PAPILA LERI YAKA EKA VAFILIPIYA

1 Papila leri ri huma eka Pawulo na Timotiya, malandza ya Kreste Yesu, ri ya eka vakwetsimi hinkwavo lava nga vadyondzisiwa va Kreste Yesu lava nga eFilipiya,+ swin’we ni valanguteri ni malandza ya vutirheli:+

2 Onge mi nga va ni musa lowukulu ni ku rhula leswi humaka eka Xikwembu Tata wa hina ni le ka Hosi Yesu Kreste.

3 Mikarhi hinkwayo loko ndzi mi tsundzuka ndzi khensa Xikwembu xa mina 4 eka xikombelo xin’wana ni xin’wana lexi ndzi xi endlelaka n’wina hinkwenu. Ndzi endla xikombelo xin’wana ni xin’wana hi ntsako,+ 5 hikwalaho ka leswi mi seketelaka ku chumayeriwa ka mahungu lamanene ku sukela hi siku ro sungula ku ta fikela sweswi. 6 Ndza tshemba leswaku leswi Xikwembu xi sunguleke ntirho lowunene eka n’wina xi ta wu hetisa+ ku ya fika hi siku ra Kreste Yesu.+ 7 I swinene ku va ndzi ehleketa ha n’wina hi ndlela leyi, hikuva mi le mbilwini ya mina naswona hi tiphina swin’we hi musa lowukulu wa Xikwembu naswona mi ndzi seketerile loko ndzi ri ekhotsweni+ ni loko ndzi simeka ni ku lwela mahungu lamanene hi nawu.+

8 Hikuva Xikwembu xa swi tiva leswaku ndza mi tsundzuka swinene hinkwenu naswona ndza mi rhandza hilaha Kreste Yesu a mi rhandzaka hakona. 9 Ndzi ya emahlweni ndzi khongelela leswaku rirhandzu ra n’wina ri ya ri kula swinene,+ hi vutivi bya ntiyiso+ ni ku twisisa loku enteke;+ 10 leswaku mi ta tiva swilo leswi nga swa nkoka swinene,+ mi nga vi na xivati naswona mi nga khunguvanyisi van’wana+ ku fikela esikwini ra Kreste; 11 ni leswaku mi tala mihandzu yo lulama hi ku pfuniwa hi Yesu Kreste+ leswaku Xikwembu xi ta vangamisiwa ni ku tlhela xi dzunisiwa.

12 Vamakwerhu sweswi ndzi lava mi swi tiva leswaku xiyimo xa mina xi endle leswaku mahungu lamanene ma ya emahlweni, 13 hikuva Varindzi hinkwavo va Mufuminkulu ni lavan’wana hinkwavo va swi twile+ leswaku ndzi pfaleriwe ekhotsweni+ hikwalaho ka Kreste. 14 Vamakwerhu vo tala eHosini se va ni ripfumelo hikwalaho ka ku khomiwa ka mina naswona va ni xivindzi xa ku chumayela rito ra Xikwembu va nga chavi nchumu.

15 I ntiyiso leswaku van’wana va chumayela hi Kreste hikwalaho ka mona ni ku phikizana, kambe van’wana va chumayela hikwalaho ka xikongomelo lexinene. 16 Lava chumayelaka hikwalaho ka xikongomelo lexinene, va chumayela hi Kreste hikwalaho ka rirhandzu, hikuva va swi tiva leswaku ndzi vekiwe leswaku ndzi lwela mahungu lamanene;+ 17 kambe lava chumayelaka hikwalaho ka mona ni ku phikizana, va endla tano ku nga ri hikwalaho ka xikongomelo lexinene, hikuva va tiyimisele ku ndzi vangela nhlomulo loko ndza ha ri ekhotsweni. 18 Xana ku ve ni vuyelo byihi? Ku chumayeriwa hi Kreste hi tindlela to hambanahambana, hambi ku ri hi ndlela ya vukanganyisi kumbe ya ntiyiso naswona ndza tsaka ha swona. Ndzi ta ya emahlweni ndzi tsaka, 19 hikuva ndza swi tiva leswaku leswi swi ta endla leswaku ndzi ponisiwa hikwalaho ka xikombelo xa n’wina+ ni hi ku pfuniwa hi moya wa Yesu Kreste.+ 20 Leswi swi fambisana ni ku langutela ka mina lokukulu ni ku tshemba leswaku a ndzi nge khomiwi hi tingana nikatsongo, kambe hikwalaho ka ntshunxeko wo vulavula, Kreste u ta vangamisiwa sweswi ku fana ni le nkarhini lowu hundzeke, u ta vangamisiwa hikwalaho ka miri wa mina, hambiloko ndzi hanya kumbe ndzi file.+

