ZAKARIYA
1 Hi n’hweti ya vunhungu, hi lembe ra vumbirhi ra ku fuma ka Dariyosi,+ rito ra Yehovha ri fika eka muprofeta Zakariya*+ n’wana wa Berakiya n’wana wa Ido, ri ku: 2 “Yehovha u va hlundzukele ngopfu vatata wa n’wina.+
3 “Va byele u ku, ‘Yehovha wa mavuthu u ri: “‘Tlhelelani eka mina,’ ku vula Yehovha wa mavuthu, ‘kutani ndzi ta tlhelela eka n’wina,’+ ku vula Yehovha wa mavuthu.”’
4 “‘Mi nga fani ni vatata wa n’wina, lava vaprofeta va khale va va byeleke va ku: “Yehovha wa mavuthu u ri, ‘Ndzi kombela mi tshika tindlela ni mitirho ya n’wina yo biha.’”’+
“‘Kambe a va ndzi yingisanga va ndzi fularherile,’+ ku vula Yehovha.
5 “‘Va kwihi vatata wa n’wina sweswi? Xana vaprofeta va hanye hilaha ku nga heriki? 6 Hambiswiritano, marito ya mina ni milawu ya mina leswi ndzi swi leriseke malandza ya mina, ku nga vaprofeta xana vatata wa n’wina a va swi vonanga swi hetiseka?’+ Kutani va tlhelele eka mina va ku: ‘Yehovha wa mavuthu u hi xupurile hi ku ya hi swiendlo swa hina, hilaha a a tiyimisele ku endla hakona.’”+
7 Hi siku ra vu-24 ra n’hweti ya vu-11, ku nga n’hweti ya Xebata,* hi lembe ra vumbirhi ra ku fuma ka Dariyosi,+ rito ra Yehovha ri fika eka muprofeta Zakariya n’wana wa Berakiya n’wana wa Ido, ri ku: 8 “Ndzi vone xivono nivusiku. A ku ri ni munhu la gadeke hanci yo tshwuka, a yimile a nga fambi exikarhi ka mirhi ya mirta leyi a yi ri enkoveni; endzhaku ka yena ku ri ni tihanci to tshwuka, ta ribungu ni to basa.”
9 Hiloko ndzi ku: “I vamani lava, hosi yanga?”
Ntsumi leyi a yi vulavula na mina yi ku: “Ndzi ta ku komba leswaku lava i vamani.”
10 Kutani munhu loyi a a yime exikarhi ka mirhi ya mirta a ku: “Lava hi lava Yehovha a va rhumeke leswaku va ya rhendzeleka emisaveni.” 11 Hiloko va hlamula ntsumi ya Yehovha leyi a yi yime exikarhi ka mirhi ya mirta va ku: “Hi rhendzelekile emisaveni naswona misava hinkwayo yi tshamisekile yi ni ku rhula.”+
12 Kutani ntsumi ya Yehovha yi ku: “Yehovha wa mavuthu, xana u ta tshama ku fikela rini u nga wu tweli vusiwana muti wa Yerusalema ni miti ya Yuda+ leyi u yi hlundzukeleke malembe lawa ya 70?”+
13 Yehovha a hlamula ntsumi leyi a yi vulavula na mina, hi marito ya musa lama chavelelaka. 14 Kutani ntsumi leyi a yi vulavula na mina yi ku: “Huwelela u ku, ‘Yehovha wa mavuthu u ri: “Ndzi n’wi rhandza swinene Yerusalema na Siyoni naswona ndza khathala ha vona.+ 15 Ndzi ma hlundzukele ngopfu matiko lawa ma tshamisekeke,+ hikuva a ndzi nga hlundzukanga ngopfu,+ kambe wona ma engetele khombo.”’+
16 “Hikwalaho Yehovha u ri: ‘“Ndzi ta tlhela ndzi komba Yerusalema tintswalo,+ yindlu ya mina yi ta akiwa kona,”+ ku vula Yehovha wa mavuthu, “ntambhu yo pima yi ta tshambulutiwa ehenhla ka Yerusalema.”’+
17 “Huwelela nakambe u ku, ‘Yehovha wa mavuthu u ri: “Miti ya mina yi ta tlhela yi khapakhapa hi vunene; Yehovha u ta tlhela a chavelela Siyoni+ a tlhela a hlawula Yerusalema.”’”+
18 Kutani ndzi languta, ndzi vona timhondzo ta mune.+ 19 Hiloko ndzi vutisa ntsumi leyi a yi vulavula na mina ndzi ku: “Xana leswi i yini?” Yona yi ku: “Leti i timhondzo leti hangalaseke Yuda,+ Israyele+ na Yerusalema.”+
20 Kutani Yehovha a ndzi komba vanhu va mune lava tivaka ntirho wa mavoko. 21 Hiloko ndzi vutisa ndzi ku: “Xana lava va tele ku ta endla yini?”
A ku: “Leti i timhondzo leti hangalaseke Yuda lerova ku pfumaleka ni wa ku tlakusa nhloko. Lava van’wana va tele ku ta va chavisa, ku wisa timhondzo ta matiko lawa ma yimiseke timhondzo ta wona ma lwa ni tiko ra Yuda leswaku ma ri hangalasa.”
2 Kutani ndzi languta, hiloko ndzi vona munhu a khome ntambhu yo pima.+ 2 Hiloko ndzi ku: “U ya kwihi?”
Yena a ku: “Ndzi ya pima muti wa Yerusalema, ndzi ta tiva ku anama ni ku leha ka wona.”+
3 Ntsumi leyi a yi vulavula na mina yi suka eka mina, kutani ku ta ntsumi yin’wana yi ya yi hlanganisa. 4 Hiloko yi ku eka yona: “Tsutsuma u ya byela jaha leriya u ku, ‘“Muti wa Yerusalema wu ta va ni vaaki+ kambe wu nga ri na makhumbi yo wu biyelela hikwalaho ka vanhu hinkwavo ni swifuwo swa wona.+ 5 Kutani eka wona,” ku vula Yehovha, “ndzi ta va khumbi ra ndzilo leri wu rhendzeleke,+ ndzi ta va ku vangama ka mina exikarhi ka wona.”’”+
6 “Hatlisani! Hatlisani! Humani etikweni ra le n’walungwini,”+ ku vula Yehovha.
“Hikuva ndzi mi hangalasele ematlhelweni ya timheho ta mune ta tilo,”+ ku vula Yehovha.
7 “Tana, Siyoni! Baleka, wena loyi a tshamaka ni nhwanyana wa Babilona.+ 8 Hikuva Yehovha wa mavuthu, loyi endzhaku ko vangamisiwa a ndzi rhumeke ematikweni lama phangeke nhundzu ya wena u ri:+ ‘Loyi a ku khumbaka u khumba ndzololo ya tihlo ra mina.+ 9 Hikuva ndzi ta ma xungeta, kutani mahlonga ya wona ma ta ma tekela swilo swa wona.’+ Kunene mi ta swi tiva leswaku Yehovha wa mavuthu u ndzi rhumile.
