YONASI

1 Yehovha a vulavula na Yonasi*+ n’wana wa Amitayi, a ku: 2 “Yana emutini lowukulu wa Ninivha,+ u ya twarisa ku avanyisiwa ka wona hikuva ndzi vone vubihi bya wona.”

3 Kambe Yonasi a balekela Yehovha a ya eTaraxixi; a suka a ya eYopa kutani a kuma xikepe lexi yaka eTaraxixi. Hiloko a hakela, a khandziya xikepe ni van’wana lava a va ya eTaraxixi a balekela Yehovha.

4 Yehovha a rhumela moya lowukulu elwandle, hiloko ku va ni xidzedze lexikulu elwandle lerova xikepe xi lava ni ku tshoveka. 5 Vatluti va chuha ngopfu lerova un’wana ni un’wana wa vona a sungula ku kombela mpfuno eka xikwembu xakwe. Kutani va sungula ku lahlela nhundzu ya vona elwandle leswaku xikepe xi nga tikeriwi.+ Kambe Yonasi a ya endzenindzeni ka xikepe, a fika a etlela. 6 Mulawuri wa xikepe a ya eka yena a ku: “Hikwalaho ka yini u etlele? Pfuka u kombela mpfuno eka xikwembu xa wena! Kumbexana Xikwembu xa ntiyiso xi ta hi twela vusiwana hi nga fi.”+

7 Hiloko va ku: “Tanani, a hi hoxeni vuhlolotwana*+ leswaku hi ta tiva loyi a hi vangelaka khombo leri.” Va hoxa vuhlolotwana,* kutani vuhlolotwana* byi komba Yonasi.+ 8 Va ku eka yena: “Hi kombela u hi byela, i mani loyi a hi vangelaka khombo leri? U tirha yini naswona u huma kwihi? U huma etikweni rihi naswona u wa rixaka rihi?”

9 A va hlamula a ku: “Ndzi Muheveru naswona ndzi gandzela Yehovha Xikwembu xa le matilweni, Loyi a endleke lwandle ni misava.”

10 Hiloko vavanuna volavo va sungula ku chava swinene, va ku: “U endle yini?” (Vavanuna lava va swi twile leswaku a a balekela Yehovha, hikuva a a va byerile.) 11 Kutani va ku eka yena: “Hi fanele hi endla yini hi wena leswaku lwandle ri miyela?” Hikuva lwandle a ri ya ri kariha ngopfu. 12 Hiloko a ku eka vona: “Ndzi tlakuleni mi ndzi lahlela elwandle, lwandle ri ta miyela; hikuva ndza swi tiva leswaku xidzedze lexi xa matimba xi va kona hikwalaho ka mina.” 13 Kutani vavanuna lava va ringeta hi matimba ku yisa xikepe eribuweni, kambe va tsandzeka, hikuva lwandle a ri ya emahlweni ri va karihela ngopfu.

14 Hiloko va huwelela eka Yehovha va ku: “Yehovha, hi nga tshuki hi lova hikwalaho ka munhu loyi! U nga hi voni nandzu hikwalaho ka ngati ya munhu loyi a nga riki na nandzu, hileswi u endleke ku rhandza ka wena, Yehovha Xikwembu xa hina.” 15 Hiloko va tlakula Yonasi va n’wi lahlela elwandle; kutani lwandle ri miyela. 16 Vavanuna lava va sungula ku chava Yehovha swinene,+ va endlela Yehovha magandzelo, va hlambanya leswaku va ta n’wi tirhela.

17 Yehovha a rhuma nhlampfi leyikulu leswaku yi mita Yonasi, kutani Yonasi a tshama ekhwirini ra nhlampfi leyi, masiku manharhu ni vusiku bya kona.+

2 Kutani Yonasi a khongela eka Yehovha Xikwembu xa yena a ri ekhwirini ra nhlampfi,+ 2 a ku:

“Ndzi kombele mpfuno eka Yehovha loko ndzi ri ekhombyeni naswona u ndzi hlamurile.+

Ndzi kombele ku pfuniwa ndzi ri eSirheni.*+

Wena u ndzi twile.

Maboboma ni magandlati ya wena swi ndzi khukhurile.+

 4 Hiloko ndzi ku, ‘U ndzi hlongorile emahlweni ka wena!

Xana ndza ha ta tlhela ndzi yi vona tempele ya wena yo kwetsima?’

Nhloko ya mina a yi tsondzeriwe hi swimilana swa le lwandle.

 6 Ndzi mbombomele ndzi ya fika ehansi ka lwandle.*

Tinyangwa ta misava a ti ndzi pfalerile.

Kambe Yehovha Xikwembu xanga, u ndzi humesile ekheleni.+

 7 Loko ndzi ri ekusuhi ni ku fa, ndzi tsundzuke Yehovha.+

Kutani xikhongelo xa mina xi te eka wena etempeleni ya wena yo kwetsima.+

 8 Lava gandzelaka swifaniso, va fularhela loyi a va rhandzaka swinene.

 9 Loko ku ri mina, ndzi ta ku dzunisa ndzi tlhela ndzi ku endlela gandzelo.

Ndzi ta endla leswi ndzi ku tshembiseke swona.+

Yehovha, hi wena u ponisaka.”+

10 Hiloko Yehovha a lerisa nhlampfi leswaku yi hlantela Yonasi eribuweni ra lwandle.

3 Yehovha a vulavula na Yonasi ra vumbirhi, a ku:+ 2 “Yana emutini lowukulu wa Ninivha,+ u ya wu byela leswi ndzi ku byelaka swona.”

