Ku Lavisisa Mutshila Lonkulu Ku Tlurisa
Yoleyo a ku ri mhaka leyi a ku vulavuriwa ha yona eka Awake! ya November 8, 1995. Mhaka leyi yi tise n’wangulo lowunene lowu humaka eka vahlayi emisaveni hinkwayo.
Amang u tsale a ri eDouala, eCameroon a ku: “Swihloko leswi swi ndzi khumbe swinene hikuva ndzi rhandza vutshila, ngopfu-ngopfu mimpfampfarhuto ya pende. Sweswi ndza swi twisisa leswaku ku ni Mutshila lonkulu ku tlula Van Gogh, Rembrandt, Da Vinci ni van’wana—naswona mutshila yoleyo i Yehovha Xikwembu hi yexe.”
Le St. Barthélemy, eFrench West Indies, Frederick u te: “Ndzi yi hlaye ndzi yi phindha-phindha ka mune, naswona eka khamba rin’wana ni rin’wana a ndzi tlangela swilo swo saseka leswi Mutumbuluxi wa hina a hi nyikeke swona.”
Assunta u tsale a ri eItaly a ku: “Swi ndzi pfuxele ku navela ku mpfampfarhuta hi pende. Swi kurise ku hisekela ka mina misava leyintshwa ya Xikwembu.” Naswona Irena wa le Riphabliki ra Czech, u te: “Loko hi endzela etimuziyamu, hi boheka ku hakela ku vona mintirho ya vutshila, kasi Mutumbuluxi wa swilo hinkwaswo leswo xonga u hi komba swona mahala, siku rin’wana ni rin’wana.” Aline u tsale a ri eBrazil a ku: “Hambi leswi hi tshamelaka ku kuma swihloko leswi hi pfunaka ku twisisa vumunhu bya Yehovha, leswi swi ndzi khumbe mbilu. Swi ndzi nyike vuxokoxoko byo tala bya mayelana ni ntumbuluko lebyi kuriseke rirhandzu ra mina eka Yehovha.”
Anne u tsale a ri le Wisconsin, U.S.A., exixikeni lexo titimela a ku: “Swi ndzi pfune swinene ku twisisa vuxongi bya ntumbuluko. Lebyi minkarhi yin’wana hi xixika swi tikaka ku byi vona. Ha rona siku rolero ndzi hlayeke xihloko lexi, ndzi ye ehandle ivi ndzi vona rhavi leri funengetiweke hi gwitsi, tluka leri funengetiweke hi gamboko, mintila ya swiharhi egambokweni. Ndzi ba mandla nakambe hi xitsundzuxo xa ndlela leyi hi nga tivaka ‘Mutshila Lonkulu ku Tlurisa’ ha yona.”
Loko u tsakela ku kuma rungula leri engetelekeke mayelana ni ku kuma magazini lowu minkarhi hinkwayo, hi kombela u vulavurisana ni Timbhoni ta Yehovha endhawini ya ka n’wina kumbe u tsalela eka adirese leyi nga ekusuhi eka leti longoloxiweke eka tluka 5.