NHLAVUTELO LEYI KOMBIWEKE YOHANE

1 Leyi i nhlavutelo ya Yesu Kreste, leyi Xikwembu xi n’wi nyikeke yona,+ leswaku a komba malandza yakwe+ swilo leswi faneleke swi endleka ku nga ri khale. U rhume ntsumi yakwe eka nandza wakwe Yohane,+ leswaku yi ya n’wi komba nhlavutelo leyi hi ku tirhisa swikombiso. 2 Yohane u nyikele vumbhoni eritweni leri Xikwembu xi ri humeseke ni le ka vumbhoni lebyi Yesu Kreste a byi nyikeleke, ina eka swilo hinkwaswo leswi a swi voneke. 3 Wa tsaka loyi a byi hlayelaka ehenhla vuprofeta lebyi, ni lava byi twaka kutani va hanya hi swilo leswi tsariweke eka byona+ hikuva nkarhi lowu vekiweke wu kusuhi.

4 Mina Yohane, ndzi tsalela mavandlha ya nkombo+ lama nga exifundzheni xa Asiya:

Onge mi nga va ni musa lowukulu ni ku rhula leswi humaka eka “Loyi a nga kona ni loyi a a ri kona ni loyi a taka,”+ ni leswi humaka eka mimoya ya nkombo+ leyi nga emahlweni ka xiluvelo xa yena, 5 ni leswi humaka eka Yesu Kreste, “Mbhoni yo Tshembeka,”+ “mativula eka lava feke”+ ni “Mufumi wa tihosi ta misava.”+

Yena loyi a hi rhandzaka+ naswona a hi tshunxeke eswidyohweni swa hina hi ngati yakwe+— 6 loyi a hi endleke mfumo,+ vaprista+ va Xikwembu xakwe tlhelo Tata wakwe—ku vangama ni matimba a swi ve eka yena hilaha ku nga heriki. Amen.

7 Maswivo! U ta hi mapapa+ naswona vanhu hinkwavo va ta n’wi vona ku katsa ni lava n’wi tlhaveke; tinyimba hinkwato ta vanhu ti ta va ni gome hikwalaho ka yena.+ Amen.

8 “Hi mina Alfa na Omega,”*+ ku vula Yehovha* Xikwembu, “Loyi a nga kona ni loyi a a ri kona ni loyi a taka, wa Matimba Hinkwawo.”+

9 Mina Yohane, makwenu loyi a xanisekeke+ ni ku tiyisela+ swin’we na n’wina naswona hi nga ta va swin’we emfun’weni+ na Yesu,+ a ndzi ri exihlaleni lexi vuriwaka Patmosi hikwalaho ko vulavula hi Xikwembu ni ku nyikela vumbhoni hi Yesu. 10 Moya lowo kwetsima wu ndzi yise esikwini ra Hosi naswona ndzi twe rito ra matimba endzhaku ka mina leri a ri twala ku fana ni mhalamhala, 11 ri ku: “Leswi u swi vonaka swi tsale ebukwini* kutani u yi rhumela eka mavandlha ya nkombo: eEfesa,+ Smirna,+ Pergamo,+ Tiyatira,+ Sarda,+ Filadelfiya+ ni le Lawodikiya.”+

12 Hiloko ndzi hundzuluka leswaku ndzi ta vona loyi a a vulavula na mina, loko ndzi hundzulukile ndzi vone swo tlhoma timboni swa nsuku swa nkombo,+ 13 naswona exikarhi ka swo tlhoma timboni a ku ri ni un’wana loyi a fanaka ni n’wana wa munhu,+ a ambale xiambalo xo leha ku ya fika emilengeni, a bohe bandhi ra nsuku exifuveni. 14 Ku tlula kwalaho, nhloko ni misisi yakwe a swi base onge i voya byo basa, onge i gamboko, kasi matihlo yakwe a ma fana ni langavi leri pfurhaka,+ 15 milenge yakwe a yi hatima ku fana ni koporo yo tenga+ loko yi ri karhi yi swekiwa exitikweni, rito rakwe a ri twala ku fana ni mpfumawulo wa mati yo tala. 16 A a khome tinyeleti ta nkombo hi voko rakwe ra xinene,+ enon’wini wakwe a ku huma banga ro leha ro kariha, leri tsemaka hi matlhelo mambirhi+ naswona xikandza xakwe a xi fana ni dyambu loko ri tlhavile.+ 17 Loko ndzi n’wi vona, ndzi wele emilengeni yakwe onge hiloko ndzi file.

Hiloko a ndzi khumba hi voko rakwe ra xinene, a ku: “U nga chavi. Hi mina wo Sungula+ ni wo Hetelela,+ 18 ni loyi a hanyaka,+ a ndzi file,+ kambe vona, se ndza hanya hilaha ku nga heriki+ naswona ndzi ni swikhiya swa rifu ni swa Sirha.*+ 19 Hikwalaho, tsala swilo leswi u swi voneke ni swilo leswi nga eku endlekeni ni swilo leswi nga ta endleka endzhaku ka leswi. 20 Xihundla xo kwetsima xa tinyeleti ta nkombo leti u voneke ndzi ti khomile hi voko ra mina ra xinene ni xa swo tlhoma timboni swa nsuku swa nkombo xi vula leswi: Tinyeleti ta nkombo ti yimela tintsumi ta mavandlha ya nkombo, kasi swo tlhoma timboni swa nkombo swi yimela mavandlha ya nkombo.+

2 “Tsalela ntsumi+ ya vandlha ra le Efesa+ u ku: Loyi a khomeke tinyeleti ta nkombo hi voko rakwe ra xinene, loyi a fambaka exikarhi ka swo tlhoma timboni swa nsuku swa nkombo, u ri:+ 2 ‘Ndzi tiva swiendlo swa wena, mitirho ya wena ni ku tiyisela ka wena ni leswaku a wu va amukeli vanhu vo biha, naswona u kambela lava tivulaka vaapostola+ va nga ri vona kutani u kume leswaku vo hemba. 3 Wa tiyisela, u kondzelerile hikwalaho ka vito ra mina+ naswona a wu karhalanga.+ 4 Nilokoswiritano, lexi ndzi ku solaka eka xona hi lexi, u tshike rirhandzu leri a wu ri na rona eku sunguleni.

5 “‘Hikwalaho, tsundzuka laha u weke kona, kutani u hundzuka,+ u endla leswi a wu swi endla eku sunguleni. Loko u nga endli tano, ndzi ta ku tela, ndzi ta susa xo tlhoma timboni+ xa wena laha xi vekiweke kona, handle ka loko wo hundzuka.+ 6 Nilokoswiritano, lexi ndzi xi rhandzaka hi wena hileswaku u venga mitirho ya ntlawa wa Nikolasi+ leyi na mina ndzi yi vengaka. 7 Loyi a nga ni ndleve a a yingise leswi moya wu swi byelaka mavandlha:+ Loyi a hlulaka+ ndzi ta n’wi pfumelela ku dya emurhini wa vutomi,+ lowu nga eparadeyisini ya Xikwembu.’

8 “Kutani tsalela ntsumi ya vandlha ra le Smirna u ku: ‘Lowo Sungula ni wo Hetelela,’+ loyi a a file a tlhela a pfuka, u ri:+ 9 ‘Ndzi tiva maxangu ni vusiwana bya wena—kambe u fuwile+—ni swisandzu leswi va ku sandzaka ha swona lava tivulaka Vayuda va nga ri vona, kambe va nga sinagoga ya Sathana.+ 10 Mi nga chavi swilo leswi nga ta mi wela ku nga ri khale.+ Yingisani! Diyavulosi u ta ya emahlweni a hoxa van’wana va n’wina ekhotsweni leswaku mi ta ringiwa hilaha ku heleleke, naswona mi ta va ni nhlomulo ku ringana masiku ya khume. Tshamani mi tshembekile ku fikela eku feni kutani ndzi ta mi nyika harhi ya vutomi.+ 11 Loyi a nga ni ndleve a a yingise+ leswi moya wu swi byelaka mavandlha: Loyi a hlulaka,+ rifu ra vumbirhi a ri nge n’wi khumbi.’+

12 “Tsalela ntsumi ya vandlha ra le Pergamo u ku: Loyi a nga ni banga ro kariha ro leha, leri tsemaka hi matlhelo mambirhi u ri:+ 13 ‘Ndza ku tiva laha u tshamaka kona, hi laha xiluvelo xa Sathana xi nga kona; kambe u khomelela swi tiya evitweni ra mina+ naswona u ve ni ripfumelo ro tiya eka mina,+ hambi hi nkarhi wa Antipasi, mbhoni ya mina yo tshembeka,+ loyi a dlayiweke+ endhawini ya ka n’wina, laha Sathana a tshamaka kona.

14 “‘Nilokoswiritano, ku ni swilo switsongo leswi ndzi vilerisaka hi wena, leswaku kwalaho ku ni lava nga yi tshikangiki dyondzo ya Balama,+ loyi a dyondziseke Balaka+ ku yenga vana va Israyele, leswaku va dya swakudya leswi nyikeriweke swikwembu ni ku tikhoma ku biha hi swa masangu.*+ 15 Hilaha ku fanaka, na wena u ni lava nga yi tshikangiki dyondzo ya ntlawa wa Nikolasi.+ 16 Hikwalaho hundzuka. Loko u nga endli tano, ndza ku tela hi ku hatlisa, kutani ndzi ta lwa na vona hi banga ro leha leri humaka enon’wini wa mina.+

17 “‘Loyi a nga ni ndleve a a yingise leswi moya wu swi byelaka mavandlha:+ Loyi a hlulaka+ ndzi ta n’wi nusela manna leyi tumbetiweke,+ ndzi ta tlhela ndzi n’wi nyika ribye ro basa, leri tsariweke vito lerintshwa leri nga tiviwiki hi munhu handle ka loyi a ri kumeke.’

18 “Tsalela ntsumi ya vandlha ra le Tiyatira+ u ku: N’wana wa Xikwembu, loyi matihlo yakwe ma fanaka ni langavi leri pfurhaka+ ni loyi milenge yakwe yi fanaka ni koporo yo tenga, u ri:+ 19 ‘Ndzi tiva swiendlo swa wena, rirhandzu ra wena, ripfumelo ra wena, ntirho lowu u wu endlelaka Xikwembu ni ku tiyisela ka wena, ni leswaku mitirho ya wena ya sweswi yi tlula leyi u yi endleke eku sunguleni.

20 “‘Nilokoswiritano, lexi ndzi ku solaka eka xona hi lexi, u tshika wansati yoloye Yezabele,+ loyi a tivulaka muprofeta naswona u dyondzisa a tlhela a yenga malandza ya mina leswaku ma tikhoma ku biha hi swa masangu*+ ni ku dya swakudya leswi nyikeriweke swikwembu. 21 Ndzi n’wi nyike nkarhi wo hundzuka, kambe a nga swi lavi ku hundzuka eka ku tikhoma kakwe ko biha hi swa masangu.* 22 Waswivo, ku nga ri khale ndzi ta n’wi lahlela emubedweni wa vavabyi naswona ndzi ta endla leswaku lava endlaka vuoswi na yena va wela enhlomulweni lowukulu, handle ka loko vo hundzuka eka swiendlo swakwe. 23 Naswona ndzi ta dlaya vana vakwe hi ntungu, leswaku mavandlha hinkwawo ma ta tiva leswaku hi mina loyi a kambisisaka mianakanyo* ni timbilu, ndzi ta hakela un’wana ni un’wana wa n’wina hi ku ya hi swiendlo swakwe.+

24 “‘Hambiswiritano, ndzi byela n’wina hinkwenu lava nga eTiyatira, hinkwavo lava nga yi landzeriki dyondzo leyi, lava nga swi tiviki swilo leswi vuriwaka “swilo leswi enteke swa Sathana,”+ ndzi ri: A ndza ha mi rhwexi ndzhwalo wun’wana. 25 Ntsena khomelelani swi tiya eka leswi mi nga na swona kukondza ndzi fika.+ 26 Kutani loyi a hlulaka ni loyi a endlaka leswi ndzi swi leriseke ku ya fika emakumu, ndzi ta n’wi nyika matimba yo fuma matiko,+ 27 u ta risa vanhu hi nhonga ya nsimbhi+ leswaku va fayeleriwa va va swipetlu ku fana ni xibya xa vumba, hilaha Tatana a ndzi nyikeke matimba hakona. 28 Kutani ndzi ta n’wi nyika nyeleti ya nimixo.+ 29 Loyi a nga ni ndleve a a yingise leswi moya wu swi byelaka mavandlha.’

