“A Swi Ta Antswa Loko Wo Kambisisa Xalamuka!”

SWESWO hi leswi Pasquale, Mbhoni leyitsongo ya Yehovha loyi a a dyondza dyondzo yo karhi ekholichi ya le Bari, eItaly, a byeriweke swona loko a kombele tinhla to karhi emhakeni ya ku godzomberiwa hi swidzidzirisi eka mudyondzisi wakwe wa ntivo-mianakanyo. Kambe, enkarhini lowu hundzeke mudyondzisi loyi a a nga ti tsakeli Timbhoni ta Yehovha. Xana i yini lexi nga hundzula langutelo ra yena?

Pasquale wa hlamusela: “Emakumu ka dyondzo yin’wana, mudyondzisi u kombele swichudeni swakwe leswaku swi n’wi pfuna ku kuma rungula emhakeni ya ku khomiwa ka vana hi ndlela yo biha, nhloko-mhaka leyi a a yi lulamisela ku humesa rungula leri engetelekeke ra nkambisiso emhakeni leyi ra swichudeni leswi heteke xikolo xa le henhla. Ndzi tsundzuke minkandziyiso yi nga ri yingani ya Awake! leyi a yi vulavula hi leswi ni tinhloko-mhaka leti fambisanaka na swona, tanihi ‘Dyondzo Ya Rimbewu—I Mani Loyi A Faneleke A Yi Dyondzisa?’ (February 22, 1992). Kambe, hikwalaho ka leswi a ndzi swi tiva leswaku mudyondzisi wa mina a a nga ti tsakeli Timbhoni, ndzi kombele loyi hi nga na yena etlilasini leswaku a n’wi nyika timagazini leti.”

Pasquale u hlamusela leswi humeleleke loko endzhaku ka masikunyana, yena a kombele tinhla leti a a ti lava mayelana ni ku godzomberiwa hi swidzidzirisi, u ri: “A nga ndzi hlamulanga xikan’we-kan’we. Ematshan’weni ya sweswo u suke a yima ivi a ta a ta ndzi qhavula. U vule leswaku enkarhini lowu hundzeke a a nga ti lavi timagazini ta Timbhoni ta Yehovha hikuva a a ti teka ti nga nyawuli naswona ti fanele vana ngopfu. Hambiswiritano, endzhaku ko ti hlaya, u hundzule mianakanyo yakwe. U vule leswaku u kume leswi timagazini ti nga na swona swi tirha swinene etimhakeni ta ntshamisano. U vule leswaku a a ta katsa tinhla ta Xalamuka! eka vuyelo bya nkambisiso wakwe.”

Mudyondzisi u te yini hi tinhla leti Pasquale a nga ti kombela mayelana ni vugodzomberi bya swidzidzirisi? U vule leswi: “Tona ndzi ta ku nyika hi mbilu yo basa, kambe a swi ta antswa loko wo kambisisa Xalamuka! I magazini lowu bulaka hi tinhloko-mhaka ta nkoka swinene, naswona wa tirha, hambi ku ri eka tidyondzo ta le yunivhesithi.”

Xalamuka! yi xiyisisa swiphiqo leswi nga kona sweswi kutani yi lwela ku nyikela mpfuno lowu tirhaka eka lava langutaneke ni mintlhontlho leyikulu kumbe leyitsongo evuton’wini bya siku rin’wana ni rin’wana. Loko u tsakela ku tiva leswaku Bibele yi pfuna hi ndlela yihi, vonana ni Timbhoni ta Yehovha leti hangalasaka Xalamuka!, kumbe u tsalela eka adirese leyi faneleke eka leti longoloxiweke eka tluka 5.