Ndlela Yo Kuma Vutomi Bya Ndyangu Lebyi Tsakisaka

GRACIELA wa le Argentina, le Amerika Dzonga wa tsala: “Ndzi ni malembe ya 40 ndzi ri karhi ndzi hlaya timagazini ta Xihondzo xo Rindza ni Xalamuka! Namuntlha, endzhaku ka malembe yo tala swinene, ndzi nga ha vula ndzi tiyisile leswaku ti fikelele swilaveko swa mina. Ti ndzi pfunile evuhlangini, loko ndzi ri emalembeni ya kondlo-a-ndzi-dyi, loko ndzi ri karhi ndzi tolovelana ni munhu loyi ndzi nga ta tekana na yena swin’we ni le vukatini, ti ndzi pfunile ni le ku kuriseni ka vana va mina va tsevu.

“Timagazini leti ti pfune mina ni nuna wa mina eku kuriseni ka vana va hina va mune lava ha ha tshamaka na vona. Ndzi ti tirhisa kahle timagazini leti eku vulavuleni ni vana va mina ni vadyondzisi va vona exikolweni. Loko ndzi ri karhi ndzi vulavula ni madokodela malunghana ni rihanyo, ndzi ma hlayele Xalamuka! hi ku kongoma. Hi ku pfuniwa hi swihloko leswi tlhandlamanaka leswi vulavulaka hi vana lava nga ni swiphiqo swa ku dyondza, eka Xalamuka! ya March 8, 1997, hi xiye leswaku eka vana va hina va mune va vanhwanyana, un’wana u ni xiphiqo xa ku dyondza.”

Minkandziyiso ya Sosayiti ya Watch Tower yi nga pfuna mindyangu ku langutana ni swiphiqo swo tala leswi swi yi welaka ni ku kuma vutomi lebyi tsakisaka. Hi xikombiso, buku leyi nga ni matluka ya 192 leyi nge Xihundla Xa Ntsako eNdyangwini yi nga pfuna vavanuna, vavasati, vatswari, vana, vakokwana—ina, xirho xin’wana ni xin’wana xa ndyangu. Tin’wana ta tindzima ta yona leti dyondzisaka hi leti: “Letela N’wana Wa Wena Ku Sukela eVuhlangini,” “Pfuna N’wana Wa Wena Wa Kondlo-a-ndzi-dyi Leswaku A Endla Nhluvuko,” “Sirhelela Ndyangu Wa Wena Eka Minkucetelo Leyi Onhaka” ni leyi nge “U Nga Swi Hlula Swiphiqo Leswi Onhaka Ndyangu.”

Leswaku u kuma kopi ya wena, hi kombela u tata xiphephana lexi xi nga laha u tlhela u xi rhumela, u tirhisa adirese leyi kombisiweke kumbe adirese leyi faneleke leyi kumekaka eka tluka 5 ra magazini lowu. U ta kuma swiringanyeto swo hlawuleka leswi nga ku pfunaka ku tlhantlha swiphiqo ni leswi nga endlaka vutomi bya ndyangu byi tsakisa hi ndlela leyi Muvumbi a a lava ha yona.

□ Ndzi rhumeleni kopi ya buku leyi nge Xihundla Xa Ntsako eNdyangwini.

Kombisa ririmi ra kona

□ Ndzi kombela mi ndzi endzela malunghana ni dyondzo ya le kaya ya mahala ya Bibele.

[Xifaniso lexi nga eka tluka 32]

Graciela ni ndyangu wakwe