21 Hikuva mina loko ndzi hanya ndzi hanyela Kreste+ kasi loko ndzi fa ndza vuyeriwa.+ 22 Kambe loko ndza ha hanya emirini lowu, ndzi ta kota ku endla swilo swo tala entirhweni wa Kreste. Hambiswiritano, a ndzi nge vuli leswaku ndzi ta hlawula yini. 23 A ndzi swi tivi leswaku ndzi ta hlawula yini eka swilo leswimbirhi, hikuva ndza swi navela ku tshunxiwa kasi hi hala tlhelo ndzi navela ku va na Kreste,+ leswi entiyisweni ku nga swona swi antswaka ngopfu.+ 24 Hambiswiritano, i swa nkoka leswaku ndzi ya emahlweni ndzi hanya eka miri lowu hikwalaho ka n’wina. 25 Kutani hikwalaho ka sweswo, ndza swi tiva leswaku ndzi ta ya emahlweni ndzi hanya, ndza ha ta va na n’wina hinkwenu leswaku mi ta ya emahlweni mi kula ni ku tsaka eripfumelweni ra n’wina, 26 leswaku loko ndzi tlhela ndzi ta eka n’wina, mi ta va ni ntsako lowukulu eka Kreste Yesu hikwalaho ka mina.

27 Ntsena tikhomeni hi ndlela leyi fanelaka mahungu lamanene mayelana na Kreste+ leswaku hambi ndzi ta mi vona kumbe ndzi nga ri kona, ndzi twa hi ta n’wina ni ku twa leswaku ma ha yime mi tiyile hi moya wun’we,+ mi lwela ripfumelo leri vaka kona hikwalaho ka mahungu lamanene hi vun’we, 28 mi nga tshuki mi chavisiwa hi vakaneti va n’wina. Sweswo i vumbhoni bya leswaku va ta lovisiwa+ ni leswaku n’wina mi ta ponisiwa;+ leswi swi huma eka Xikwembu. 29 Hikuva mi nyikiwe nkateko hikwalaho ka Kreste, ku nga ri ku va ni ripfumelo ntsena eka yena kambe ni ku xaniseka hikwalaho ka yena.+ 30 Hikuva mi lwa nyimpi leyi fanaka ni leyi mi ndzi voneke ndzi yi lwa,+ leyi ni sweswi mi twaka leswaku ndza ha ya emahlweni ndzi yi lwa.

2 Loko ku ri ni xilaveko xo khutaza lava nga ni vun’we na Kreste, loko mi kota ku chavelela van’wana hi rirhandzu, loko mi kota ku khathalela van’wana ni ku rhandzana ni ku twelana vusiwana, 2 endlani tano leswaku ndzi tsaka ngopfu hi ku va ni mianakanyo yin’we, mi va ni rirhandzu leri fanaka, mi va ni vun’we ni ku ehleketa hi ndlela leyi fanaka.+ 3 Mi nga endli nchumu hi ku kanetana+ kumbe hi ku tikurisa,+ kambe hi ku titsongahata mi teka van’wana va ri lava tlakukeke eka n’wina,+ 4 mi nga ehleketi hi leswi vuyerisaka n’wina ntsena,+ kambe ehleketelelani ni van’wana.+

