MALAKIYA

1 Marito ya ku avanyisa:

Rito ra Yehovha leri yaka eka Vaisrayele hi Malakiya:*

2 “Ndzi mi rhandzile,”+ ku vula Yehovha.

Kambe mi ri: “U hi rhandze hi ndlela yihi?”

“Xana Esawu a a nga ri makwavo wa Yakobo?”+ ku vula Yehovha. “Kambe ndzi rhandze Yakobo, 3 Esawu ndzi n’wi vengile;+ ndzi endle tintshava ta yena ti va marhumbi+ kutani ndzhaka ya yena ndzi yi siyela timhungubye ta le mananga.”+

4 “Hambileswi Edomu a nge, ‘Miti ya hina yi onhiwile kambe hi ta tlhelela hi ya yi pfuxa,’ Yehovha wa mavuthu u ri, ‘Va ta aka kambe ndzi ta mbundzumuxa naswona yi ta vuriwa “ndhawu ya vuhomboloki” kasi vanhu va kona va ta vuriwa “vanhu lava Yehovha a va kariheleke hilaha ku nga heriki.”+ 5 Matihlo ya n’wina ma ta swi vona naswona mi ta ku: “Onge Yehovha a nga xiximiwa eIsrayele.”’”

6 “‘N’wana u xixima tata wakwe+ ni nandza u xixima n’wini wakwe. Kutani loko mina ndzi ri tatana,+ hikwalaho ka yini mi nga ndzi xiximi?+ Loko mina ndzi ri n’wini wa n’wina, hikwalaho ka yini mi nga ndzi chavi?’ Yehovha wa mavuthu u byela n’wina vaprista lava sandzaka vito ra yena.+

“‘Kambe n’wina mi ri: “Xana vito ra wena hi ri sandze njhani?”’

7 “‘Hi ku nyikela swakudya* leswi thyakeke ealtarini ya mina.’

“‘N’wina mi ri: “Xana hi ku thyakise hi ndlela yihi?”’

“‘Hi ku vula mi ku: “Tafula ra Yehovha+ i nchumu lowu faneleke wu languteriwa ehansi.” 8 Ni loko mi nyikela xifuwo lexi feke matihlo xi va gandzelo, mi ri: “A swi bihanga.” Ni loko mi nyikela xifuwo lexi khwitaka kumbe lexi vabyaka, mi ri: “A swi bihanga.”’”+

“Ndzi kombela mi nyikela ha swona eka ndhunankulu ya n’wina. Xana yi ta mi tsakela, kumbe yi mi amukela hi musa?” ku vula Yehovha wa mavuthu.

9 “Kombelani Xikwembu leswaku xi hi komba tintswalo. Xana leswi mi swi nyikelaka swi ta endla leswaku mi amukeleka eka xona?” ku vula Yehovha wa mavuthu.

10 “I mani exikarhi ka n’wina loyi a tiyimiseleke ku pfala tinyangwa?*+ Hikuva a mi nge tshiveli ndzilo ealtarini ya mina mi nga hakeriwanga.+ A ndzi mi tsakeli naswona magandzelo lawa mi ma nyikelaka hinkwawo a ndzi ma tsakeli,”+ ku vula Yehovha wa mavuthu.

11 “Hikuva ku sukela eku humeni ka dyambu ku ya eku peleni ka rona,* vito ra mina ri ta xiximiwa hi matiko.+ Endhawini yin’wana ni yin’wana ku ta hisiwa magandzelo, vito ra mina ri ta endleriwa magandzelo, tanihi nyiko leyi tengeke; hikuva vito ra mina ri ta xiximiwa hi matiko,”+ ku vula Yehovha wa mavuthu.

12 “Kambe n’wina ma ri thyakisa*+ hi ku vula mi ku, ‘Tafula ra Yehovha ri thyakisiwile ni magandzelo lama vekiwaka eka rona ma fanele ma languteriwa ehansi.’+ 13 Mi tlhela mi ku, ‘Ra hi phirha’ naswona mi ri monyile,” ku vula Yehovha wa mavuthu. “Mi tisa swifuwo leswi yiviweke, leswi khwitaka ni leswi vabyaka. Mi swi tisa swi va magandzelo. Xana ndzi fanele ndzi swi amukela?”+ ku vula Yehovha.

