Xana U Ta Va Kona?

N’wexemu, ku tlula 8700 000 wa vanhu emisaveni hinkwayo va ve kona eNtsombanweni wa Muganga wa Timbhoni ta Yehovha wa “Vadzunisi Lava Tsakeke.” Xana u ta va kona eka wun’wana wa Mintsombano ya Muganga leyi nge “Varhumiwa Va Ku Rhula Ka Xikwembu”? Wa rhambiwa hi malwandla leswaku u va kona.

Etindhawini to tala, ntsombano wu ta sungula hi 9:30 hi Ravuntlhanu nimixo hi vuyimbeleri. Xiyenge xo pfula xi ta va ni nkulumo leyi khutazaka leyi nge “I yini Leswi Xikwembu Xi Swi Languteleke Eka Hina?” Yona yi ta va yi ri ni rungula leri hi nga ri tirhisaka ku pfuna van’wana va timiliyoni ku endla leswi Xikwembu xi swi lavaka.

Nkulumo ya nindzhenga leyi nge “Ku Pfuna Van’wana Va Dyondza Swilaveko Swa Xikwembu” yi ta hlomisela vatsombani leswaku va tirha hi laha ku humelelaka entirhweni wo endla vadyondzisiwa. Endzhaku ka sweswo, nxaxamelo wa swiyenge swimbirhi lowu nge “Tivonele Eka Mintlhamu Leyi Tumbeleke Ya Vuhungasi” wu ta tsundzuxa hi mintlhamu ya vudimona leyi hi faneleke hi yi papalata. Nongonoko wa Ravuntlhanu wu ta hela hi nkulumo ya nkoka leyi nge “Ku Khomelela Eka Vutshembeki Bya Rito Ra Xikwembu.”

Nongonoko wa nimixo wa Mugqivela wu ta kandziyisa nkoka wa ntirho wa ku endla vadyondzisiwa hi nxaxamelo wa swiyenge swinharhu lowu nge, “Varhumiwa Lava Tisaka Mahungu Lamanene Ya Ku Rhula.” Nkulumo yo hetelela ya nongonoko yi ta va ya ku tinyiketela ni nkhuvulo, kutani ku ta landzela ku khuvuriwa ka vadyondzisiwa lavantshwa.

Nkulumo ya nindzhenga ya Mugqivela leyi nge “Xiya Ndlela Leyi Yehovha A Langutaka Swilo Ha Yona” yi ta hlamula swivutiso leswi vo tala va veke na swona hi timhaka ta sweswinyana. U ta tiphina hi nxaxamelo wa swiphemu swimbirhi lowu phyuphyisaka mbilu lowu nge “Xikwembu Xa Ku Rhula Xa Ku Khathalela.” Kutani vanhu va ta tiphina hi nchumu wun’wana wo hlawuleka hi nkarhi wa nkulumo yo hetelela ya nongonoko leyi nge “Lava Ku Rhula Ka Xikwembu eVuton’wini Bya Ndyangu.”

Nxaxamelo wa Sonto nimixo wa swiyenge swinharhu lowu nge, “Ku Tiva Muxaka Lowunene Wa Varhumiwa,” wu ta kandziyisa xihloko xa ntsombano hi ku vulavula hi swikombiso swa vaprofeta va le Bibeleni. Nongonoko wa nimixo wu ta hetelela hi drama leyi va nga ta va va ambale swiambalo swa kona leyi nga ta humesa tidyondzo ta nkoka eka mhaka ya le Bibeleni ya Muavanyisi Gidiyoni.—Vaavanyisi 6:11–8:28.

Nongonoko wo hetelela wa ntsombano wa Sonto nindzhenga wu ta va ni nkulumo ya le rivaleni leyi nga ni xihloko lexi nge “Eku Heteleleni Ku Rhula Ka Ntiyiso!—Xana Ku Huma Kwihi?” Eku heteleleni, nkulumo leyi khumbaka leyi nge “Ku Ya Emahlweni Tanihi Varhumiwa Va Ku Rhula Ka Xikwembu” yi ta pfala ntsombano.

Leswi ku nga na 30 wa mintsombano leyi hleleriweke laha dzongeni wa Afrika ntsena, swi le rivaleni leswaku wun’wana wu ta khomeriwa ekusuhi ni laha u tshamaka kona. Vonana ni Timbhoni ta Yehovha ta kwalaho mayelana ni nkarhi ni ndhawu ya ntsombano lowu nga ekusuhi na wena.