PAPILA RO SUNGULA RA YOHANE

1 Lexi a xi ri kona ku sukela eku sunguleni, lexi hi xi tweke, lexi hi xi voneke hi matihlo ya hina, lexi hi xi xiyisiseke ni ku xi khoma hi mavoko ya hina, mayelana ni rito ra vutomi,+ 2 (vutomi byi kombisiwile, hi byi vonile naswona hi nyikela vumbhoni+ ni ku mi byela hi vutomi lebyi nga heriki+ lebyi a byi ri na Tatana kutani hi kombisiwa byona), 3 lexi hi xi voneke ni ku xi twa hi mi vikela xona na n’wina+ leswaku na n’wina mi ta va ni vun’we na hina. Naswona hi ni vun’we na Tatana ni N’wana wakwe Yesu Kreste.+ 4 Hi mi tsalela swilo leswi leswaku hi ta tsaka hilaha ku heleleke.

5 Lawa i mahungu lawa hi ma tweke eka yena naswona hi mi byela wona hi ku: Xikwembu i ku vonakala+ naswona a ku na munyama eka xona. 6 Loko hi ku, “Hi vanghana va xona,” kambe hi ya emahlweni hi famba emunyameni, ha hemba naswona a hi hanyi hi ntiyiso.+ 7 Hambiswiritano, loko hi famba eku vonakaleni tanihi leswi na xona xi nga eku vonakaleni, hi ni vuxaka naswona ngati ya Yesu N’wana wa xona ya hi basisa eka swidyoho hinkwaswo.+

8 Loko hi ku, “A hi na xidyoho,” ha tixisa+ naswona a hi na ntiyiso. 9 Loko hi boxa swidyoho swa hina, xi ta hi rivalela ni ku hi basisa eka swilo hinkwaswo swo biha hikuva xa tshembeka naswona xi lulamile.+ 10 Loko hi ku, “A hi dyohanga,” hi ri xa hemba naswona rito ra xona a ri kona eka hina.

2 Vana vanga, ndzi mi tsalela swilo leswi leswaku mi nga endli xidyoho. Kambe, loko mani na mani o endla xidyoho, hi ni mupfuni* loyi a nga na Tatana, ku nga Yesu Kreste,+ loyi a lulameke.+ 2 Yena i gandzelo+ leri endliweke leswaku hi ta rivaleriwa swidyoho swa hina,+ kambe ku nga ri swidyoho swa hina ntsena ni swa misava hinkwayo.+ 3 Naswona loko hi ya emahlweni hi hanya hi swileriso swakwe, hi ta va hi kombisa leswaku se ha n’wi tiva. 4 Loyi a nge, “Se ndza n’wi tiva,” kambe a nga hanyi hi swileriso swa yena, i muhembi naswona ntiyiso a wu kona eka munhu yoloye. 5 Kambe un’wana ni un’wana loyi a yingisaka rito rakwe, hakunene rirhandzu ra yena eka Xikwembu ri endliwe ri hetiseka.+ Loko na hina hi endla sweswo, hi ta va hi kombisa leswaku hi ni vun’we na yena.+ 6 Loyi a nge u ni vun’we na yena u boheka ku famba hilaha yena a fambeke hakona.+

7 Varhandziwa, a ndzi mi tsaleli nawu lowuntshwa kambe i nawu wa khale, lowu mi wu tweke ku sukela eku sunguleni.+ Nawu lowu wa khale i rito leri mi ri tweke. 8 Nakambe, ndzi mi tsalela nawu lowuntshwa, lowu yena a hanyeke ha wona na n’wina mi hanyaka ha wona, hikuva munyama wa hundza naswona ku vonakala ka ntiyiso se ka voninga.+

9 Loyi a vulaka leswaku u le ku vonakaleni kambe a venga+ makwavo, wa ha ri emunyameni.+ 10 Loyi a rhandzaka makwavo u tshama a ri eku vonakaleni+ naswona a ku na lexi nga ta n’wi khudlunya. 11 Kambe loyi a vengaka makwavo u le munyameni naswona u famba emunyameni,+ a nga ku tivi lomu a yaka kona,+ hikuva munyama wu n’wi dlaye matihlo.