10 “Bana nkulungwana, wena nhwanyana wa Siyoni;+ hikuva ndza ta,+ ndzi ta tshama na wena,”+ ku vula Yehovha. 11 “Hi siku rero matiko yo tala ma ta namarhela Yehovha,+ ma ta va vanhu va mina; kutani ndzi ta tshama na n’wina.” Mi ta swi tiva leswaku Yehovha wa mavuthu hi yena loyi a ndzi rhumeke eka n’wina. 12 Yehovha u ta teka Yuda ri va nhundzu yakwe etikweni ro kwetsima, wa ha ta tlhela a hlawula Yerusalema.+ 13 Miyelani, n’wina vanhu hinkwenu emahlweni ka Yehovha, hikuva u teka goza a ri endhawini yakwe yo kwetsima.
3 Hiloko a ndzi komba muprista lonkulu Yoxuwa+ a yime emahlweni ka ntsumi ya Yehovha naswona Sathana+ a a yime evokweni rakwe ra xinene leswaku a lwa na yena. 2 Kutani ntsumi ya Yehovha yi ku eka Sathana: “Onge Yehovha a nga ku tshinya, wena Sathana,+ onge Yehovha loyi a hlawuleke Yerusalema+ a nga ku tshinya! Xana loyi a nga fani ni xisana lexi susiweke endzilweni?”
3 Yoxuwa a a ambale swiambalo leswi thyakeke, a yime emahlweni ka ntsumi. 4 Hiloko ntsumi yi byela lava a va yime emahlweni ka yena yi ku, “N’wi hluvuleni swiambalo swakwe leswi thyakeke.” Kutani yi ku eka yena, “Waswivo, ndzi suse xidyoho* xa wena naswona u ta ambexiwa swiambalo leswi fanelekaka.”*+
5 Kutani ndzi ku: “N’wi tsimbeni duku leri baseke.”+ Hiloko va n’wi tsimba duku, va tlhela va n’wi ambexa swiambalo; ntsumi ya Yehovha a yi yime ekusuhi. 6 Ntsumi ya Yehovha yi ku eka Yoxuwa: 7 “Yehovha wa mavuthu u ri, ‘Loko wo famba etindleleni ta mina, u endla leswi ndzi ku lerisaka swona, u ta avanyisa vanhu va mina endlwini ya mina,+ u khathalela* swivava* swa mina; ndzi ta ku pfumelela leswaku u ta eka mina ku fana ni lava yimeke laha.’
8 “‘Ndzi kombela u yingisa, wena Muprista Lonkulu Yoxuwa, wena ni vaprista lava tshamaka emahlweni ka wena, hikuva vavanuna lava i xikombiso xa swilo leswi nga ta endleka enkarhini lowu taka; ndzi tisa nandza wa mina+ loyi a vuriwaka Xihluke!+ 9 Vona ribye leri ndzi ri vekeke emahlweni ka Yoxuwa! Eka ribye rero ku ni matihlo ya nkombo; naswona ndzi kovotla marito eka rona,’ ku vula Yehovha wa mavuthu, ‘ndzi ta susa xidyoho xa tiko rero hi siku rin’we.’+
10 “‘Hi siku rero,’ ku vula Yehovha wa mavuthu, ‘un’wana ni un’wana wa n’wina u ta rhamba muakelani wa yena va tshama swin’we ehansi ka murhi wa yena wa madiriva ni le hansi ka nkuwa wa yena.’”+
4 Ntsumi leyi a yi vulavula na mina yi tlhela yi vuya yi ta ndzi pfuxa, ku fana ni loko yi pfuxa munhu evurhongweni. 2 Kutani yi ku eka mina: “Xana u vona yini?”
Hiloko ndzi ku: “Ndzi vona xo tlhoma timboni lexi endliweke hi nsuku,+ lexi nga ni nkambana ehenhla ka xona. Xi ni timboni ta nkombo,+ nkombo wa tona naswona timboni leti ti nga ehenhla ka xona ti ni tiphayiphi ta nkombo. 3 Ematlhelo ka xona ku ni mirhi yimbirhi ya mitlhwari,+ wun’wana etlhelweni ra xinene ra nkambana wun’wana eximatsini.”
4 Kutani ndzi vutisa ntsumi leyi a yi vulavula na mina ndzi ku: “Xana swilo leswi swi vula yini, hosi yanga?” 5 Ntsumi leyi a yi vulavula na mina yi ndzi vutisa yi ku: “Xana a wu swi tivi leswaku swilo leswi swi vula yini?”
Ndzi ku: “A ndzi swi tivi, hosi yanga.”
6 Hiloko yi ku eka mina: “Leswi hi leswi Yehovha a swi byelaka Zerubabele: ‘“A ndzi nge tirhisi masocha, kumbe matimba,+ kambe ndzi ta tirhisa moya wa mina,”+ ku vula Yehovha wa mavuthu. 7 U mani wena, wena ntshava leyikulu? Zerubabele+ u ta ku hundzula rivala.+ Hambi ribye ra wena ro hetelela ro aka ha rona u ta ri teka naswona va ta huwelela va ku: “Mawaku ku xonga ka rona! Mawaku ku xonga ka rona!”’”
8 Yehovha a tlhela a vulavula na mina a ku: 9 “Zerubabele hi yena a sunguleke ku aka yindlu leyi,+ naswona u ta yi heta.+ Mi ta swi tiva leswaku Yehovha wa mavuthu hi yena loyi a ndzi rhumeke eka n’wina. 10 Hikuva i mani loyi a ri languteleke ehansi siku ra swilo leswitsongo?+ Hikuva va ta tsaka loko va vona Zerubabele a khome ntambhu* yo pima. Timboni leta nkombo i matihlo ya Yehovha lama langutaka hinkwako emisaveni.”+
11 Kutani ndzi yi vutisa ndzi ku: “Xana mirhi leyimbirhi ya mitlhwari etlhelweni ra xinene ni ra ximatsi ra xo tlhoma timboni yi vula yini?”+ 12 Ndzi tlhela ndzi yi vutisa ndzi ku: “Xana tinyandza timbirhi ta switluka* swa mirhi ya mitlhwari, leswi humesaka mafurha ya nsuku hi tiphayiphi timbirhi ta nsuku ti vula yini?”
13 Kutani yi ndzi vutisa yi ku: “Xana a wu swi tivi leswaku swilo leswi swi vula yini?”
Hiloko ndzi ku: “A ndzi swi tivi, hosi yanga.”
