EZRA

1 Hi lembe ro sungula ra ku fuma ka Hosi Korexe+ wa le Peresiya, Yehovha u nyike Hosi Korexe wa le Peresiya miehleketo yo endla leswi Yehovha a swi vuleke hi ku tirhisa Yeremiya+ leswaku a tivisa hinkwavo emfun’weni wakwe ni ku tlhela a tsala+ a ku:

2 “Hosi Korexe wa le Peresiya u ri, ‘Yehovha Xikwembu xa matilo u ndzi nyike mifumo hinkwayo ya misava+ naswona u ndzi lerise leswaku ndzi n’wi akela yindlu eYerusalema,+ etikweni ra Yuda. 3 Un’wana ni un’wana exikarhi ka n’wina vanhu vakwe hinkwenu, Xikwembu a xi ve na yena a ya eYerusalema le Yuda a ya pfuxa yindlu ya Yehovha Xikwembu xa Israyele leyi a yi ri eYerusalema,* hikuva i Xikwembu xa ntiyiso. 4 Un’wana ni un’wana la nga muluveri,+ kun’wana ni kun’wana laha a nga vaka a ri kona, a a pfuniwe hi vaakelani vakwe hi ku va va n’wi nyika silivhere, nsuku, nhundzu ya vona, swifuwo swin’we ni gandzelo ra ku tirhandzela ra yindlu ya Xikwembu xa ntiyiso,+ leyi a yi ri eYerusalema.’”

5 Kutani varhangeri va mindyangu ya Yuda ni ya Benjamini ni vaprista, Valevhi, hinkwavo lava moya wa Xikwembu xa ntiyiso wu va susumeteke, va lunghekela ku ya pfuxa yindlu ya Yehovha, leyi a yi ri eYerusalema. 6 Vaakelani va vona va va pfunile hi ku va nyika* swibya swa silivhere, swa nsuku, nhundzu, swifuwo ni swilo swa nkoka, handle ka hinkwaswo leswi nga ta tirhiseriwa magandzelo ya ku tirhandzela.

7 Hosi Korexe u tlhele a humesa swibya swa yindlu ya Yehovha, leswi Nebukadnetsara a nga swi teka eYerusalema a swi veka endlwini ya xikwembu xakwe.+ 8 Hosi Korexe wa le Peresiya u swi humese ehansi ka vulawuri bya Mitiredata mukhomi wa timali, loyi a nga swi hlayela kutani a swi nyika Xexebazara*+ ndhuna ya le Yuda.

9 Hi leyi nhlayo ya swona: swibya swa 30 leswi fanaka ni tibasikiti leswi endliweke hi nsuku, swibya swa 1 000 leswi fanaka ni tibasikiti leswi endliweke hi silivhere, swibya swin’wana swa 29, 10 mikambana leyitsongo ya nsuku ya 30, mikambana ya 410 leyitsongo ya silivhere ni swibya swin’wana swa 1 000. 11 Swibya hinkwaswo swa nsuku ni silivhere a swi ri 5 400. Xexebazara u fambe na swona hinkwaswo loko mahlonga+ ma suka eBabilona ma tlhelela eYerusalema.

2 Lava i vanhu va le xifundzheni* lava a va huma evuhlongeni,+ lava Hosi Nebukadnetsara wa le Babilona a nga va yisa evuhlongeni eBabilona,+ lava endzhaku va nga vuyela eYerusalema ni le Yuda, un’wana ni un’wana emutini wa ka vona,+ 2 lava nga ta na Zerubabele,+ Yexuwa,+ Nehemiya, Seraya, Relaya, Mordekayi, Bilixani, Mispa, Bigivhayi, Rehumi na Bana.

Nhlayo ya vavanuna va Israyele a yi katsa:+ 3 vana va Paroxi, 2 172; 4 vana va Xefatiya, 372; 5 vana va Ara,+ 775; 6 vana va Pahata-mowabu,+ vandyangu wa Yexuwa na Yowabu, 2 812; 7 vana va Elami,+ 1 254; 8 vana va Zatu,+ 945; 9 vana va Zakayi, 760; 10 vana va Bani, 642; 11 vana va Bebayi, 623; 12 vana va Azigadi, 1 222; 13 vana va Adonikamu, 666; 14 vana va Bigivhayi, 2 056; 15 vana va Adini, 454; 16 vana va Atere lava nga vatukulu va Hezekiya, 98; 17 vana va Bezayi, 323; 18 vana va Yora, 112; 19 vana va Haxumu,+ 223; 20 vana va Gibara, 95; 21 vana va Betlehema, 123; 22 vavanuna va le Netofa, 56; 23 vavanuna va le Anathoti,+ 128; 24 vana va Azamavhete, 42; 25 vana va le Kiriyati-yeyarimi, Kefira ni le Beroti, 743; 26 vana va le Rhama+ ni le Geba,+ 621; 27 vavanuna va le Mikimasi, 122; 28 vavanuna va le Bethele ni le Ayi,+ 223; 29 vana va Nebo,+ 52; 30 vana va Magibixi, 156; 31 vana va Elami lowun’wana, 1 254; 32 vana va Harimi, 320; 33 vana va Lodi, Hadida na Ono, 725; 34 vana va le Yeriko, 345; 35 vana va le Sena, 3 630.

36 Vaprista:+ vana va Yedaya+ va ndyangu wa Yexuwa,+ 973; 37 vana va Imere,+ 1 052; 38 vana va Paxahuru,+ 1 247; 39 vana va Harimi,+ 1 017.

40 Valevhi:+ vana va Yexuwa na Kadimiyele,+ vana va Hodavhiya, 74. 41 Vayimbeleri:+ vana va Asafa,+ 128. 42 Vana va varindzi va tigede:+ vana va Xalumu, vana va Atere, vana va Talimoni,+ vana va Akubu,+ vana va Hatita, vana va Xobayi, hinkwavo ka vona, 139.

43 Vatirhi va le tempeleni:*+ vana va Ziha, vana va Hasufa, vana va Tabawoto, 44 vana va Kerosi, vana va Siya, vana va Padoni, 45 vana va Lebana, vana va Hagaba, vana va Akubu, 46 vana va Hagabu, vana va Salmayi, vana va Hanani, 47 vana va Gidele, vana va Gahara, vana va Reyaya, 48 vana va Resini, vana va Nekoda, vana va Gazamu, 49 vana va Uza, vana va Pasiya, vana va Besayi, 50 vana va Asina, vana va Mewunimi, vana va Nefisimi, 51 vana va Bakibuku, vana va Hakufa, vana va Harahuru, 52 vana va Basiluti, vana va Mehida, vana va Harixa, 53 vana va Barikosi, vana va Sisera, vana va Tema, 54 vana va Neziya, vana va Hatifa.

55 Vana va malandza ya Solomoni: vana va Sotayi, vana va Sofereti, vana va Peruda,+ 56 vana va Yale, vana va Darikoni, vana va Gidele, 57 vana va Xefatiya, vana va Hatila, vana va Pokereti-hazebayimi, vana va Ami.

