“Ndzi Fanele Ndzi Tshemba Xikwembu”

Papila leri landzelaka ri siyiwe eHolweni ya Mfumo ya Timbhoni ta Yehovha le Edmonton, eAlberta, le Canada.

“Eka Murhumiwa:

“Ndzi tsala papila leri, ndzi nkhensa munhu loyi swi nga ha endlekaka a nga swi tivi leswaku u endle hlori evuton’wini bya mina.

“Emavhikini ma nga ri mangani lama hundzeke, mina ni nuna wa mina a hi ri karhi hi holova. A ndza ha ku vula ndzi ku, ‘Mhaka leyi i yikulu lerova a ndzi tshembi leswaku ndzi ta yi hlula.’ Hi nkarhi wolowo, hiloko bele ya le nyangweni yi rila. A ku ri Mbhoni ya Yehovha leyi a yi ri enyangweni wa mina, naswona a ndzi nga ha ta swi kota ku tumbeta leswi a swi humelela.

“Loko ndzi pfula nyangwa, ndzi khumbekile swinene loko ndzi twa leswi a swi vuriwa. Ndzi tsundzuka marito lawa ‘vana’ na ‘ndyangu.’ Wanuna loyi u humese buku leyi nge Xihundla Xa Ntsako eNdyangwini. Loko ndzi vona xihloko lexi, ndzi sungule ku rila ndzi nga miyeli. U ndzi langutile, kutani a kombela ndzivalelo hi ku va a ndzi kavanyetile, a ndzi nyika buku, kutani a famba.

“Hi rihi hlori ra kona? I xitsundzuxo lexi vulaka leswaku loko ndzi nga swi tivi leswi ndzi nga swi endlaka, a ndzi fanelanga ndzi karhateka hikuva Xikwembu xa swi tiva. Ndzi fanele ndzi tshemba Xikwembu. Xi rhumele ni murhumiwa. Ndza nkhensa.”

Buku leyi nge Xihundla Xa Ntsako eNdyangwini yi nga pfuna xirho xin’wana ni xin’wana xa ndyangu. Tin’wana ta tindzima ta yona leti dyondzisaka hi leti nge “Sirhelela Ndyangu Wa Wena Eka Minkucetelo Leyi Onhaka,” “Hlayisa Ku Rhula eNdyangwini Wa Wena,” ni leyi nge “U Nga Swi Hlula Swiphiqo Leswi Onhaka Ndyangu.”

Leswaku u kuma kopi ya wena, hi kombela u tata xiphephana lexi kutani u xi rhumela eka adirese leyi kombisiweke eka xona kumbe eka leyi faneleke eka leti longoloxiweke eka tluka 5 ra magazini lowu. U ta kuma swiringanyeto swo hlawuleka leswi nga ku pfunaka ku tlhantlha swiphiqo ni ku endla vutomi bya ndyangu byi tsakisa hi ndlela leyi Muvumbi a a lava ha yona.

□ Ndzi rhumeleni kopi ya buku leyi nge Xihundla Xa Ntsako eNdyangwini.

Kombisa ririmi leri u ri lavaka

□ Ndzi kombela mi tihlanganisa na mina malunghana ni dyondzo ya mahala ya le kaya ya Bibele.