‘A Va Phyuphyisa Hakunene!’

SWESWINYANA, mufambisi wa hotela leyi nga ekusuhi ni rivala ra swihaha-mpfhuka swa matiko hinkwawo ra le Japani u endzele hofisi ya rhavi ra Timbhoni ta Yehovha le Ebina. A a vonaka a tsake ngopfu. Ha yini?

Hi 1998, Timbhoni leti tlulaka 200 a ti tshama ehotela ya mufambisi loyi loko ti ya niloko ti vuya emintsombanweni ya matiko hinkwawo eAfrika, Australia, Korea ni le Amerika N’walungu. Loko vatirhi va le hotela yoleyo va ri ni nhlangano wo pfuxeta mintirho leyi endliweke n’wexemu, va vule leswaku eka vaendzi va 30 000 va lembe ni lembe, vapfhumba lava va ntsombano va ve vaendzi vo hlamarisa ku tlula hinkwavo lava va tshameke va va amukela.

Hikwalaho, mufambisi wa hotela u ye le Ebina a ya phofula marito yo nkhensa. U te: ‘Vaendzi volavo, a va rhurile naswona a va siya makamara ya vona ma basile. A va tala ku phofula marito ya ku nkhensa. Tlhandla-kambirhi, a va nyikela marito ya xikhutazo lama humaka eBibeleni. A va phyuphyisa hakunene!’

Mufambisi loyi u ye emahlweni a ku: ‘Hi vona vaendzi vo tala lava nga ni swiphiqo. Xisweswo a hi ri karhi hi lava rungula leri nga va pfunaka. Hi lava leswaku va pfuniwa hi dyondzo ya Bibele hikuva yi ni nkucetelo lowunene evuton’wini bya vanhu.’

Hikwalaho ka sweswo, mufambisi loyi u kombele 80 wa tikopi ta tibuku ta Timbhoni ta Yehovha leswaku a ta ti veka emakamareni ya hotela. Yin’wana ya tibuku leti a ti kombeleke a ku ri buku leyi nga ni matluka ya 192 leyi nge Xihundla Xa Ntsako eNdyangwini. Loko u yi lava, hi kombela u tata xiphephana lexi nga laha kutani u xi rhumela eka adirese leyi kombisiweke kumbe eka adirese leyi faneleke eka leti nga eka tluka 5 ra magazini lowu.

□ Ndzi rhumeleni buku leyi nge Xihundla Xa Ntsako eNdyangwini.

Kombisa ririmi leri u ri lavaka

□ Ndzi kombela mi tihlanganisa na mina malunghana ni dyondzo ya mahala ya le kaya ya Bibele.