Vana Va Fanele Va Tshinyiwa Njhani?
Phepha-hungu ra Canada’s National Post ri ri: “Xiphiqo xi va kona loko vana va byeriwa leswaku xin’wana ni xin’wana lexi va xi endlaka i xinene.” Vatswari van’wana va kholwa leswaku leswi swi endla leswaku vana va vona va titshemba. Kambe, hi ku ya hi mutivi wa mianakanyo Roy Baumeister, “ku titshemba ku kahle loko ku sekeriwe eka leswinene leswi a swi endleke, kambe vatswari va fanele va dyondzisa vana va vona ku tikhoma.”
Mutswari la chavaka ku tshinya n’wana wakwe loyi a endlaka swo huma endleleni, wa n’wi onha. Phela, ku tshinya i ndlela yo dyondzisa. Ku tshinya koloko ku dyondzisa n’wana la nga ni muxalaphungana leswaku a nga phindhi swihoxo swakwe. I ntiyiso, vatswari va fanele nkarhi ni nkarhi va papalata ku tshinya n’wana hi tihanyi ni ku hundzeleta loko a hoxile. (Yeremiya 46:28) Va fanele ku tiyiseka leswaku ndlela leyi va tshinyaka n’wana ha yona ya ringaniseriwa. Bibele yi ri: “N’wina vatatana, mi nga dyisi vana va n’wina mbitsi, leswaku va nga heli mbilu.”—Vakolosa 3:21.
EBibeleni, nkarhi ni nkarhi ku tshinya ku fambisana ni rirhandzu ni ku rhula, ku nga ri ku swi endla hi ku hlundzuka ni ku va ni mona. Munyiki wa ndzayo la nga ni vutshila u fanele a ‘olova eka hinkwavo . . . a tikhoma eka leswo biha, a letela hi ku rhula lava nga ni mboyamelo lowu nga riki wunene.’ (2 Timotiya 2:24, 25) Hikwalaho, ndzayo ya vatswari a yi fanelanga yi ri yo boxa leswi nga emintlhavekweni ntsena. Hikuva Bibele a yi swi khutazi nikatsongo leswaku n’wana a tshinyiwa hi ndlela leyi n’wi vavisaka.
Vanhu va timiliyoni emisaveni hinkwayo va pfuniwe hi buku leyi ya matluka ya 192 leyi nge, Xihundla Xa Ntsako eNdyangwini. Tindzima ta yona tin’wana leti tameleke dyondzo leyinene hi leti nge “Letela N’wana Wa Wena Ku Sukela eVuhlangini” ni leyi nge “Pfuna N’wana Wa Wena Wa Kondlo-a-ndzi-dyi Leswaku A Endla Nhluvuko.” Leswaku u kuma kopi ya wena, hi kombela u tata xiphephana lexi kutani u xi rhumela eka adirese leyi kombisiweke eka xona kumbe eka adirese leyi faneleke eka leti longoloxiweke eka tluka 5 ra magazini lowu. U ta kuma swiringanyeto swo karhi leswi nga ta ku pfuna ku tlhantlha swiphiqo ni ku endla vutomi bya ndyangu byi tsakisa hilaha Muvumbi a a lava byi va hakona.
□ Ndzi kombela mi ndzi tisela buku leyi nge Xihundla Xa Ntsako eNdyangwini.
Kombisa ririmi ra kona
□ Ndzi kombela mi ti hlanganisa na mina malunghana ni dyondzo ya mahala ya Bibele.