3 “Tsalela ntsumi ya vandlha ra le Sarda u ku: Loyi a nga ni mimoya ya nkombo ya Xikwembu+ ni tinyeleti ta nkombo+ u ri: ‘Ndzi tiva mitirho ya wena, leswaku u ni ndhuma ya leswaku wa hanya kambe u file.+ 2 Xalamuka,+ u tiyisa swilo leswi saleke leswi a swi ri kusuhi ni ku fa, hikuva ndzi kume leswaku a wu yi hetanga mitirho ya wena emahlweni ka Xikwembu xa mina. 3 Hikwalaho, tshama u ri karhi u tsundzuka leswi u swi amukeleke ni leswi u swi tweke, swi hlayise u tlhela u hundzuka.+ Ndza ku byela, loko wo ka u nga pfuki, ndzi ta ta ku fana ni khamba+ naswona a wu nge wu tivi nkarhi lowu ndzi nga ta ku tela ha wona.+

4 “‘Nilokoswiritano, u ni vanhu vatsongo eSarda lava nga swi thyakisangiki swiambalo swa vona+ naswona va ta famba na mina va ambale swiambalo swo basa,+ hikuva swi va lulamerile. 5 Loyi a nga ta hlula,+ na yena u ta ambexiwa swiambalo swo basa,+ naswona a ndzi nge ri suli vito rakwe ebukwini ya vutomi,+ kambe ndzi ta vula emahlweni ka Tatana ni le mahlweni ka tintsumi ta yena leswaku ndza ri tiva vito ra yena.+ 6 Loyi a nga ni ndleve a a yingise leswi moya wu swi byelaka mavandlha.’

7 “Tsalela ntsumi ya vandlha ra Filadelfiya u ku: Loyi a kwetsimaka,+ loyi a nga ni ntiyiso,+ loyi a nga ni xikhiya xa Davhida,+ loyi loko a pfula ku nga riki na loyi a pfalaka ni loyi loko a pfala ku nga riki na loyi a pfulaka, u ri: 8 ‘Ndzi tiva swiendlo swa wena, vona, ndzi veke nyangwa lowu pfulekeke emahlweni ka wena,+ lowu ku nga riki na munhu la nga ta wu pfala. Ndza swi tiva leswaku u na wona matimba matsongo, nileswaku u yingise rito ra mina naswona u tshame u tshembekile eka vito ra mina. 9 Yingisa! Ndzi ta endla leswaku lava humaka esinagogeni ya Sathana lava tivulaka Vayuda kambe va nga ri vona,+ va ta eka wena va fika va khinsama emilengeni ya wena naswona ndzi ta va endla va swi tiva leswaku ndzi ku rhandzile. 10 Hikwalaho ka leswi u yingiseke leswi u swi tweke hi ku tiyisela ka mina,*+ na mina ndzi ta ku hlayisa hi nkarhi wa ndzingo,+ lowu nga ta wela vanhu hinkwavo emisaveni leswaku va ringiwa. 11 Ndza ta hi ku hatlisa.+ Khoma leswi u nga na swona swi tiya, leswaku ku nga vi na loyi a ku tekelaka harhi ya wena.+

12 “‘Loyi a hlulaka, ndzi ta n’wi endla phuphu etempeleni ya Xikwembu xa mina, a nge he humi endzeni ka yona naswona ndzi ta n’wi tsala vito ra Xikwembu+ xa mina ni vito ra muti wa Xikwembu xa mina, ku nga Yerusalema Lowuntshwa+ lowu xikaka hi le tilweni wu huma eka Xikwembu xa mina ni vito ra mina lerintshwa.+ 13 Loyi a nga ni ndleve a a yingise leswi moya wu swi byelaka mavandlha.’

14 “Tsalela ntsumi ya vandlha ra Lawodikiya+ u ku: Amen,+ mbhoni+ yo tshembeka ni ya ntiyiso,+ masungulo ya ntumbuluko wa Xikwembu,+ u ri: 15 ‘Ndzi tiva mitirho ya wena, leswaku a wu titimeli naswona a wu hisi. Ndzi navela onge u nga titimela kumbe u hisa. 16 Kutani leswi u kufumelaka kambe u nga hisiki+ kumbe u nga titimeliki,+ ndzi ta ku hlanta enon’wini wa mina. 17 Leswi u nge, “Ndzi fuwile,+ ndzi kume rifuwo naswona a ndza ha lavi nchumu,” kasi a wu tivi leswaku u dyisa mbitsi, u terisa vusiwana, u xisiwana, u fe matihlo naswona a wu ambalanga, 18 ndzi ku tsundzuxa leswaku u xava nsuku lowu tengisiweke hi ndzilo eka mina, leswaku u ta fuwa, u xava ni swiambalo swo basa leswaku u ta tifunengeta u nga voneriwi,+ u xava ni murhi wo tola matihlo+ leswaku u ta vona.+

19 “‘Hinkwavo lava ndzi va rhandzaka ndza va tshinya ni ku va laya.+ Hikwalaho hiseka, u hundzuka.+ 20 Vona! Ndzi yime enyangweni ndzi ri karhi ndzi gongondza. Loko munhu o twa rito ra mina kutani a pfula nyangwa, ndzi ta nghena endlwini yakwe ndzi dya na yena swakudya swo lalela. 21 Loyi a hlulaka+ ndzi ta n’wi pfumelela ku tshama na mina exiluvelweni xa mina,+ tanihi leswi na mina ndzi hluleke kutani ndzi tshama+ na Tatana exiluvelweni xakwe. 22 Loyi a nga ni ndleve a a yingise leswi moya wu swi byelaka mavandlha.’”

4 Endzhaku ka swilo leswi ndzi languta etilweni, ndzi vona nyangwa leyi pfulekeke, kutani ndzi twa rito ro sungula leri a ri twala ku fana ni mhalamhala, ri ku eka mina: “Tana haleno, ndzi ta ku komba swilo leswi faneleke swi endleka.” 2 Endzhaku ka sweswo, hi ku hatlisa moya wa Xikwembu wu sungula ku tirha eka mina, a ku ri ni xiluvelo endhawini ya xona etilweni naswona a ku ri ni loyi a tshameke eka xona.+ 3 Loyi a tshameke exiluvelweni a a hatima ku fana ni ribye ra yaspere+ ni ribye ra risima ra muhlovo wo tshwuka, naswona xiluvelo a xi rhendzeriwe hi nkwangulatilo lowu a wu fana ni ribye ra emeralda.+

4 Xiluvelo lexi a xi rhendzeriwe hi swiluvelo swa 24 naswona eka swiluvelo sweswo ndzi vone ku tshame vakulu va 24,+ va ambale swiambalo swo basa, va vekele tiharhi ta nsuku etinhlokweni. 5 Exiluvelweni a ku huma rihati+ ni marito ni ku dzindza ka tilo;+ naswona emahlweni ka xiluvelo a ku pfurha mavoni ya nkombo, mavoni lawa i mimoya ya nkombo ya Xikwembu.+ 6 Emahlweni ka xiluvelo a ku ri ni nchumu lowu fanaka ni lwandle ra nghilazi+ leri fanaka ni kristala.

Exikarhi ka xiluvelo ni le matlhelo ka xona a ku ri ni swivumbiwa swa mune leswi hanyaka,+ leswi a swi ri ni matihlo yo tala emahlweni ni le ndzhaku. 7 Xivumbiwa xo sungula lexi hanyaka a xi fana ni nghala,+ xivumbiwa xa vumbirhi lexi hanyaka a xi fana ni xinkuzana,+ xivumbiwa xa vunharhu lexi hanyaka+ a xi ri ni xikandza xo fana ni xa munhu, kasi xivumbiwa xa vumune lexi hanyaka+ a xi fana ni gama leri hahaka.+ 8 Xin’wana ni xin’wana xa swivumbiwa leswi hanyaka leswi swa mune a xi ri ni timpapa ta tsevu; ti tele hi matihlo hinkwako.+ Naswona vusiku ninhlikanhi a swi ku: “Wa kwetsima, wa kwetsima, wa kwetsima Yehovha*+ Xikwembu, lowa Matimba Hinkwawo, loyi a a ri kona, loyi a nga kona ni loyi a taka.”+

9 Mikarhi hinkwayo loko swivumbiwa leswi hanyaka swi yisa ku vangama, xichavo ni ku khensa eka Loyi a tshameke exiluvelweni, Loyi a hanyaka hilaha ku nga heriki,+ 10 vakulu va 24+ a va khinsama emahlweni ka Loyi a tshameke exiluvelweni kutani va gandzela Loyi a hanyaka hilaha ku nga heriki, va tlhela va hoxa tiharhi ta vona emahlweni ka xiluvelo va ku: 11 “Swa ku fanela Yehovha* Xikwembu xa hina ku dzunisiwa+ ni ku xiximiwa+ ni ku va ni matimba+ hikuva u tumbuluxe swilo hinkwaswo+ naswona hinkwaswo swi kona hikwalaho ka ku rhandza ka wena, swi tumbuluxiwile.”

5 Hiloko ndzi vona buku* evokweni ra xinene ra Loyi a tshameke exiluvelweni+ leyi tsariweke endzeni ni le handle, yi pfariwe swi tiya hi swilemo swa nkombo. 2 Ndzi vona ni ntsumi ya matimba yi huwelela hi rito lerikulu yi ku: “I mani loyi a faneriwaka hi ku susa swilemo swa buku a yi pfula?” 3 Kambe a ku vanga ni un’we etilweni kumbe emisaveni kumbe ehansi ka yona loyi a a kota ku pfula buku kumbe ku languta endzeni ka yona. 4 Hiloko ndzi rila hi xiviti hikuva a ku vanga ni un’we loyi a swi n’wi fanela ku pfula buku kumbe ku languta endzeni ka yona. 5 Kambe un’wana wa vakulu a ku eka mina: “Tshika ku rila. Vona! Nghala ya nyimba ya Yuda,+ rimitsu+ ra Davhida,+ yi hlurile+ lerova swa yi fanela ku pfula buku ni swilemo swa yona swa nkombo.”

6 Kutani ndzi vona xinyimpfana+ lexi a xi vonaka onge xi tlhaviwile,+ xi ri ni timhondzo ta nkombo ni mahlo ya nkombo lama yimelaka mimoya ya nkombo ya Xikwembu+ leyi rhumeriweke emisaveni hinkwayo, xi yime exikarhi ka xiluvelo ni swivumbiwa leswi hanyaka swa mune ni le xikarhi ka vakulu.+ 7 Hiloko xi tshinela kutani xi teka buku evokweni ra xinene ra Loyi a tshameke exiluvelweni.+ 8 Loko xi teka buku, swivumbiwa swa mune leswi hanyaka ni vakulu va 24+ va khinsama emahlweni ka Xinyimpfana naswona ha un’we wa vona a ri ni haripa ni xindhichana xa nsuku lexi teleke hi murhi wo nun’hwela. (Murhi lowu wu vula swikhongelo swa vakwetsimi.)+ 9 Va yimbelela risimu lerintshwa+ va ku: “Swa ku fanela ku teka buku u pfula swilemo swa yona, hikuva u tlhaviwile naswona hi ngati ya wena u xavele Xikwembu vanhu+ lava humaka eka tinyimba hinkwato, tindzimi hinkwato, vanhu hinkwavo ni matiko hinkwawo,+ 10 naswona u va endle va va mfumo+ ni vaprista leswaku va tirhela Xikwembu xa hina,+ va ta va tihosi+ emisaveni.”

11 Hiloko ndzi languta, kutani ndzi twa rito ra tintsumi to tala leti rhendzeleke xiluvelo ni swivumbiwa leswi hanyaka ni vakulu, nhlayo ya tona a yi ri timiriyadi ta timiriyadi* ni magidi ya magidi,+ 12 ti huwelela ti ku: “Xinyimpfana lexi a xi tlhaviwile+ xi faneriwa hi ku kuma matimba, rifuwo, vutlhari, ntamu, ku xiximiwa, ku vangama ni ku dzunisiwa.”+

13 Kutani ndzi twa swivumbiwa hinkwaswo etilweni, emisaveni, ehansi ka misava+ ni le lwandle ni swilo hinkwaswo leswi nga eka swona swi ku: “Ku dzuneka, ku xiximiwa,+ ku vangama ni matimba a swi ve eka Loyi a tshameke exiluvelweni+ ni le ka Xinyimpfana+ hilaha ku nga heriki.”+ 14 Swivumbiwa leswi hanyaka swa mune a swi ku: “Amen,” kutani vakulu va khinsama va gandzela.