58 Vatirhi va le tempeleni* hinkwavo ni vana va malandza ya Solomoni a va ri 392.

59 Vanhu lava humaka eTela-mela, eTela-haraxa, eKeruba, eAdoni ni le Imere, lava nga swi kotangiki ku kumisisa mindyangu ya vatata wa vona hambi ku ri ku tiva loko va ri va rixaka ra Vaisrayele+ kumbe e-e, hi lava: 60 vana va Delaya, vana va Tobiya, vana va Nekoda, 652. 61 Vana va vaprista: vana va Habayiya, vana va Hakozi,+ vana va Barizilayi, loyi a nga teka nsati eka vana va Barizilayi+ wa le Giliyadi, kutani a thyiwa vito ra tata wa nsati wa yena. 62 Lava hi vona va laveke lomu va tsariweke kona eka nxaxamelo wa swivongo leswaku va kuma xivongo xa vona, kambe a va ku kumanga lomu va nga tsariwa kona, kutani va tshikisiwa ntirho wa vuprista.*+ 63 Ndhunankulu* yi va byele leswaku a va nge dyi swakudya leswi kwetsimaka ngopfu+ kukondza ku va ni muprista loyi a nga ta vutisa hi ku tirhisa Urimi na Thumimi.+

64 Nhlayo hinkwayo ya vanhu a ku ri 42 360,+ 65 handle ka mahlonga ya vona ya xinuna ni ya xisati ya 7 337; a ku ri ni vayimbeleri va xinuna ni va xisati va 200. 66 Tihanci ta vona a ti ri 736, timeyila ta vona a ti ri 245, 67 tikamela ta vona a ti ri 435, timbhongolo ta vona a ti ri 6 720.

68 Loko va fika endlwini ya Yehovha eYerusalema, van’wana va varhangeri va mindyangu va endle magandzelo lama endliwaka hi ku swi rhandza+ ya yindlu ya Xikwembu xa ntiyiso, leswaku va ta tlhela va yi aka* laha a yi ri kona.+ 69 Hi ku ya hi leswi va nga na swona va humesa tidrakma* ta nsuku ta 61 000, timayina* ta silivhere ta 5 000,+ ni swiambalo swo leha swa vaprista swa 100, va nyikela hi swona laha ku hlayisiwaka xuma xo pfuxa tempele. 70 Kutani vaprista, Valevhi ni vanhu van’wana, vayimbeleri, varindzi va tigede ni vatirhi va le tempeleni* va tshama emitini ya vona, ni Vaisrayele lavan’wana hinkwavo va tshamiseka emitini ya vona.+

3 Loko n’hweti ya vunkombo+ yi fika naswona Vaisrayele va ri emitini ya vona, va hlengeletana eYerusalema hi xikongomelo xin’we. 2 Yexuwa+ n’wana wa Yohozadaki ni vapristakulobye na Zerubabele+ n’wana wa Salatiyele+ ni vamakwavo va sungula ku aka altari ya Xikwembu xa Israyele, leswaku va ta endla magandzelo yo hisiwa ehenhla ka yona, hi ku landza leswi tsariweke eNawini wa Muxe+ nandza wa Xikwembu xa ntiyiso.

3 Hiloko va aka altari laha a ku ri ni altari ya khale, hambileswi a va chava vanhu va matiko lawa va akelaneke na wona,+ va sungula ku hisela Yehovha magandzelo eka yona, magandzelo yo hisiwa ya nimixo ni ya nimadyambu.+ 4 Kutani va endla Nkhuvo wa Mitsonga* hi ku landza leswi tsariweke,+ va nyikela nhlayo leyi lavekaka ya magandzelo yo hisiwa+ siku ni siku. 5 Endzhaku ka sweswo va endla magandzelo yo hisiwa ya siku ni siku+ ni ya ku huma ka n’weti+ ni ya mikhuvo+ hinkwayo yo kwetsima ya Yehovha, ku katsa ni magandzelo hinkwawo ya ku tirhandzela+ lama humaka eka un’wana ni un’wana loyi hi ku swi rhandza a nyikeleke gandzelo ra ku tirhandzela eka Yehovha. 6 Va sungule ku endlela Yehovha magandzelo yo hisiwa ku sukela esikwini ro sungula ra n’hweti ya vunkombo,+ hambileswi masungulo ya tempele ya Yehovha a ma nga si vekiwa.

7 Va nyike vatsemi va maribye+ ni lava va tivaka ntirho wa mavoko+ mali, va tlhela va nyika Vasidoni ni Vatiri swakudya ni swakunwa ni mafurha, hikwalaho ka leswi a va va tisela timhandzi ta mukedari hi le lwandle ti suka eLebanoni ti ya eYopa,+ hi ku landza mpfumelelo lowu va nyikiweke wona hi Hosi Korexe wa le Peresiya.+

8 Hi lembe ra vumbirhi endzhaku ka loko va fike endlwini ya Xikwembu xa ntiyiso eYerusalema, hi n’hweti ya vumbirhi, Zerubabele n’wana wa Salatiyele, Yexuwa n’wana wa Yohozadaki ni vamakwavo hinkwavo, vaprista ni Valevhi ni hinkwavo lava vuyeke eYerusalema va huma evuhlongeni,+ va sungula ntirho; va nyika Valevhi lava nga ni malembe ya 20 ku ya ehenhla ntirho wo kongomisa ku akiwa ka yindlu ya Yehovha. 9 Hiloko Yexuwa, vana vakwe ni vamakwavo na Kadimiyele ni vana vakwe, ku nga vana va Yuda, va tirha swin’we leswaku va langutela lava endlaka ntirho wo aka yindlu ya Xikwembu xa ntiyiso, va ri ni vana va Henadada,+ vana va vona ni vamakwavo, ku nga Valevhi.

10 Loko vaaki va veka masungulo ya tempele ya Yehovha,+ vaprista lava ambaleke swiambalo swa vuprista va khome timhalamhala+ ni Valevhi vana va Asafa, va khome swiphambati, va suka va yima va dzunisa Yehovha hi ku landza leswi Hosi Davhida wa le Israyele,+ a va byeleke swona. 11 Va sungula ku yimbelela+ va dzunisa ni ku khensa Yehovha “hikuva hi lonene; rirhandzu rakwe lerikulu eka Israyele a ri heli.”+ Hiloko vanhu hinkwavo va ba mikulungwana va dzunisa Yehovha hikuva masungulo ya yindlu ya Yehovha ma vekiwile. 12 Vaprista vo tala, Valevhi, varhangeri va mindyangu, vakhalabye lava voneke yindlu yo sungula,+ va rila swinene loko va vona masungulo ya yindlu leyi, kasi van’wana a va ba minkulungwana hikwalaho ka ntsako.+ 13 Hikwalaho a va nga swi koti ku hambanisa mpfumawulo wa minkulungwana ni ku rila ka vanhu, hikuva vanhu lava a va huwelela lerova va twiwa ni le kule swinene.