12 Ndzi tsalela n’wina vana vanga, hikuva mi rivaleriwe swidyoho hikwalaho ka vito ra yena.+ 13 Ndzi tsalela n’wina vatatana, hikuva se ma n’wi tiva loyi a a ri kona ku sukela eku sunguleni. Ndzi tsalela n’wina majaha, hikuva mi hlule lowo homboloka.+ Ndzi tsalela n’wina vana, hikuva se ma n’wi tiva Tatana.+ 14 Ndzi tsalela n’wina vatatana, hikuva se ma n’wi tiva loyi a a ri kona ku sukela eku sunguleni. Ndzi tsalela n’wina majaha, hikuva mi ni matimba,+ rito ra Xikwembu ri tshama etimbilwini ta n’wina+ naswona mi hlule lowo homboloka.+

15 Mi nga rhandzi misava kumbe swilo leswi nga emisaveni.+ Loko mani na mani a rhandza misava, a nga n’wi rhandzi Tatana;+ 16 hikuva hinkwaswo leswi nga emisaveni—ku navela ka nyama,+ ku navela ka matihlo+ ni ku bombisa* rifuwo—a swi humi eka Tatana, kambe swi huma emisaveni. 17 Ku tlula kwalaho, misava ya hundza ni leswi vanhu va swi navelaka eka yona,+ kambe loyi a endlaka ku rhandza ka Xikwembu u tshama hilaha ku nga heriki.+

18 Vana vanga, i nkarhi wo hetelela naswona hilaha mi tweke hakona leswaku mukaneti wa Kreste wa ta,+ hambi sweswi ku ni vakaneti va Kreste vo tala,+ leswi hi kombaka leswaku se i nkarhi wo hetelela. 19 Va humile eka hina, kambe a va nga ri va ka hina;+ hikuva loko a va ri va ka hina, a va ta va va tshame na hina. Kambe va humile ku komba leswaku a hi vanhu hinkwavo va nga va ka hina.+ 20 Hambiswiritano, n’wina mi hlawuriwe hi mukwetsimi+ naswona hinkwenu mi ni vutivi. 21 Lexi endlaka ndzi mi tsalela, a hi leswi mi nga wu tiviki ntiyiso,+ kambe hileswi mi wu tivaka ni leswi ku nga riki na mavunwa lama humaka entiyisweni.+

22 I mani muhembi loko ku nga ri loyi a vulaka leswaku Yesu a hi Kreste?+ Yoloye i mukaneti wa Kreste,+ yena loyi a nga pfumeliki eka Tatana ni N’wana. 23 Un’wana ni un’wana loyi a nga pfumeliki eka N’wana a nga na vuxaka na Tatana.+ Kambe loyi a pfumelaka eka N’wana+ u ni vuxaka na Tatana.+ 24 Loko ku ri n’wina, leswi mi swi tweke eku sunguleni swi fanele swi tshama etimbilwini ta n’wina.+ Loko leswi mi swi tweke eku sunguleni swi tshama etimbilwini ta n’wina, na n’wina mi ta va ni vun’we ni N’wana swin’we na Tatana. 25 Ku tlula kwalaho, leswi hi leswi yena hi byakwe a hi tshembiseke swona, vutomi lebyi nga heriki.+

26 Ndzi mi tsalela swilo leswi mayelana ni vanhu lava ringetaka ku mi hambukisa. 27 Loko ku ri n’wina, moya lowu a mi hlawuleke ha wona+ wu tshama eka n’wina, kutani a mi lavi munhu wa ku mi dyondzisa; kambe ku hlawuriwa loku humaka eka yena ku mi dyondzisa swilo hinkwaswo,+ i ka ntiyiso a hi ka mavunwa. Tshamani mi ri ni vun’we na yena hilaha ku mi dyondziseke hakona.+ 28 Hikwalaho, vana vanga, tshamani mi ri ni vun’we na yena, leswaku loko a humelela, hi ta swi kota ku vulavula hi tshunxekile,+ hi nga khomiwi hi tingana loko a vuya. 29 Loko mi swi tiva leswaku u lulamile, ma swi tiva leswaku un’wana ni un’wana loyi a endlaka swilo leswinene u velekiwe hi yena.+

3 Vonani ndlela leyi Tatana a hi rhandzaka ha yona,+ lerova hi vuriwa vana va Xikwembu!+ Hi vana va xona. Hi yona mhaka leyi misava yi nga hi tiviki,+ hikuva a yi n’wi tivi Tatana.+ 2 Varhandziwa, sweswi hi vana va Xikwembu,+ kambe a hi si swi tiva leswi hi nga ta va swona.+ Ha swi tiva leswaku loko a humelela hi ta fana na yena, hikuva hi ta n’wi vonisa leswi a nga xiswona. 3 Un’wana ni un’wana loyi a n’wi tshembaka wa tibasisa,+ hikuva na yena u basile.