3 Hiloko Yonasi a ya eNinivha+ hilaha Yehovha a n’wi leriseke hakona.+ Ninivha a wu ri muti lowukulu,* lowu a swi teka masiku manharhu ku wu tsemakanya hi milenge. 4 Hiloko Yonasi a nghena emutini, a famba siku hinkwaro a huwelela a ku: “Ku lo sala masiku ya 40 ntsena leswaku Ninivha wu herisiwa.”

5 Vanhu va le Ninivha va pfumela eka Xikwembu,+ kutani va lerisa leswaku vanhu va titsona swakudya ni ku ambala swiambalo swo khwaxa, ku sukela eka lonkulu ku ya eka lontsongo. 6 Loko hosi ya Ninivha yi swi twa, yi suka exiluvelweni xa yona yi hluvula xiambalo xa yona xa vuhosi, yi ambala swiambalo swo khwaxa kutani yi tshama enkumeni. 7 Yi tlhela yi endla xitiviso emutini hinkwawo wa Ninivha,

“Hi lexi xileriso xa hosi ni tindhuna ta yona: Ku hava munhu kumbe xiharhi, ntlhambi wa tihomu kumbe wa tinyimpfu, leswi swi faneleke swi dya xanchumu. A ku fanelanga ku dyiwa kumbe ku nwiwa mati. 8 Vanhu ni swiharhi va fanele va ambala swiambalo swo khwaxa; va huwelela eka Xikwembu hi timbilu ta vona hinkwato, va tshika tindlela ta vona to biha ni ku endla madzolonga. 9 Kumbexana Xikwembu xa ntiyiso xi nga tshika ku endla leswi xi tiyimiseleke ku swi endla, xi hi tsetselela leswaku hi nga lovisiwi!”

10 Loko Xikwembu xa ntiyiso xi vona leswi va swi endleke, ndlela leyi va nga ti tshika ha yona tindlela ta vona to biha,+ xi tshika ku tisa khombo leri xi vuleke leswaku xi ta va tisela rona.+

4 Kambe sweswo a swi n’wi tsakisanga Yonasi, hiloko a hlundzuka swinene. 2 Kutani a khongela eka Yehovha, a ku: “Yehovha, xana mhaka leyi a ndzi yi vulanga loko ndza ha ri etikweni ra rikwerhu? Hi swona swi endleke ndzi ringeta ku balekela eTaraxixi;+ hikuva a ndzi swi tiva leswaku wena u Xikwembu lexi nga ni ntwelavusiwana* ni tintswalo, lexi hlwelaka ku hlundzuka naswona xi nga ni rirhandzu,+ lexi nga rhandziki ku lovisa. 3 Yehovha Xikwembu xanga, ndzi kombela u ndzi dlaya, hikuva swa antswa leswaku ndzi fa ematshan’weni ya leswaku ndzi hanya.”+

4 Yehovha a n’wi vutisa a ku: “Xana u ni xivangelo lexi twalaka xo hlundzuka?”

5 Yonasi a huma emutini a ya tshama evuxeni bya wona. A tiendlela ndzhuti a tshama ehansi ka wona, leswaku a vona leswi nga ta endleka emutini wolowo.+ 6 Yehovha Xikwembu a mirisa ximilana xa mindzheko,* xi endlela Yonasi ndzhuti, leswaku a wisa maxangu yakwe. Yonasi a tsaka ngopfu hikwalaho ka ximilana lexi.

7 Kambe Xikwembu xa ntiyiso xi rhumela xivungu hi matakuxa ya mundzuku wa kona leswaku xi dya ximilana xa mindzheko, kutani ximilana xi vuna. 8 Loko dyambu ri huma, Xikwembu xi rhumela moya wo hisa wa le vuxeni, kutani dyambu ri hisa nhloko ya Yonasi, lerova a lava ku titivala. A tshamela ku vula leswaku swa antswa a fa, hi ku phindhaphindha a ku, “Swa antswa ndzi fa ematshan’weni ya leswaku ndzi hanya.”+

9 Xikwembu xi vutisa Yonasi xi ku: “Xana u ni xivangelo lexi twalaka xo hlundzuka hikwalaho ka ximilana lexi?”+

Hiloko a ku: “Ndzi ni xivangelo xo hlundzuka lerova ndzi lava ni ku fa.” 10 Kambe Yehovha a ku: “U xi twele vusiwana ximilana lexi, lexi u nga xi tirhelangiki kumbe ku xi byala; xi kule hi vusiku byin’we xi tlhela xi fa hi vusiku byebyo. 11 Xana a ndzi fanelanga ndzi va ni ntwelavusiwana eka muti lowukulu wa Ninivha,+ lowu wu nga ni vanhu vo tlula 120 000, lava va nga tiviki leswinene ni leswo biha, ku katsa ni swifuwo swa vona swo tala?”+