14 “A ku rhukaniwe loyi a kanganyisaka hi ku nyikela hi xifuwo lexi nga hanyangiki kahle* eka Yehovha kasi u ni xifuwo xa xinuna lexi hanyeke kahle entlhambini wakwe. Hikuva ndzi Hosi leyi tlakukeke,+ vito ra mina ri ta xiximeka exikarhi ka matiko,” ku vula Yehovha wa mavuthu.+

2 “Xileriso lexi xi ta eka n’wina vaprista.+ 2 Loko mi ala ku yingisa naswona mi nga swi lavi ku vangamisa vito ra mina, ndzi ta mi tisela ndzhukano,+ ndzi ta hundzula mikateko ya n’wina yi va ndzhukano.+ Mikateko ya n’wina ndzi yi endle yi va ndzhukano, hikuva a mi yingisi,”* ku vula Yehovha wa mavuthu.

3 “Maswivo! Ndzi ta onha* mbewu leyi mi yi byaleke hikwalaho ka swiendlo swa n’wina,+ ndzi ta mi haxa swikandza hi vulongo, vulongo bya swifuwo leswi mi endlaka magandzelo ha swona emikhubyeni ya n’wina; mi ta cukumeteriwa laha byi nga kona.* 4 Kutani mi ta swi tiva leswaku hi mina ndzi rhumeleke xileriso lexi eka n’wina, leswaku ntwanano wa mina na Levhi wu ya emahlweni,”+ ku vula Yehovha wa mavuthu.

5 “Ntwanano wa mina na yena a ku ri ku n’wi nyika vutomi ni ku rhula, leswi ndzi n’wi nyikeke swona leswaku a ta ndzi chava. U ndzi chavile a tlhela a xixima vito ra mina. 6 Nawu wa ntiyiso a wu ri enon’wini wakwe,+ a a nga vulavuli leswo homboloka. U tirhisane na mina hi ku rhula ni hi vululami,+ va tele lava a va pfuneke ku tshika tindlela to biha. 7 Hikuva milomu ya muprista yi fanele yi dyondzisa vanhu ku tiva Xikwembu, vanhu va fanele va lava nawu eka yena+ hikuva i murhumiwa wa Yehovha wa mavuthu.

8 “Kambe n’wina mi hambukile endleleni. Mi hambukise vo tala hi ku ka mi nga va dyondzisi nawu.+ Mi tlule ntwanano lowu endliweke na Levhi,”+ ku vula Yehovha wa mavuthu. 9 “Ndzi ta endla leswaku mi languteriwa ehansi ni ku nyenyiwa hi vanhu hinkwavo, hikuva a mi yingisanga milawu ya mina kambe mi ve ni xihlawuhlawu loko mi avanyisa.”+

10 “Xana hina hinkwerhu a hi na tatana un’we?+ Xana a hi tumbuluxiwanga hi Xikwembu xin’we? Loko swi ri tano, hikwalaho ka yini hi kanganyisana,+ hi nga wu xiximi ntwanano lowu endliweke ni vakokwa wa hina? 11 Yuda a nga tshembekanga naswona ku endliwe nchumu wo nyenyetsa eIsrayele ni le Yerusalema; hikuva Yuda a nga ku xiximi ku kwetsima ka Yehovha+ Loyi a rhandzaka ku kwetsima naswona u teke nhwana la gandzelaka xikwembu xa mavunwa a va nsati wakwe.+ 12 Yehovha u ta herisa un’wana ni un’wana loyi a endlaka leswi ematendeni ya Yakobo, ku nga khathariseki leswaku i mani,* hambiloko a nyikela gandzelo eka Yehovha wa mavuthu.”+