4 Un’wana ni un’wana loyi a hanyaka hi xidyoho u tlula nawu, xidyoho i ku tlula nawu. 5 Nakambe ma swi tiva leswaku u tile a ta susa swidyoho swa hina+ naswona yena a nga dyohanga. 6 Un’wana ni un’wana loyi a nga ni vun’we na yena a nga hanyi hi xidyoho;+ loyi a hanyaka hi xidyoho a nga n’wi vonanga kumbe ku n’wi tiva. 7 Vana vanga, mi nga xisiwi hi munhu; loyi a endlaka swo lulama u lulamile, tanihi leswi na yena a lulameke. 8 Loyi a hanyaka hi xidyoho u huma eka Diyavulosi, hikuva Diyavulosi a a dyoha ku sukela eku sunguleni.+ Hikwalaho ka sweswo, N’wana wa Xikwembu u tile leswaku a ta herisa mitirho ya Diyavulosi.+

9 Un’wana ni un’wana loyi a velekiweke hi Xikwembu a nga hanyi hi xidyoho,+ hikuva matimba ya Xikwembu* ma tshama eka yena kutani a nge hanyi hi xidyoho, hikuva u velekiwe hi Xikwembu.+ 10 Vana va Xikwembu ni vana va Diyavulosi va vonaka hi leswi: Un’wana ni un’wana loyi a nga endliki leswo lulama a nga humi eka Xikwembu, hambi ku ri loyi a nga rhandziki makwavo.+ 11 Hikuva leyi i mhaka leyi mi yi tweke ku sukela eku sunguleni, leswaku hi fanele hi rhandzana;+ 12 hi nga fani na Kayini, loyi a humeke eka lowo homboloka ivi a dlaya makwavo.+ Kutani xana a a n’wi dlayela yini? Hileswi mitirho yakwe a yi hombolokile,+ kambe ya makwavo a yi lulamile.+

13 Vamakwerhu, mi nga hlamali leswi misava yi mi vengaka.+ 14 Ha swi tiva leswaku hi hundzile eku feni hi ya evuton’wini,+ hikuva hi rhandza vamakwerhu.+ Loyi a nga riki na rirhandzu u tshama eku feni.+ 15 Un’wana ni un’wana loyi a vengaka makwavo i mudlayi+ naswona ma swi tiva leswaku a ku na mudlayi loyi a nga ta kuma vutomi lebyi nga heriki.+ 16 Rirhandzu se ha ri tiva, hikuva yena u nyikele hi vutomi bya yena hikwalaho ka hina+ naswona na hina hi boheka ku fela vamakwerhu.+ 17 Kambe loko un’wana ni un’wana la nga ni swilo swa misava leyi a vona makwavo loyi a nga xisiwana kambe a nga n’wi tweli vusiwana, xana a nga vurisa ku yini leswaku u rhandza Xikwembu?+ 18 Vana vanga, hi fanele hi rhandzana hi swiendlo+ ni ntiyiso+ ku nga ri hi marito kumbe nomu.+

19 Loko hi endla sweswo hi ta swi tiva leswaku hi va ntiyiso naswona hi ta tiyisekisa timbilu ta hina emahlweni ka yena 20 mayelana ni xin’wana ni xin’wana lexi timbilu ta hina ti nga hi solaka ha xona, hikuva Xikwembu i xikulu eka timbilu ta hina naswona xi tiva swilo hinkwaswo.+ 21 Varhandziwa, loko timbilu ta hina ti nga hi soli, hi ta vulavula ni Xikwembu hi tshunxekile;+ 22 naswona xin’wana ni xin’wana lexi hi xi kombelaka xa hi nyika+ hikuva hi yingisa swileriso swa xona naswona hi endla leswi tsakisaka emahlweni ka xona. 23 Kunene, xileriso xa xona hi lexi: leswaku hi va ni ripfumelo eka vito ra N’wana wa xona Yesu Kreste+ naswona hi rhandzana,+ hilaha xi hi leriseke hakona. 24 Ku tlula kwalaho, loyi a yingisaka swileriso swa xona u tshama a ri ni vun’we na xona, na xona xi tshama xi ri ni vun’we na yena.+ Naswona hi moya lowu xi hi nyikeke wona, ha swi tiva leswaku xi tshama xi ri ni vun’we na hina.+

4 Varhandziwa, mi nga tshembi marito man’wana ni man’wana lama ku vuriwaka leswaku ma huma eka Xikwembu,+ kambe rhangani hi ku ma kambela mi tiyiseka loko ma huma eka Xikwembu,+ hikuva ku ni vaprofeta vo tala va mavunwa emisaveni.+