6 Hiloko ndzi vona Xinyimpfana+ xi pfula xilemo xo sungula eka swa nkombo+ kutani ndzi twa xivumbiwa xo sungula lexi hanyaka+ eka leswa mune xi vula hi rito ro fana ni ku dzindza ka tilo xi ku: “Tana!” 2 Loko ndzi languta, ndzi vona hanci yo basa+ naswona loyi a tshameke ehenhla ka yona a a khome vurha;* hiloko a nyikiwa harhi+ kutani a huma a ya hlula valala vakwe.+

3 Loko xi pfula xilemo xa vumbirhi, ndzi twa xivumbiwa lexi hanyaka xa vumbirhi+ xi ku: “Tana!” 4 Hiloko ku landzela hanci yin’wana ya muhlovo wo tshwuka naswona loyi a tshameke ehenhla ka yona a a pfumeleriwe ku susa ku rhula emisaveni leswaku vanhu va dlayana, kutani a nyikiwa banga lerikulu.+

5 Loko xi pfula xilemo xa vunharhu,+ ndzi twa xivumbiwa lexi hanyaka xa vunharhu+ xi ku: “Tana!” Loko ndzi languta ndzi vona hanci ya ntima naswona loyi a tshameke ehehla ka yona a a khome xikalo. 6 Hiloko ndzi twa rito leri a ri twala onge ri huma exikarhi ka swivumbiwa swa mune leswi hanyaka, ri ku: “Litara* ya koroni yi ta xaviwa hi denari*+ ni tilitara tinharhu ta maxalana ti ta xaviwa hi denari; u nga tlangisi mafurha ya mitlhwari ni vhinyo.”+

7 Loko xi pfula xilemo xa vumune, ndzi twa rito ra xivumbiwa lexi hanyaka xa vumune+ ri ku: “Tana!” 8 Hiloko ndzi languta kutani ndzi vona hanci yo kwalala, loyi a tshameke ehenhla ka yona a a vuriwa Rifu. Ni loyi va nge i Sirha* a a n’wi landzela ekusuhi. Hiloko va nyikiwa matimba yo dlaya kotara ya vanhu hi banga ro leha, ndlala,+ ntungu ni hi swiharhi swa nhova.+

9 Loko xi pfula xilemo xa vuntlhanu, ndzi vone ngati+ ya lava dlayiweke hikwalaho ka rito ra Xikwembu ni hikwalaho ko chumayela+ ehansi ka altari.+ 10 Va huwelela va ku: “Hosi Leyi Tlakukeke yo kwetsima ni ya ntiyiso,+ xana u ta va avanyisa rini lava tshamaka emisaveni leswaku u rihisela ngati ya hina?”+ 11 Hiloko un’wana ni un’wana wa vona a nyikiwa xiambalo xo leha xo basa,+ kutani va byeriwa ku rindzanyana kukondza ku helela nhlayo ya malandzakulobye ni ya vamakwavo lava a va ri kusuhi ni ku dlayiwa ku fana na vona.+

12 Kutani ndzi languta loko xi pfula xilemo xa vutsevu, ku va ni ku tsekatseka lokukulu ka misava; dyambu ri hundzuka ri va ra ntima wonge i nguvu yo khwaxa ya voya,* n’weti hinkwawo wu hundzuka ngati,+ 13 tinyeleti ti wela emisaveni, ku fana ni loko nkuwa lowu biwaka hi moya lowukulu wu hohlota makuwa lama nga wupfangiki. 14 Kutani matilo ma suka ku fana ni buku* loko yi songiwa,+ naswona ntshava yin’wana ni yin’wana ni xihlala xin’wana ni xin’wana swi susiwa etindhawini ta swona.+ 15 Hiloko tihosi ta misava, vafumi, tindhuna ta nyimpi, lava fuweke, lava nga ni matimba, mahlonga hinkwawo ni vanhu hinkwavo lava nga riki mahlonga va ya tumbela emabakweni ni le maribyeni lamakulu ya tintshava.+ 16 Kutani va byela tintshava ni maribye lamakulu, hi ku phindhaphindha va ku: “Hi weleni+ mi hi fihla hi nga voni xikandza xa Loyi a tshameke exiluvelweni+ ni vukarhi bya Xinyimpfana,+ 17 hikuva siku lerikulu ra vukarhi bya vona ri fikile,+ naswona i mani a nga ri tiyelaka?”+

7 Endzhaku ka sweswo ndzi vona tintsumi ta mune ti yime etikhonweni ta mune ta misava, ti khome mimoya ya mune ya misava swi tiya, leswaku ku nga vi ni moya lowu hungelaka emisaveni kumbe elwandle kumbe emurhini wihi ni wihi. 2 Hiloko ndzi vona ntsumi yin’wana yi ta hi le vuxeni, yi ri ni mfungho wa Xikwembu lexi hanyaka; kutani yi huwelela tintsumi ta mune leti nyikiweke mpfumelelo wo onha misava ni lwandle, 3 yi ku: “Mi nga onhi misava kumbe lwandle kumbe mirhi, ku fikela loko hi ta va hi funghe+ malandza ya Xikwembu xa hina emimombyeni ya wona.”+

4 Kutani ndzi twa nhlayo ya lava funghiweke, va 144 000+ naswona a va huma eka tinyimba hinkwato ta vana va Israyele:+

9 Endzhaku ka swilo leswi ndzi languta kutani ndzi vona ntshungu lowukulu, lowu a ku nga ri na munhu la kotaka ku wu hlaya, wu huma eka matiko hinkwawo ni tinyimba hinkwato ni vanhu hinkwavo ni tindzimi hinkwato,+ wu yime emahlweni ka xiluvelo ni le mahlweni ka Xinyimpfana, wu ambale swiambalo swo leha swo basa;+ wu khome marhavi ya micindzu.+ 10 Kutani wu tshamela ku huwelela hi rito lerikulu wu ku: “Ku ponisiwa ku huma eka Xikwembu xa hina, lexi tshameke exiluvelweni+ ni le ka Xinyimpfana.”+

11 Tintsumi hinkwato a ti yime ti rhendzela xiluvelo ni vakulu+ ni swivumbiwa leswi hanyaka swa mune, kutani swi khinsama, swikandza swa swona swi khumba ehansi emahlweni ka xiluvelo swi gandzela Xikwembu, 12 swi ku: “Amen! Ku dzuneka, ku vangama, vutlhari, ku khensa, ku xiximiwa, matimba ni ntamu a swi ve eka Xikwembu xa hina hilaha ku nga heriki.+ Amen.”

13 Hiloko un’wana wa vakulu a ndzi vutisa a ku: “Lava ambaleke swiambalo swo leha swo basa+ i vamani naswona va huma kwihi?” 14 Xikan’wekan’we ndzi n’wi hlamula ndzi ku: “Hosi yanga, hi wena u swi tivaka.” Kutani a ku eka mina: “Vanhu lava va huma enhlomulweni lowukulu+ naswona va hlantswe swiambalo swa vona swo leha va swi endla swo basa hi ngati ya Xinyimpfana.+ 15 Hi yona mhaka leyi va nga emahlweni ka xiluvelo xa Xikwembu naswona va xi endlela ntirho wo kwetsima vusiku ni nhlikanhi etempeleni ya xona; kutani Loyi a tshameke exiluvelweni+ u ta vamba tende rakwe leswaku va va ehansi ka rona.+ 16 A va nge he twi ndlala kumbe torha, naswona mumu a wu nge he va vavuli,+ 17 hikuva Xinyimpfana+ lexi nga exikarhi ka xiluvelo xi ta va risa,+ xi va yisa eswihlobyeni swa mati ya vutomi.+ Kutani Xikwembu xi ta sula mihloti hinkwayo ematihlweni ya vona.”+

8 Loko xi+ pfula xilemo xa vunkombo,+ ku ve ni ku miyela etilweni ku ringana kwalomu ka hafu ya awara. 2 Kutani ndzi vona tintsumi ta nkombo+ leti yimaka emahlweni ka Xikwembu, ti nyikiwa timhalamhala ta nkombo.

3 Ku fika ntsumi yin’wana yi yima ealtarini,+ yi khome xibya xa nsuku xa murhi wo nun’hwela, kutani yi nyikiwa murhi wo tala wo nun’hwela+ leswaku yi wu hisa swin’we ni swikhongelo swa vakwetsimi hinkwavo ealtarini ya nsuku+ leyi a yi ri emahlweni ka xiluvelo. 4 Musi wa murhi wo nun’hwela lowu ntsumi yi wu hiseke wu tlhandluka swin’we ni swikhongelo+ swa vakwetsimi emahlweni ka Xikwembu. 5 Kambe xikan’wekan’we ntsumi yi teka xibya xa murhi wo nun’hwela yi xi tata hi ndzilo lowu humaka ealitarini, yi wu lahlela emisaveni. Hiloko ku va ni ku dzindza ka tilo ku twakala ni marito, rihati+ ni ku tsekatseka ka misava. 6 Kutani tintsumi ta nkombo leti khomeke timhalamhala ta nkombo+ ti lunghekela ku ti chaya.

7 Ntsumi yo sungula yi chaya mhalamhala ya yona. Kutani ku va ni xihangu ni ndzilo swi pfanganisiwe ni ngati, swi lahleriwa emisaveni;+ hiloko ku tshwa xiphemu lexitsongo* xa misava, ku tlhela ku tshwa ni xiphemu lexitsongo xa mirhi, ku tshwa ni swimilana hinkwaswo swa rihlaza.+

8 Ntsumi ya vumbirhi yi chaya mhalamhala ya yona. Kutani nchumu lowu fanaka ni ntshava leyikulu leyi pfurhaka wu lahleriwa elwandle.+ Hiloko xiphemu lexitsongo xa lwandle xi hundzuka ngati;+ 9 naswona ku fa swin’wana* swa swivumbiwa leswi hanyaka swa le lwandle,+ ku tshoveka ni swin’wana* swa swikepe.

10 Ntsumi ya vunharhu yi chaya mhalamhala ya yona. Kutani nyeleti leyikulu leyi pfurhaka ku fana ni rivoni yi wa hi le tilweni, yi wela ehenhla ka xiphemu lexitsongo* xa milambu ni swihlovo swa mati.+ 11 Vito ra nyeleti yoleyo i Xibaha. Hiloko xiphemu lexitsongo* xa mati xi hundzuka xibaha, kutani vanhu vo tala va fa hi mati ya kona, hikuva a ma endliwe ma bava.+

12 Ntsumi ya vumune yi chaya mhalamhala ya yona. Hiloko ku biwa xiphemu lexitsongo* xa dyambu+ ni xiphemu lexitsongo xa n’weti ni xiphemu lexitsongo xa tinyeleti, leswaku xiphemu lexitsongo xa swona xi hundzuka munyama+ ni leswaku xiphemu lexitsongo xa siku xi nga voningeriwi, swi ve tano ni hi vusiku bya kona.

13 Kutani ndzi languta, ndzi twa gama leri hahaka empfhukeni ri huwelela ri ku: “Khombo, khombo, khombo+ eka lava tshamaka emisaveni hikwalaho ka ku chayiwa ka timhalamhala letin’wana hi tintsumi tinharhu leti nga kusuhi ni ku chaya timhalamhala ta tona!”+

9 Ntsumi ya vuntlhanu yi chaya mhalamhala ya yona.+ Kutani ndzi vona nyeleti leyi weleke emisaveni ku suka etilweni yi nyikiwa khiya ra nomu wa khele ro enta.+ 2 Yi pfula nomu wa khele kutani ku huma musi wo fana ni musi lowu humaka ekheleni lerikulu ra ndzilo, hiloko dyambu ri hundzuka ra ntima+ na wona moya, hikwalaho ka musi lowu humaka ekheleni. 3 Kutani ku huma tinjiya exikarhi ka musi ti ya emisaveni,+ ti nyikiwa matimba yo fana ni ya swipamu swa le misaveni. 4 Ti byeriwa leswaku ti nga onhi swimilana swa rihlaza kumbe mirhi, kambe ti ya eka vanhu lava nga riki na mfungho wa Xikwembu emimombyeni ya vona.+

5 Hiloko tinjiya ti nyikiwa mpfumelelo wo xanisa vanhu tin’hweti ta ntlhanu, kambe ti nga va dlayi naswona ku vava ka kona a ku fana ni loko munhu a lumiwe hi xipamu.+ 6 Emasikwini wolawo vanhu va ta lava rifu kambe a va nge ri kumi, va ta navela ku fa kambe rifu ri ta va baleka.