5 Vanani ni mianakanyo yo fana ni ya Kreste Yesu,+ 6 loyi hambileswi a a ri ni xivumbeko xo fana ni xa Xikwembu,+ a nga telangiki hi miehleketo yo lwela ku ringana ni Xikwembu.+ 7 Kambe u tshike* swilo hinkwaswo leswi a ri na swona kutani a fana ni hlonga,+ a va munhu.+ 8 Ku tlula sweswo, loko a tile tanihi munhu, u titsongahatile kutani a yingisa ku ya fika eku feni,+ u fele emhandzini ya nxaniso.*+ 9 Hikwalaho ka xivangelo lexi, Xikwembu xi n’wi tlakusile hi ku n’wi nyika xikhundlha lexi tlakukeke+ kutani hi musa xi n’wi nyika vito leri nga ehenhla ka mavito laman’wana hinkwawo,+ 10 leswaku hinkwavo lava nga etilweni ni lava nga emisaveni ni lava nga ehansi ka misava,+ va khinsama hi vito ra Yesu, 11 naswona tindzimi hinkwato ti fanele ti swi vula erivaleni leswaku Yesu Kreste i Hosi,+ leswaku ku vangamisiwa Xikwembu Tatana.

12 Hikwalaho varhandziwa, tanihi leswi mikarhi hinkwayo mi yingisaka, ku nga ri loko ndzi ri kona ntsena kambe ngopfungopfu ni loko ndzi nga ri kona, yanani emahlweni mi tirhela ku ponisiwa ka n’wina hi ku chava ni ku rhurhumela. 13 Hikuva Xikwembu xi endla swilo hi ndlela leyi xi yi tsakelaka, xi mi nyika matimba yo navela ni ku endla swilo hinkwaswo leswi xi swi lavaka. 14 Endlani swilo hinkwaswo mi nga gunguli+ kumbe ku kanetana,+ 15 leswaku mi pfumala xisandzu ni ku kala nandzu, mi va vana va Xikwembu+ lava nga riki na xisolo hambileswi mi hanyaka ni vanhu vo homboloka+ lava endlaka swo biha, lava mi voningaka exikarhi ka vona tanihi mavoni emisaveni,+ 16 mi khoma swi tiya eritweni ra vutomi.+ Kutani ndzi ta va ni xivangelo xo tsaka esikwini ra Kreste, hi ku tiva leswaku a ndzi tsutsumelanga mahala kumbe ku tirha hi matimba ndzi tirhela swa hava. 17 Kambe, hambiloko ndzi chuluriwa ku fana ni gandzelo ra swakunwa,+ ndzi endla gandzelo+ leri na n’wina mi ri endlaka ni ntirho lowu mi wu endlelaka Xikwembu hi ku tshembeka. Ndza tsaka ni ku khana swin’we na n’wina hinkwenu. 18 Hilaha ku fanaka, na n’wina mi fanele mi tsaka ni ku khana swin’we na mina.

19 Kutani ndza tshemba leswaku loko Hosi Yesu a swi rhandza, ndzi ta rhuma Timotiya+ eka n’wina ku nga ri khale, leswaku ndzi ta khutazeka loko a ndzi byela hi ta n’wina. 20 Hikuva a ndzi na un’wana la fanaka na yena loyi a nga ta mi khathalela hi mbilu hinkwayo. 21 Hikuva lavan’wana hinkwavo va lava leswi vuyerisaka vona ntsena, ku nga ri leswi laviwaka hi Yesu Kreste. 22 Kambe ma swi tiva leswaku u swi kombisile leswaku yena a nga tano, hikuva ku fana ni n’wana+ ni tata wakwe, u tirhe na mina ku chumayela mahungu lamanene. 23 Hikwalaho, hi yena loyi ndzi tshembaka leswaku ndzi ta n’wi rhuma endzhakunyana ka loko ndzi vone leswi nga ta humelela eka mina. 24 Hakunene, ndza tshemba leswaku loko Hosi yi swi rhandza na mina ndzi ta ta ku nga ri khale.+