4 Loko valala va Yuda na Benjamini+ va twa leswaku vanhu lava vuyeke evuhlongeni+ va le ku akeni ka tempele ya Yehovha Xikwembu xa Israyele, 2 hi ku hatlisa, va ya eka Zerubabele ni tindhuna ta mindyangu, va fika va ku: “Hi pfumeleleni hi aka swin’we na n’wina; hikuva na hina hi gandzela* Xikwembu xa n’wina+ naswona a hi xi gandzela ku sukela emasikwini ya Hosi Esari-hadoni+ wa le Asiriya loyi a hi tiseke laha.”+ 3 Kambe, Zerubabele na Yexuwa ni varhangeri va mindyangu ya Israyele, va ku eka vona: “A ku na nchumu lexi mi nga xi endlaka ku hi pfuna ku akela Xikwembu xa hina yindlu,+ hi hina hi nga ta akela Yehovha Xikwembu xa Israyele hilaha Hosi Korexe wa le Peresiya a hi leriseke hakona.”+

4 Vanhu va tiko a va tshamela ku heta Vayuda matimba leswaku va ta tshika ku aka.+ 5 Va thola vatsundzuxi leswaku va ta pfilunganya ntirho wa vona+ emasikwini hinkwawo ya ku fuma ka Hosi Korexe wa le Peresiya ku ya fikela eku fumeni ka Hosi Dariyosi+ wa le Peresiya. 6 Eku sunguleni ka ku fuma ka Ahasuwerusi, va tsale papila ro hehla vaaki va Yuda na Yerusalema. 7 Nakambe, hi nkarhi wa ku fuma ka Hosi Atazekiseki wa le Peresiya, Bixilama, Mitiredata, Tabele ni vatirhikulobye hinkwavo, va tsalele hosi Atazekiseki papila leri hundzuluxeriweke hi Xiaramu.*+

8 * Ndhunankulu Rehumi na matsalana Ximxayi, va tsalele Hosi Atazekiseki papila ro hehla vaaki va le Yerusalema va ri tsala hi ndlela leyi: 9 (A ri huma eka ndhunankulu Rehumi na matsalana Ximxayi ni vatirhikulobye hinkwavo, vaavanyisi ni tindhuna, vamatsalana, vanhu va le Ereki,+ Vababilona, vaaki va le Susa+ ku nga Vaelami,+ 10 ni matiko hinkwawo lawa muchaviseki Asenapara a ma yiseke evuhlongeni, a ma nyika miti ya Samariya+ ni hinkwavo lava nga eNtsungeni wa Nambu, 11 hi leyi kopi ya papila leri va n’wi rhumeleke rona.)

“Eka Hosi Atazekiseki, papila leri ri huma eka malandza ya wena lama tshamaka etikweni leri nga eNtsungeni wa Nambu: 12 Swi tive wena hosi leswaku Vayuda lava teke laha va huma eka wena va ta eka hina, va fikile eYerusalema. Va le ku pfuxeni ka muti lowu xandzukaka ni ku endla leswo biha naswona va le ku hetiseni ka ku aka makhumbi+ ni ku lunghisa masungulo. 13 Hosi a yi swi tive leswaku, loko muti lowu wo tlhela wu pfuxiwa ni makhumbi ya wona ma hela, vanhu lava a va nge he humesi xibalo kumbe ndzuvo,*+ kutani tihosi ti ta lahlekeriwa hi xuma.* 14 Leswi munyu wa hina hi wu kumaka endlwini ya hosi* naswona hi nga swi laviki ku vona hosi yi lahlekeriwa, hi yona mhaka hi tivisaka hosi mhaka leyi, 15 leswaku ku kambisisiwa buku ya matimu ya vakokwa wa wena.+ Kutani u ta swi kuma ebukwini ya matimu leswaku muti lowu i muti wo xandzuka, lowu pfukelaka tihosi ni swifundzha, vanhu va wona va dume hi ku pfukela tihosi ku sukela khale. Hi swona leswi nga endla leswaku muti lowu wu lovisiwa.+ 16 Hi tivisa hosi leswaku, loko ko pfuxiwa muti lowu ku tlhela ku hetiwa ni makhumbi ya wona, hosi a yi nge he swi koti ku fuma tiko leri nga eNtsungeni wa Nambu.”+

17 Hosi yi rhumela rito eka ndhunankulu Rehumi na matsalana Ximxayi ni le ka vatirhikulobye va vona hinkwavo lava a va tshama eSamariya ni le tindhawini hinkwato leti nga eNtsungeni wa Nambu yi ku:

“Xewani! 18 Papila leri mi ndzi tsaleleke rona ndzi ri kumile naswona ri hlayiwile swi twala* emahlweni ka mina. 19 Ndzi lerise leswaku ku endliwa ndzavisiso, vakambisisi va kume leswaku muti wolowo a wu pfukela ni ku xandzukela tihosi ku sukela khale naswona a wu tshamela ku vanga hasahasa.+ 20 A ku ri ni tihosi ta matimba leti a ti fuma eYerusalema, leti a ti fuma ni tiko hinkwaro leri nga eNtsungeni wa Nambu naswona xibalo ni ndzuvo* a swi hakeriwa eka tona. 21 Sweswi humesani xileriso xa leswaku vavanuna volavo va tshika ntirho, leswaku muti wolowo wu nga pfuxiwi kukondza ndzi lerisa leswaku va endla tano. 22 Hatlisani mi teka goza hi mhaka leyi, leswaku hosi yi nga lahlekeriwi ku tlula mpimo.”+

23 Endzhaku ka loko papila ra Hosi Atazekiseki ri hlayeriwe Rehumi, matsalana Ximxayi ni vatirhikulobye, va tsutsumela eYerusalema eka Vayuda va ya va sindzisa ku tshika ntirho. 24 Ntirho wo aka yindlu ya Xikwembu leyi a yi ri eYerusalema wu yimile ku sukela siku rero; wu yimise xisweswo ku fikela elembeni ra vumbirhi ra ku fuma ka Hosi Dariyosi wa le Peresiya.+

5 Kutani muprofeta Hagayi+ na muprofeta Zakariya+ ntukulu wa Ido+ va profetela Vayuda lava a va ri eYuda ni le Yerusalema, hi vito ra Xikwembu xa Israyele lexi a xi va seketela. 2 Hi wona nkarhi lowu Zerubabele+ n’wana wa Salatiyele na Yexuwa+ n’wana wa Yohozadaki va sunguleke ku pfuxa yindlu ya Xikwembu,+ leyi a yi ri eYerusalema; naswona vaprofeta va Xikwembu a va ri na vona va va seketela.+ 3 Hi nkarhi wolowo ndhunankulu Tatenayi loyi a fumaka tiko leri nga eNtsungeni wa Nambu na Xetha-bozenayi ni vatirhikulobye va ya eka vona va fika va ku: “I mani loyi a mi nyikeke mpfumelelo wo aka yindlu leyi ni ku belela timhandzi leti?” 4 Endzhaku ka sweswo va ku eka vona: “Hi byeleni mavito ya vanhu lava akaka muako lowu.” 5 Kambe Xikwembu a xi va seketela* vakulukumba va Vayuda+ naswona a va va tshikisanga kukondza xiviko xi yisiwa eka Dariyosi leswaku a ta rhumela papila ra ximfumo mayelana ni mhaka leyi.

6 Hi leyi kopi ya papila leri ndhunankulu Tatenayi loyi a fumaka tiko leri ri nga eNtsungeni wa Nambu na Xetha-bozenayi ni vatirhikulobye ni tindhuna leti tshamaka eNtsungeni wa Nambu, va yi rhumeleke eka Hosi Dariyosi; 7 va n’wi rhumele xiviko, naswona a xi tsariwe hi ndlela leyi:

“Eka Hosi Dariyosi:

“Ku rhula a ku ve na wena! 8 Hosi a yi swi tive leswaku hi ye exifundzheni xa Yuda eka yindlu ya Xikwembu lexikulu naswona yi le ku akiweni hi maribye lamakulu lama ngo khunguluxiwa kunene ma vekiwa, makhumbi ya kona ma akiwa hi timhandzi. Vanhu va aka hi ku tiyimisela swinene naswona ntirho wolowo wu ya emahlweni. 9 Kutani hi vutise vakulukumba va vona hi ku: ‘I mani loyi a mi nyikeke mpfumelelo wo aka yindlu leyi ni ku belela timhandzi leti?’+ 10 Hi tlhele hi va vutisa mavito ya vona leswaku hi ta ku byela, hi ta kota ku ku tsalela mavito ya vavanuna lava rhangelaka.