7 Tinjiya ta kona ti fana ni tihanci leti lunghekeleke ku ya enyimpini;+ etinhlokweni ta tona a ti ri ni leswi langutekaka ku fana ni tiharhi ta nsuku, swikandza swa tona a swi fana ni swikandza swa vanhu, 8 kambe a ti ri ni misisi yo fana ni ya vavasati. Matino ya tona a ma fana ni ya tinghala,+ 9 a ti ri ni swisirhelelo swa xifuva swo fana ni swisirhelelo swa xifuva swa nsimbhi. Mpfumawulo wa timpapa ta tona a wu fana ni mpfumawulo wa makalichi lama kokiwaka hi tihanci leti tsutsumelaka enyimpini.+ 10 Nakambe, ti ni micila leyi nga ni mindzhombo yo fana ni ya swipamu; naswona ti nyikiwe matimba yo vavisa vanhu hi micila ya tona tin’hweti ta ntlhanu.+ 11 Ti ni hosi, ku nga ntsumi ya khele ro enta.+ Hi Xiheveru vito ra yona i Abadoni,* kasi hi Xigriki i Apoliyoni.*

12 Ku hundze khombo rin’we. Kambe ka ha ta makhombo man’wanyana mambirhi+ endzhaku ka swilo leswi.

13 Ntsumi ya vutsevu+ yi chaya mhalamhala ya yona.+ Kutani ndzi twa rito rin’wana leri humaka etimhondzweni ta altari ya nsuku+ leyi nga le mahlweni ka Xikwembu 14 ri byela ntsumi ya vutsevu leyi khomeke mhalamhala, ri ku: “Tshunxa tintsumi ta mune leti bohiweke enambyeni lowukulu wa Yufrata.”+ 15 Kutani ku tshunxiwa tintsumi ta mune leti a ti yimele nkarhi, siku, n’hweti ni lembe ro dlaya xiphemu lexitsongo* xa vanhu.

16 Ndzi twa nhlayo ya mavuthu ya vagadi va tihanci, leyi ku nga 200 000 000. 17 Leyi i ndlela leyi ndzi ti voneke ha yona tihanci ni vagadi va tona exivonweni: A va ambale swisirhelelo swa xifuva swa muhlovo wo tshwuka, wa wasi ni wa xitshopana naswona tinhloko ta tihanci a ti fana ni tinhloko ta tinghala,+ emilon’wini ya tona a ku huma ndzilo, musi ni xivavula. 18 Xiphemu lexitsongo* xa vanhu xi dlayiwa hi makhombo lamanharhu, ku nga ndzilo, musi ni xivavula leswi humaka emilon’wini ya tona. 19 Matimba ya tihanci leti ma le milon’wini ni le micileni ya tona, micila ya tona yi fana ni tinyoka, yi ni tinhloko naswona ti tirhisa yona ku luma vanhu.

20 Kambe vanhu lavan’wana hinkwavo lava nga dlayiwangiki hi makhombo lawa a va tisolanga hikwalaho ka swikwembu leswi va swi endleke; a va tshikanga ku gandzela madimona, swikwembu swa nsuku, swa silivhere, swa koporo, swa ribye ni swa ntsandza, leswi nga voniki, swi nga twiki naswona swi nga kotiki ku famba.+ 21 Nakambe a va tshikanga ku dlaya, ku tirhisana ni mimoya, ku tikhoma ko biha hi swa masangu* ni ku yiva.

10 Ndzi vona ntsumi yin’wana ya matimba yi xika hi le tilweni, yi titsondzele hi papa, naswona yi ri ni nkwangulatilo enhlokweni ya yona, xikandza xa yona a xi fana ni dyambu,+ naswona milenge ya yona a yi fana ni tiphuphu leti pfurhaka ndzilo, 2 evokweni ra yona a yi khome buku* leyitsongo leyi pfulekeke. Hiloko yi veka nenge wa yona wa xinene elwandle, lowa ximatsi yi wu veka emisaveni, 3 kutani yi huwelela hi rito lerikulu ku fana ni nghala loko yi bonga.+ Loko yi huwelela, marito ya tindlati ta nkombo+ ma vulavula.

4 Loko tindlati ta nkombo ti vulavula, a ndzi lava ku tsala, kambe ndzi twa rito ri huma etilweni+ ri ku: “Swi hlayise embilwini leswi vuriweke hi tindlati ta nkombo, u nga swi tsali.” 5 Ntsumi leyi ndzi yi voneke yi yime elwandle ni le misaveni yi tlakusela voko ra yona ra xinene ehenhla, 6 kutani yi hlambanya hi Loyi a hanyaka hilaha ku nga heriki,+ loyi a tumbuluxeke tilo ni swilo leswi nga eka rona ni misava ni swilo leswi nga eka yona ni lwandle ni swilo leswi nga eka rona, yi ku:+ “A ku nge he hlweriwi. 7 Kambe hi nkarhi lowu ntsumi ya vunkombo+ a yi lava ku chaya mhalamhala ya yona,+ xihundla xo kwetsima+ lexi Xikwembu xi xi byeleke malandza ya xona lama nga vaprofeta+ tanihi mahungu lamanene xa hetiseka.”

8 Kutani ndzi twa rito leri humaka etilweni+ ri tlhela ri vulavula na mina ri ku: “Famba, u ya teka buku leyi pfulekeke leyi nga evokweni ra ntsumi leyi yimeke elwandle ni le misaveni.”+ 9 Ndzi ya eka ntsumi yoleyo ndzi fika ndzi yi byela leswaku yi ndzi nyika buku leyitsongo. Yi ku eka mina: “Yi teke u yi dya hinkwayo,+ yi ta bava ekhwirini ra wena, kambe enon’wini wa wena yi ta tsokombela ku fana ni vulombe.” 10 Hiloko ndzi teka buku leyitsongo evokweni ra ntsumi ndzi yi dya hinkwayo,+ a yi tsokombela ku fana ni vulombe+ enon’wini wa mina, kambe a yi bava ekhwirini ra mina. 11 Kutani va ku eka mina: “U fanele ku tlhela u profeta hi vanhu ni matiko ni tindzimi ni tihosi to tala.”

11 Kutani ndzi nyikiwa rihlanga+ ro fana ni nhonga loko a ri karhi a ku: “Suka u yima u pima ndhawu yo kwetsima ya le tempeleni ya Xikwembu ni altari ni nhlayo ya lava gandzelaka eka yona. 2 Kambe loko ku ri xivava* lexi nga le handle ka ndhawu yo kwetsima ya le tempeleni, xi tshike u nga xi pimi, hikuva xi nyikiwe vanhu va matiko naswona va ta kandziyela muti wo kwetsima+ ku ringana tin’hweti ta 42.+ 3 Ndzi ta endla leswaku timbhoni ta mina timbirhi ti profeta masiku ya 1 260 ti ambale swiambalo swo khwaxa.” 4 Tona ti yimeriwa hi mirhi yimbirhi ya mitlhwari+ ni swo tlhoma timboni swimbirhi+ naswona ti yime emahlweni ka Hosi ya misava.+

5 Loko munhu a lava ku ti vavisa, ku huma ndzilo emilon’wini ya tona wu lovisa valala va tona. Loyi munhu a lava ku ti vavisa, u fanele a dlayiwa hi ndlela yoleyo. 6 Tona ti ni matimba yo pfala tilo+ leswaku mpfula yi nga ni+ hi masiku lawa ti profetaka ha wona naswona ti ni matimba ya ku hundzula mati ma va ngati+ ni ku ba misava hi makhombo ya mixaka hinkwayo hi ku phindhaphindha hilaha ti lavaka hakona.

7 Loko ti hetile ku profeta, xivandzana lexi humaka ekheleni ro enta xi ta lwa na tona, xi ti hlula xi tlhela xi ti dlaya.+ 8 Mitsumbu ya tona yi ta va exitarateni lexikulu xa muti lowukulu lowu hi tlhelo ra moya wu vitaniwaka Sodoma na Egipta, laha Hosi ya tona na yona yi dlayiweke kona, emhandzini. 9 Kutani vanhu va tinxaka ni tinyimba ni tindzimi ni matiko va ta languta mitsumbu ya tona ku ringana masiku manharhu ni hafu+ naswona a va nge pfumeli leswaku mitsumbu ya tona yi lahliwa esirheni. 10 Lava tshamaka emisaveni va tsaka va giya hikwalaho ka rifu ra tona, va ta rhumelana tinyiko hikuva vaprofeta lavambirhi a va xanisa lava tshamaka emisaveni.

11 Endzhaku ka masiku manharhu ni hafu, moya wa vutomi lowu humaka eka Xikwembu wu nghena endzeni ka vona,+ hiloko va yima kutani lava va va voneke va chava swinene. 12 Kutani va twa rito lerikulu leri humaka etilweni ri va byela ri ku: “Tlhandlukelani haleno.” Hiloko va tlhandlukela etilweni hi papa, valala va vona va ri karhi va va vona. 13 Hi nkarhi wolowo ku va ni ku tsekatseka lokukulu ka misava, kutani ku wa xiphemu lexitsongo* xa muti; vanhu va 7 000 va dlayiwa hi ku tsekatseka koloko ka misava, lava saleke va chava swinene, va dzunisa Xikwembu xa le tilweni.

14 Khombo ra vumbirhi ri hundzile.+ Waswivo! Khombo ra vunharhu ri le ku teni hi ku hatlisa.

15 Ntsumi ya vunkombo yi chaya mhalamhala ya yona.+ Kutani ku twakala marito lamakulu etilweni ma ku: “Mfumo wa misava se i Mfumo wa Hosi ya hina+ ni wa Kreste+ wa yona naswona yi ta fuma hilaha ku nga heriki.”+

16 Kutani vakulu va 24+ lava tshameke eswiluvelweni swa vona emahlweni ka Xikwembu va khinsama, swikandza swa vona swi khumba ehansi va gandzela Xikwembu, 17 va ku: “Ha ku khensa, Yehovha* Xikwembu, wena wa Matimba Hinkwawo, loyi a nga kona+ ni loyi a a ri kona, hikuva u kombise matimba ya wena lamakulu naswona se u sungule ku fuma.+ 18 Kambe matiko ma hlundzukile kutani vukarhi bya wena byi ta naswona ku fike nkarhi lowu vekiweke wa ku avanyisa lava feke, wa ku hakela+ malandza ya wena lama nga vaprofeta,+ vakwetsimi ni lava chavaka vito ra wena, lavakulu ni lavatsongo ni ku lovisa lava onhaka misava.”+

19 Hiloko ku pfuriwa ndhawu yo kwetsima ya le tempeleni ya Xikwembu leyi nga le tilweni, kutani ku vonaka areka ya ntwanano wa xona endzeni ka ndhawu yo kwetsima ya tempele ya xona.+ Ku va ni rihati, marito, ku dzindza ka tilo, ku tsekatseka ka misava ni xihangu lexikulu.

12 Hiloko ku humelela xikombiso xo hlamarisa swinene etilweni: Wansati+ a ambale dyambu naswona ehansi ka milenge yakwe a ku ri ni n’weti kasi enhlokweni yakwe a ku ri ni harhi leyi endliweke hi tinyeleti ta 12, 2 a a tikile. Naswona a a huwelela a ri eku lun’weni a twa ku vava hileswi a a ri kusuhi ni ku veleka.

3 Ku tlhela ku humelela xikombiso xin’wana etilweni. Dragona leyikulu yo tshwuka,+ leyi nga ni tinhloko ta nkombo ni timhondzo ta khume ni tiharhi ta nkombo etinhlokweni ta yona; 4 kutani yi koka xiphemu lexitsongo* xa tinyeleti+ ta le tilweni hi ncila wa yona, yi ti lahlela emisaveni.+ Hiloko dragona yi yima emahlweni ka wansati+ loyi a a ri kusuhi ni ku veleka, leswaku loko a veleka, yi ta mita n’wana wakwe.