25 Kambe sweswi ndzi vona swi fanerile ku mi rhumela Epafrodito, makwerhu ni mutirhikulorhi ni sochakulorhi naswona i muyimeri loyi mi n’wi rhumeke leswaku a ta ndzi pfuna,+ 26 tanihi leswi a navelaka ku mi vona hinkwenu ni leswi a karhatekeke hikwalaho ka leswi mi nga twa leswaku a a vabya. 27 Hakunene, a a vabya lerova a ku sale katsongo a fa; kambe Xikwembu xi n’wi kombe tintswalo, entiyisweni ku nga ri yena ntsena kambe na mina, leswaku ndzi nga vi ni gome lerikulu ku tlula leri ndzi nga na rona. 28 Hikwalaho, ndzi n’wi rhumela eka n’wina hi ku hatlisa swinene, leswaku loko mi n’wi vona mi ta tlhela mi tsaka kutani na mina ndzi nga ha vileli ngopfu. 29 Kutani n’wi amukeleni hi ntsako lowukulu hilaha mi va amukelaka hakona valandzeri va Hosi, mi xixima vanhu vo tano.+ 30 A ku sale katsongo a file hikwalaho ka ntirho wa Kreste,* naswona u veke vutomi byakwe ekhombyeni hikwalaho ka mina hikuva a mi nga ri kona leswaku mi kota ku ndzi pfuna.+

3 Hikwalaho, vamakwerhu, tsakani hikwalaho ka Hosi.+ A swi ndzi karhalisi ku mi tsalela swilo leswi fanaka hikuva swi sirhelela n’wina.

2 Tivoneleni eka lava tikhomaka ku fana ni timbyana; tivoneleni eka lava vavisaka van’wana; tivoneleni eka lava khutazaka ku yimba.*+ 3 Hikuva hi hina lava yimbeke swa xiviri,+ lava endlaka ntirho wo kwetsima hi moya wa Xikwembu, hi tibuma hi Kreste Yesu+ naswona a hi veki ntshembo eka swilo swa nyama, 4 hambileswi ndzi nga ni xivangelo xo veka ntshembo eka swilo swa nyama ku tlula vanhu hinkwavo.

Loko ku ri ni loyi a ehleketaka leswaku u ni xivangelo xo veka ntshembo eka swilo swa nyama, mina ndza n’wi tlula: 5 ndzi yimbe hi siku ra vunhungu,+ ndzi Muisrayele wa nyimba ya Benjamini naswona ndzi Muheveru loyi a velekiweke hi Vaheveru;+ loko swi ta eka ku landzela nawu, ndzi Mufarisi;+ 6 loko swi ta eka ku hiseka, ndzi xanise vandlha;+ loko swi ta eku endleni ka leswo lulama hi ku ya hi nawu, a ndzi vanga na nandzu. 7 Hambiswiritano, swilo leswi a ndzi swi teka swi ri swa nkoka swinene, ndzi swi teka swi nga pfuni nchumu* hikwalaho ka Kreste.+ 8 Ndzi teka swilo hinkwaswo ku ri leswi nga pfuniki nchumu loko swi pimanisiwa ni vutivi bya nkoka swinene bya ku tiva Kreste Yesu Hosi ya mina. Ndzi lahle swilo hinkwaswo hikwalaho ka yena, ndzi swi teka swi ri nhulu ya thyaka leswaku ndzi kuma Kreste 9 naswona ndzi mulandzeri wakwe. Kambe a ndzi vuli swona leswaku ndzi lulamile hikwalaho ka leswi ndzi landzelaka Nawu kambe ndzi vuriwa loyi a lulameke hikwalaho ka leswi ndzi nga ni ripfumelo+ eka Kreste.+ Hakunene Xikwembu xi teka lava nga ni ripfumelo eka yena va ri lava lulameke.+ 10 Xikongomelo xa mina i ku n’wi tiva ni ku twisisa nkoka wa ku pfuxiwa kakwe+ ni ku xaniseka ku fana na yena.+ Ndzi tiyimisele ku fa ku fana na yena,+ 11 leswaku loko swi koteka ndzi va un’wana wa lava nga ta pfuxiwa ku sungula eka lava feke.+