14 Yi ku: “Swi yimela vahlawuriwa vambirhi lava yimeke etlhelo ka Hosi ya misava hinkwayo.”+
5 Ndzi tlhela ndzi languta, hiloko ndzi vona buku* leyi hahaka. 2 Ntsumi yi ndzi vutisa yi ku: “Xana u vona yini?”
Ndzi ku: “Ndzi vona buku* leyi hahaka, leyi leheke kwalomu ka 9 wa timitara yi anama kwalomu ka 5 wa timitara.”*
3 Kutani yi ku eka mina: “Lowu i ndzhukano lowu yaka emisaveni hinkwayo, hikuva un’wana ni un’wana la yivaka,+ hilaha swi tsariweke hakona eka tlhelo rin’we ra yona, a nga xupuriwanga; ni un’wana ni un’wana la hlambanyaka,+ hilaha swi tsariweke hakona eka tlhelo rin’we ra yona, a nga xupuriwanga. 4 ‘Ndzi wu rhumerile,’ ku vula Yehovha wa mavuthu, ‘wu fanele wu nghena endlwini ya khamba ni le ndlwini ya loyi a hlambanyaka hi vito ra mina a tlhela a nga endli; naswona wu ta tshama endlwini yoleyo, wu yi lovisa ni ku lovisa timhandzi ni maribye ya yona.’”
5 Kutani ntsumi leyi a yi vulavula na mina yi tlhela yi humelela yi ku: “Ndzi kombela u languta, u vona lexi humaka.”
6 Ndzi vutisa ndzi ku: “Xana i yini?”
Yi ku: “Ku huma xibya xo pima xa efa.”* Yi ya emahlweni yi ku: “Leyi i ndlela leyi va langutekaka ha yona emisaveni hinkwayo.” 7 Kutani ndzi vona ku pfuriwa xipfalo xa xirhendzevutana lexi endliweke hi nsimbhi,* a ku ri ni wansati loyi a a tshame endzeni ka xibya. 8 Yi ku: “Wansati loyi u yimela Vuhomboloki.” Kutani yi n’wi tlherisela endzeni ka xibya xolexo xo pima xa efa, endzhaku yi pfala xibya hi xipfalo xa nsimbhi.*
9 Ndzi languta kutani ndzi vona vavasati vambirhi va ri karhi va ta, a va haha. A va ri ni timpapa to fana ni ta ntavila. Va tlakula xibya xolexo xo pima xi ya va exikarhi ka misava ni matilo. 10 Kutani ndzi vutisa ntsumi leyi a yi vulavula na mina ndzi ku: “Xana va xi yisa kwihi xibya xo pima xa efa?”
11 Yi ku: “Va xi yisa etikweni ra Xinara*+ leswaku va ta n’wi akela yindlu kona; loko yi herile, u ta tshama kwalaho endhawini yakwe leyi n’wi faneleke.”
6 Kutani ndzi tlhela ndzi languta kutani ndzi vona makalichi ya mune lama humaka exikarhi ka tintshava timbirhi, tintshava leti a ti ri ta koporo. 2 Kalichi yo sungula a yi kokiwa hi tihanci to tshwuka, kasi ya vumbirhi a yi kokiwa hi tihanci ta ntima.+ 3 Kalichi ya vunharhu a yi kokiwa hi tihanci to basa, kasi ya vumune a yi kokiwa hi tihanci ta switwavitwavi ni ta mavalavala.+
4 Ndzi vutisa ntsumi leyi a yi vulavula na mina, ndzi ku: “Xana i yini leswi, hosi yanga?”
5 Ntsumi yi ndzi hlamula yi ku: “Leswi i swivumbiwa swa mune swa moya+ swa le matilweni leswi humaka endzhaku ka loko swi yime emahlweni ka Hosi ya misava hinkwayo.+ 6 Kalichi leyi kokiwaka hi tihanci ta ntima yi ya etikweni ra le n’walungwini;+ leya leto basa yi ya evupeladyambu;* loko ku ri leta switwavitwavi ti ya etikweni ra le dzongeni. 7 Leta mavalavala a ti lunghekele ku rhendzeleka emisaveni.” Ntsumi yi ku: “Fambani, mi ya rhendzeleka emisaveni.” Kutani ti sungula ku rhendzeleka emisaveni.
8 Hiloko ntsumi yi ndzi huwelela yi ku: “Waswivo, leti yaka etikweni ra le n’walungwini hi tona leti endleke leswaku vukarhi bya Yehovha byi vohla etikweni ra le n’walungwini.”
9 Yehovha a tlhela a vulavula na mina a ku: 10 “A ku tekiwe leswi teke na Helidayi, Thobiya na Yedaya leswi humaka eka vanhu lava nga evuhlongeni; kutani hi siku rero u fanele u nghena endlwini ya Yosiya n’wana wa Sofaniya swin’we ni lava, lava humaka eBabilona. 11 U fanele u teka silivhere ni nsuku u endla harhi,* u yi tlhandleka enhlokweni ya Yoxuwa+ n’wana wa Yohozadaki muprista lonkulu. 12 U n’wi byela u ku,
“‘Yehovha wa mavuthu u ri: “Hi loyi munhu loyi vito rakwe a nga Xihluke.+ U ta hluka endhawini yakwe naswona u ta aka tempele ya Yehovha.+ 13 Hi yena loyi a nga ta aka tempele ya Yehovha naswona u ta va muchaviseki. U ta tshama exitulwini xa yena xa vuhosi+ a fuma a tlhela a va muprista exitulwini xa yena xa vuhosi, u ta endla mitirho leyi hi ku rhula. 14 Harhi* yi ta vekiwa etempeleni ya Yehovha yi va xitsundzuxo eka leswi endliweke hi Heleme, Thobiya, Yedaya+ na Heni n’wana wa Sofaniya. 15 Lava va nga le kule va ta ta va ta pfuneta eku akiweni ka tempele ya Yehovha.” Mi ta swi tiva leswaku Yehovha wa mavuthu u ndzi rhumile eka n’wina. Sweswo swi ta endleka, loko mi yingisa rito ra Yehovha Xikwembu xa n’wina.’”
7 Hi lembe ra vumune ra ku fuma ka Hosi Dariyosi, Yehovha a vulavula na Zakariya+ hi siku ra vumune ra n’hweti ya vukaye, ku nga n’hweti ya Kislevhe.* 2 Vanhu va le Bethele va rhume Xarezere na Regemu-meleki ni vanhu vakwe ku ya kombela ku rivaleriwa eka Yehovha, 3 va byela vaprista lava nga endlwini* ya Yehovha wa mavuthu ni vaprofeta va ku: “Xana ndzi fanele ndzi rila hi n’hweti ya vuntlhanu+ ndzi titsona swakudya hilaha ndzi endleke hakona malembe yo tala?”
