PAPILA RA VUMBIRHI LERI YAKA EKA VATESALONIKA

1 Hi mina Pawulo, ndzi na Silvhano* na Timotiya,+ eka vandlha ra Vatesalonika leri nga ni vun’we ni Xikwembu Tata wa hina na Hosi Yesu Kreste:

2 Onge mi nga va ni musa lowukulu ni ku rhula leswi humaka eka Xikwembu Tatana ni le ka Hosi Yesu Kreste.

3 Vamakwerhu, hi fanele ku khensa Xikwembu hi masiku hikwalaho ka n’wina. Leswi swa fanela hikuva ripfumelo ra n’wina ri ya ri kula swinene naswona ndlela leyi mi rhandzanaka ha yona ya kula.+ 4 Hikwalaho ka sweswo, ha tinyungubyisa hi n’wina+ emavandlheni ya Xikwembu hikwalaho ka ku tiyisela ka n’wina ni ripfumelo ra n’wina loko mi xanisiwa ni nhlomulo lowu mi wu tiyiselaka.+ 5 Leswi i vumbhoni bya leswaku Xikwembu xi avanyisa hi ndlela yo lulama. Hikwalaho ka sweswo, ma faneleka ku nghena eMfun’weni wa Xikwembu, lowu mi xanisekaka hikwalaho ka wona.+

6 Leswi Xikwembu xi nga lulama, xi ta xupula lava mi xanisaka.+ 7 Kambe n’wina lava mi xanisiwaka, Xikwembu xi ta mi tshunxa swin’we na hina loko Hosi Yesu+ a humelela* hi le tilweni a ri ni tintsumi takwe ta matimba+ 8 a ri endzilweni lowu pfurhaka, leswaku a xupula lava nga xi tiviki Xikwembu ni lava nga ma yingisiki mahungu lamanene mayelana ni Hosi ya hina Yesu.+ 9 Lava va ta avanyisiwa hi Hosi ya hina. Va ta loviseriwa makumu,+ naswona a yi nge he va languti kumbe ku va pfuna hi matimba ya yona lamakulu. 10 Loko Hosi ya hina yi ta leswaku yi vangamisiwa ni vamakwavo va yona lava kwetsimaka, hinkwavo lava pfumelaka eka yona va ta yi xixima. Kutani leswi mi tshembeke swilo leswi hi mi byeleke swona, na n’wina mi ta va exikarhi ka vona.

11 Hi yona mhaka leyi hi mi khongelelaka nkarhi na nkarhi, leswaku Xikwembu xa hina xi ta vona swi fanerile ku mi vitana+ naswona hi matimba ya xona xi endla swilo hinkwaswo leswinene leswi xi swi tsakelaka, ni ku heta leswi a mi swi endla hikwalaho ka ripfumelo ra n’wina. 12 Sweswo swi ta endla leswaku vito ra Hosi ya hina Yesu ri vangamisiwa eka n’wina kutani n’wina mi va ni vun’we na yena, hi ku ya hi musa lowukulu wa Xikwembu xa hina ni wa Hosi Yesu Kreste.

2 Hambiswiritano vamakwerhu, loko swi ta eka nkarhi wa ku vuya ka Hosi ya hina Yesu Kreste+ ni ku hlengeletiwa ka hina leswaku hi va na yena,+ ha mi kombela 2 leswaku mi nga pfumeleli mianakanyo ya n’wina yi hatla yi pfilunganyiwa hambi ku ri ku chavisiwa hi marito lama vonakaka onge ma huma eka Xikwembu,+ kumbe mahungu yo karhi kumbe hi papila leri vonakaka onge ri huma eka hina, ri vula leswaku siku ra Yehovha*+ ri fikile.

3 Ku nga vi ni loyi a mi hambukisaka* hi ndlela yo karhi, hikuva a ri nge fiki ku nga si va ni vugwinehi+ ni munhu wo homboloka+ a nga si paluxiwa, n’wana wa ku lovisiwa.+ 4 I mukaneti naswona wa titlakusa eka nchumu wun’wana ni wun’wana lowu vuriwaka xikwembu kumbe nchumu lowu gandzeriwaka, lerova u tshama etempeleni ya Xikwembu, a tikombisa leswaku i xikwembu. 5 Xana a ma ha tsundzuki leswaku loko ndza ha ri na n’wina, a ndzi tshamela ku mi byela swilo leswi?

6 Kutani sweswi ma wu tiva nchumu lowu n’wi sivelaka, leswaku a ta paluxiwa hi nkarhi wakwe lowu faneleke. 7 I ntiyiso, vuhomboloki bya munhu loyi, lebyi nga xihundla se bya tirha,+ kambe byi ta tshama byi ri xihundla ku fikela loko loyi a n’wi sivelaka a nga ha ri kona. 8 Hakunene lowo homboloka u ta paluxiwa, loyi Hosi Yesu a nga ta n’wi dlaya hi marito lama nga ni matimba lama humaka enon’wini wakwe,*+ u ta n’wi lovisa hi nkarhi wa ku vuya kakwe.+ 9 Loko munhu loyi wo homboloka a humelela, u ta endla tano hi matimba ya Sathana+ naswona u ta endla masingita yo tala, swikombiso swa mavunwa ni swilo swo hlamarisa+ 10 ni vukanganyisi hinkwabyo+ eka lava lovaka, va ta xupuriwa hikuva a va wu rhandzanga ntiyiso leswaku va ta ponisiwa. 11 Hi yona mhaka leyi Xikwembu xi va pfumelelaka ku kanganyisiwa hi dyondzo ya mavunwa leswaku va tshemba mavunwa,+ 12 leswaku hinkwavo va ta avanyisiwa hikuva a va wu tshembanga ntiyiso kambe va tsakisiwe hi swilo leswi nga lulamangiki.