12 A ndzi vuli swona leswaku se ndzi yi kumile hakelo leyi kumbe leswaku se ndzi hetisekile, kambe ndzi tirha hi matimba+ ku endla leswi Kreste Yesu a ndzi hlawuleleke ku swi endla.+ 13 Vamakwerhu, a ndzi titeki se ndzi yi kumile hakelo; kambe ndzi endla leswi: Ndzi rivala swilo swa le ndzhaku+ ndzi tikarhatela ku kuma swilo leswi nga emahlweni,+ 14 xikongomelo xa mina i ku tikarhatela ku kuma hakelo+ ya ku vitaneriwa etilweni+ hi Xikwembu hi ku tirhisa Kreste Yesu. 15 Hikwalaho, hina lava nga ni ripfumelo leri tiyeke,+ a hi anakanyeni hi ku pfumelelana ni swilo leswi ndzi mi byeleke swona. Loko swi nga ri tano, Xikwembu xi ta mi pfuna leswaku mi va ni mianakanyo yoleyo. 16 Eka leswi se hi swi fikeleleke, a hi yeni emahlweni hi endla hi ndlela yoleyo.

17 Vamakwerhu, ndzi tekeleleni+ kutani mi xiyisisa lava fambaka hi ndlela leyi fambisanaka ni xikombiso lexi hi mi vekeleke xona. 18 Hikuva va tele lava fambaka tanihi valala va mhandzi ya nxaniso* ya Kreste, lava a ndzi tshamela ku vulavula hi vona kambe sweswi ndzi vulavula hi vona ndzi ri karhi ndzi rila. 19 Makumu ya vona i rifu, xikwembu xa vona i khwiri ra vona, va tibuma hi swilo leswi va swi endlaka leswi khomisaka tingana; va tshamela ku anakanya hi swilo swa misava leyi.+ 20 Kambe kaya ra hina+ ri le tilweni+ naswona hi n’wi langutele hi mahlongati muponisi loyi a humaka kona ku nga Hosi Yesu Kreste,+ 21 loyi a nga ta tirhisa matimba yakwe lamakulu leswaku a hundzula miri wa hina lowu tsaneke wu fana ni miri wakwe lowu vangamaka+ ni ku tlhela a tirhisa matimba wolawo ku fuma swilo hinkwaswo.+

4 Hikwalaho, vamakwerhu lava ndzi va rhandzaka ni lava ndzi navelaka ku va vona, n’wina mi nga ntsako ni harhi ya mina,+ yimani mi tiyile+ hi ndlela leyi eHosini, n’wina varhandziwa.

2 Ndzi khutaza Efodiya na Sintika leswaku va va ni mianakanyo yin’we eHosini.+ 3 Na wena ndza ku kombela tanihi mutirhikulorhi wa ntiyiso leswaku u ya emahlweni u pfuna vavasati lava, lava tirheke na mina hi matimba eku chumayeleni ka mahungu lamanene, swin’we na Klemento ni vatirhikulorhi lavan’wana hinkwavo, lava mavito ya vona ma nga ebukwini ya vutomi.+

4 Tshamani mi tsakile eHosini. Nakambe ndzi ri, Tsakani!+ 5 Ku anakanyela+ ka n’wina a ku tiviwe hi vanhu hinkwavo. Hosi yi le kusuhi. 6 Mi nga vileli ha nchumu,+ kambe eka hinkwaswo kombelani Xikwembu hi xikhongelo leswaku xi mi pfuna, mi kombela mi ri karhi mi khensa;+ 7 kutani ku rhula+ ka Xikwembu loku tlulaka ku twisisa hinkwako ku ta rindza timbilu+ ta n’wina ni mianakanyo ya n’wina ha Kreste Yesu.