4 Yehovha wa mavuthu a tlhela a ku: 5 “Byela vanhu hinkwavo va tiko ni vaprista u ku, ‘Loko mi titsona swakudya mi tlhela mi rila hi n’hweti ya vuntlhanu ni hi n’hweti ya vunkombo+ ku ringana malembe ya 70,+ xana a mi swi endlela mina hakunene? 6 Loko mi dya ni loko mi nwa, xana a mi nga swi endleli ku titsakisa? 7 Xana a mi fanelanga mi yingisa marito lawa Yehovha a ma vuleke hi ku tirhisa vaprofeta va khale,+ enkarhini lowu Yerusalema ni miti leyi nga le kusuhi a yi ri ni vaaki naswona ku ri ni ku rhula ni le nkarhini lowu Negebu na le Xefela a yi ri ni vaaki?’”
8 Yehovha a tlhela a vulavula na Zakariya, a ku: 9 “Yehovha wa mavuthu u ri, ‘Avanyisani hi ndlela leyinene,+ rhandzanani+ mi kombana tintswalo. 10 Mi nga tshuki mi dyelela noni kumbe n’wana la nga riki na tatana,*+ hambi ku ri muluveri+ kumbe xisiwana;+ naswona mi nga tshuki mi bohelana makungu ya swilo swo biha etimbilwini ta n’wina.’+ 11 Kambe a va tshamela ku ala ku yingisa,+ va ndzi fularhela,+ va tipfala tindleve leswaku va nga ndzi twi.+ 12 Va nonon’hwise timbilu ta vona ku fana ni dayimani,*+ va ala ku yingisa nawu* ni marito lawa Yehovha wa mavuthu a ma rhumeleke hi moya wakwe hi ku tirhisa vaprofeta va khale.+ Kutani Yehovha wa mavuthu a hlundzuka ngopfu.”+
13 “‘Leswi va nga yingisangiki loko ndzi* va vitana,+ na mina a ndzi nge va yingisi loko va ndzi vitana,’+ ku vula Yehovha wa mavuthu. 14 ‘Kutani ndzi va hangalase hi xihuhuri ematikweni hinkwawo lawa a va nga ma tivi,+ tiko ra vona ri sala ri va marhumbi, ku nga ri na munhu loyi a tsemakanyaka kumbe ku tlhelela eka rona;+ hikuva va endle tiko leri ro saseka ri va nchumu wo chavisa.’”
8 Yehovha wa mavuthu a tlhela a ku: 2 “Yehovha wa mavuthu u ri, ‘Ndzi tiyimiserile ku lwela+ Siyoni naswona ndzi tiyimiserile ku n’wi lwela hi vukarhi lebyikulu.’”
3 “Yehovha u ri, ‘Ndzi ta tlhelela eSiyoni+ ndzi tshama eYerusalema;+ Yerusalema wu ta vitaniwa muti wo tshembeka,+ ntshava ya Yehovha wa mavuthu yi ta vitaniwa ntshava yo kwetsima.’”+
4 “Yehovha wa mavuthu u ri, ‘Vakhalabye ni vakhegula va ta tlhela va tshama exikarhi ka muti wa Yerusalema, un’wana ni un’wana a khome nxongotelo wakwe hikwalaho ka ku dyuhala.*+ 5 Exikarhi ka muti ku ta tala hi vafana ni vanhwanyana lava nga le ku tlangeni.’”+
6 “Yehovha wa mavuthu u ri, ‘Hambiloko swo tikomba swi tika swinene eka lava saleke va vanhu lava emasikwini wolawo, xana swi fanele swi tikomba swi tika swinene ni le ka mina?’ ku vula Yehovha wa mavuthu.”
7 “Yehovha wa mavuthu u ri, ‘Ndzi ta ponisa vanhu va mina ematikweni ya le vuxeni ni ya le vupeladyambu.*+ 8 Ndzi ta va vuyisa va ta tshama eYerusalema;+ va ta va vanhu va mina, mina ndzi ta va Xikwembu+ xa vona hi ntiyiso* ni hi ku lulama.’”
9 “Yehovha wa mavuthu u ri, ‘Vanani ni xivindzi,+ n’wina lava sweswi mi twaka marito lawa lama vuriweke hi vaprofeta,+ marito lama vuriweke loko ku vekiwa masungulo ya tempele ya Yehovha wa mavuthu leswaku ku ta akiwa tempele. 10 Hikuva emahlweni ka nkarhi wolowo vanhu kumbe swifuwo a swi nga hakeriwi;+ lava fambaka a va nga hlayisekanga hikwalaho ka nala, hikuva ndzi endle leswaku vanhu hinkwavo va lwa hi xivona.’
11 “‘Kambe sweswi, masalela ya vanhu lava a ndzi nge he ma khomi ku fana ni le ku sunguleni,’+ ku vula Yehovha wa mavuthu. 12 ‘Hikuva ku ta byariwa mbewu ya ku rhula; murhi wa madiriva wu ta humesa mihandzu ya wona+ ni misava yi ta va ni ndzalo, ni matilo ma ta humesa mberha ya wona; kutani ndzi ta endla leswaku lava saleke eka vanhu lava va tiphina hi swilo leswi hinkwaswo.+ 13 Tanihi leswi n’wina vanhu va Yuda ni vanhu va Israyele a mi rhukaniwa hi matiko,+ ndzi ta mi ponisa naswona mi ta va nkateko.+ Mi nga chavi!+ Vanani ni xivindzi.’+
14 “Hikuva Yehovha wa mavuthu u ri, ‘“Tanihi leswi a ndzi tiyimisele ku mi tisela khombo hikwalaho ka leswi vakokwa wa n’wina va ndzi hlundzukiseke,” ku vula Yehovha wa mavuthu “naswona ndzi nga tisolangiki,+ 15 kutani sweswi ndzi tiyimisele ku endlela Yerusalema ni vanhu va Yuda leswinene.+ Mi nga chavi!”’+
16 “‘Swilo leswi mi faneleke mi swi endla hi leswi: Byelanani ntiyiso+ naswona ndlela leyi mi avanyisaka ha yona etigedeni ta n’wina yi fanele yi kondletela ntiyiso ni ku rhula.+ 17 Mi nga tshuki mi lukelana mano etimbilwini ta n’wina+ naswona mi nga hlambanyi mi tlhela mi nga endli;+ hikuva sweswo hinkwaswo ndza swi venga,’+ ku vula Yehovha.”
18 Yehovha wa mavuthu a tlhela a ku: 19 “Yehovha wa mavuthu u ri, ‘Ku titsona swakudya ka n’hweti ya vumune,+ ku titsona swakudya ka n’hweti ya vuntlhanu,+ ku titsona swakudya ka n’hweti ya vunkombo+ ni ku titsona swakudya ka n’hweti ya vukhume+ ku ta va mikarhi ya ntsako eka vanhu va Yuda, mikhuvo ya ntsako.+ Hikwalaho rhandzani ntiyiso ni ku rhula.’