11 “Va hi hlamule va ku: ‘Hina hi malandza ya Xikwembu xa tilo ni misava naswona hi le ku pfuxeni ka yindlu leyi akiweke khale swinene, leyi a yi akiwe hi hosi leyikulu ya Israyele yi tlhela yi yi heta.+ 12 Kambe, vatata wa hina va hlundzukise Xikwembu xa le tilweni,+ kutani xi va nyiketa eka Hosi Nebukadnetsara+ wa Babilona, wa Mukalidiya, loyi a mbundzumuxeke yindlu leyi,+ kutani a teka vanhu a va yisa evuhlongeni eBabilona.+ 13 Nilokoswiritano, hi lembe ro sungula ra Hosi Korexe wa le Babilona, Hosi Korexe u lerise leswaku yindlu leyi ya Xikwembu yi pfuxiwa.+ 14 Ku engetela kwalaho, Hosi Korexe u humese etempeleni ya le Babilona swibya swa nsuku ni swa silivhere swa yindlu ya Xikwembu leswi Nebukadnetsara a swi tekeke etempeleni eYerusalema a swi tisa etempeleni ya le Babilona.+ Swi nyikiwe Xexebazara,*+ wanuna loyi Korexe a n’wi vekeke ku va ndhunankulu.+ 15 Korexe a n’wi byela a ku: “Teka swibya leswi. Famba u ya swi veka etempeleni leyi nga eYerusalema naswona yindlu ya Xikwembu a yi pfuxiwe laha a yi akiwe kona.”+ 16 Kutani Xexebazara yoloye a fika a veka masungulo ya yindlu ya Xikwembu,+ leyi nga eYerusalema; ku sukela enkarhini wolowo ya ha ri eku akiweni, a yi si hetiwa.’+

17 “Kutani hina hi ri loko hosi yi swi vona swi fanerile, a ku rhumiwe munhu a ya endla vulavisisi etibukwini leti nga endlwini leyi hlayisaka swilo swa nkoka kwale Babilona, ku tiyisekisa loko Hosi Korexe a tshame a humesa xileriso xo pfuxa yindlu yoleyo ya Xikwembu eYerusalema;+ hosi a yi hi tivise xiboho xa yona emhakeni leyi.”

6 Hi wona nkarhi wolowo lowu Hosi Dariyosi a leriseke leswaku ku endliwa vulavisisi etibukwini leti nga endlwini leyi ku hlayisiwaka swilo swa nkoka eBabilona. 2 Hiloko ku kumiwa buku* endlwini ya vuhosi leyi nga le Ekibatana, exifundzheni xa Meda naswona a ku tsariwe leswi landzelaka eka yona:

3 “Hi lembe ro sungula ra ku fuma ka Hosi Korexe, Hosi Korexe u lerise leswi landzelaka mayelana ni yindlu ya Xikwembu leyi nga eYerusalema:+ ‘Vayuda a va pfuxe yindlu leswaku va ta kota ku endla magandzelo eka yona, masungulo ya yona ma fanele ma endliwa ma tiya; yi fanele yi leha timitara* ta kwalomu ka 27 yi tlhela yi anama timitara ta kwalomu ka 27+ 4 yi akiwa hi maribye lamakulu lama ngo khunguluxiwa kunene ma va tilayini tinharhu, kasi layini ya vumune a yi ve ya timhandzi;+ hinkwaswo swi ta hakeleriwa hi hosi.+ 5 Nakambe swibya swa nsuku ni swa silivhere swa yindlu ya Xikwembu leswi Nebukadnetsara a swi tekeke etempeleni leyi a yi ri eYerusalema a swi tisa eBabilona,+ swi fanele swi tlheriseriwa etempeleni leyi nga eYerusalema swi ya vekiwa endlwini ya Xikwembu.’+

6 “Kutani wena Tatenayi ndhunankulu ya tiko leri nga eNtsungeni wa Nambu na wena Xetha-bozenayi ku katsa ni vatirhikuloni, ku nga tindhuna ta tiko leri nga eNtsungeni wa Nambu,+ mi nga ngheneleli. 7 Mi nga kavanyeti ntirho wa yindlu yoleyo ya Xikwembu. Ndhunankulu ya Vayuda ni vakulukumba va Vayuda va ta pfuxa yindlu ya Xikwembu laha a yi ri kona. 8 Ku engetela eka sweswo, ndzi mi lerisa leswi mi faneleke mi swi endla leswaku mi pfuna vakulukumba va Vayuda ku pfuxa yindlu ya Xikwembu: Eka vuhlayiselo bya xuma xa hosi,+ ku nga xibalo lexi humaka etikweni leri nga eNtsungeni wa Nambu, hatlisani mi nyika vavanuna volavo mali leyi lavekaka leswaku ntirho wu ta ya emahlweni wu nga kavanyetiwi.+ 9 Mi va nyika hinkwaswo leswi lavekaka, swinkuzana+ ni makhuna+ ni swinyimpfana+ swa magandzelo yo hisiwa ya Xikwembu lexi nga etilweni, koroni,+ munyu,+ vhinyo+ ni mafurha+ hilaha vaprista lava nga eYerusalema va vulaka hakona, va fanele va swi kuma siku ni siku va nga kavanyeteki, 10 leswaku va ta tshama va ri karhi va endla magandzelo lama tsakisaka Xikwembu xa le tilweni ni ku khongelela hosi ni vana va yona.+ 11 Ndzi tlhele ndzi humesa xileriso xa leswaku loyi a nga ta tlula nawu lowu, ku ta hlomuriwa mhandzi endlwini yakwe kutani a beleriwa eka yona naswona yindlu yakwe yi ta hundzuriwa xihambukelo* xa mani na mani hikwalaho ko tlula nawu lowu. 12 Onge Xikwembu lexi endleke leswaku vito ra xona ri tshama kwalaho+ xi nga hlula hosi yin’wana ni yin’wana ni vanhu lava nga ta tlula nawu lowu kutani va onha yindlu yoleyo ya Xikwembu, leyi nga eYerusalema. Xileriso lexi xi huma eka mina Dariyosi. A swi endliwe hi ku hatlisa.”

13 Hiloko Tatenayi ndhunankulu ya tiko leri nga eNtsungeni wa Nambu, Xetha-bozenayi+ ni vatirhikulobye, va hatla va endla hinkwaswo leswi Hosi Dariyosi a va leriseke swona. 14 Kutani vakulukumba va Vayuda va ya emahlweni va aka+ hilaha muprofeta Hagayi+ na Zakariya+ ntukulu wa Ido va vuleke hakona; kutani va aka va heta hi ku landza xileriso xa Xikwembu xa Israyele+ ni hi ku landza xileriso xa Korexe,+ Dariyosi+ na Hosi Atazekiseki+ wa le Peresiya. 15 Va hete yindlu leyi hi siku ra vunharhu ra n’hweti leyi vuriwaka Adara,* hi lembe ra vutsevu ra ku fuma ka Hosi Dariyosi.

