“Ndzi Kombela Mi Ndzi Pfuna! Ndzi Tshembe N’wina Ntsena”

MARITO LAMA NGA LAHA HENHLA I YA DOKODELA wa le Yunivhesiti ya Kaunas Medical, eLithuania, loko a gimeta papila leri a ri tsaleleke hofisi ya Timbhoni ta Yehovha etikweni rero. Dokodela wa hlamusela:

“Entirhweni ndzi sungule ku hlaya buku leyi nge, Swivutiso Leswi Vantshwa Va Swi Vutisaka—Tinhlamulo Leti Tirhaka. Ndzi kunguhate ku tirhisa rungula rin’wana leri nga eka yona eka switsalwana swa mina swin’wana, kambe hiloko yi nyamalala. Swi tikomba onge ku ni munhu loyi a nga yi teka. Leswi a swi nga ndzi tiseli ku rhula nikatsongo—hileswi ndzi lahlekeleke hi nchumu wo tano wa risima. Ndzi kombela mi ndzi kombisa musa hi ku ndzi rhumela buku yin’wana.

“Buku leyi ndzi yi lava hi mbilu ya mina hinkwayo hikuva ya ndzi pfuna loko ndzi endzela swikolo niloko ndzi heta nkarhi ndzi ri ni vantshwa, naswona buku leyi yi ndzi pfuna ku hlamula swivutiso swa vona swo tala. Loko ndzi kuma buku yin’wana, ndzi ta yi veka ekaya naswona ndzi ta yi khathalela kahle. Munhu loyi a tekeke buku leyi, u yi teke hileswi yi nga ni rungula ra nkoka swinene. Eminkarhini leyi ya mangava, swi fanerile ku kuma matimba kun’wana. Ndzi kombela mi ndzi pfuna! Ndzi tshembe n’wina ntsena.”

Buku leyi nge Vantshwa Va Vutisa, yi hlamula swivutiso swo tala leswi vantshwa va tivutisaka swona, swo fana ni leswi nge: “Ndzi Nga Endlisa Ku Yini Leswaku Vatswari Va Mina Va Ndzi Nyika Ntshunxeko?,” “Xana Ndzi Fanele Ku Baleka eKaya?,” “Ndzi Nga Va Endlisa Ku Yini Vanghana Va Xiviri Ke?,” “I Ntirho-vutomi Wihi Lowu Ndzi Faneleke Ku Wu Hlawula?,” “Ku Vuriwa Yini Hi Rimbewu eMahlweni Ka Vukati?,” “Ndzi Swi Tivisa Ku Yini Loko Ri Ri Rirhandzu Ra Xiviri?” Leti ko va tinhloko-mhaka ti nga ri tingani leti nga ebukwini leyi. U nga kombela buku leyi hi ku tata xiphephana lexi kutani u xi rhumela eka adirese leyi nga eka xona kumbe eka adirese leyi faneleke eka leti longoloxiweke eka tluka 5 ra magazini lowu.

□ Ndzi rhumeleni buku leyi nge, Swivutiso Leswi Vantshwa Va Swi Vutisaka—Tinhlamulo Leti Tirhaka

Kombisa ririmi leri u ri lavaka.

□ Ndzi kombela mi tihlanganisa na mina malunghana ni dyondzo ya mahala ya Bibele.