U Hlamarisiwe Hi Nhlayo Ya Minkandziyiso Ya Xalamuka!
MUHLAYI WA XALAMUKA! LE MINNESOTA, U.S.A., u tirha ekholichini leyi mutivi wa ntivo-vutomi bya swiharhi leswi tshamaka elwandle Sam LaBudde a a averiwe ku nyikela nkulumo leyi nga ni xihloko lexi nge “Xana Tinkavangaheti Ti Ye Kwihi?” Hi ku tsundzuka leswaku u tshame a tshahiwa eka xihloko xa Xalamuka! lexi nge “Xana Ku Phasa Hi Tinkoka Ka Hunguteka?” (May 22, 1992), u fambe ni magazini wolowo le nkulumeni.
“Emagazinini wolowo ndzi tsale rungulanyana leri yaka eka Tatana LaBudde. Ndzi te a ndzi anakanya leswaku u ta tsakela ku tiva leswaku xihloko lexi lexinene xi ta hangalasiwa emisaveni hinkwayo hi tindzimi to tala naswona magazini lowu wu kandziyisiwa hi nhlayo leyi tlulaka 13 000 000. Ivi ndzi tsala vito ra mina ndzi veka Xalamuka! yi pfuriwile ehenhla ka tafula ra xivulavuri ndzi tlhelela exitulwini xa mina.
“Endzhaku ka nkarhi ndzi vone wanuna a ya etafuleni ra xivulavuri, a teka magazini, ivi a sungula ku hlaya. Endzhaku ka timinete ti nga ri tingani, u tlakuse mahlo ivi a vutisa hi rito leri tlakukeke loko loyi a nga veka magazini lowu a ri kona. Loko ndzi tlakuse voko ra mina ivi ndzi ku, ‘Hi mina,’ u chikile ivi a tshama ekusuhi na mina. A khensa magazini lowu ivi a ku u swi tlangela swinene loko munhu a n’wi nyika rungula leri kandziyisaka ntirho kumbe ku humelela eka ntirho wakwe. Hambi swi ri tano, a a anakanya leswaku ndzi fanele ndzi endle xihoxo loko ndzi ku ku kandziyisiwa 13 000 000 wa tona. A a anakanya leswaku ndzi fanele ndzi vula 13 000. Ndzi phendle emasungulweni ya magazini ndzi n’wi komba leswaku a ku ri 13 000 000. Swi n’wi hlamarisile. Nakambe u tsakisiwe hi nhlayo ya tindzimi leti magazini lowu a wu hangalasiwa ha tona [sweswi i 74 wa tindzimi]. A a anakanya leswaku magazini a wu hangalasiwa le United States ntsena, kambe ndzi n’wi hlamusele ndlela leyi wu hangalasiwaka ha yona emisaveni hinkwayo.”
Loko u lava leswaku kopi ya Xalamuka! yi rhumeriwa ekaya ra wena, hi kombela u tsalela Watch Tower, Private Bag X2067, Krugersdorp, 1740, kumbe eka adirese leyi faneleke eka leti nga longoloxiwa eka tluka 5.