13 “Ku ni nchumu wun’wana* lowu mi wu endlaka, lowu endlaka leswaku altari ya Yehovha yi tala hi mihloti, hi ku rila ni hi ku konya, lerova a nga ha ma amukeli magandzelo ya n’wina kumbe xin’wana ni xin’wana lexi humaka emavokweni ya n’wina.+ 14 Kambe mi ri, ‘Hikwalaho ka yini?’ Hikwalaho ka leswi Yehovha a nga mbhoni exikarhi ka wena ni nsati wa vuntshwa bya wena, loyi u n’wi kanganyiseke, hambileswi a nga nsati wa wena hi ku ya hi ntwanano.*+ 15 Kambe ku ni loyi a nga swi endlangiki, tanihi leswi a a ri ni moya lowo kwetsima wa Xikwembu. Xana a a lava yini? A a lava vana* va Xikwembu. Hikwalaho tivoneleni, ku nga tshuki ku va ni loyi a xengaka nsati wa vuntshwa byakwe. 16 Hikuva ndzi venga* ku dlaya vukati,”+ ku vula Yehovha Xikwembu xa Israyele “ni munhu wa madzolonga,”* ku vula Yehovha wa mavuthu. “Tivoneleni mi nga tshuki mi kanganyisa.+

17 “N’wina mi endle Yehovha a karhala hi marito ya n’wina.+ Kambe mi ri, ‘Xana hi n’wi karharise hi ndlela yihi?’ Hi ku vula mi ku, ‘Un’wana ni un’wana loyi a endlaka leswo biha u lulamile eka Yehovha naswona wa tsaka hi vanhu vo tano,’+ kumbe hi ku vula mi ku, ‘Xi kwihi Xikwembu lexi nga ni vululami?’”

3 “Maswivo! Ndzi rhuma nandza wa mina, u ta ndzi basisela* ndlela.+ Hi ku hatlisa Hosi ya ntiyiso leyi mi yi lavaka yi ta ta etempeleni ya yona;+ kutani murhumiwa wa ntwanano loyi mi n’wi tsakelaka u ta ta. Kunene u ta ta,” ku vula Yehovha wa mavuthu.

2 “Kambe i mani loyi a nga ta tiyisela siku ra ku ta ka yena naswona i mani loyi a nga ta kota ku yima loko a humelela? Hikuva u ta fana ni ndzilo wa mun’okisi wa nsimbhi a tlhela a fana ni xisibi+ xa vahlantswi. 3 U ta tshama a ri mun’okisi ni mubasisi wa silivhere+ naswona u ta basisa vana va Levhi; u ta va endla va tenga ku fana ni nsuku ni silivhere, kutani va ta va vanhu lava endlelaka Yehovha gandzelo hi ndlela leyinene. 4 Gandzelo ra Yuda ni ra Yerusalema ri ta tsakisa Yehovha ku fana ni le masikwini ya khale swinene ni le malembeni ya khale.+

5 “Ndzi ta ta eka n’wina leswaku ndzi ta mi avanyisa, ndzi ta va mbhoni leyi taka hi ku hatlisa ku lwa ni valoyi,+ vaoswi, lava endlaka switshembiso kambe va nga swi hetisisi,+ lava dyelelaka vatirhi,+ tinoni ni vana lava nga riki na tatana*+ ni lava alaka ku pfuna* valuveri.+ Vanhu lava a va ndzi chavanga,” ku vula Yehovha wa mavuthu.

6 “Hikuva hi mina Yehovha; a ndzi cinci.*+ N’wina mi vana va Yakobo; a mi lovisiwanga. 7 Ku sukela emasikwini ya vakokwa wa n’wina a mi yi yingisanga milawu ya mina.+ Tlhelelani eka mina kutani ndzi ta tlhelela eka n’wina,”+ ku vula Yehovha wa mavuthu.

Kambe mi ri: “Xana hi ta tlhelela njhani?”

8 “Xana munhu wa nyama a nga kanganyisa Xikwembu? Kambe n’wina ma ndzi kanganyisa.”

Mi ri: “Xana hi ku kanganyise hi ndlela yihi?”

