Diyavulosi—Xana I Munhu Wa Xiviri Hakunene?

EVUKHONGERINI byo tala, Diyavulosi u tala ku tekiwa a ri vukholwa-hava ntsena—a ri nchumu lowu vanhu va nga lo tiendlela wona. Kutani Dionigi Tettamanzi, mubixopo-nkulu wa le Genoa—un’wana va varhangeri-nkulu wa vafundhisi le Italiya—u vange hasahasa leyikulu eka papila ra yena leri a ri tsaleleke vafundhisi, leri nga ni matluka ya 40, leri hlamuselaka ndlela ya ku lwa na Diyavulosi. Ri xaxamete “milawu ya khume.”

Wo sungula: “U nga rivali leswaku diyavulosi u kona,” hikuva “mavunwa yo sungula” lama a ma vuleke i ya ku “hi endla hi kholwa leswaku a nga kona.”

Wa vumbirhi: “U nga rivali leswaku diyavulosi i muxengi. . . . U nga titeki u sirhelelekile kumbe u ri la nga hlaselekiki.”

Wa vunharhu: “U nga rivali leswaku diyavulosi i ntlharhi leyikulu naswona u ni vutivi. U ya emahlweni a wonga vanhu hi vukanganyisi, hilaha a endleke hakona eka munhu wo sungula.”

Wa vumune: “Xalamuka: ematihlweni ni le mbilwini. Naswona vana ni matimba: u tiyisela naswona u endla vululami.”

Wa vuntlhanu: “Tiyiseka swinene leswaku Kreste u ta n’wi hlula muxengi loyi” hikuva sweswo swi “ta ku sirhelela ni ku ku tisela ku rhula loko u langutana ni nhlaselo wa tihanyi.”

Wa vutsevu: “Tsundzuka leswaku Kreste u avelana na wena ku hlula kakwe.”

Wa vunkombo: “Hambeta u yingisa Rito ra Xikwembu.”

Wa vunhungu: “Titsongahate naswona u amukela ku tshinyiwa.”

Wa vukaye: “Khongela nkarhi ni nkarhi naswona u nga karhali,” leswaku u ta hlula ndzingo.

Wa vukhume: “Chava Hosi Xikwembu xa wena naswona u gandzela xona ntsena.”

Xana papila leri ra vafundhisi ri ve ni vuyelo byihi? Switsundzuxo swa rona a swi nga amukeleki eka Huvo ya Tidyondzo ta Vukhongeri ya Milan. Huvo leyi yi kanete hi ku vula leswaku “rungula leri ra vafundhisi, ri twala ri hundzeriwe hi nkarhi.” Hi ku ya hi muvulavuleri un’wana, “ku rhwexa diyavulosi nandzu hinkwawo swi nga ha endla leswaku vanhu va bakanya vutihlamuleri bya vona [vini].”

Hambileswi Bibele yi nga ntshunxeki vanhu eka vutihlamuleri bya swiendlo swa vona, yi swi veke erivaleni leswaku Sathana Diyavulosi i “xikwembu xa mafambiselo lawa ya swilo,” hi yena loyi a ringeke Yesu. Yi tlhela yi paluxa matimba ya Sathana swin’we ni makungu yakwe ya ku ‘dlaya mianakanyo ya lava nga riki vapfumeri.’—2 Vakorinto 4:4; Matewu 4:1-11.

Ina, hilaha muapostola Petro a tsaleke hakona, Sathana u “famba-famba ku fana ni nghala leyi vombaka, yi lava wa ku n’wi dya.” (1 Petro 5:8) A swi hlamarisi leswi muapostola Yohane a tsundzuxeke vapfumeri a ku: “Misava hinkwayo yi le hansi ka matimba ya lowo homboloka.” (1 Yohane 5:19) Hi ta va hi kombisa vutlharhi loko hi yingisa switsundzuxo leswi swa Matsalwa.