13 Hambiswiritano, swa fanela ku va hi khensa Xikwembu nkarhi ni nkarhi hikwalaho ka n’wina vamakwerhu lava rhandziwaka hi Yehovha,* hikuva hikwalaho ka ripfumelo ra n’wina, Xikwembu xi mi hlawule ku sukela eku sunguleni+ leswaku mi ponisiwa hi ku mi kwetsimisa+ hi moya wa xona. 14 Xi mi vitanele eku ponisiweni loku hi mahungu lamanene lawa hi ma chumayelaka, leswaku mi vangama ku fana ni Hosi ya hina Yesu Kreste.+ 15 Hikwalaho vamakwerhu, tiyani+ mi ya emahlweni mi khomelela eka timhaka leti hi mi dyondziseke tona+ hi nomu kumbe hi papila. 16 Ku tlula kwalaho, onge Hosi ya hina Yesu Kreste ni Xikwembu Tata wa hina, lexi hi rhandzeke+ kutani xi hi chavelela hilaha ku nga heriki ni ku hi nyika ntshembo lowunene+ hi musa lowukulu, 17 xi nga chavelela timbilu ta n’wina ni ku mi tiyisa leswaku mi endla ni ku vula swilo leswinene.

3 Xo hetelela vamakwerhu, mi nga tshiki ku hi khongelela+ leswaku rito ra Yehovha* ri ta ya emahlweni ri chumayeriwa hi ku hatlisa+ ni ku vangamisiwa hilaha swi nga hakona eka n’wina, 2 ni leswaku hi ponisiwa eka vanhu lava twisaka van’wana ku vava ni lava hombolokeke,+ hikuva a hi vanhu hinkwavo lava nga ni ripfumelo.+ 3 Kambe Hosi ya tshembeka, yi ta mi tiyisa ni ku mi sirhelela eka lowo homboloka. 4 Ku tlula kwalaho, leswi hi nga valandzeri va Hosi ha tshemba leswaku swileriso leswi hi mi nyikeke swona ma swi landzela naswona mi ta ya emahlweni mi swi landzela. 5 Onge Hosi yi nga ya emahlweni yi kongomisa timbilu ta n’wina hilaha ku heleleke leswaku mi rhandza Xikwembu+ ni leswaku mi tiyisela+ hikwalaho ka Kreste.

6 Sweswi vamakwerhu, hi mi nyika swileriso hi vito ra Hosi ya hina Yesu Kreste, leswaku mi hambana ni makwerhu loyi a fambaka hi ndlela leyi nga hlelekangiki+ naswona a nga fambiki hi ku ya hi swileriso leswi hi mi* nyikeke swona.+ 7 Hikuva ma yi tiva ndlela leyi mi faneleke mi hi tekelela ha yona,+ hikuva a hi tikhomanga hi ndlela leyi nga hlelekangiki exikarhi ka n’wina, 8 naswona a hi dyanga swakudya swa munhu mahala.+ Ku ri na sweswo, hi tirhe hi matimba vusiku ni nhlikanhi leswaku hi nga mi tikiseli.+ 9 Hi na yona mfanelo yo amukela swilo kambe a hi yi tirhisi,+ leswaku hi ta va xikombiso lexi mi faneleke mi xi tekelela.+ 10 Kahlekahle loko ha ha ri na n’wina, a hi tshamela ku mi lerisa hi ku: “Loko munhu a nga lavi ku tirha ni ku dya a nga dyi.”+ 11 Hikuva hi twa leswaku van’wana exikarhi ka n’wina va famba hi ndlela leyi nga hlelekangiki,+ a va tirhi nikatsongo kambe va nghenelela eka swilo leswi nga va laviki.+ 12 Vanhu vo tano ha va lerisa ni ku va tsundzuxa hi vito ra Hosi Yesu Kreste leswaku va fanele va tirha hi ku rhula naswona va dya swakudya leswi va swi tirheleke.+

13 N’wina hinkwenu vamakwerhu, mi nga tshiki ku endla swilo leswinene. 14 Kambe loko munhu a ala ku yingisa swilo leswi hi swi tsaleke epapileni leri, tshamani mi n’wi funghile naswona mi nga tihlanganisi na yena+ leswaku a ta khomiwa hi tingana. 15 Hambiswiritano, mi nga n’wi teki a ri nala kambe n’wi+ tsundzuxeni hikuva i makwenu.

16 Onge Hosi ya ku rhula yi nga mi nyika ku rhula nkarhi hinkwawo hi tindlela hinkwato.+ Onge Hosi yi nga va na n’wina hinkwenu.

17 Hi lawa marungula ya mina Pawulo, lama tsariweke hi voko ra mina,+ ku nga mfungho eka papila rin’wana ni rin’wana; leyi i ndlela leyi ndzi tsalaka ha yona.

18 Musa lowukulu wa Hosi ya hina Yesu Kreste a wu ve na n’wina hinkwenu.