5 Hiloko a veleka n’wana wa jaha,+ loyi a nga ta risa matiko hinkwawo hi nhonga ya nsimbhi.+ Kutani n’wana wakwe a hatla a yisiwa eka Xikwembu ni le xiluvelweni xa xona. 6 Wansati a balekela emananga, laha Xikwembu xi n’wi lunghiseleleke ndhawu kona, laha a a ta phameriwa ku ringana masiku ya 1 260.+

7 Kutani ku tlhekeka nyimpi etilweni: Mikayele*+ ni tintsumi ta yena va lwa ni dragona, dragona na yona yi lwa yi ri ni tintsumi ta yona 8 kambe dragona ni tintsumi ta yona va hluriwa naswona a va ha pfumeleriwanga ku tshama etilweni. 9 Hiloko dragona leyikulu yi lahleriwa ehansi,+ ku nga nyoka ya khale,+ leyi vuriwaka Diyavulosi+ na Sathana,+ leyi hambukisaka misava hinkwayo;+ yi lahleriwa emisaveni+ ni tintsumi ta yona. 10 Kutani ndzi twa rito lerikulu etilweni ri ku:

“Sweswi ku ponisa+ ni matimba ni Mfumo wa Xikwembu xa hina+ ni vuhosi bya Kreste wa xona se swa tirha, hikuva muhehli wa vamakwerhu u lahleriwe emisaveni, yena loyi a va hehlaka vusiku ni nhlikanhi emahlweni ka Xikwembu xa hina!+ 11 Va n’wi hlule+ hi ngati ya Xinyimpfana+ ni hi vumbhoni lebyi va byi nyikeleke+ naswona a va titsetselelanga+ hambiloko va langutane ni rifu. 12 Hikwalaho ka sweswo tsakani n’wina matilo na n’wina lava tshamaka eka wona! Khombo eka misava ni lwandle,+ hikuva Diyavulosi u xikele eka n’wina a hlundzukile swinene, hi ku tiva leswaku u ni nkarhi wo koma.”+

13 Loko dragona yi vona leswaku yi lahleriwe emisaveni,+ yi xanisa wansati+ la velekeke n’wana wa jaha. 14 Kambe wansati a nyikiwa timpapa timbirhi ta gama lerikulu,+ leswaku a ta haha a ya endhawini yakwe leyi nga emananga, laha a nga ta phameriwa kona ku ringana nkarhi ni mikarhi yimbirhi ni hafu ya nkarhi*+ a ri ekule ni nyoka.+

15 Hiloko nyoka yi kampfula mati lawa a ma tele ku fana ni nambu endzhaku ka wansati, leswaku yi n’wi nwerisa hi nambu wolowo. 16 Kambe misava yi pfuna wansati, yi pfula nomu yi mita nambu lowu dragona yi wu kampfuleke. 17 Hiloko dragona yi karihela wansati, kutani yi suka yi ya lwa ni vana* vakwe lava seleke,+ lava yingisaka swileriso swa Xikwembu naswona va nga ni ntirho wa ku nyikela vumbhoni ha Yesu.+

13 Hiloko yi* yima yi ku tserhe, esaveni ra lwandle.

Kutani ndzi vona xivandzana+ xi huma elwandle,+ xi ri ni timhondzo ta khume ni tinhloko ta nkombo naswona etimhondzweni ta xona a xi ri ni tiharhi ta khume, kambe xi ri ni mavito lama sandzaka etinhlokweni ta xona. 2 Xivandzana lexi ndzi xi voneke a xi fana ni yingwe, kambe milenge ya xona a yi fana ni ya bere, kasi nomu wa xona a wu fana ni wa nghala. Kutani xivandzana xi nyikiwa matimba ni xiluvelo ni vulawuri lebyikulu+ hi dragona.+

3 Hiloko ndzi xiya leswaku yin’wana ya tinhloko ta xona yi vavisiwile swinene, kambe mbanga ya xona leyi chavisaka yi horile,+ kutani vanhu emisaveni hinkwayo va landzela xivandzana va tlhela va xi xixima. 4 Kutani va gandzela dragona hikuva yi nyike xivandzana vulawuri, va tlhela va gandzela xivandzana hi marito lama nge: “I mani la fanaka ni xivandzana naswona i mani loyi a nga lwaka na xona?” 5 Xi nyikiwa matimba yo tibuma ni yo sandza, xi tlhela xi nyikiwa matimba ya ku tirha ku ringana tin’hweti ta 42.+ 6 Hiloko xi pfula nomu xi sandza+ Xikwembu ni ku sandza vito ra xona ni laha xi tshamaka kona hambi ku ri lava tshamaka etilweni.+ 7 Xi pfumeleriwa ku lwa ni vakwetsimi ni ku va hlula,+ kutani xi nyikiwa matimba yo fuma tinyimba hinkwato ni vanhu hinkwavo ni tindzimi hinkwato ni matiko hinkwawo. 8 Kutani hinkwavo lava tshamaka emisaveni va ta xi gandzela. Hi mpfhuka misava yi va kona, a ri kona ni vito rin’we eka mavito ya vona leri tsariweke ebukwini* ya vutomi+ ya Xinyimpfana lexi dlayiweke.+

9 Loyi a nga ni ndleve a a yingise.+ 10 Loko munhu a fanele a ya evuhlongeni u ta ya evuhlongeni. Loyi a dlayaka hi banga* u fanele a dlayiwa hi banga.+ Laha hi laha ku tiyisela+ ka vakwetsimi+ ni ripfumelo+ ra vona swi lavekaka kona.

11 Kutani ndzi vona xivandzana xin’wana xi huma emisaveni, xi ri ni timhondzo timbirhi to fana ni ta xinyimpfana kambe xi sungula ku vulavula ku fana ni dragona.+ 12 Xi tirhisa vulawuri lebyi fanaka lebyi xivandzana xo sungula+ xi nga na byona emahlweni ka xona. Kutani xi endla leswaku misava ni lava tshamaka eka yona va gandzela xivandzana lexo sungula, lexi horisiweke mbanga leyi chavisaka.+ 13 Hiloko xi endla masingita lamakulu emahlweni ka vanhu lerova xi endla ni ndzilo wu xika hi le tilweni wu ta emisaveni.

14 Xi hambukisa lava tshamaka emisaveni, hi ku tirhisa masingita lawa xi pfumeleriweke ku ma endla emahlweni ka xivandzana, xi ri karhi xi byela lava tshamaka emisaveni leswaku va endla xifaniso+ xa xivandzana, lexi a xi ri ni mbanga ya banga kambe xi holeke.+ 15 Kutani xi pfumeleriwa ku nyika xifaniso xa xivandzana lexo sungula moya, leswaku xifaniso xa xivandzana xi ta vulavula xi tlhela xi endla leswaku hinkwavo lava nga ta ka va nga xi gandzeli va dlayiwa.

16 Xi sindzisa vanhu hinkwavo, lavatsongo ni lavakulu, lava fumeke ni swisiwana, lava tshunxekeke ni mahlonga leswaku va funghiwa evokweni ra xinene kumbe emombyeni,+ 17 leswaku ku nga vi na munhu la kotaka ku xava kumbe ku xavisa loko a nga ri na mfungho, vito+ ra xivandzana kumbe nhlayo ya vito ra xona.+ 18 Laha hi laha vutlhari byi tirhaka kona: Loyi a nga ni ku twisisa a a hlayele nhlayo ya xivandzana, hikuva i nhlayo ya munhu, i 666.+

14 Hiloko ndzi languta, kutani ndzi vona Xinyimpfana+ xi yime eNtshaveni ya Siyoni,+ xi ri ni lava 144 000+ lava tsariweke vito ra xona ni vito ra Tata+ wa xona emimombyeni ya vona. 2 Ndzi twa mpfumawulo lowu humaka etilweni lowu fanaka ni wa mati yo tala ni wa ku dzindza lokukulu ka tilo; naswona mpfumawulo lowu a ndzi wu twa a wu fana ni wa vayimbeleri lava yimbelelaka va ri karhi va chaya ni tiharipa. 3 Va yimbelela risimu leri twalaka onge hi lerintshwa+ emahlweni ka xiluvelo ni le mahlweni ka swivumbiwa leswi hanyaka+ swa mune ni le mahlweni ka vakulu+ naswona a a nga ri kona loyi a a ri kota handle ka lava 144 000,+ lava xaviweke emisaveni. 4 Lava hi lava va nga tithyakisangiki hi vavasati; i tinghwendza.+ Hi lava landzelaka Xinyimpfana hinkwako laha xi yaka kona.+ Va xaviwe+ evanhwini leswaku va va ntshovelo wo sungula+ eka Xikwembu ni le ka Xinyimpfana, 5 naswona a ku kumiwanga vuxisi emilon’wini ya vona; a va na xisolo.+

6 Hiloko ndzi vona ntsumi yin’wana yi haha empfhukeni, yi ri ni mahungu lamanene lama nga heriki leswaku yi ma byela lava tshamaka emisaveni, va matiko hinkwawo, tinyimba hinkwato, tindzimi hinkwato ni vanhu hinkwavo.+ 7 Yi huwelela hi rito lerikulu yi ku: “Chavani Xikwembu mi xi vangamisa, hikuva nkarhi wa leswaku xi avanyisa wu fikile,+ kutani gandzelani Loyi a endleke tilo ni misava ni lwandle+ ni swihlovo swa mati.”

8 Kutani ku landzela ntsumi yin’wana ya vumbirhi yi ku: “U wile! Babilona Lonkulu+ u wile,+ loyi a nwiseke matiko hinkwawo vhinyo ya vunghwavava*+ byakwe!”

9 Ku landzela ntsumi yin’wana, ya vunharhu, yi huwelela hi rito lerikulu yi ku: “Loyi a nga ta gandzela xivandzana+ ni xifaniso xa xona ni ku pfumela ku funghiwa emombyeni kumbe evokweni ra yena,+ 10 u ta nwa ni vhinyo ya ku hlundzuka ka Xikwembu leyi cheriwaka yi nga timuriwanga ekhapini ya vukarhi+ bya xona naswona u ta xanisiwa hi ndzilo ni xivavula+ emahlweni ka tintsumi to kwetsima ni le mahlweni ka Xinyimpfana. 11 Kutani musi wa ku xanisiwa ka lava gandzelaka xivandzana ni xifaniso xa xona ni lava nga ta funghiwa+ hi vito ra xona wu ta tuvika hilaha ku nga heriki+ naswona a va nge wisi vusiku ni nhlikanhi. 12 Laha hi laha swi lavaka ku tiyisela eka vakwetsimi,+ lava yingisaka swileriso swa Xikwembu ni lava khomelelaka swi tiya eka ripfumelo+ ra Yesu.”

13 Ndzi tlhela ndzi twa rito ri huma etilweni ri ku: “Tsala: Va tsaka lava ku sukela sweswi ku ya emahlweni va faka va ri ni vun’we ni Hosi.+ Ina, ku vula moya, a va wise emitirhweni ya vona, hikuva swilo leswi va swi endleke swi famba na vona.”

14 Hiloko ndzi languta, kutani ndzi vona papa ro basa naswona ehenhla ka rona a ku tshame un’wana loyi a fanaka ni n’wana wa munhu,+ a ri ni harhi ya nsuku enhlokweni ya yena naswona a khome sikiri* ro kariha evokweni ra yena.

15 Ku humelela ntsumi yin’wana endhawini yo kwetsima ya le tempeleni, yi huwelela loyi a tshameke epapeni hi rito lerikulu yi ku: “Humesa sikiri ra wena u tshovela, hikuva nkarhi wa ku tshovela wu fikile naswona ntshovelo wa misava wu wupfile hi ku helela.”+ 16 Hiloko loyi a tshameke epapeni a humesa sikiri kutani a tshovela misava.

17 Ku tlhela ku humelela ntsumi yin’wana yi huma endhawini yo kwetsima ya le tempeleni leyi nga etilweni, na yona a yi khome sikiri ro kariha.

18 Nakambe ku humelela ntsumi yin’wana hi le altarini naswona a yi ri ni matimba yo lawula ndzilo. Yi huwelela loyi a khomeke sikiri ro kariha yi ku: “Nghenisa sikiri ra wena ro kariha u tshovela swichocho swa madiriva ya misava, hikuva se ma wupfile.”+ 19 Ntsumi yi teka sikiri* ra yona yi tshovela madiriva ya mirhi ya misava, kutani yi ma teka yi ma hoxa exikamelweni lexikulu xa vhinyo xa ku hlundzuka ka Xikwembu.+ 20 Xikamelo xa vhinyo xi pyanyeteriwa ehandle ka muti, naswona ngati leyi humeke loko xi pyanyeteriwa a yi tele ngopfu lerova yi fika ematon’wini ya tihanci, yi khuluka mpfhuka wo ringana kwalomu ka tikhilomitara ta 296.*

15 Ndzi tlhela ndzi vona xikombiso xin’wana etilweni, lexikulu ni lexi hlamarisaka, xa tintsumi+ ta nkombo leti khomeke makhombo ya nkombo. Makhombo lawa i yo hetelela, hikuva endzhaku ka wona vukarhi bya Xikwembu byi ta va byi herile.+

2 Ndzi vona nchumu lowu fanaka ni lwandle+ ra nghilazi leri pfanganeke ni ndzilo naswona lava koteke ku hlula+ xivandzana ni xifaniso+ xa xona ni nhlayo+ ya vito ra xona va yime ekusuhi ni lwandle ra nghilazi, va khome tiharipa ta Xikwembu. 3 Va ri karhi va yimbelela risimu ra Muxe+ nandza wa Xikwembu ni risimu ra Xinyimpfana,+ va ku:

“Mitirho ya wena Yehovha* Xikwembu xa Matimba Hinkwawo+ i yikulu naswona ya hlamarisa.+ Tindlela ta wena ti lulamile naswona i ta ntiyiso,+ Hosi ya hilaha ku nga heriki.+ 4 Yehovha,* i mani la nga ta ka a nga ku chavi, a tlhela a nga ri vangamisi vito ra wena, hikuva a ku na un’wana la tshembekaka handle ka wena?+ Matiko hinkwawo ma ta ta ma ta ku gandzela,+ hikuva swa tiveka leswaku u avanyisa hi ndlela leyinene.”