2 Marito lama humaka eka Xikwembu mi ta ma tiva hi leswi: Marito hinkwawo lama pfumelaka leswaku Yesu Kreste u tile a ri munhu ma huma eka Xikwembu.+ 3 Kambe loko marito wolawo ma nga pfumeli leswaku Yesu u tile emisaveni, swi vula leswaku a ma humi eka Xikwembu.+ Marito wolawo ma huma eka mukaneti wa Kreste lawa mi tweke leswaku ma ta va kona+ naswona se ma kona emisaveni.+

4 Vana vanga, n’wina mi huma eka Xikwembu naswona mi va hlurile,+ hikuva loyi a nga ni vun’we na n’wina+ i nkulu eka loyi a nga ni vun’we ni misava.+ 5 Va huma emisaveni;+ hi yona mhaka leyi va vulavulaka leswi humaka emisaveni naswona misava ya va yingisa.+ 6 Hina hi huma eka Xikwembu. Un’wana ni un’wana loyi a tivaka Xikwembu wa hi yingisa;+ kambe loyi a nga humiki eka Xikwembu a nga hi yingisi.+ Yoleyo i ndlela leyi hi kotaka ku hambanisa marito ya ntiyiso lama humaka eka Xikwembu ni marito lama nga riki ntiyiso.+

7 Varhandziwa, a hi yeni emahlweni hi rhandzana,+ hikuva rirhandzu ri huma eka Xikwembu naswona un’wana ni un’wana loyi a nga ni rirhandzu u velekiwe hi Xikwembu naswona u tiva Xikwembu.+ 8 Un’wana ni un’wana loyi a nga riki na rirhandzu a nga xi tivi Xikwembu, hikuva Xikwembu i rirhandzu.+ 9 Xikwembu xi kombise leswaku xa hi rhandza, hi ku rhumela N’wana wa xona la tswariweke a ri swakwe+ emisaveni leswaku hi ta kuma vutomi ha yena.+ 10 Rirhandzu ri tise xileswi, ku nga ri leswaku hina hi rhandze Xikwembu, kambe xona xi hi rhandzile kutani xi rhuma N’wana wa xona leswaku a ta va gandzelo ro rivalela+ swidyoho swa hina.+

11 Varhandziwa, loko leyi ku ri ndlela leyi Xikwembu xi hi rhandzeke ha yona, kutani na hina hi boheka ku rhandzana.+ 12 A nga kona loyi a nga tshama a vona Xikwembu.+ Loko hi ya emahlweni hi rhandzana, Xikwembu xi tshama eka hina naswona rirhandzu ra xona ra hetiseka eka hina.+ 13 Ha swi tiva leswaku hi tshama hi ri ni vun’we na xona ni leswaku na xona xi ni vun’we na hina, hikuva xi hi nyike moya wa xona. 14 Ku engetela kwalaho, hi swi vonile naswona hi byela vanhu leswaku Tatana u rhume N’wana wakwe leswaku a va muponisi wa misava.+ 15 Un’wana ni un’wana loyi a pfumelaka leswaku Yesu i N’wana wa Xikwembu,+ Xikwembu xi tshama xi ri ni vun’we na yena naswona na yena u tshama a ri ni vun’we ni Xikwembu.+ 16 Se ha swi tiva leswaku Xikwembu xa hi rhandza naswona ha swi tshemba.+

Xikwembu i rirhandzu+ naswona loyi a tshamaka a ri ni rirhandzu u tshama a ri ni vun’we ni Xikwembu na xona xi tshama xi ri ni vun’we na yena.+ 17 Hi ndlela yoleyo rirhandzu ri endliwe ri hetiseka eka hina, leswaku hi ta vulavula hi tshunxekile+ hi siku ra vuavanyisi, hikuva ndlela leyi yena a nga ha yona, na hina hi tano emisaveni leyi. 18 A ku na ku chava erirhandzwini,+ kambe rirhandzu leri hetisekeke ri cukumetela ku chava ehandle, hikuva ku chava ka hi sivela hi tindlela to tala. Kunene, loyi a chavaka a nga na rirhandzu leri hetisekeke.+ 19 Hi ni rirhandzu, hikuva hi xona xi nga sungula xi hi rhandza.+

20 Loko mani na mani a ku, “Ndzi rhandza Xikwembu,” kambe a venga makwavo, i muhembi.+ Hikuva loyi a nga rhandziki makwavo,+ la n’wi vonaka, a nge xi rhandzi Xikwembu lexi a nga si tshamaka a xi vona.+ 21 Naswona hi ni xileriso lexi, lexi humaka eka xona, xa leswaku loyi a rhandzaka Xikwembu u fanele a rhandza ni makwavo.+