8 Xo hetelela vamakwerhu, swilo hinkwaswo leswi nga ntiyiso, swilo hinkwaswo leswi nga swa nkoka, swilo hinkwaswo leswi lulameke, swilo hinkwaswo leswi tengeke, swilo hinkwaswo leswi rhandzekaka, swilo hinkwaswo leswi ku vulavuriwaka kahle ha swona, swilo hinkwaswo leswi nga swinene ni swilo hinkwaswo leswi dzunekaka, yanani emahlweni mi anakanyisisa ha swona.+ 9 Hanyani hi swilo leswi mi swi dyondzeke ni ku swi amukela ni ku swi twa ni ku swi vona eka mina,+ kutani Xikwembu xa ku rhula xi ta va na n’wina.

10 Ndza tsaka swinene eHosini hileswi mi nga tlhela mi ndzi tsundzuka.+ Hambileswi a mi karhateka hi mina, a mi wu kumanga nkarhi wo swi kombisa. 11 Leswi a ndzi swi vuli hikwalaho ka leswi ndzi pfumalaka, hikuva ndzi dyondze ku eneriseka eka xiyimo xin’wana ni xin’wana lexi ndzi nga eka xona.+ 12 Ndza swi kota ku hanya hi leswitsongo+ kumbe hi swo tala. Eka hinkwaswo ni le ka swiyimo hinkwaswo ndzi dyondze xihundla xa ku xurha ni ku va ni ndlala, ku va ni swo tala ni ku pfumala. 13 Eka hinkwaswo ndzi ni matimba hikwalaho ka loyi a ndzi nyikaka matimba.+

14 Nilokoswiritano, mi endle kahle hi ku ndzi pfuna loko ndzi ri emaxangwini. 15 Kahlekahle n’wina Vafilipiya ma swi tiva leswaku endzhaku ka loko mi twe mahungu lamanene ro sungula, loko ndzi suka eMakedoniya, ku hava vandlha leri ndzi pfuneke handle ka n’wina ntsena;+ 16 hikuva loko ndza ha ri eTesalonika mi ndzi rhumelele swilo leswi a ndzi swi pfumala kambirhi loku. 17 A ndzi vuli swona leswaku ndzi lava nyiko kambe ndzi lava leswaku mi endla swilo leswinene leswi nga ta mi vuyerisa swinene. 18 Hambiswiritano, ndzi kume swilo hinkwaswo leswi ndzi swi pfumalaka naswona swi tele. Ndzi enerisekile hikuva ndzi swi kumile swilo leswi mi swi rhumeleke na Epafrodito,+ ku nga nun’hwelo wo nandziha,+ gandzelo leri amukelekaka ni leri tsakisaka swinene eka Xikwembu. 19 Kutani, Xikwembu lexi nga ni rifuwo leri vangamaka xi ta mi nyika swilo hinkwaswo leswi mi swi pfumalaka+ ha Kreste Yesu. 20 Ku vangama a ku ve eka Xikwembu xa hina tlhelo Tata wa hina hilaha ku nga heriki. Amen.

21 Rungulani vakwetsimi hinkwavo lava nga vadyondzisiwa va Kreste Yesu. Vamakwerhu lava nga na mina va mi rungula. 22 Vakwetsimi hinkwavo, kambe ngopfungopfu lava nga vandyangu wa Khezari+ va mi rungula.

23 Musa lowukulu wa Hosi Yesu Kreste a wu ve ni moya lowu mi wu kombisaka.