16 Kutani Vaisrayele, vaprista, Valevhi+ ni hinkwavo lava vuyeke hi le vuhlongeni, va khangula* yindlu leyi ya Xikwembu va tsakile swinene. 17 Hiloko va nyikela tinkuzi ta 100, makhuna ya 200, swinyimpfana swa 400 eku khanguriweni ka yindlu leyi ya Xikwembu ni swiphongo swa 12 swi va magandzelo ya swidyoho swa Vaisrayele hinkwavo hi ku landza nhlayo ya tinyimba ta Israyele.+ 18 Kutani ku hlawuriwa vaprista ni Valevhi hi ku landza mitirho ya vona leswaku va ta endla ntirho wa Xikwembu eYerusalema,+ hi ku ya hileswi tsariweke ebukwini ya Muxe.+

19 Kutani Vaisrayele lava vuyeke hi le vuhlongeni va tlangela Paseka hi siku ra vu-14 ra n’hweti yo sungula.+ 20 Vaprista ni Valevhi hinkwavo va tibasisile,+ kutani hinkwavo a va basile; hiloko va tlhava swifuwo swo endla magandzelo ya Paseka ya hinkwavo lava vuyeke hi le vuhlongeni, ya vapristakulobye ni ya vona vini. 21 Kutani Vaisrayele lava vuyeke hi le vuhlongeni va dya, swin’we ni hinkwavo lava a va ri na vona lava nga tshika mikhuva yo biha ya vanhu va matiko, leswaku va ta gandzela Yehovha Xikwembu xa Israyele.+ 22 Va tlhele va endla Nkhuvo Wa Swinkwa Leswi Nga Riki Na Comela+ ku ringana masiku ya nkombo va tsakile, hikuva Yehovha u endle leswaku va tsaka naswona u endle leswaku hosi ya Asiriya yi va tsakela swinene+ lerova yi va pfuna eka ntirho wo aka yindlu ya Xikwembu xa ntiyiso, Xikwembu xa Israyele.

7 Endzhaku ka swilo leswi, hi nkarhi wa ku fuma ka Hosi Atazekiseki+ wa le Peresiya, Ezra*+ a tlhelela eka rikwavo. A a ri n’wana wa Seraya,+ n’wana wa Azariya, n’wana wa Hilkiya,+ 2 n’wana wa Xalumu, n’wana wa Sadoki, n’wana wa Ahithuba, 3 n’wana wa Amariya, n’wana wa Azariya,+ n’wana wa Merayoto, 4 n’wana wa Zerahiya, n’wana wa Uzi, n’wana wa Buki, 5 n’wana wa Abixuwa, n’wana wa Finiyasi,+ n’wana wa Eliyazara,+ n’wana wa Aroni+ muprista lonkulu. 6 Ezra loyi, u te hi le Babilona. A ri matsalana loyi a nga ni vutivi bya Nawu wa Muxe,+ lowu wu humaka eka Yehovha Xikwembu xa Israyele. Hosi yi n’wi nyike hinkwaswo leswi a swi kombeleke, hikuva Yehovha Xikwembu a a ri na yena.*

7 Vaisrayele van’wana, vaprista, Valevhi,+ vayimbeleri,+ varindzi va gede+ ni vatirhi va le tempeleni*+ va ye eYerusalema hi lembe ra vunkombo ra ku fuma ka Hosi Atazekiseki. 8 Ezra u fike eYerusalema hi n’hweti ya vuntlhanu, hi lembe ra vunkombo ra ku fuma ka hosi. 9 Hi siku ro sungula ra n’hweti yo sungula, u teke riendzo a suka eBabilona, a fika eYerusalema hi siku ro sungula ra n’hweti ya vuntlhanu, hikuva Xikwembu a xi ri na yena.+ 10 Ezra a tiyimisele* ku kambisisa Nawu wa Yehovha ni ku hanya hileswi tsariweke eka wona+ ni ku dyondzisa nawu ni matirhelo ya wona eIsrayele.+

11 Hi leyi kopi ya papila leri Hosi Atazekiseki a ri nyikeke muprista Ezra loyi nakambe a a ri matsalana, mutivi wa matirhelo* ya swileriso swa Yehovha ni wa milawu leyi a yi nyikeke Vaisrayele:

12 * “Atazekiseki,+ hosi ya tihosi, eka muprista Ezra, matsalana wa Nawu wa Xikwembu xa le tilweni: Onge u nga va ni ku rhula lokukulu. 13 Ndzi lerise leswaku un’wana ni un’wana wa Vaisrayele ku katsa ni vaprista ni Valevhi lava nga emfun’weni wa mina lava lavaka ku tlhelela eYerusalema na wena, va famba.+ 14 Hikuva u rhumiwa hi hosi ni vatsundzuxi va yona va nkombo leswaku u ya kambisisa loko Nawu wa Xikwembu xa wena lexi xi nga na wena wu landzeriwa eYuda ni le Yerusalema, 15 ni ku famba ni silivhere ni nsuku leswi hosi ni vatsundzuxi va yona va swi nyikeleke hi ku swi rhandza eka Xikwembu xa Israyele lexi tshamaka eYerusalema, 16 ni silivhere hinkwayo ni nsuku leswi u nga ta swi kuma eswifundzeni hinkwaswo swa Babilona, ku katsa ni nyiko leyi vanhu ni vaprista va yi nyikeleleke yindlu ya Xikwembu xa vona leyi nga eYerusalema.+ 17 Mali leyi u fanele u hatla u yi tirhisa ku xava tinkuzi,+ makhuna,+ swinyimpfana,+ mavele+ ni swakunwa+ leswi tirhisiwaka loko ku endliwa magandzelo, kutani u ta swi nyikela ealtarini leyi nga endlwini ya Xikwembu xa n’wina le Yerusalema.

18 “Kutani xin’wana ni xin’wana lexi vonakaka xi ri xinene eka wena ni le ka vamakwenu leswaku mi xi endla, mi nga xi endla hi silivhere hinkwayo ni nsuku, hi ku ya hileswi laviwaka hi Xikwembu xa n’wina. 19 Naswona swibya hinkwaswo leswi mi nyikiwaka swona leswaku mi ta swi tirhisa endlwini ya Xikwembu xa n’wina, swi yiseni eka xona eYerusalema.+ 20 Swilo swin’wana leswi nga ta laveka endlwini ya Xikwembu xa wena, u ta swi xava hi mali ya hosi.+

21 “Mina Hosi Atazekiseki ndzi lerise vakhomi hinkwavo va mali etikweni leri nga eNtsungeni wa Nambu, leswaku hinkwaswo leswi muprista Ezra,+ matsalana wa Nawu wa Xikwembu xa le tilweni a swi kombelaka eka n’wina, mi fanele mi swi endla hi ku hatlisa, 22 mi fanele mi n’wi nyika ku ya fika eka titalenta* ta silivhere ta 100, mpimo wa tikoro* ta koroni ta 100, mpimo wa tibati* ta vhinyo+ ta 100, mpimo wa tibati ta mafurha+ ta 100 kasi munyu+ wona n’wi nyikeni lowu a wu lavaka. 23 Hinkwaswo leswi lerisiweke hi Xikwembu xa le tilweni a swi endliwe hi ku hiseka, swi endleriwa yindlu ya Xikwembu xa le tilweni,+ leswaku ku nga vi na khombo leri nga ta wela mfumo wa hosi ni vana va yona.+ 24 Ndzi tlhela ndzi mi tsundzuxa leswaku a mi pfumeleriwanga ku teka xibalo+ kumbe muthelo eka vaprista ni Valevhi, vayimbeleri,+ varindzi va tigede, vatirhi va le tempeleni*+ ni hinkwavo lava tirhaka endlwini ya Xikwembu.

