Nhlangano Wa Nkoka Swinene eLembeni

A hi nge u khomiwe hi vuvabyi lebyi nga ha mukaka ni vutomi bya wena. Vuhandzuri byi nga ku hanyisa, kambe mali leyi lavekaka a wu na yona naswona a wu nge yi kumi. Kutani munhu un’wana u lava ku ku pfuna, a ku hakelela mali ya vuhandzuri. Xana a wu nga ta tsaka hi nyiko yakwe leyi nga ponisaka vutomi bya wena?

Bibele yi vula leswaku vanhu vo sungula, ku nga Adamu na Evha, va hundzisele xidyoho ni rifu eka vatukulu va vona hinkwavo. Hi nga ha ku, hinkwerhu hi tswariwe hi ri ni mavabyi lama nga tshungulekiki—naswona a nga kona ni un’we eka hina loyi a nga kotaka ku humesa nkutsulo wa kona. (Pisalema 49:7-9) Hambiswiritano, Yehovha Xikwembu u nyikele hi N’wana wakwe ku nga Yesu Kreste, leswaku a va nkutsulo wa swidyoho swa hina. Hikwalaho ka nyiko leyi yi ponisaka vutomi, swi nga ha koteka leswaku hi hanya hilaha ku nga heriki eParadeyisini.—Varhoma 6:23.

Hi Ravunharhu, April 16, endzhaku ka ku pela ka dyambu, Timbhoni ta Yehovha ti ta tlangela Rifu ra Yesu. Lembe leri nga hundza a ku ri ni vanhu lava tlulaka 15 000 000—vo tala va vona a va nga ri Timbhoni ta Yehovha. Wa rhambiwa ku va kona eXitsundzuxweni xa nan’waka xa rifu ra Kreste. Kunene i nhlangano wa nkoka swinene elembeni. Hi kombela u vutisa Timbhoni ta Yehovha ta laha u tshamaka kona malunghana ni ndhawu ni nkarhi lowu xi nga ta tlangeriwa ha wona.