5 Endzhaku ka swilo leswi, ndzi vona ku pfuriwa ndhawu yo kwetsima ya tende ra vumbhoni+ etilweni,+ 6 kutani tintsumi ta nkombo leti khomeke makhombo ya nkombo+ ti humelela hi le ndhawini yo kwetsima, ti ambale swiambalo swa ntsembyana leswi baseke swi tlhela swi hatima naswona a ti bohiwe mabandhi ya nsuku eswifuveni. 7 Xin’wana xa swivumbiwa leswi hanyaka swa mune xi nyika tintsumi teto ta nkombo swindhichana swa nkombo swa nsuku leswi teleke vukarhi bya Xikwembu+ lexi hanyaka hilaha ku nga heriki. 8 Hiloko ndhawu yo kwetsima yi tala hi musi hikwalaho ka ku vangama ka Xikwembu+ ni hikwalaho ka matimba ya xona naswona a nga kona la koteke ku nghena endhawini yo kwetsima ku nga si hela makhombo ya nkombo+ ya tintsumi ta nkombo.

16 Kutani ndzi twa rito ri huwelela ku suka endhawini yo kwetsima+ ri byela tintsumi ta nkombo ri ku: “Fambani mi ya chulula swindhichana swa nkombo swa vukarhi bya Xikwembu emisaveni.”+

2 Ntsumi yo sungula yi chulula xindhichana xa yona emisaveni.+ Kutani vanhu lava nga ni mfungho wa xivandzana+ ni lava gandzelaka xifaniso+ xa xona va huma swilondza swo vava swinene.+

3 Ntsumi ya vumbirhi yi chulula xindhichana xa yona elwandle.+ Hiloko lwandle ri hundzuka ngati+ yo fana ni ya munhu loyi a feke, kutani ku fa swivumbiwa hinkwaswo swa le lwandle.+

4 Ntsumi ya vunharhu yi chulula xindhichana xa yona emilambyeni ni le swihlobyeni swa mati.+ Hiloko swi hundzuka ngati.+ 5 Ndzi twa ntsumi leyi nga ni matimba yo lawula mati yi ku: “Wena Loyi a nga kona ni loyi a a ri kona,+ Lowo tshembeka+ u lulamile, hikuva u humese vuavanyisi lebyi,+ 6 hikuva va halate ngati ya vakwetsimi ni ya vaprofeta,+ kutani u va nyike ngati va nwa;+ swa va fanela.”+ 7 Kutani ndzi twa rito ri huma ealtarini ri ku: “Yehovha,* Xikwembu xa Matimba Hinkwawo,+ vuavanyisi bya wena i bya ntiyiso naswona byi lulamile.”+

8 Ntsumi ya vumune yi chulula xindhichana xa yona edyambyini,+ hiloko dyambu ri pfumeleriwa ku vavula vanhu hi ndzilo. 9 Vanhu va vavuriwa hi mumu lowukulu, kambe va sandza vito ra Xikwembu lexi nga ni matimba yo lawula makhombo lawa, a va hundzukanga va xi dzunisa.

10 Ntsumi ya vuntlhanu yi chulula xindhichana xa yona ehenhla ka xiluvelo xa xivandzana. Hiloko mfumo wa xona wu hundzuka ntima,+ kutani va tiluma marimi hikwalaho ko twa ku vava, 11 kambe va sandza Xikwembu xa le tilweni hikwalaho ka switlhavi ni swilondza swa vona naswona a va yi tshikanga mitirho ya vona.

12 Ntsumi ya vutsevu yi chulula xindhichana xa yona enambyeni lowukulu wa Yufrata,+ hiloko mati ya kona ma phya,+ leswaku ku lunghiseleriwa ndlela ya tihosi+ ta le vuxeni.

13 Hiloko ndzi vona mimoya yinharhu leyi nga basangiki leyi a yi fana ni machela yi huma enon’wini wa dragona+ ni le non’wini wa xivandzana ni le non’wini wa muprofeta wa mavunwa. 14 Kahlekahle i mimoya leyi humaka eka madimona, yi endla masingita+ naswona yi ya eka tihosi ta misava hinkwayo yi ya ti hlengeleta leswaku ti ta lwa nyimpi+ ya siku lerikulu ra Xikwembu xa Matimba Hinkwawo.+

15 “Vonani! Ndza ta ku fana ni khamba.+ Wa tsaka loyi a tshamaka a xalamukile,+ loyi a tshamaka a ambale swiambalo swakwe* leswaku a nga fambi a nga ambalanga kutani vanhu va n’wi vonela.”+

16 Hiloko mimoya leyi nga basangiki yi hlengeleta tihosi endhawini leyi vuriwaka Armagedoni* hi Xiheveru.+

17 Ntsumi ya vunkombo yi chulula xindhichana xa yona emoyeni. Hiloko ku twakala rito ri huwelela ku suka endhawini yo kwetsima+ ya le xiluvelweni, ri ku: “Swi endlekile!” 18 Kutani ku va ni rihati ni marito ni ku dzindza ka tilo hiloko ku va ni ku tsekatseka lokukulu ka misava+ loku a ku chavisa swinene loku nga si tshamaka ku va kona hi mpfhuka vanhu va va kona emisaveni. 19 Muti lowukulu+ wu avana wu va swiphemu swinharhu, miti ya matiko yi wa; hiloko Xikwembu xi tsundzuka Babilona Lonkulu,+ leswaku a nyikiwa xinwelo xa vhinyo ya vukarhi bya xona.+ 20 Nakambe swihlala hinkwaswo swi nyamalala ni tintshava a ta ha kumekanga.+ 21 Kutani ku wa xihangu lexikulu hi le tilweni lexi maribye ya xona a ma tika kwalomu ka talenta* xi wela vanhu+ hiloko va sandza Xikwembu hikwalaho ka khombo ra xihangu+ hikuva a ri chavisa ngopfu.

17 Yin’wana ya tintsumi ta nkombo leti a ti khome swindhichana swa nkombo+ yi ta eka mina yi fika yi ku: “Tana, ndzi ta ku komba ndlela leyi nghwavava leyikulu leyi tshameke ematini yo tala yi nga ta avanyisiwa ha yona,+ 2 leyi tihosi ta misava ti endleke vuoswi*+ na yona naswona lava tshamaka emisaveni va dakwisiweke hi vhinyo ya vunghwavava bya yona.”+

3 Hiloko ntsumi yi ndzi tlakula hi matimba ya moya yi ndzi yisa emananga. Kutani ndzi vona wansati a gade xivandzana xo tshwuka lexi teleke mavito lama sandzaka, lexi a xi ri ni tinhloko ta nkombo ni timhondzo ta khume. 4 Wansati loyi a a ambale xiambalo xa phephulu*+ ni xo tshwuka naswona a a tisasekise hi nsuku, maribye ya risima ni tiperela,+ a a khome xinwelo xa nsuku lexi a xi tele hi swilo leswi nyenyetsaka ni leswi nga basangiki swa vunghwavava* byakwe. 5 Emombyeni wakwe a ku tsariwe vito leri nga xihundla, leri nge: “Babilona Lonkulu, mana wa tinghwavava+ ni wa swilo leswi nyenyetsaka swa misava.”+ 6 Ndzi tlhele ndzi xiya leswaku wansati loyi u dakwe hi ngati ya vakwetsimi ni ya timbhoni ta Yesu.+

Loko ndzi n’wi vona ndzi hlamale ngopfu. 7 Hiloko ntsumi yi ku eka mina: “Hikwalaho ka yini u hlamala? Ndzi ta ku byela xihundla xa wansati+ loyi ni xa xivandzana lexi nga ni tinhloko ta nkombo ni timhondzo ta khume lexi wansati loyi a xi gadeke:+ 8 Xivandzana lexi u xi voneke a xi ri kona, kambe a xa ha ri kona, hambiswiritano xi ta huma ekheleni ro enta+ ku nga ri khale xi ya eku lovisiweni. Kutani lava tshamaka emisaveni, lava mavito ya vona ma nga tsariwangiki ebukwini* ya vutomi+ hi mpfhuka misava yi va kona, va ta hlamala loko va xiya leswaku xivandzana lexi xi ve kona, kambe a xa ha ri kona, hambiswiritano xi ta tlhela xi va kona.

9 “Laha hi laha vutlhari byi tirhaka kona: Tinhloko ta nkombo+ ti vula tintshava ta nkombo, leti wansati a tshameke ehenhla ka tona. 10 Ti yimela tihosi ta nkombo: Ntlhanu wa tona ti wile, leyin’wana yi kona, kasi leyin’wana a yi si fika; kambe loko yi fika yi ta fuma nkarhinyana. 11 Naswona xivandzana lexi a xi ri kona kambe xi nga ha riki kona,+ na xona i hosi ya vunhungu, kambe xi huma eka leta nkombo naswona xi ya eku lovisiweni.

12 “Timhondzo ta khume leti u ti voneke ti yimela tihosi ta khume, leti nga si sungulaka ku fuma, kambe ti ta fuma awara yin’we ni xivandzana. 13 Tihosi leti ti ni miehleketo yin’we, hikwalaho ti nyika xivandzana matimba yo fuma. 14 Ti ta lwa ni Xinyimpfana,+ kambe leswi xi nga Hosi ya tihosi ni Mufumi wa vafumi,+ Xinyimpfana xi ta ti hlula.+ Nakambe lava nga ni Xinyimpfana, lava vitaniweke, lava hlawuriweke naswona va tshembekaka, na vona va ta ti hlula.”+

15 Ntsumi yi ku eka mina: “Mati lawa u ma voneke, lawa nghwavava yi tshameke ehenhla ka wona, ma yimela vanhu ni mitshungu ni matiko ni tindzimi.+ 16 Timhondzo ta khume+ leti u ti voneke ni xivandzana,+ swi ta venga nghwavava,+ kutani swi ta yi tekela swilo swa yona hinkwaswo, yi ta sala yi nga ambalanga nchumu naswona swi ta dya nyama ya yona swi tlhela swi yi hisa hi ndzilo yi hela.+ 17 Hikuva Xikwembu xi swi nghenise etimbilwini ta swona leswaku swi endla ku rhandza ka xona,+ ina, ku hetisisa mianakanyo ya swona yin’we hi ku nyika xivandzana mfumo wa swona+ kukondza ku endleka leswi Xikwembu xi swi vuleke. 18 Loko ku ri wansati+ loyi u n’wi voneke u yimela muti lowukulu lowu fumaka tihosi ta misava.”

18 Endzhaku ka sweswo ndzi vona ntsumi yin’wana yi xika hi le tilweni yi ri ni matimba lamakulu, kutani misava yi voningeriwa hi ku vangama ka yona. 2 Hiloko yi huwelela hi rito lerikulu yi ku: “U wile! Babilona Lonkulu u wile+ naswona u hundzuke kaya ra madimona ni mimoya hinkwayo leyi nga basangiki ni kaya ra swinyenyana hinkwaswo leswi nga basangiki leswi vengiwaka!+ 3 Hikuva matiko hinkwawo ma nwisiwe vhinyo ya vunghwavava* byakwe, tihosi ta misava ti etlele na yena,+ van’wamabindzu va misava va fuwile hikwalaho ka leswi a rhandzaka vutomi bya vulovolovo lebyi nga n’wi khomisiki tingana.”

4 Kutani ndzi twa rito rin’wana ri huma etilweni ri ku: “Humani eka yena, n’wina vanhu va mina,+ loko mi nga lavi ku katseka eswidyohweni swa yena ni loko mi nga lavi ku weriwa hi man’wana ya makhombo lama nga ta n’wi wela.+ 5 Hikuva swidyoho swakwe swi tlhandlekelane ku ya fika etilweni+ naswona Xikwembu xi tsundzuke milandzu yakwe.+ 6 N’wi endleni leswi a endleke van’wana swona,+ mi swi phindha kambirhi swilo leswi a swi endleke;+ swakunwa leswi a swi pfanganiseke ekhapini yakwe,+ n’wi pfanganiseleni swona swi phindhiwe kambirhi.+ 7 N’wi xaniseni mi tlhela mi n’wi vangela gome hi ku landza mpimo lowu a a tikurisa ha wona ni ku hanya vutomi bya vulovolovo lebyi a byi nga n’wi khomisi tingana. Hikuva u tshamela ku tibyela a ku: ‘Ndzi hosi ya xisati, a ndzi noni naswona a ndzi nge pfuki ndzi ve ni gome.’+ 8 Hi yona mhaka leyi makhombo yakwe ma nga ta n’wi wela hi siku rin’we, rifu ni nkosi ni ndlala naswona u ta hisiwa hi ndzilo a hela,+ hikuva Yehovha* Xikwembu, loyi a n’wi avanyiseke u ni matimba.+

9 “Kutani tihosi ta misava leti endleke vuoswi* na yena, leti hanyeke vutomi bya vulovolovo na yena ti nga khomiwi hi tingana, ti ta n’wi rila, ti tlhela ti va ni gome loko ti vona musi wa ku tshwa ka yena. 10 Ti ta yimela ekule hikwalaho ko chava khombo rakwe ti ku: ‘Swa vava, swa vava swa wena muti lowukulu,+ wena Babilona muti lowu tiyeke, hikuva ku avanyisiwa ka wena ku fike hi awara yin’we!’