20 “Yehovha wa mavuthu u ri, ‘Vanhu ni vaaki va miti yo tala va ta ta; 21 kutani vaaki va muti wo karhi va ta ya eka vaaki va muti wun’wana, va ku: “A hi yeni eka Yehovha hi ya kombela ku rivaleriwa ni mpfuno eka Yehovha wa mavuthu. Na mina ndzi ya kona.”+ 22 Kutani vanhu vo tala ni matiko ya matimba va ta ta va ta kombela mpfuno eka Yehovha wa mavuthu eYerusalema+ ni ku kombela ku rivaleriwa hi Yehovha.’
23 “Yehovha wa mavuthu u ri, ‘Emasikwini wolawo vanhu va khume lava humaka eka tindzimi hinkwato ta matiko+ va ta khomelela nguvu ya Muyuda,* va ku: “Hi lava ku famba na n’wina+ hikuva hi swi twile leswaku Xikwembu xi na n’wina.”’”+
9 Marito ya ku avanyisa:
“Yehovha u avanyisa tiko ra Hadiraka,
U vulavula na Damaska,+
Hikuva Yehovha u langute vanhu hinkwavo+
Ni tinyimba hinkwato ta Israyele.
3 Tiri u tiakele khokholo.
U hlengelete silivhere kukota ritshuri
Ni nsuku kukota misava leyi nga le switarateni.+
4 Vonani! Yehovha u ta n’wi tekela leswi a nga na swona,
Masocha ya yena u ta ma dlayela elwandle;+
Kasi yena u ta lovisiwa hi ndzilo.+
5 Axikeloni u ta swi vona kutani a chava;
Gaza u ta twa ku vava ngopfu,
Na Ekroni, hikuva loyi a a n’wi tshembile u khomisiwe tingana.
Hosi yi ta lova eGaza,
Kasi Axikeloni u ta pfumala vaaki.+
7 Ndzi ta humesa swilo leswi nga ni ngati enon’wini wa yena
Ni swilo leswi nyenyetsaka exikarhi ka matino yakwe,
Yena u ta salela Xikwembu xa hina;
U ta fana ni ndhuna eYuda,+
Ekroni u ta fana ni Muyebusi.+
8 Ndzi ta dzima nxaxa ku fana ni murindzi wa yindlu ya mina,+
Leswaku ku nga vi na munhu loyi a tsemakanyaka ni loyi a tlhelaka;
A ku na loyi a tshikilelaka loyi a nga ta tlhela a hundza,+
Hikuva sweswi ndzi swi* vonile hi matihlo ya mina.
9 Tsaka u tsakisisa, wena nhwanyana wa Siyoni.
Bana nkulungwana, wena nhwanyana wa Yerusalema.
Vona! Hosi ya wena yi ta eka wena.+
Yi lulamile, yi tisa ku ponisa,
Ya titsongahata+ naswona yi gade mbhongolo,
10 Ndzi ta tekela Efrayimi kalichi ya nyimpi
Ni hanci eYerusalema.
Vurha* bya nyimpi byi ta tekiwa.
Yi ta endla leswaku matiko ma va ni ku rhula;+
Mfumo wa yona wu ta nava ku suka elwandle rin’wana ku ya eka rin’wana
11 Loko ku ri wena, hi ngati ya ntwanano wa wena,
Ndzi ta humesa vabohiwa va wena exihlobyeni lexi nga riki na mati.+
12 Tlhelelani ekhokholweni, n’wina vabohiwa lava nga ni ntshembo.+
Namuntlha ndza mi byela ndzi ri,
‘Ndzi ta ku hakela hilaha ku phindhiweke kambirhi.+
13 Hikuva ndzi ta gova* Yuda ku fana ni vurha bya mina.
Efrayimi ndzi ta n’wi endla nseve wa vurha bya mina,
Ndzi ta pfuxa vana va wena, wena Siyoni,
Leswaku va lwa ni vana va wena, wena Grikiya,
Ndzi ta ku endla u fana ni banga ra nhenha.’
14 Yehovha u ta vonaka ehenhla ka vona,
Nseve wa yena wu ta huma ku fana ni rihati.
Yehovha Hosi Leyi Tlakukeke u ta ba nanga,+
U ta huma ku fana ni swidzedze swa le dzongeni.
Va ta nwa va tlhela va ba huwa onge hi loko va nwe vhinyo;
Va ta tala kukota nkambana,
Kukota tikhona ta altari.+
16 Yehovha Xikwembu xa vona u ta va ponisa hi siku rero
Ku fana ni murisi loko a ponisa tinyimpfu takwe;+
Hikuva va ta fana ni maribye lama nga eka harhi lama hatimaka ehenhla ka misava ya yena.+
Majaha ma ta kurisiwa hi ku dya mavele,
Ni vanhwana hi ku nwa vhinyo leyintshwa.”+
10 “Kombelani mpfula eka Yehovha hi nkarhi wa mpfula ya ximun’wana.
I Yehovha loyi a endlaka mapapa ya mpfula leyikulu,
Loyi a endlaka leswaku ma nisa mpfula,+
A endla leswaku ku va ni swakudya swa hinkwavo emasin’wini.
Va vulavula hi milorho leyi nga pfuniki nchumu,
Va ringeta ku chavelela hi ndlela leyi nga pfuniki nchumu.
Hi yona mhaka va nga ta tsendzeleka ku fana ni tinyimpfu.
Va ta xaniseka hikuva a ku na murisi.
3 Ndzi va hlundzukele swinene varisi,
Varhangeri lava tshikilelaka va ta tihlamulela eka mina;
Hikuva Yehovha wa mavuthu u rhandza ntlhambi wa yena,+ ku nga vanhu va Yuda,
U va endle va fana ni hanci yakwe leyi xiximekaka yi tlhela yi va ni matimba enyimpini.
4 Murhangeri* u huma eka yena,
Mufumi la pfunaka* u huma eka yena,
Vurha bya nyimpi byi huma eka yena;
Tindhuna hinkwato ti huma eka yena, hinkwavo va huma eka yena.
5 Va ta fana ni tinhenha,
Leti kandziyelaka ndzhope eswitarateni hi nkarhi wa nyimpi.
Ndzi ta tlhela ndzi va nyika tiko ra vona,
Ndzi ta va komba musa;+
Swi ta fana niloko ndzi nga si tshama ndzi va lahla;+
Hikuva hi mina Yehovha Xikwembu xa vona, ndzi ta va hlamula.