25 “Kutani wena Ezra, hi ku tirhisa vutlhari lebyi u byi kumeke eka Xikwembu xa wena,* hlawula vamajistarata ni vaavanyisi lava nga ta hamba va avanyisa vanhu hinkwavo lava nga etikweni leri nga eNtsungeni wa Nambu, hinkwavo lava tivaka milawu ya Xikwembu xa wena; naswona lava nga yi tiviki u ta va dyondzisa.+ 26 Kutani un’wana ni un’wana loyi a nga ta tlula Nawu wa Xikwembu xa wena ni nawu wa hosi, a a avanyisiwe hi ku hatlisa, ku nga ha va hi ku gweviwa rifu, ku hlongoriwa etikweni, ndziho kumbe ku pfaleriwa ekhotsweni.”

27 Onge Yehovha Xikwembu xa vatata wa hina a nga dzunisiwa, loyi a pfuneke hosi leswaku yi kota ku sasekisa yindlu ya Yehovha eYerusalema!+ 28 U tirhise hosi, vatsundzuxi va yona+ ni tihosana ta yona hinkwato ta matimba, ku ndzi komba leswaku wa ndzi rhandza.+ Hiloko ndzi va ni xivindzi* hikuva Yehovha Xikwembu xa mina a a ri na mina, kutani ndzi hlengeleta vavanuna lava nga varhangeri* eIsrayele leswaku va famba na mina.

8 Hi lawa mavito ni swivongo swa tindhuna ta mindyangu ya lava va nga suka na mina eBabilona hi nkarhi wa ku fuma ka Hosi Atazekiseki:+ 2 eka vana va Finiyasi,+ Gerixomu; eka vana va Ithamara,+ Daniyele; eka vana va Davhida, Hatuxi; 3 eka vana va Xekaniya, eka vana va Paroxi, Zakariya, loyi a tsarisiwe ni vavanuna va 150; 4 eka vana va Pahata-mowabu,+ Eliyeho-enayi n’wana wa Zerahiya, a ri ni vavanuna va 200; 5 eka vana va Zatu,+ Xekaniya n’wana wa Yahaziyele, a ri ni vavanuna va 300; 6 eka vana va Adini,+ Ebedi n’wana wa Yonathani, a ri ni vavanuna va 50; 7 eka vana va Elami,+ Yexaya n’wana wa Ataliya, a ri ni vavanuna va 70; 8 eka vana va Xefatiya,+ Zebadiya n’wana wa Mikayele, a ri ni vavanuna va 80; 9 eka vana va Yowabu, Obadiya n’wana wa Yehiyele, a ri ni vavanuna va 218; 10 eka vana va Bani, Xelomiti n’wana wa Yosifiya, a ri ni vavanuna va 160; 11 eka vana va Bebayi,+ Zakariya n’wana wa Bebayi, a ri ni vavanuna va 28; 12 eka vana va Azigadi,+ Yohanani n’wana wa Hakatana, a ri ni vavanuna va 110; 13 eka vana va Adonikamu+ lava a va ri vo hetelela, hi lawa mavito ya vona: Elifalete, Yehiyele na Xemaya, a va ri ni vavanuna va 60; 14 eka vana va Bigivhayi,+ Utayi na Zabudi, a va ri ni vavanuna va 70.

15 Ndzi va hlengelete enambyeni lowu khulukelaka eAhavha,+ kutani hi dzima mixaxa kwalaho masiku manharhu. Kambe loko ndzi langutisisa vanhu ni vaprista, ndzi kume leswaku Valevhi a va nga ri kona. 16 Hiloko ndzi rhumela rito leswaku ku vitaniwa Eliyezere, Ariyele, Xemaya, Elinathani, Yaribi, Elinathani, Nathani, Zakariya na Mexulama lava a va ri varhangeri ku katsa na Yowaribi na Elinathani, lava a va ri vadyondzisi. 17 Ndzi va rhuma eka Ido loyi a nga murhangeri wa le Kasifiya. Ndzi va byela Ieswaku va byela Ido ni vamakwavo, lava nga vatirhi va le tempeleni* lava a va ri eKasifiya, leswaku va hi rhumela vanhu lava nga ta tirha endlwini ya Xikwembu xa hina. 18 Leswi Xikwembu xa hina a xi ri na hina,* va hi tisele wanuna wo tlhariha la humaka eka vana va Maheli+ ntukulu wa Levhi n’wana wa Israyele, ku nga Xerebiya+ ni vana vakwe ni vamakwavo, vavanuna va 18; 19 na Haxabiya loyi a nga ta na Yexaya loyi a humaka eka Vamerari,+ vamakwavo ni vana va vona, hinkwavo ka vona a va ri 20. 20 Naswona a ku ri na 220 wa vatirhi va le tempeleni* lava a va hlawuriwe hi Davhida ni tihosana leswaku va ta pfuna Valevhi, lava hinkwavo ka vona mavito ya vona a ma tsariwile ebukwini.

21 Hiloko ndzi va tivisa leswaku hi ta titsona swakudya kwalaho enambyeni wa Ahavha, hi titsongahata emahlweni ka Xikwembu xa hina, leswaku xi ta hi kongomisa eka riendzo ra hina xi tlhela xi sirhelela vana va hina ni nhundzu ya hina hinkwayo. 22 A swi ndzi khomisa tingana ku kombela hosi leswaku yi hi nyika masocha ni vagadi va tihanci leswaku ma ta hi sirhelela eka valala endleleni, hikuva a hi byele hosi hi ku: “Xikwembu xa hina xi na hinkwavo lava xi lavaka,+ kambe matimba ni vukarhi bya xona swi lwisana ni hinkwavo lava xi fularhelaka.”+ 23 Hikwalaho hi titsone swakudya hi tlhela hi kombela Xikwembu xa hina leswaku xi hi pfuna emhakeni leyi naswona xi hi yingisile.+

24 Hiloko ndzi hlawula tindhuna ta 12 ta vaprista, ku nga Xerebiya na Haxabiya+ ni vamakwavo va vona va khume. 25 Kutani ndzi va nyika silivhere ni nsuku ni swibya, ku nga munyikelo lowu hosi ni vatsundzuxi va yona ni tihosana ta yona ni Vaisrayele hinkwavo lava a va ri kona kwalaho va swi nyikeleleke yindlu ya Xikwembu xa hina.+ 26 Hiloko ndzi va nyika titalenta* ta silivhere ta 650, swibya swa silivhere swa 100 leswi durhaka titalenta timbirhi, titalenta ta nsuku ta 100, 27 mikambana leyitsongo ya nsuku ya 20 leyi durhaka tidarika* ta 1 000 ni swibya swimbirhi swa koporo, leswi hatimaka ku fana ni nsuku.

28 Kutani ndzi va byela ndzi ku: “Ma kwetsima eka Yehovha+ ni swibya swa kwetsima, kasi silivhere ni nsuku i magandzelo ya ku tirhandzela lama yaka eka Yehovha Xikwembu xa vakokwa wa n’wina. 29 Swi hlayiseni hi vukheta kukondza mi swi pima emahlweni ka tindhuna ta vaprista ni Valevhi ni tihosana ta mindyangu ya Israyele eYerusalema,+ etiholweni to dyela endlwini ya Yehovha.” 30 Hiloko vaprista ni Valevhi va teka silivhere ni nsuku ni swibya leswi va pimeriweke swona leswaku va swi yisa eYerusalema endlwini ya Xikwembu xa hina.

