Ntshembo Wa Nhwanyana Wa Murhaxiya

NHWANYANA la nga ni malembe ya 15 hi vukhale le Ukhta, eRussia, ku nga doroba leri nga ni vaaki lava tlulaka 100 000, lowu nga eka 1200 wa tikhilomitara en’walungu-vuxa bya Moscow, hi mbilu hinkwayo u phofule ku navela ka yena mayelana ni swiyimo leswinene emisaveni. U hlamusele mhaka leyi eka papila leri landzelaka leri kongomisiweke eka hofisi ya rhavi ya Timbhoni ta Yehovha eRussia:

“Munghana wa mina u ndzi byele leswaku buku leyi nge Nghwazi Leyi Tshameke Yi Hanya yi hlamusela vutomi bya Yesu Kreste. Ndzi ti rhandza ngopfu tibuku, timagazini ni tibroxara ta n’wina. Mi nge ndzi mi hlamusela lexi ndzi endleke ndzi ti rhandza. Mhaka yi sukele loko ndzi ri ehofisini ya thelegrafu, laha a ndzi ya hakela swikweleti swa xiya-ni-moya ni swa riqingho. Loko ndzi fika ndzi vone xiphephana xi wele ehansi. Ndzi xi rholerile, ndzi xi phumunha ritshuri ivi ndzi sungula ku hlaya xiphephana lexi, a xi ri ni nhloko-mhaka leyi nge Ha Yini Ku Ri Ni Swiphiqo Swo Tala Swonghasi eVuton’wini?

“Ndzi hlaye hi ku xaniseka ni maxangu lawa vanhu va nga na wona, naswona xifunengeto xa xiphephana a xi ri ni xifaniso lexi kombisaka xitshembiso xa vutomi lebyintshwa eParadeyisini. Ndza tshemba leswaku siku rin’wana yi ta fika. Ndzi langutele ku vona vanhu hinkwavo va tsakile, va tiphina ni ku va ni rihanyo lerinene naswona ndzi lava ku vona maxaka lama feke. . . . Ndzi navela ku tiva leswi ndzi faneleke ndzi swi endla leswaku ndzi va ni ntshembo wa ku hanya eParadeyisini ya laha misaveni. Ndzi kombela leswaku mi ndzi rhumela rungula ro karhi kumbe tibuku. Ndzi ta hakela mali ya tona ni leyi mi ti rhumeleke ha yona.”

Na wena u nga ti kuma tibuku leti nga ta ku pfuna leswaku u va ni ntshembo wa vutomi emisaveni ya paradeyisi lowu sekeriweke eBibeleni. Loko u lava ku kuma rungula leri engetelekeke malunghana ni ndlela leyi u nga kumaka kopi ya broxara leyi nge I Yini Leswi Xikwembu Xi Swi Languteleke Eka Hina? kumbe u tsakela leswaku un’wana a ku endzela ekaya leswaku a ta va ni dyondzo ya mahala ya Bibele na wena, hi kombela u tsalela eka Watch Tower, Private Bag X2067, Krugersdorp, 1740, South Africa, kumbe eka adirese leyi faneleke eka leti nga eka tluka 5.