7 Va yindlu ya Efrayimi va ta fana ni nhenha ya matimba,
Mbilu ya vona yi ta tsaka ku fana niloko yi tsakisiwe hi vhinyo.+
Vana va vona va ta swi vona sweswo, kutani va tsaka;
Mbilu ya vona yi ta tsaka eka Yehovha.+
8 ‘Ndzi ta va bela noti, ndzi va hlengeleta;
Hikuva ndzi ta va kutsula+ kutani va ta tala,
Va ya emahlweni va andza.
9 Hambiloko ndzi va haxa exikarhi ka vanhu ku fana ni mbewu,
Va ta ndzi tsundzuka va ri ematikweni ya le kule;
Swilo swi ta tlhela swi va fambela kahle, va vuya swin’we ni vana va vona.
10 Ndzi ta va vuyisa va suka etikweni ra Egipta
Ndzi va hlengeleta va suka eAsiriya;+
Ndzi ta va tisa etikweni ra Giliyadi+ ni ra Lebanoni,
A ku nge he vi na ndhawu leyi nga ta va ringana hinkwavo.+
11 Loko lwandle ri va pfalela ndlela;
Ndzi ta tsemakanya ndzi ba magandlati ya rona;+
Nambu wa Nayili wu ta phya hinkwawo.
Manyunyu ya Asiriya ma ta herisiwa,
Ni nhonga ya vuhosi ya le Egipta yi ta suka.+
12 Mina Yehovha ndzi ta va endla va va ni matimba,+
Va ta famba hi ku landza vito ra mina,’+ ku vula Yehovha.”
11 “Pfula tinyangwa ta wena, wena Lebanoni,
Leswaku ndzilo wu ta hisa mirhi ya wena ya mikedari.
2 Rila, wena murhi wa yunipa, hikuva mukedari wu wile;
Mirhi leyikulu yi lovisiwile!
Rilani, n’wina mirhi ya oku ya le Baxani,
Hikuva khwati lero tlhuma ri lovisiwile!
3 Yingisani! Varisi va le ku rileni,
Hikuva madyelo ya vona yo nona ma lovisiwile.
Yingisani! Swinghalana swa vomba,
Hikuva swikhwatana swo tlhuma leswi nga le kusuhi ni Nambu wa Yordani swi lovisiwile.
4 “Yehovha Xikwembu xa mina u ri, ‘Risa tinyimpfu leti nga ta tlhaviwa,+ 5 leti vaxavi va tona va ti tlhavaka+ kambe va nga voniwi nandzu. Lava va ti xavisaka+ va ri, “Onge Yehovha a nga dzunisiwa, hikuva hi ta fuwa.” Varisi va tona a va ti tweli vusiwana.’+
6 “‘Hikuva a ndzi nge he va tweli vusiwana vaaki va tiko leri,’ ku vula Yehovha. ‘Ndzi ta endla leswaku vanhu va xanisana hi xivona ni hosi yi va xanisa; va ta pfotlosela tiko, a ndzi nge va ponisi evokweni ra vona.’”
7 N’wina lava xanisekaka entlhambini, ndzi sungule ku mi risela tinyimpfu leti nga ta tlhaviwa.+ Hikwalaho ndzi teke tinhonga timbirhi, yin’wana ndzi yi thye Musa, leyin’wana ndzi yi thya Vun’we,+ kutani ndzi sungula ku risa tinyimpfu. 8 Ndzi hlongole varisi vanharhu hi n’hweti yin’we, hikuva a ndzi va helela mbilu kasi na vona a va ndzi nyenya. 9 Hiloko ndzi ku: “A ndzi nge tshameli ku mi risa. Leti ti faka a ti fe, leti ti dlayiwaka a ti dlayiwe. Leti saleke a ti dyanane.” 10 Hiloko ndzi teka nhonga ya mina leyi ndzi nga yi thya Musa,+ ndzi yi tshovelela, ku ri xikombiso xo tshova ntwanano lowu ndzi wu endleke ni vanhu hinkwavo. 11 Kutani ntwanano wu va wu tshoviwile hi siku rero, lava xanisekaka entlhambini lava a va ndzi langutile va swi vonile leswaku a ku ri rito ra Yehovha.
12 Ndzi ku eka vona: “Loko mi swi vona swi fanerile, ndzi hakeleni; kambe loko swi nga ri tano, tshikani.” Hiloko va ndzi hakela* swiphemu swa 30 swa silivhere.+
13 Kutani Yehovha a ku eka mina: “Swi hoxe laha ku hlayisiwaka xuma kona, lowu i mpimo lowu va ndzi pimeke ha wona.”+ Hiloko ndzi teka swiphemu swa 30 swa silivhere, ndzi swi hoxa laha ku hlayisiwaka xuma kona endlwini ya Yehovha.+
14 Kutani ndzi tsemelela nhonga ya mina ya vumbirhi, ku nga Vun’we,+ leswaku ndzi tsema vuxaka exikarhi ka Yuda na Israyele.+
15 Hiloko Yehovha a ku eka mina: “Teka swilo leswi tirhisiwaka hi murisi la nga pfuniki nchumu.+ 16 Hikuva ndzi endla leswaku ku va ni murisi etikweni. A nge ti khathaleli tinyimpfu leti faka;+ letitsongo a nge fambi a ti lava, kumbe a tshungula leti vavisekeke+ hambi ku ri ku nyika leti hanyeke kahle swakudya. Ku ri na sweswo u ta dya nyama ya leto nona,+ a kwamula swinyondzwana swa tona.+
17 Khombo eka murisi wa mina la nga pfuniki nchumu,+ loyi a siyaka ntlhambi!+
Banga ri ta n’wi tsema voko ri tlhela ri n’wi tlhava tihlo ra xinene.
Voko ra yena ri ta khwanyana,
Tihlo ra yena ra xinene a ri nge he voni.”
12 Marito ya ku avanyisa:
“Rito ra Yehovha mayelana na Israyele,” ku vula Yehovha,
Loyi a andlaleke matilo,+
Loyi a vekeke masungulo ya misava,+
Ni loyi a nyikeke munhu moya wa vutomi.
