A Va Langutiwile

VANA vambirhi va kondlo-a-ndzi-dyi va fike va nghena evhengeleni ro xavisa swakudya exidorobanini xa Ohio, eU.S.A. leswaku va xava swo fihlula. Tanihi leswi ku nga mukhuva wa vona, va korhamise tinhloko, va khongelele embilwini va nga si dya.

Endzhaku ka sweswo, wansati loyi a a va langutile, u tile etafuleni ra vona kutani a teka xilipi xa vona xo hakela. U va byele a ku: “Emisaveni leyi vantshwa va hina va tikhomeke hi ndlela yo biha swinene, swa tsakisa ku vona vantshwa vambirhi va tinyika nkarhi wo nkhensa Xikwembu hikwalaho ka swakudya leswi xi va nyikeke swona. Ndzi lava ku mi hakelela swakudya swa n’wina.”

Vafana lava va sale va hlamarile kambe va swi kotile ku n’wi nkhensa. Endzhaku ka sweswo va ehlekete ku byela wansati loyi leswaku a nga anakanyi leswaku a va khongela Xikwembu xin’wana ni xin’wana. Kutani un’wana wa vona u ye eka wansati loyi, endzhaku ka ku n’wi nkhensa nakambe, u n’wi hlamusele leswaku a va ri Timbhoni ta Yehovha.

Timbhoni ta Yehovha ti tolovele ku dyondza Bibele ni mindyangu ya tona. Vatswari va vafana lava va endle tano. Yin’wana ya tibuku leti mindyangu leyi yi yi dyondzeke hi leyi nge, Vutivi Lebyi Yisaka eVuton’wini Lebyi Nga Heriki. Eka tindzima ta yona ta 19, ku ni ndzima yin’wana leyi nga ni xihloko lexi vulavulaka hi xikhongelo, leyi nge, “Ndlela Leyi U Nga Tshinelaka Ha Yona Eka Xikwembu.”

U nga kombela kopi ya buku leyi ya matluka ya 192, leyi pfunaka ku dyondza Bibele hi ku tata ni ku rhumela xiphephana eka adirese leyi kombisiweke eka xona kumbe eka leyi faneleke eka leti longoloxiweke eka tluka 5 ra magazini lowu.

□ Ndzi kombela mi ndzi tisela buku leyi nge, Vutivi Lebyi Yisaka eVuton’wini Lebyi Nga Heriki.

Kombisa ririmi leri u ri lavaka.

□ Ndzi kombela mi tihlanganisa na mina mayelana ni dyondzo ya mahala ya Bibele.