11 “Van’wamabindzu emisaveni na vona va n’wi rila, hikuva a ka ha ri na munhu loyi a nga ta xava nhundzu ya vona yo tala, 12 nhundzu yo tala ya nsuku, silivhere, maribye ya risima, tiperela, malapi ya xiyimo xa le henhla, malapi ya phephulu,* ya silika ni yo tshwuka; ni swilo hinkwaswo leswi endliweke hi ntsandza wo nun’hwela; ni mixaka hinkwayo ya swilo leswi endliweke hi timhondzo ta tindlopfu ni leswi endliweke hi ntsandza wo durha, koporo, nsimbhi ni maribye ya mavula; 13 ku katsa ni sinamoni, swipayisisi swa le Indiya, mirhi yo nun’hwela, mafurha yo nun’hwela, murhi wa risuna, vhinyo, mafurha ya mitlhwari, mapa lama silekeke kahle, koroni, tihomu, tinyimpfu, tihanci, tigolonyi, mahlonga ni vanhu. 14 Ina, mihandzu leyinene leyi a wu yi navela a ya ha ri kona, mahinyahinya hinkwawo ni swilo swo saseka leswi a wu ri na swona swi ku helerile, a wu nge he pfuki u swi kumile.

15 “Van’wamabindzu lava a va xavisa swilo leswi, lava fuweke hikwalaho ka yena, va ta yimela ekule hikwalaho ko chava khombo rakwe naswona va ta n’wi rila 16 va ku: ‘Swa vava, swa vava swa wena muti lowukulu, lowu ambaleke xiambalo lexi endliweke hi lapi ra xiyimo xa le henhla, leri nga ni muvala wa phephulu* ni wo tshwuka, muti lowu tisasekiseke hi swin’wetsin’wetsi swa nsuku ni maribye ya risima ni tiperela,+ 17 hikuva rifuwo leri lerikulu hinkwaro ri lovisiwe hi awara yin’we!’

“Kutani valawuri hinkwavo va swikepe ni vanhu lava fambaka hi swikepe ni vatlutisi ni hinkwavo lava tihanyisaka hi ku tirha elwandle, va yimela ekule 18 va huwelela va langute musi wa ku tshwa ka yena, va ku: ‘A wu kona muti lowu fanaka ni muti lowu lowukulu.’ 19 Va tichela ritshuri etinhlokweni va huwelela, va ri karhi va rila va ku: ‘Swa vava, swa vava swa wena muti lowukulu, lowu hinkwavo lava nga ni swikepe elwandle va fuweke hikwalaho ka rifuwo ra wona, hikuva wu lovisiwe hi awara yin’we!’+

20 “Tsakani hikwalaho ka wona n’wina matilo+ na n’wina vakwetsimi+ ni vaapostola ni vaprofeta, hikuva Xikwembu xi mi avanyisele muti lowu!”+

21 Hiloko ntsumi leyi nga ni matimba yi tlakula ribye ro fana ni ribye lerikulu ro sila kutani yi ri lahlela elwandle yi ku: “Babilona muti lowukulu wu ta cukumetisiwa xisweswo, a wu nge he tlheli wu va kona.+ 22 A ku nge he pfuki ku twakale mpfumawulo wa vayimbeleri lava fambisanaka ni haripa, swiyimbeleri, vachayi va switiringo ni vabi va timhalamhala eka wena. A ku nge he pfuki ku kumeke vanhu lava tivaka mitirho ya mavoko eka wena naswona a ku nge he pfuki ku twakale mpfumawulo wa ribye ro sila eka wena. 23 A ku nge he pfuki ku ve ni rivoni leri voningaka eka wena, a ku nge he pfuki ku twakale rito ra muteki ni ra mutekiwa eka wena; hikuva van’wamabindzu va wena a va ri va xiyimo xa le henhla emisaveni naswona matiko hinkwawo ma hambukisiwile hikwalaho ka vungoma bya wena.+ 24 Ina, eka yena ku kumiwe ngati ya vaprofeta ni ya vakwetsimi+ ni ya hinkwavo lava dlayiweke emisaveni.”+

19 Endzhaku ka swilo leswi ndzi twa leswi fanaka ni ku huwelela ka ntshungu lowukulu etilweni. Wu ku: “Dzunisani Yehovha!*+ Ku ponisiwa ni ku vangama ni matimba i swa Xikwembu xa hina, 2 hikuva xi avanyisa hi ntiyiso ni hi ndlela yo lulama.+ Xi xupule nghwavava leyikulu leyi onheke misava hi vunghwavava* bya yona naswona xi rihisele ngati ya malandza ya xona leyi nga emavokweni ya nghwavava.”+ 3 Hiloko xikan’wekan’we ntshungu wu tlhela wu ku: “Dzunisani Yehovha!*+ Kutani musi wa ku tshwa ka yona wu tuvika hilaha ku nga heriki.”+

4 Kutani vakulu va 24+ ni swivumbiwa leswi hanyaka swa mune+ va khinsama va gandzela Xikwembu lexi tshameke exiluvelweni, va ku: “Amen! Dzunisani Yehovha!”*+

5 Ndzi tlhela ndzi twa rito ri huma exiluvelweni ri ku: “Dzunisani Xikwembu xa hina, n’wina malandza ya xona hinkwawo,+ n’wina lava mi xi chavaka, lavatsongo ni lavakulu.”+

6 Kutani ndzi twa leswi fanaka ni rito ra ntshungu lowukulu ni leswi fanaka ni mpfumawulo wa mati yo tala ni leswi fanaka ni mpfumawulo wa ku dzindza lokukulu ka tilo. Wu ku: “Dzunisani Yehovha,*+ hikuva Yehovha* Xikwembu xa hina lexi nga ni Matimba Hinkwawo,+ se i hosi!+ 7 A hi tsakeni hi khana, hi n’wi dzunisa, hikuva mucato wa Xinyimpfana wu fikile naswona nsati wa xona u tilunghisile. 8 Ina, u pfumeleriwe ku ambala xiambalo xa ntsembyana wa xiyimo xa le henhla xo hatima, lexi baseke, hikuva ntsembyana wa xiyimo xa le henhla wu yimela mitirho leyinene ya vakwetsimi.”+

9 Yi ndzi byela yi ku, “Tsala: Va tsaka lava rhambiweke ku ta dya swakudya swo lalela emucatweni wa Xinyimpfana.”+ Yi tlhela yi ku: “Lawa i marito ya ntiyiso lama humaka eka Xikwembu.” 10 Hiloko ndzi khinsama emahlweni ka milenge ya yona leswaku ndzi yi gandzela. Kambe yi ku eka mina: “U nga swi endli sweswo!+ Na mina ndzo va nandza ku fana na wena ni vamakwenu lava nga ni ntirho wa ku nyikela vumbhoni hi Yesu.+ Gandzela Xikwembu!+ Hikuva xikongomelo xa vuprofeta i ku nyikela vumbhoni hi Yesu.”+

11 Ndzi vona matilo ma pfuleka, kutani ku humelela hanci yo basa.+ Loyi a yi gadeke u vuriwa wo Tshembeka+ ni wa Ntiyiso+ naswona u avanyisa ni ku lwa hi ndlela yo lulama.+ 12 Matihlo ya yena ma fana ni langavi+ naswona enhlokweni ya yena ku ni tiharhi to tala. U tsariwe vito leri nga tiviwiki hi munhu kambe ri tiviwaka hi yena ntsena, 13 naswona u ambale xiambalo lexi cheriweke* hi ngati, kutani vito leri a vitaniwaka ha rona i Rito+ ra Xikwembu. 14 Nakambe a a landzeriwa hi mavuthu ya le tilweni lama gadeke tihanci to basa lawa a ma ambale swiambalo swa ntsembyana wa xiyimo xa le henhla swo basa paa! 15 Enon’wini wa yena a ku huma banga ro leha+ ro kariha, leswaku a lovisa matiko ha rona naswona u ta ma risa hi nhonga ya nsimbhi.+ Ku tlula kwalaho, u pyanyetela madiriva lama nga exikamelweni xa vukarhi bya Xikwembu xa Matimba Hinkwawo.+ 16 Eka xiambalo xakwe hi le ndzhumbini, ku tsariwe vito leri nge, Hosi ya tihosi ni Mufumi wa vafumi.+

17 Ndzi tlhela ndzi vona ntsumi yi yime edyambyini, yi huwelela yi byela swinyenyana hinkwaswo leswi hahaka empfhukeni yi ku: “Tanani haleno, hlengeletanani mi ta dya xilalelo lexikulu xa Xikwembu,+ 18 mi ta dya nyama ya tihosi, nyama ya tindhuna ta nyimpi, nyama ya vavanuna lava nga ni matimba+ ni nyama ya tihanci ni ya lava ti gadeke,+ nyama ya vanhu hinkwavo, ya vanhu lava tshunxekeke ni ya mahlonga ni ya lavatsongo ni lavakulu.”

19 Kutani ndzi vona xivandzana ni tihosi ta misava ni mavuthu ya tona va hlengeletanile leswaku va lwa ni loyi a gadeke hanci swin’we ni vuthu ra yena.+ 20 Hiloko xivandzana xi khomiwa ni muprofeta wa mavunwa+ loyi a a endla masingita emahlweni ka xona, masingita lawa a ma tirhiseke ku hambukisa vanhu lava amukeleke mfungho wa xivandzana+ ni lava gandzelaka xifaniso xa xona.+ Havumbirhi bya vona va lahleriwa etiveni ra ndzilo ni xivavula va ri karhi va hanya.+ 21 Kambe lavan’wana hinkwavo va dlayiwa hi banga ro leha ra loyi a gadeke hanci, leri a ri huma enon’wini wa yena.+ Swinyenyana hinkwaswo swi dya nyama ya vona swi xurha.+

20 Kutani ndzi vona ntsumi yi xika hi le tilweni yi khome xikhiya xa khele ro enta+ ni nketana leyikulu. 2 Yi khoma dragona,+ nyoka ya khale,+ ku nga Diyavulosi+ na Sathana,+ yi n’wi boha ku ringana malembe ya 1 000. 3 Yi n’wi lahlela ekheleni ro enta,+ yi ri pfala swi tiya leswaku a nga ha pfuki a hambukise matiko kukondza ku hela malembe ya 1 000. Endzhaku ka sweswo, u fanele a tshunxiwa swa nkarhinyana.+

4 Kutani ndzi vona swiluvelo naswona lava tshameke eka swona va nyikiwa matimba yo avanyisa. Hiloko ndzi vona ngati ya lava dlayiweke hikwalaho ko nyikela vumbhoni hi Yesu ni hikwalaho ko vulavula hi Xikwembu ni lava nga xi gandzelangiki xivandzana kumbe xifaniso xa xona naswona va nga wu amukelangiki mfungho emimombyeni ni le mavokweni ya vona.+ Va sungula ku tlhela va hanya va va tihosi na Kreste+ ku ringana malembe ya 1 000. 5 (Vafi lavan’wana hinkwavo+ a va tlhelanga va hanya kukondza ku hela malembe ya 1 000.) Loku i ku pfuxiwa ka vafi ko sungula.+ 6 Va tsaka naswona va kwetsima lava nga ta katseka eku pfuxiweni ka vafi ko sungula;+ rifu ra vumbirhi+ a ri na matimba eka vona,+ kambe va ta va vaprista+ va Xikwembu ni va Kreste naswona va ta va tihosi na yena ku ringana malembe ya 1 000.+

7 Hi ku hatlisa endzhaku ka malembe ya 1 000, Sathana u ta tshunxiwa 8 naswona u ta huma a ya hambukisa matiko lama nga ematlhelweni hinkwawo ya misava, ku nga Gogo na Magogo, a ma hlengeleta leswaku ma ta lwa nyimpi. Nhlayo ya wona yi fana ni sava ra lwandle. 9 Hiloko ma hangalaka ni misava hinkwayo ma fika ma rhendzela nxaxa wa vakwetsimi ni muti lowu rhandzekaka. Kambe ku xika ndzilo hi le tilweni wu fika wu ma lovisa.+ 10 Diyavulosi loyi a a ma hambukisa a lahleriwa etiveni ra ndzilo ni xivavula, leri xivandzana+ ni muprofeta wa mavunwa va hoxiweke eka rona;+ kutani va ta xanisiwa vusiku ni nhlikanhi hilaha ku nga heriki.