2 “Ndzi endla leswaku Yerusalema wu va xinwelo* lexi endlaka vanhu hinkwavo lava nga ekusuhi na wona va dedeleka; naswona muti wa Yuda ni wa Yerusalema yi ta rhendzeriwa hi valala.+ 3 Hi siku rero ndzi ta endla Yerusalema wu va ribye ro tika eka vanhu hinkwavo. Hinkwavo lava va ri tlakulaka va ta vaviseka swinene;+ matiko hinkwawo ya misava ma ta hlengeletana leswaku ma lwa na wona.”+ 4 Yehovha u ri: “Hi siku rero, ndzi ta pfilunganya tihanci hinkwato ndzi pengisa ni vagadi va tona. Ndzi ta endla leswaku tihanci ta vona hinkwato ti fa matihlo, kambe ndzi ta rindza vanhu va Yuda. 5 Tindhuna ta Yuda ti ta tibyela ti ku, ‘Vaaki va Yerusalema i ntamu wa hina lowu humaka eka Yehovha wa mavuthu, Xikwembu xa vona.’+ 6 Hi siku rero, ndzi ta endla tindhuna ta Yuda ti fana ni ndzilo enhoveni ni xisana lexi pfurhaka exikarhi ka nyandza ya mavele lama tsemiweke.+ Ti ta lovisa vanhu hinkwavo lava tshamaka ekusuhi, exineneni ni le ximatsini;+ vaaki va Yerusalema va ta tlhela va aka endhawini ya vona, eYerusalema.+
7 “Yehovha u ta rhanga hi ku ponisa matende ya Yuda, leswaku va yindlu ya Davhida ni vaaki va Yerusalema va nga xiximiwi ku tlula vanhu va Yuda. 8 Hi siku rero Yehovha u ta sirhelela vaaki va Yerusalema;+ hi siku rero loyi a tsandzekaka ku yima* exikarhi ka vona u ta fana na Davhida, yindlu ya Davhida yi ta va ni matimba ku fana ni Xikwembu, ku fana ni ntsumi ya Yehovha leyi va rhangelaka.+ 9 Hi siku rero ndzi ta lovisa matiko hinkwawo lama lwaka na Yerusalema.+
10 “Ndzi ta nyika ndyangu wa Davhida ni vaaki va Yerusalema moya wa mina, ndzi ta va amukela naswona va ta ndzi khongela va ndzi kombela, va ta languta loyi va n’wi tlhaveke,+ kutani va n’wi rilela ku fana ni loko va rilela n’wana loyi a nga swakwe; va ta ba nkalanga ku fana ni loko va rilela n’wana wa mativula. 11 Hi siku rero ku ta va ni xirilo lexikulu eYerusalema, ku fana ni xirilo xa le Hadadrimoni eRivaleni ra Megido.+ 12 Tiko ri ta kalakala, ndyangu wun’wana ni wun’wana wu ri woxe; ndyangu wa yindlu ya Davhida wu ri woxe ni vavasati va wona va ri voxe; ndyangu wa yindlu ya Nathani+ wu ri woxe ni vavasati va wona va ri voxe; 13 ndyangu wa yindlu ya Levhi+ wu ri woxe ni vavasati va wona va ri voxe; ndyangu wa Vaximeyi+ wu ri woxe ni vavasati va wona va ri voxe; 14 ni mindyangu hinkwayo leyi saleke, ndyangu wun’wana ni wun’wana wu ri woxe ni vavasati va wona va ri voxe.
13 “Hi siku rero xihlovo xi ta pfuleriwa vatukulu va Davhida ni vaaki va Yerusalema leswaku va tihlantswa swidyoho ni thyaka ra vona.”+
2 Yehovha wa mavuthu u ri: “Hi siku rero, ndzi ta susa mavito ya swikwembu etikweni,+ a ma nge he tsundzukiwi; ndzi ta herisa vaprofeta+ ni moya wa thyaka etikweni. 3 Loko munhu o tlhela a profeta, tata wakwe ni mana wakwe lava n’wi velekeke va fanele va n’wi byela va ku, ‘U ta fa hikuva u vulavule mavunwa hi vito ra Yehovha.’ Kutani tata wakwe ni mana wakwe lava n’wi velekeke, va fanele va n’wi tlhava hi banga hikwalaho ka ku profeta ka yena.+
4 “Hi siku rero muprofeta un’wana ni un’wana u ta khomiwa hi tingana hikwalaho ka xivono xakwe loko a profeta; a va nge xi ambali xiambalo xa voya+ hi xikongomelo xo kanganyisa. 5 Un’wana ni un’wana wa vona u ta ku, ‘A ndzi muprofeta. Ndzo va murimi, hikuva ku ni munhu la ndzi xaveke ndza ha ri ntsongo.’ 6 Loko munhu a n’wi vutisa a ku, ‘I ta yini timbanga leti ti nga emirini wa wena?’* yena u ta ku, ‘Ndzi biwe ekaya ka vanghana va mina.’”*
7 “Wena banga, pfuka u lwa ni murisi wa mina,+
Ni loyi a nga munghana wa mina,” ku vula Yehovha wa mavuthu.
9 Kutani lava saleke ndzi ta va basisa hi ndzilo;
Ndzi ta va basisa ku fana ni loko ku basisiwa silivhere,
Ndzi tlhela ndzi va kambela ku fana ni loko ku kamberiwa nsuku.+
Va ta vitana vito ra mina,
Kutani ndzi ta va hlamula.
Ndzi ta ku, ‘I vanhu va mina,’+
Vona va ta ku, ‘Yehovha i Xikwembu xa hina.’”
14 “Vonani! Siku ra ta, ku nga siku ra Yehovha, leri swilo leswi phangiweke eka wena* swi nga ta aviwa exikarhi ka wena. 2 Ndzi ta hlengeleta matiko hinkwawo leswaku ma lwa na Yerusalema; muti wu ta tekiwa, tiyindlu ti ta phangiwa, vavasati va ta pfinyiwa. Hafu ya vaakatiko va ta yisiwa evuhlongeni, kambe lava nga ta sala, a va nge herisiwi emutini.
3 “Yehovha u ta huma a ya lwa ni matiko wolawo+ ku fana ni loko a lwa hi siku ra nyimpi.+ 4 Hi siku rero milenge yakwe yi ta yima ehenhla ka Ntshava ya Mitlhwari,+ leyi langutaneke na Yerusalema hi le vuxeni; Ntshava ya Mitlhwari yi ta pandziwa hi le xikarhi, ku suka evuxeni ku ya evupeladyambu,* ku huma nkova lowukulu; hafu ya ntshava yi ta ya en’walungwini, kasi hafu leyin’wana yi ta ya edzongeni. 5 Mi ta balekela enkoveni lowu nga exikarhi ka tintshava ta mina, hikuva nkova lowu nga exikarhi ka tintshava wu ta fika ni le Azele. Mi ta boheka ku baleka, ku fana ni leswi mi balekeke hikwalaho ka ku tsekatseka ka misava emasikwini ya Hosi Uziya wa le Yuda.+ Yehovha Xikwembu xa mina u ta ta a ri ni vakwetsimi hinkwavo.+
6 “Hi siku rero, a ku nge vi na ku vonakala,+ swilo swi ta yima ku tirha.* 7 Ri ta va siku ro hlawuleka, leri tiviwaka tanihi siku ra Yehovha.+ A ku nge vi nhlikanhi kumbe vusiku; nimadyambu ku ta va ni ku vonakala. 8 Hi siku rero mati ya vutomi+ ma ta khuluka ma huma eYerusalema,+ hafu ya wona ma ta khulukela elwandle* leri nga evuxeni,+ kasi hafu leyin’wana yi ta khulukela elwandle* leri nga evupeladyambu.+ Ma ta khuluka hi ximumu ni hi xixika. 9 Yehovha u ta va Hosi ya misava hinkwayo.+ Hi siku rero vanhu va ta gandzela Yehovha ntsena,+ va ta dzunisa vito rakwe ntsena.+
10 “Tiko hinkwaro ri ta fana na Araba,+ ku suka eGeba+ ku ya eRimoni+ edzongeni wa Yerusalema; muti wa Yerusalema wu ta kula hikuva vanhu va ta tlhela va aka eka wona,+ va ta aka ku suka eGedeni ya Benjamini+ ku ya fika endhawini ya Gede yo Sungula, ni ku ya fika eGedeni leyi nga eKhonweni, ni ku suka eXihondzweni xa Hananele+ ku ya fika laha vhinyo ya hosi yi endliwaka kona. 11 Vanhu va ta aka eka wona; naswona a wu nge he pfuki wu gweveriwa ku lovisiwa,+ vanhu va Yerusalema va ta tshama va sirhelelekile.+
12 “Yehovha u ta ba vanhu hinkwavo lava lwaka na Yerusalema hi ntungu:+ Nyama ya vona yi ta bola va ri karhi va yime hi milenge, matihlo ya vona ma ta bola emakheleni ya wona ni tindzimi ta vona ti ta bolela emilon’wini ya vona.
