lwa na n’wina, kambe ndzi va nyiketa evokweni ra n’wina.+ 12 Ndzi endle leswaku va hela matimba mi nga si fika ni le ka vona, sweswo hi swona swi nga va hlongola emahlweni ka n’wina,+ tihosi timbirhi ta Vaamori. A ku nga ri hi banga ra n’wina kumbe hi vurha* bya n’wina.+ 13 Xisweswo ndzi mi nyike tiko leri mi nga ri tirhelangiki ni miti leyi mi nga yi akangiki,+ naswona mi tshama eka yona. Mi dya leswi humaka emasin’wini ya madiriva ni le masin’wini ya mitlhwari leswi mi nga swi byalangiki.’+

14 “Hikwalaho, chavani Yehovha mi n’wi tirhela hi ku tiyimisela ni hi ku tshembeka,+ mi susa swikwembu leswi vakokwa wa n’wina va swi tirheleke entsungeni wa Nambu* ni le Egipta,+ mi tirhela Yehovha. 15 Loko mi vona swi nga ri swinene ku tirhela Yehovha, hlawulani namuntlha loyi mi nga ta n’wi tirhela,+ hambi i swikwembu leswi vakokwa wa n’wina va swi tirheleke entsungeni wa Nambu*+ kumbe i swikwembu swa Vaamori lava mi tshamaka etikweni ra vona.+ Kambe loko ku ri mina ni ndyangu wa mina, hi ta tirhela Yehovha.”

16 Hiloko vanhu va hlamula va ku: “A hi nge pfuki hi tshike Yehovha hi ya tirhela swikwembu swin’wana. 17 I Yehovha Xikwembu xa hina loyi a humeseke hina ni vakokwa wa hina etikweni ra Egipta,+ endlwini ya vuhlonga+ naswona a endleke masingita lawa lamakulu emahlweni ka hina+ ni loyi a hi rindzeke endleleni hinkwayo leyi hi fambeke eka yona ni le xikarhi ka vanhu hinkwavo lava hi hundzeke eka vona.+ 18 Yehovha u hlongole vanhu hinkwavo ku katsa ni Vaamori lava a va tshama etikweni leri hi tshamaka eka rona. Hikwalaho, na hina hi ta gandzela Yehovha hikuva i Xikwembu xa hina.”

19 Kutani Yoxuwa a byela vanhu a ku: “Xana mi ta swi kota ku tirhela Yehovha hakunene? Hikuva i Xikwembu lexi kwetsimaka;+ i Xikwembu lexi lavaka leswaku ku tirheriwa xona ntsena.+ A xi nge mi rivaleli loko mo tlula nawu* kumbe mi dyoha.+ 20 Loko mo fularhela Yehovha mi ya tirhela swikwembu swin’wana, na yena u ta mi fularhela a mi lovisa endzhaku ko mi endlela leswinene.”+

21 Hiloko vanhu va byela Yoxuwa va ku: “E-e, kambe hi ta tirhela Yehovha!”+ 22 Kutani Yoxuwa a byela vanhu a ku: “Mi timbhoni hi n’wexe ta leswaku mi tihlawulele ku tirhela Yehovha hi ku swi rhandza.”+ Hiloko vona va ku: “Hi timbhoni.”

23 “Hikwalaho, susani swikwembu swa matiko leswi nga exikarhi ka n’wina, mi tirhela Yehovha Xikwembu xa Israyele hi mbilu hinkwayo.” 24 Vanhu va byela Yoxuwa va ku: “Hi ta tirhela Yehovha Xikwembu xa hina naswona hi ta yingisa rito rakwe!”

25 Kutani Yoxuwa a endla ntwanano ni vanhu hi siku rero, a va vekela swiletelo ni milawu eXikeme. 26 Hiloko Yoxuwa a tsala marito lawa ebukwini ya Nawu+ wa Xikwembu kutani a teka ribye lerikulu+ a ri yimisa ehansi ka murhi lowukulu lowu nga endhawini yo kwetsima ya Yehovha.

27 Yoxuwa a byela vanhu hinkwavo a ku: “Yingisani! Ribye leri ri ta va mbhoni ya hina,+ hikuva ri twe hinkwaswo leswi Yehovha a hi byeleke swona, kutani ri ta va mbhoni leyi kanetanaka na n’wina leswaku mi nga landzuli Xikwembu xa n’wina.” 28 Endzhaku ka sweswo Yoxuwa a tshunxa vanhu va muka, un’wana ni un’wana a ya endzhakeni yakwe.+

29 Endzhaku ka swilo leswi, Yoxuwa n’wana wa Nuni, nandza wa Yehovha a fa a ri ni malembe ya 110.+ 30 Hiloko va n’wi lahla endhawini leyi nga ndzhaka yakwe eTiminata-sera,+ leyi nga endhawini ya tintshava ya Efrayimi, en’walungwini wa Ntshava ya Gaxi. 31 Vaisrayele va ya emahlweni va tirhela Yehovha emasikwini hinkwawo ya Yoxuwa ni le masikwini hinkwawo ya vakulukumba lava hanyeke ku n’wi tlula, lava a va tiva mitirho hinkwayo leyinene leyi Yehovha a yi endleleke Vaisrayele.+

32 Marhambu ya Yosefa+ lawa Vaisrayele va humeke na wona eEgipta, ma lahliwe eXikeme exiphen’wini xa nsimu leyi Yakobo a yi xaveke eka vana va Hamori+ tata wa Xikeme, hi swiphemu swa mali swa 100;+ kutani nsimu yoleyo yi ve ndzhaka ya vana va Yosefa.+

33 Eliyazara n’wana wa Aroni na yena a fa.+ Hiloko va n’wi lahla eXitsungeni xa Finiyasi n’wana wakwe,+ lexi a a nyikiwe xona endhawini ya tintshava ya Efrayimi.