11 Hiloko ndzi vona xiluvelo lexikulu xo basa ni Loyi a tshameke eka xona.+ Misava ni tilo swi nyamalala emahlweni ka yena,+ a swa ha vanga kona. 12 Kutani ndzi vona vafi, lavakulu ni lavatsongo va yime emahlweni ka xiluvelo, hiloko ku pfuriwa tibuku.* Kambe ku pfuriwe buku yin’wana; i buku ya vutomi.+ Vafi va avanyisiwa hi ku ya hi leswi tsariweke etibukwini hi ku ya hi mitirho ya vona.+ 13 Lwandle ri humesa vafi lava nga eka rona, rifu ni Sirha* swi humesa vafi lava nga eka swona, kutani va avanyisiwa ha un’weun’we hi ku ya hi mitirho ya vona.+ 14 Kutani rifu ni Sirha* swi lahleriwa etiveni ra ndzilo.+ Tiva leri ra ndzilo+ ri vula rifu ra vumbirhi.+ 15 Ku tlula kwalaho, mani na mani loyi a nga kumeka a nga tsariwanga ebukwini ya vutomi+ a lahleriwa etiveni ra ndzilo.+

21 Hiloko ndzi vona tilo lerintshwa ni misava leyintshwa;+ hikuva tilo ro sungula ni misava yo sungula a swi nga ha ri kona+ ni lwandle+ a ri nga ha ri kona. 2 Ndzi vona ni muti wo kwetsima, Yerusalema Lowuntshwa, wu xika hi le tilweni wu huma eka Xikwembu,+ wu lunghisiwe wonge i mutekiwa a tisasekisele nuna wakwe.+ 3 Hiloko ndzi twa rito ri huwelela ku suka exiluvelweni ri ku: “Waswivo! Tabernakela ya Xikwembu yi le xikarhi ka vanhu, xi ta tshama na vona, va ta va vanhu va xona. Xikwembu hi xoxe xi ta va na vona.+ 4 Kutani xi ta sula mihloti hinkwayo ematihlweni ya vona,+ rifu a ri nge he vi kona,+ hambi ku ri nkosi, ku rila ni switlhavi a swi nge he vi kona.+ Swilo swo sungula swi hundzile.”

5 Kutani Loyi a tshameke exiluvelweni+ a ku: “Vona, ndzi endla swilo hinkwaswo swi va leswintshwa.”+ A tlhela a ku: “Tsala, hikuva marito lawa ma tshembeka naswona i ya ntiyiso.” 6 A tlhela a ku: “Swi endlekile! Hi mina Alfa na Omega,* masungulo ni makumu.+ Loyi a nga ni torha ndzi ta n’wi nyika mati lama humaka exihlobyeni xa mati ya vutomi mahala.+ 7 Loyi a hlulaka, u ta kuma swilo leswi naswona ndzi ta va Xikwembu xa yena, yena a va n’wana wa mina. 8 Kambe loko ku ri matoya ni lava nga riki na ripfumelo+ ni lava nga basangiki hikwalaho ko endla swilo swa manyala ni vadlayi+ ni lava tikhomaka ku biha hi swa masangu*+ ni vangoma ni lava gandzelaka swikwembu ni hinkwavo lava hembaka,+ va ta hoxiwa etiveni leri pfurhaka ndzilo ni xivavula.+ Leswi swi vula rifu ra vumbirhi.”+

9 Yin’wana ya tintsumi ta nkombo leti a ti khome swindhichana swa nkombo leswi a swi tele hi makhombo yo hetelela ya nkombo+ yi ta kutani yi ku eka mina: “Tana haleno, ndzi ta ku komba mutekiwa, nsati wa Xinyimpfana.”+ 10 Kutani yi ndzi teka hi matimba ya moya yi ndzi yisa entshaveni leyikulu yo leha swinene, yi ndzi komba Yerusalema muti wo kwetsima wu xika wu huma hi le tilweni eka Xikwembu+ 11 wu ri ni ku vangama ka Xikwembu.+ Ku vangama ka wona a ku fana ni ribye ra risima ngopfu, ku fana ni ribye ra yaspere leri hatimaka ku fana ni kristala yo tenga.+ 12 Muti lowu a wu biyeriwe hi khumbi lerikulu ro leha naswona a wu ri ni tigede ta 12 ni tintsumi ta 12 leti a ti rindze tigede leti naswona a ku tsariwe mavito ya tinyimba ta 12 ta vana va Israyele etigedeni teto. 13 Evuxeni a ku ri ni tigede tinharhu, en’walungwini ku ri ni tigede tinharhu, edzongeni ku ri ni tigede tinharhu, evupeladyambu ku ri ni tigede tinharhu.+ 14 Khumbi ra muti a ri akiwe ehenhla ka maribye ya 12, eka wona a ku tsariwe mavito ya 12 ya vaapostola va 12+ va Xinyimpfana.

15 Loyi a a vulavula na mina a a khome rihlanga ra nsuku ro pima ha rona leswaku a ta pima muti, tigede ta wona ni khumbi ra wona.+ 16 Muti lowu wu ni matlhelo ya mune yo ringana naswona ku leha ka wona a ku ringana ni ku anama ka wona. Hiloko a pima muti hi rihlanga, kutani a kuma leswaku ku leha ka wona, ku anama ka wona ni ku tlakuka ka wona a ku ri kwalomu ka 2 220 wa tikhilomitara;* hikuva matlhelo ya wona a ma ringana. 17 A tlhela a pima ni khumbi ra muti, kutani a kuma leswaku a ri lehe swisungunu swa 144* hi ku ya hi mapimelo ya munhu ni ya ntsumi. 18 Khumbi leri a ri akiwe hi ribye ra yaspere+ naswona muti a wu akiwe hi nsuku wo tenga lowu vonikelaka ku fana ni nghilazi. 19 Khumbi ra muti a ri akiwe ehenhla ka maribye ya risima yo hambanahambana: ribye ro sungula a ku ri yaspere, ra vumbirhi safiri, ra vunharhu kalkedoni, ra vumune emeralda, 20 ra vuntlhanu sardonikisi, ra vutsevu sardiyo, ra vunkombo krisolita, ra vunhungu berila, ra vukaye topazi, ra vukhume krisopurasi, ra vu-11 yakinta, ra vu-12 ametisita. 21 Nakambe tigede ta 12 a ti endliwe hi tiperela ta 12; gede ha yin’we a yi endliwe hi perela yin’we. Ndlela leyikulu ya muti a yi endliwe hi nsuku wo tenga lowu vonikelaka ku fana ni nghilazi.

22 A ndzi vonanga tempele endzeni ka muti, hikuva Yehovha* Xikwembu xa Matimba Hinkwawo+ ni Xinyimpfana i tempele ya wona. 23 Muti lowu a wu lavi dyambu kumbe n’weti leswaku wu voningeriwa, hikuva ku vangama ka Xikwembu ka wu voningela+ naswona rivoni ra wona i Xinyimpfana.+ 24 Matiko ma ta famba hikwalaho ka ku vonakala ka wona,+ tihosi ta misava ti ta vangamisa muti lowu. 25 Tigede ta wona a ti nge pfariwi ninhlikanhi, hikuva vusiku a byi nge vi kona eka wona.+ 26 Ku vangama ka matiko ni ku xiximeka ka wona ku ta tisiwa eka wona.+ 27 Kambe nchumu lowu thyakeke ni munhu loyi a endlaka swilo swo nyenyetsa ni wa vuxisi a nge ngheni eka wona;+ ku ta nghena ntsena lava tsariweke ebukwini* ya vutomi ya Xinyimpfana.+

22 Kutani yi ndzi komba nambu wa mati ya vutomi,+ lowu tengeke ku fana ni ribye ra kristala, wu khuluka wu huma exiluvelweni xa Xikwembu ni xa Xinyimpfana+ 2 wu ya fika ni le xikarhi ka ndlela leyikulu ya muti. Ematlhelo ka nambu lowu a ku ri ni mirhi ya vutomi leyi humesaka mixaka ya 12 ya mihandzu naswona a yi tswala mihandzu n’hweti ni n’hweti. Matluka ya mirhi leyi a ma ri ya ku hanyisa matiko.+

3 Muti lowu a wu nge he rhukaniwi. Kambe xiluvelo xa Xikwembu ni xa Xinyimpfana+ swi ta va emutini wolowo naswona malandza ya xona ma ta xi endlela ntirho wo kwetsima; 4 ma ta vona xikandza+ xa xona naswona ma ta tsariwa vito ra xona emimombyeni ya wona.+ 5 Nakambe, vusiku a byi nge he vi kona,+ a ma nge he lavi ku voningeriwa hi rivoni kumbe hi dyambu hikuva Yehovha* Xikwembu u ta ma voningela,+ kutani ma ta va tihosi hilaha ku nga heriki.+

6 Hiloko yi ku eka mina: “Marito lawa ma tshembeka naswona i ya ntiyiso;+ Yehovha* Xikwembu loyi a vulavuleke hi ku tirhisa vaprofeta+ vakwe u rhume ntsumi ya yena ku komba malandza yakwe swilo leswi faneleke ku endleka ku nga ri khale. 7 Waswivo, ndza ta hi ku hatlisa.+ Wa tsaka loyi a hlayisaka marito ya vuprofeta bya buku* leyi.”+

8 Hi mina Yohane la tweke ni ku vona swilo leswi. Loko ndzi swi twile ni ku swi vona, ndzi khinsama emahlweni ka milenge ya ntsumi leyi a yi ndzi komba swilo leswi, leswaku ndzi yi gandzela. 9 Kambe yi ndzi byela yi ku: “E-e, u nga endli sweswo! Na mina ndzo va nandza ku fana na wena ni vamakwenu lava nga vaprofeta ni lava yingisaka marito ya buku leyi. Gandzela Xikwembu.”+

10 Yi tlhela yi ku: “U nga ma endli ma va xihundla marito ya vuprofeta lebyi, hikuva nkarhi lowu vekiweke wu kusuhi. 11 Loyi a endlaka leswi nga lulamangiki, a a ye emahlweni a endla leswi nga lulamangiki, loyi a endlaka leswi thyakeke a a ye emahlweni a endla leswi thyakeke; kambe loyi a endlaka leswi lulameke a a ye emahlweni a endla leswi lulameke naswona loyi a kwetsimaka a a ye emahlweni a kwetsima.

12 “‘Vona, ndza ta hi ku hatlisa, ndzi ta hakela un’wana ni un’wana hi ku ya hi mitirho yakwe.+ 13 Hi mina Alfa na Omega,*+ wo sungula ni wo hetelela, masungulo ni makumu. 14 Va tsaka lava hlantswaka swiambalo swa vona,+ leswaku va ta kota ku dya emirhini ya vutomi+ ni leswaku va ta kota ku nghena hi tigede ta muti wolowo.+ 15 Ehandle ku ni timbyana* ni vangoma, lava tikhomaka ku biha hi swa masangu,* vadlayi, vagandzeri va swikwembu ni hinkwavo lava rhandzaka mavunwa ni ku hemba.’+

16 “‘Mina, Yesu, ndzi rhume ntsumi ya mina leswaku yi nyikela vumbhoni eka n’wina hi swilo leswi leswaku ku vuyeriwa mavandlha. Ndzi rimitsu ni n’wana wa Davhida+ naswona ndzi nyeleti ya nimixo leyi vangamaka.’”+

17 Kutani moya ni mutekiwa+ va ya emahlweni va ku, “Tana,” naswona loyi a swi twaka a a vule a ku, “Tana,” loyi a khomiweke hi torha a a te;+ loyi a swi lavaka a a nwe mati ya vutomi mahala.+

18 “Ndzi nyikela vumbhoni eka loyi a twaka marito ya vuprofeta bya buku leyi: Loko munhu o engetela eka swilo leswi,+ Xikwembu xi ta n’wi engetelela makhombo lama tsariweke ebukwini leyi;+ 19 naswona loko munhu o susa xo karhi emaritweni ya buku ya vuprofeta lebyi, Xikwembu a xi nge n’wi pfumeleli ku dya emirhini ya vutomi+ kumbe ku nghena emutini wo kwetsima,+ ku nga swilo leswi tsariweke ebukwini leyi.

20 “Loyi a nyikelaka vumbhoni bya swilo leswi u ri, ‘Ndza ta hi ku hatlisa.’”+

“Amen! Tana, Hosi Yesu.”

21 Onge musa lowukulu wa Hosi Yesu wu nga va ni vakwetsimi.