Lexi A A Xi Lava A Ku Ri Vutshembeki

Wanhwana un’wana eEcuador a a ye embulavurisanweni wo ya lava ntirho. Endzhaku ko vulavurisana ni van’wana lava a va tele wona—loko va helerile hinkwavo a va ri 36—u swi vonile leswaku vangwa ra yena ra leswaku a kuma ntirho a ri khumile. A va ri ni ntokoto wa ntirho ni dyondzo ya le yunivhesithi, kasi yena a a ri hava ni xin’we xa swona. Naswona eka swivutiso swa tsevu leswi a swi vutisiwile, swimbirhi swa swona a a nga swi hlamulanga kahle. Hambiswiritano, xin’wana xa swivutiso leswi, a xi ri xa munhu hi yexe: “Xana hi ku ya hi wena ntiyiso i yini?”

Wanhwana loyi u hlamule a ku: “Ntiyiso a hi mianakanyo ntsena leyi anakanyeriwaka, kambe i nchumu lowu hi faneleke hi hanya ha wona. Hi fanele hi vulavula ntiyiso naswona hi nga hembi, hikuva loko hi hemba, hi tiendla vanghana va Sathana Diyavulosi. Loko hi vulavula ntiyiso, hi tsakisa Xikwembu naswona hi ta vuyeriwa swinene hi hexe.”

Loko mufambisi wa ntirho a vutise wanhwana loyi vukhongeri byakwe, u hlamule hi leswaku i un’wana wa Timbhoni ta Yehovha. Siku leri landzelaka u byeriwe leswaku u hlawuleriwe ntirho lowu. Endzhaku ka n’hweti wanhwana loyi u vutise mufambisi wa ntirho leswaku ha yini a hlawule yena, ivi yena a ku, i mhaka ya vutshembeki byakwe.

Xana a hi ntiyiso leswaku vanhu vo tala namuntlha a va tshembekanga? Hi hala tlhelo, vanhu lava va xiximaka Bibele va tiviwa hi ku tshembeka ka vona. Xihondzo xo Rindza xa July 1, 1995, xi te: “EBibeleni, ‘ntiyiso’ a wu fani ni mianakanyo leyi nga riki ya xiviri, leyi nga twisisekiki leyi vativi va filosofi va kanetanaka ha yona.”

U ta vuyeriwa hi ku hlaya Xihondzo xo Rindza nkarhi na nkarhi, lexi xi tiviwaka misava hinkwayo tanihi nghwazi yo yimela ntiyiso wa Bibele. Loko u tsakela ku kuma rungula leri engetelekeke mayelana ni ku kuma kopi ya xona kumbe ku va ni dyondzo ya le kaya ya Bibele ya mahala hi kombela u tsalela eka Watch Tower, Private Bag X2067, Krugersdorp, 1740, kumbe eka adirese leyi faneleke eka leti longoloxiweke eka tluka 5.