“Hi vukhume ni hi minyikelo. 9 Mi rhukaniwile hikuva ma ndzi kanganyisa, tiko hinkwaro ri endla tano. 10 Tisani vukhume hinkwabyo exitlatini*+ leswaku ku ta va ni swakudya endlwini ya mina;+ ndzi kombela mi ndzi ringa, emhakeni leyi,” ku vula Yehovha wa mavuthu, “ku vona loko ndzi ta ka ndzi nga mi pfuleli tinyangwa ta matilo+ ndzi mi chululela mikateko, kukondza ku nga ha pfumaleki nchumu.”+

11 “Ndzi ta sivela switsotswana* leswaku swi nga ha dyi masimu ya n’wina, a swi nge he dyi mihandzu leyi nga kona etikweni ra n’wina naswona mirhi ya madiriva leyi nga emasin’wini ya n’wina yi ta va ni mihandzu,”+ ku vula Yehovha wa mavuthu.

12 “Matiko hinkwawo ma ta boheka ku mi vula lava tsakeke,+ hikuva mi ta va tiko ra ntsako,” ku vula Yehovha wa mavuthu.

13 “Mi vulavule ku biha hi mina,” ku vula Yehovha.

Kutani mi ri: “Xana hi vulavule ku biha hi wena hi ndlela yihi?”+

14 “Mi ri, ‘A swi pfuni nchumu ku tirhela Xikwembu.+ Xana swi hi pfune yini ku yingisa leswi Yehovha wa mavuthu a hi lerisaka swona ni ku n’wi komba leswaku ha tisola hikwalaho ka swidyoho swa hina? 15 Sweswi hi vona onge vanhu lava tikukumuxaka va tsakile. Ni lava endlaka swo biha swi va fambela kahle.+ Va ringa Xikwembu kambe a va xupuriwi.’”

16 Hi nkarhi wolowo lava chavaka Yehovha va vulavurisanile, un’wana ni un’wana a vulavurisana ni munghana wakwe, Yehovha a ya emahlweni a rhiya ndleve a yingisela. Kutani ku tsariwa buku emahlweni ka yena+ leyi nga ni mavito ya lava nga ta tsundzukiwa hi Yehovha, lava n’wi chavaka va tlhela va anakanyisisa* hi vito ra yena.+

17 “Va ta va va mina”+ ku vula Yehovha wa mavuthu, “hi siku leri ndzi nga ta va endla vanhu va mina vo hlawuleka.*+ Ndzi ta va komba tintswalo, ku fana ni loko tatana a komba n’wana wakwe loyi a n’wi yingisaka tintswalo.+ 18 Kutani mi ta tlhela mi vona ku hambana eka munhu wo lulama ni lowo homboloka+ ni le ka loyi a tirhelaka Xikwembu ni loyi a nga xi tirheliki.”

4 “Hikuva maswivo, ra ta siku leri hisaka ku fana ni khele ra ndzilo,+ leri hinkwavo lava va tikukumuxaka ni hinkwavo lava endlaka swo biha va nga ta fana ni mahlanga. Va ta lovisiwa hi siku rero, a ku nge sali munhu, va ta hela hinkwavo,”* ku vula Yehovha wa mavuthu. 2 “Kambe n’wina lava xiximaka* vito ra mina, mi ta tlhaveriwa hi dyambu leri tisaka ku lulama leri miseve ya rona yi hanyisaka; mi ta tlulatlula ku fana ni marhole lama noneke.”

3 “Mi ta kandziyela lavo homboloka hikuva va ta fana ni ritshuri ehansi ka mikondzo ya n’wina hi siku leri ndzi nga ta endla leswaku leswi swi humelela,” ku vula Yehovha wa mavuthu.

4 “Tsundzukani Nawu wa nandza wa mina Muxe, swileriso ni vuavanyisi leswi ndzi n’wi leriseke swona eHorebe, leswaku Vaisrayele hinkwavo va swi yingisa.+

5 “Maswivo! Ndzi rhuma muprofeta Eliya+ eka n’wina, ku nga si fika siku lerikulu ni leri chavisaka ra Yehovha.+ 6 U ta endla leswaku timbilu ta vatatana ti fana ni ta vana va vona+ ni timbilu ta vana ti fana ni ta vatata wa vona,* leswaku ndzi nga fiki ndzi hlasela misava ndzi yi lovisa.”

(Vuhundzuluxeri bya Matsalwa ya Xiheveru ni Xiaramu byi hela kwala, ku ta landzela bya Matsalwa ya Vukreste ya Xigriki)