U Nga Byi Kuma Vutomi Bya Ndyangu Lebyi Tsakisaka!

WANSATI wa le dorobeni ra Maladzyechna, le Belarus, u tsalele rhavi ra Timbhoni ta Yehovha eRhaxiya. U vule leswaku u tekiwile naswona u ni vana vambirhi. U tsale a ku: “Mina ni nuna wa mina ha rhandzana. Hambiswiritano, ndzi xiye leswaku loko nkarhi wu ya wu famba, hi ya hi siringana ni ku holova ku nga ri na xivangelo. Etin’hwetini ti nga ri tingani leti hundzeke, munhu un’wana u fike a ndzi yimisa exitarateni kutani a ndzi nyika xiphephana lexi nge Tsakela Vutomi Bya Ndyangu. Eku sunguleni, ndzi tsakisiwe hi xifaniso xo saseka xa ndyangu lowu tsakeke. Hi ku famba ka nkarhi ndzi hlaye rungula ra xona kutani ndzi nyika nuna wa mina leswaku na yena a xi hlaya.

“Vutomi bya ndyangu wa hina byi sungule ku tsakisa, entiyisweni, byi cince hi ku helela, a wu nge swi kholwi. Sweswi ha swi twisisa leswaku a swi tiki ku kuma ntsako. Lexi lavekaka i ku tiyimisela, rirhandzu ni moya wa ku nyika. Lexi nga xa nkoka i ku hanya hi ku landza swileriso swa Xikwembu, ku rhandza Xikwembu ni vanhu, ku katsa swirho swa ndyangu ni vanhu lava u nga va tiviki.”

U gimetise xileswi: “A ku nga ha ri na swiphiqo swo tala evuton’wini naswona a byi tsakisa swinene. Hi lava ku ya emahlweni hi dyondza Bibele ni ku yi dyondzisa vana va hina.”

Hi tshemba leswaku xiphephana lexi nge Tsakela Vutomi Bya Ndyangu xi nga ku pfuna na wena. Hi nga swi tsakela ku ku rhumelela ni buku ya matluka ya 192 leyi nge Xihundla Xa Ntsako eNdyangwini. Leswaku u tikumela xiphephana xa wena ni buku leyi, hi kombela u tata xiphephana lexi nga laha kutani u xi rhumela eka adirese leyi kombisiweke kumbe eka leyi faneleke eka leti longoloxiweke eka tluka 5 ra magazini lowu.

□ Ndzi kombela mi ndzi tisela xiphephana lexi nge Tsakela Vutomi Bya Ndyangu ni buku leyi nge Xihundla Xa Ntsako eNdyangwini.

Kombisa ririmi leri u ri lavaka.

□ Ndzi kombela mi tihlanganisa na mina malunghana ni dyondzo ya mahala ya Bibele.