Xana Ti Nga Kumiwa Kwihi Tinhlamulo?

Namuntlha vanhu vo tala va vutisa xivutiso lexi. Mudyondzisi wa xikolo xa le Novosibirsk, eRhaxiya, u xiye leswaku a swi olovi ku hlamula swivutiso leswi swichudeni swakwe swi n’wi vutisaka swona mayelana ni Xikwembu ni vukhongeri. Loko a hlamusela hi papila u te:

“Siku rin’wana loko ndzi fika ekaya, ndzi kume ku siyiwe xiphephana lexi nga ni nhloko-mhaka leyi nge ‘Mhaka Leyi U Nga Tshembaka Bibele Ha Yona.’ Exikolweni ndzi dyondzisa matimu, naswona nkarhi ni nkarhi ndzi boheka ku bula ni swichudeni hi timhaka leti khumbaka kereke, Bibele ni Xikwembu. Minkarhi yin’wana swa tika ku kuma tinhlamulo ta swivutiso leswi vana va swi vutisaka.

“Khale a ndzi anakanya leswaku vanhu va hundzukela eka Xikwembu ntsena loko va ri ni swiphiqo. Kambe sweswi ndza tiyiseka leswaku a swi tano. Munhu a nga tlhela a tivutisa: ‘Hikwalaho ka yini swi humelela mina? Ndzi mani? Ndzi huma kwihi? Ndzi ya kwihi loko ndzi fa?’ I swa nkoka ku kuma tinhlamulo ta swivutiso leswi. Swi vonaka onge Bibele yi nyikela tinhlamulo leti tiyisaka nhlana.”

Mudyondzisi u gimetise xileswi: “Ndzi tsale papila leri hikuva ndzi lava ku tiva swo tala hi Bibele ni Xikwembu.”

Timbhoni ta Yehovha ti kongomisa munhu eBibeleni, ku nga yona yi nga ni tinhlamulo ta swivutiso swa vona. Xiya buku leyi nge Vutivi Lebyi Yisaka eVuton’wini Lebyi Nga Heriki. Tindzima tin’wana leti katsiweke eka leta 19, hi leti nge: “Xikwembu Xa Ntiyiso I Mani?,” “Ha Yini Hi Dyuhala Hi Tlhela Hi Fa?,” ni leyi nge “Ha Yini Xikwembu Pfumelela Ku Xaniseka?” U nga kombela buku leyi yi pfunaka ku dyondza Bibele leyi nga ni matluka ya 192, hi ku tata ni ku rhumela xiphephana eka adirese leyi kombisiweke eka xona kumbe eka leyi faneleke eka leti longoloxiweke eka tluka 5 ra magazini lowu.

□ Ndzi kombela mi ndzi tisela buku leyi nge Vutivi Lebyi Yisaka eVuton’wini Lebyi Nga Heriki.

Kombisa ririmi leri u ri lavaka.

□ Ndzi kombela mi tihlanganisa na mina mayelana ni dyondzo ya mahala ya Bibele.