5 Un’wana ni un’wana loyi a tshembaka leswaku Yesu i Kreste u velekiwe hi Xikwembu+ naswona un’wana ni un’wana loyi a rhandzaka mutswari u rhandza ni loyi a tswariweke hi yena. 2 Ndlela leyi hi tivaka ha yona leswaku hi rhandza vana va Xikwembu,+ hi loko hi rhandza Xikwembu ni ku hanya hi swileriso swa xona. 3 Phela ku rhandza Xikwembu swi vula ku yingisa swileriso swa xona+ naswona swileriso swa xona a swi tiki,+ 4 hikuva un’wana ni un’wana la velekiweke hi Xikwembu wa yi hlula misava.+ Naswona ripfumelo ra hina hi rona ri endlaka leswaku hi hlula misava.+

5 I mani loyi a nga hlulaka misava?+ Xana a hi loyi a tshembaka leswaku Yesu i N’wana wa Xikwembu?+ 6 Yesu Kreste u te hi mati ni ngati, ku nga ri hi mati ntsena,+ kambe hi mati ni hi ngati.+ Moya hi wona wu nyikelaka vumbhoni bya sweswo,+ hikuva moya i ntiyiso. 7 Hikuva ku ni timbhoni tinharhu: 8 moya,+ mati+ ni ngati;+ naswona leswinharhu swa pfumelelana.

9 Loko hi kota ku amukela vumbhoni lebyi humaka eka vanhu, xisweswo vumbhoni lebyi humaka eka Xikwembu i byikulu. Hikuva lebyi i vumbhoni lebyi humaka eka Xikwembu, vumbhoni lebyi xi hi nyikeke byona mayelana ni N’wana wa xona. 10 Munhu loyi a nga ni ripfumelo eka N’wana wa Xikwembu u amukele vumbhoni lebyi Xikwembu xi byi nyikeleke embilwini yakwe. Munhu loyi a nga riki na ripfumelo eka Xikwembu u xi endla muhembi+ hikuva a nga tshembi vumbhoni lebyi xi byi vuleke mayelana ni N’wana wa xona. 11 Vumbhoni byebyo i bya leswaku Xikwembu xi hi nyike vutomi lebyi nga heriki,+ vutomi lebyi byi le ka N’wana wa xona.+ 12 Loyi a nga ni vun’we na N’wana u kuma vutomi; loyi a nga riki na vun’we na N’wana wa Xikwembu a nga na byona vutomi lebyi.+

13 Ndzi mi tsalela swilo leswi leswaku mi ta swi tiva leswaku mi ni vutomi lebyi nga heriki,+ n’wina lava nga ni ripfumelo evitweni ra N’wana wa Xikwembu.+ 14 Naswona ha tshemba leswaku Xikwembu xa hi twa+ loko hi kombela xin’wana ni xin’wana lexi fambisanaka ni ku rhandza ka xona.+ 15 Loko hi swi tiva leswaku xa hi twa loko hi kombela xin’wana ni xin’wana eka xona, ha swi tiva leswaku hi ta swi kuma leswi hi swi kombelaka hikuva hi swi kombela eka xona.+

16 Loko munhu a vona makwavo a endla xidyoho lexi nga yisiki eku feni, u ta n’wi kombelela naswona Xikwembu xi ta n’wi nyika vutomi,+ ina, eka lava endlaka xidyoho lexi nga yisiki eku feni. Ku ni xidyoho lexi yisaka eku feni.+ Xexo hi xona xidyoho lexi mayelana na xona ndzi n’wi byelaka leswaku a nga n’wi kombeleli. 17 Hinkwaswo leswi nga lulamangiki i xidyoho,+ kambe ku ni xidyoho lexi nga yisiki eku feni.

18 Ha swi tiva leswaku un’wana ni un’wana loyi a tswariweke hi Xikwembu a nga hanyi hi xidyoho, kambe loyi a tswariweke hi Xikwembu* wa n’wi sirhelela naswona lowo homboloka a nge n’wi endli nchumu.+ 19 Ha swi tiva leswaku hi huma eka Xikwembu, kambe misava hinkwayo yi le hansi ka matimba ya Sathana.*+ 20 Kambe ha swi tiva leswaku N’wana wa Xikwembu u tile+ naswona u hi nyike ku twisisa leswaku hi ta tiva loyi a nga wa ntiyiso. Nakambe hi ni vun’we ni loyi a nga wa ntiyiso,+ hikwalaho ka N’wana wa yena Yesu Kreste. Lexi i Xikwembu xa ntiyiso ni vutomi lebyi nga heriki.+ 21 Vana vanga, papalatani ku gandzela swifaniso.+