13 “Hi siku rero Yehovha u ta va pfilunganya; un’wana ni un’wana u ta khoma voko ra nakulobye kutani va ta hlaselana.+ 14 Yuda na yena u ta katseka enyimpini eYerusalema; kutani lava hluleke va ta hlengeleta rifuwo eka matiko lama rhendzeleke, nsuku ni silivhere ni swiambalo swo tala.+
15 “Ntungu lowu fanaka ni wolowo wu ta tlhela wu wela tihanci, timeyila, tikamela, timbhongolo ni swifuwo hinkwaswo leswi nga le mixaxeni yoleyo.
16 “Un’wana ni un’wana loyi a nga ta pona eka matiko hinkwawo lama taka ku ta lwa na Yerusalema, u ta tlhandluka lembe+ ni lembe leswaku a ya khinsamela* Hosi, ku nga Yehovha wa mavuthu+ ni ku tlangela Nkhuvo wa Mitsonga.*+ 17 Kambe loko munhu wo karhi exikarhi ka mindyangu ya misava a nga yi eYerusalema a ya khinsamela Hosi, ku nga Yehovha wa mavuthu, a va nge yi kumi mpfula.+ 18 Ni loko ndyangu wa Egipta wu nga tlhandluki, a va nge yi kumi mpfula. Kambe va ta biwa hi ntungu lowu Yehovha a beke matiko lama nga yiki ku ya tlangela Nkhuvo wa Mitsonga. 19 Lowu ku ta va nxupulo wa xidyoho xa Egipta ni xidyoho xa matiko hinkwawo lama nga tiki ma ta tlangela Nkhuvo wa Mitsonga.
20 “Hi siku rero swingelengele swa tihanci swi ta tsariwa marito lama nge, ‘Yehovha wa Kwetsima!’+ Timbita to sweka ha tona+ leti ti nga endlwini ya Yehovha ti ta fana ni mikambana+ leyi nga emahlweni ka altari. 21 Timbita hinkwato to sweka ha tona eYerusalema ni le Yuda ti ta va ta Yehovha wa mavuthu naswona ti ta kwetsima, hinkwavo lava endlaka magandzelo va ta sweka hi tin’wana ta tona. Hi siku rero a ku nge he vi na Mukanana* endlwini ya Yehovha wa mavuthu.”+
Leswi vulaka “Yehovha U Tsundzukile.”
Vona Xiengetelo B15.
Kumbe “nandzu.”
Kumbe “swo hlawuleka.”
Kumbe “langutela.”
Vona Tinhlamuselo.
Hi Xiheveru, “ribye.”
Ku nga switluka leswi teleke hi mihandzu.
Ku nga buku ya xikhale leyi a yo songiwa kunene.
Ku nga buku ya xikhale leyi a yo songiwa kunene.
Hi Xiheveru, “a yi lehe swingungunu swa 20, yi anama swa khume.” Xisungunu a xi ringana na 44,5 wa tisentimitara. Vona Xiengetelo B14.
Hi Xiheveru, “i efa” ku nga xibye lexi a xi tirhisiwa ku pima efa. Efa a yi ringana ni 22 wa tilitara. Vona Xiengetelo B14.
Kumbe “ntsopfu.”
Kumbe “ntsopfu.”
Ku nga mfumo wa Babilona.
Hi Xiheveru, “endzhaku ka lwandle.”
Kumbe “harhi leyikulu.”
Kumbe “harhi leyikulu.”
Vona Xiengetelo B15.
Kumbe “etempeleni.”
Kumbe “n’wana la nga riki na vatswari.”
Kumbexana “ribye ro tsindziyela,” ro fana ni ribye ra muhuthu.
Kumbe “xileriso.”
Hi Xiheveru, “a.”
Hi Xiheveru, “hikwalaho ka ku tala ka masiku.”
Kumbe “etikweni ra le vuhumadyambu ni le tikweni ra le vupeladyambu.”
Kumbe “ku tshembeka.”
Hi Xiheveru, “wanuna wa Muyuda.”
Swi tikomba ku vulavuriwa hi maxangu lawa vanhu va yena va ma voneke.
Kumbe “mbhongolo ya xinuna.”
Kumbe “Mpaxu.”
Ku nga Yufrata.
Hi Xiheveru, “pyanya.”
Kumbe “swikwembu swa ndyangu; swifaniso swa mavunwa.”
Hi Xiheveru, “Xihondzo lexi nga ekhonweni” leswi vulaka munhu wa nkoka; hosi.
Hi Xiheveru, “Mhandzi yo seketela,” leswi vulaka munhu loyi a seketelaka; mufumi.
Hi Xiheveru, “pimela.”
Kumbe “xibya.”
Kumbe “nga riki na matimba.”
Hi Xiheveru, “exikarhi ka mavoko ya wena?” Ku nga exifuveni kumbe enhlaneni.
Kumbe “lava va ndzi rhandzaka.”
Kumbe “tinyimpfu.”
Ku nga muti lowu ku vulavuriwaka ha wona eka ndzimana 2.
Hi Xiheveru, “elwandle.”
Kumbe “swi ta oma,” onge hiloko swi biwe hi xirhami.
Ku nga Lwandle leri Feke.
Ku nga Lwandle ra Mediteraniya.
Kumbe “gandzela.”
Kumbe “Mixaxa.”
Kumbexana “muxavisi.”