31 Eku heteleleni, hi suka enambyeni wa Ahavha+ hi siku ra vu-12 ra n’hweti yo sungula+ leswaku hi ya eYerusalema, naswona Xikwembu xa hina a xi ri na hina, xi hi sirhelerile eka valala ni le ka swigevenga endleleni. 32 Hiloko hi fika eYerusalema+ hi tshama masiku manharhu. 33 Kutani hi siku ra vumune, hi sungula ku pima silivhere ni nsuku ni swibya endlwini ya Xikwembu xa hina+ hi swi nyika Meremoto+ n’wana wa muprista Yuriya a ri na Eliyazara n’wana wa Finiyasi, a va ri ni Valevhi ku nga Yozabadi+ n’wana wa Yexuwa na Nowadiya n’wana wa Binuyi.+ 34 Hinkwaswo ka swona a swi hlayiwile swi tlhela swi pimiwa, ntiko wa swona hinkwawo a wu tsariwe ehansi. 35 Lava va vuyeke hi le vuhlongeni, va nyikele magandzelo yo hisiwa eka Xikwembu xa Israyele, tinkuzi+ ta 12 ta tiko hinkwaro ra Israyele, makhuna+ ya 96, swinyimpfana swa xinuna swa 77 ni swiphongo+ swa 12 swi va gandzelo ra xidyoho; hinkwaswo leswi swi ve gandzelo ro hisiwa eka Yehovha.+

36 Hiloko hi nyika tindhuna ta hosi leti nga eswifundzheni ni tindhunankulu leti nga etikweni leri nga eNtsungeni wa Nambu+ milawu leyi humaka eka hosi+ kutani ti pfuna vanhu ni ku seketela ntirho wa yindlu ya Xikwembu xa ntiyiso.+

9 Endzhaku ka loko swilo leswi swi endliwile, tihosana ti ta eka mina ti ku: “Vaisrayele, vaprista ni Valevhi a va tihambanisanga ni vanhu va matiko ni swiendlo swa vona swo nyenyetsa+ swa Vakanana, Vaheti, Vaperezi, Vayebusi, Vaamoni, Vamowabu, Vaegipta+ ni Vaamori.+ 2 Va teke van’wana va vana va vona va va vasati va vona ni va vana va vona.+ Kutani vona, ku nga vana* vo kwetsima+ va tihlanganise ni vanhu va matiko.+ Tindhuna ni vapfuneti va tihosi hi vona va nga rhanga va endla manyala lawa.”

3 Loko ndzi twa mhaka leyi ndzi handzule swiambalo swa mina ni xiambalo xa mina xo pfumala mavoko, ndzi tsuvula misisi yin’wana enhlokweni ya mina ni malepfu, ndzi tshama ehansi ndzi tsemeke nhlana. 4 Kutani hinkwavo lava chavaka marito ya Xikwembu xa Israyele va hlengeletana laha a ndzi ri kona hikwalaho ka ku nga tshembeki ka vanhu lava vuyeke hi le vuhlongeni, mina a ndza ha tsemeke nhlana kukondza ku endliwa gandzelo ra mavele ra nimadyambu.+

5 Hi nkarhi wa gandzelo ra mavele ra nimadyambu,+ ndzi suka ndzi yima laha a ndzi rila ndzi ri kona ni swiambalo swa mina leswi handzukeke, kutani ndzi khinsama ndzi tlakusela mavoko ya mina eka Yehovha Xikwembu xanga. 6 Kutani ndzi ku: “Xikwembu xanga, ndzi ni tingana lerova ndzi vona swi nga ndzi faneli ni ku khongela eka wena, Xikwembu xanga, hikuva swidyoho swa hina swi tele ngopfu naswona milandzu ya hina yi tele lerova yi fika ni le tilweni.+ 7 Hi ve ni nandzu lowukulu ku sukela enkarhini wa vakokwa wa hina ku ta fikela sweswi;+ naswona hikwalaho ka swihoxo swa hina, hina, tihosi ta hina ni vaprista va hina hi nyiketiwe evokweni ra tihosi ta matiko, ebangeni,+ evuhlongeni,+ eku phangeriweni ka swilo swa hina+ ni le ku khomisiweni ka tingana, hilaha swi nga hakona namuntlha.+ 8 Kambe Yehovha Xikwembu xa hina u hi kombe musa swa nkarhinyana hi ku pfumelela masalela ya hina ma huma evuhlongeni ni hi ku hi nyika vutshamo lebyi sirhelelekeke endhawini yakwe yo kwetsima,+ leswaku a hi nyika ntsako, wena Xikwembu xa hina ni ku hi hefemurisanyana evuhlongeni bya hina. 9 Hikuva hambileswi hi nga mahlonga,+ Xikwembu xa hina a xi hi tshikanga evuhlongeni bya hina; kambe xi hi kombe rirhandzu emahlweni ka tihosi ta Peresiya,+ leswaku ti hi pfuna hi pfuxa yindlu ya Xikwembu xa hina+ ni ku pfuxa marhumbi ya yona ni ku hi akela khumbi ro hi sirhelela eYuda ni le Yerusalema.

10 “Kambe sweswi hi ta ku yini, Xikwembu xa hina hi mhaka leyi? Hikuva hi tshike swileriso swa wena, 11 leswi u hi nyikeke swona hi ku tirhisa malandza ya wena ku nga vaprofeta, u ku: ‘Tiko leri mi nghenaka ku ya ri teka i tiko leri thyakeke, hikwalaho ka thyaka ra vanhu va matiko, hikwalaho ka swiendlo swa vona swo nyenyetsa leswi va ri tateke ha swona ku suka emakumu man’wana ku ya emakumu man’wana hi thyaka ra vona.+ 12 Hikwalaho mi nga pfumeleli vana va n’wina va tekiwa hi vana va vona, hambi ku ri vana va vona mi nga pfumeli va tekiwa hi vana va n’wina;+ mi nga tshuki mi endla nchumu lowu nga ta va tisela ku rhula ni lowu nga ta endla leswaku swilo swi va fambela kahle,+ leswaku mi ta va ni matimba kutani mi dya leswinene leswi kumekaka etikweni leri, mi ri siyela vana va n’wina tanihi ndzhaka hilaha ku nga heriki.’ 13 Hambiloko hi ve ni maxangu hikwalaho ka swiendlo swa hina swo biha ni nandzu wa hina lowukulu, hikuva wena Xikwembu xa hina a wu hi xupulanga hi ku ya hi xihoxo xa hina,+ naswona u pfumelele van’wana va hina lava nga laha leswaku hi pona,+ 14 xana hi ta tlhela hi tlula swileriso swa wena kutani hi tekana ni vanhu lava endlaka swilo leswi swo nyenyetsa?+ Xana a wu nge hi hlundzukeli swinene lerova u hi lovisa hi ku helela, u nga siyi munhu? 15 Yehovha Xikwembu xa Israyele, u lulamile+ hikuva hi ponile ku fikela esikwini leri. Sweswi hi yime emahlweni ka wena hikwalaho ka nandzu wa hina, hikuva a swi koteki ku yima emahlweni ka wena hikwalaho ka leswi.”+

10 Loko Ezra a ri karhi a khongela+ ni ku tiphofula a ri karhi a rila a pavalale emahlweni ka yindlu ya Xikwembu xa ntiyiso, ntshungu lowukulu wa vavanuna, vavasati ni vana va Vaisrayele va hlengeletanile va n’wi rhendzela hikuva vanhu a va rila hi xiviti. 2 Kutani Xekaniya n’wana wa Yehiyele+ wa vana va Elami+ a ku eka Ezra: “A hi tshembekanga eka Xikwembu xa hina hi ku teka vasati va matiko.+ Nilokoswiritano Vaisrayele va nga ha tsetseleriwa. 3 Sweswi a hi endleni ntwanano ni Xikwembu xa hina,+ hi hlongola vasati lava hinkwavo ni vana va vona hi ku landza nkongomiso wa Yehovha ni wa lava chavaka xileriso xa Xikwembu xa hina.+ A hi endleni leswi Nawu wu vulaka swona. 4 Suka u yima, hikuva mhaka leyi yi lava wena, hina hi ta ku seketela. U nga chavi, endla leswi faneleke.”

5 Hiloko Ezra a suka a yima, a lerisa leswaku tindhuna ta vaprista, Valevhi ni Vaisrayele hinkwavo va hlambanya ku endla leswi vuriweke.+ Hiloko va hlambanya. 6 Kutani Ezra a suka emahlweni ka yindlu ya Xikwembu xa ntiyiso, a nghena eholweni yo dyela ya Yehohanani n’wana wa Eliyaxibi. Hambileswi a ngheneke kwalaho a nga dyanga nchumu hambi ku nwa mati, hikuva a a ri ku rileni hikwalaho ka ku nga tshembeki ka vanhu lava vuyeke hi le vuhlongeni.+

7 Hiloko va tivisa etikweni hinkwaro ra Yuda ni ra Yerusalema leswaku hinkwavo lava vuyeke hi le vuhlongeni va hlengeletana eYerusalema; 8 naswona hi ku ya hi xiboho xa tihosana ni vakulukumba, un’wana ni un’wana loyi a a ta tsandzeka ku ta kukondza ku hundza masiku manharhu, a a ta tekeriwa swilo swa yena hinkwaswo naswona a a ta hlongoriwa exikarhi ka lava vuyeke hi le vuhlongeni.+ 9 Kutani vavanuna hinkwavo va Yuda na Benjamini va hlengeletana eYerusalema ku nga si hundza masiku manharhu, hi n’hweti ya vukaye, hi siku ra vu-20 ra n’hweti. Vanhu hinkwavo a va tshame exivaveni* xa yindlu ya Xikwembu xa ntiyiso, va ri karhi va rhurhumela hikwalaho ka mhaka leyi ni hikwalaho ka mpfula leyi a yi na hi matimba.

10 Hiloko muprista Ezra a suka a yima a ku: “N’wina a mi tshembekanga hikuva mi teke vasati va matiko+ kutani mi engetelele Israyele nandzu. 11 Hikwalaho tisoleni eka Yehovha Xikwembu xa vakokwa wa n’wina, mi endla ku rhandza ka yena. Tihambaniseni ni vanhu va tiko ni vasati lava.”+ 12 Hiloko vanhu hinkwavo va hlamula hi rito leri twalaka va ku: “Hi ta endla hinkwaswo leswi u swi vulaka. 13 Kambe ku ni vanhu vo tala naswona i nkarhi wa timpfula. A swi koteki ku yima ehandle naswona mhaka leyi a yi nge teki siku rin’we kumbe mambirhi, hikuva hi xandzuke ngopfu. 14 Hikwalaho, hi kombela leswaku tihosana ta hina ku va tona ti salaka laha ti yimela vanhu hinkwavo+ leswaku ti hi lulamisela mhaka leyi. Kutani hinkwavo lava nga emitini ya hina lava nga teka vasati va matiko va ta vekeriwa nkarhi lowu va nga ta ta ha wona ni vakulukumba ni vaavanyisi va muti wun’wana ni wun’wana, kukondza ku hlundzuka lokukulu ka Xikwembu xa hina ku vohla emhakeni leyi.”

15 Hambiswiritano, Yonathani n’wana wa Asahele na Yahaziya n’wana wa Tikwa a va nga yimi na yona mhaka leyi naswona Mexulama na Xabetayi+ lava a ku ri Valevhi a va va seketela. 16 Kambe lava vuyeke hi le vuhlongeni va endla leswi ku twananiweke ha swona; hiloko muprista Ezra ni varhangeri va mindyangu, hinkwavo ka vona hi ku ya hi mavito ya vona, va sungula ku kambisisa mhaka leyi hi siku ro sungula ra n’hweti ya vukhume; 17 hi siku ro sungula ra n’hweti yo sungula va heta ku tirhana na mhaka ya vavanuna hinkwavo lava nga teka vasati va matiko. 18 Kutani ku kumeke leswaku van’wana va vana va vaprista va teke vasati va matiko:+ eka vana va Yexuwa+ n’wana wa Yohozadaki ni vamakwavo, ku kumeke Maseya na Eliyezere na Yaribi na Gedaliya. 19 Kambe va tshembise ku hlongola vasati va vona naswona leswi a va ri ni nandzu, a va ta humesa khuna ra gandzelo ro riha nandzu entlhambini wa vona.+

20 Eka vana va Imere+ a ku ri na Hanane na Zebadiya; 21 eka vana va Harimi+ a ku ri na Maseya, Eliya, Xemaya, Yehiyele na Uziya; 22 eka vana va Paxahuru+ a ku ri na Eliwenayi, Maseya, Iximayele, Nethanele, Yozabadi na Eliyasa. 23 Eka Valevhi, a ku ri na Yozabadi, Ximeyi, Kelaya (ku nga Kelita), Petahiya, Yuda na Eliyezere; 24 eka vayimbeleri a ku ri na Eliyaxibi; eka varindzi va tigede a ku ri na Xalumu, Teleme na Uri.

25 Eka Israyele, eka vana va Paroxi,+ a ku ri na Ramiya, Iziya, Malikiya, Miyamini, Eliyazara, Malikiya na Benaya; 26 eka vana va Elami+ a ku ri na Mataniya, Zakariya, Yehiyele,+ Abidi, Yeremoto na Eliya; 27 eka vana va Zatu+ a ku ri na Eliwenayi, Eliyaxibi, Mataniya, Yeremoto, Zabada na Aziza; 28 eka vana va Bebayi+ a ku ri na Yehohanani, Hananiya, Zabayi na Atalayi; 29 eka vana va Bani a ku ri na Mexulama, Malukana, Adaya, Yaxubu, Xeyala na Yeremoto; 30 eka vana va Pahata-mowabu+ a ku ri na Adina, Kelala, Benaya, Maseya, Mataniya, Bezalele, Binuyi na Manase; 31 eka vana va Harimi+ a ku ri na Eliyezere, Ixiya, Malikiya,+ Xemaya, Ximiyoni, 32 Benjamini, Maluka na Xemariya; 33 eka vana va Haxumu+ a ku ri na Matenayi, Matata, Zabada, Elifalete, Yeremayi, Manase na Ximeyi; 34 eka vana va Bani a ku ri na Maadayi, Amirama, Uwele, 35 Benaya, Bedeya, Keluhi, 36 Vhaniya, Meremoto, Eliyaxibi, 37 Mataniya, Matenayi na Yasu; 38 eka vana va Binuyi a ku ri na Ximeyi, 39 Xelemiya, Nathani, Adaya, 40 Makinadebayi, Xaxayi, Xarayi, 41 Azarele, Xelemiya, Xemariya, 42 Xalumu, Amariya na Yosefa; 43 eka vana va Nebo a ku ri na Yeyiyele, Matitiya, Zabada, Zebina, Yadayi, Yuwele na Benaya. 44 Hinkwavo lava, a va teke vasati va matiko,+ kambe va va hlongorile ni vana va vona.+