Papila Leri Humaka Eka Murhandziwa
Muhlayi la tshamaka eNew York u pimanise buku leyi nge Tshinela Eka Yehovha ni papila leri humaka eka murhandziwa, u ri: “Ndzima ha yin’we yi khumba mbilu naswona yi ku endla u rhandza Yehovha.” U engetela a ku: “Sweswi leswi ndzi fikeke emakumu ka buku leyi, ndzi swi rindze hi mahlo-ngati ku tlhela ndzi yi hlaya nakambe, hilaha u nga hlayisisaka hakona papila leri humaka eka munhu loyi u n’wi rhandzaka.” Twana leswi van’wana va swi vuleke.
Muhlayi un’wana la tshamaka eKansas u te: “A ndzi titwa ndzi tshinela ekusuhi ni Tata wa mina wa le matilweni. Mbilu ya mina yi tala hi rirhandzu . . . Ndzi langutela emahlweni ku hlaya leswi engetelekeke mpundzu wun’wana ni wun’wana naswona ndzi ta yi hlaya ndzi vuyelela minkarhi yo tala.”
Wansati wa le Maine u tsale a ku: “Yi ndzi pfunile swinene ku vona leswaku Yehovha i wa xiviri! Mayana xikhutazo lexi nga le ka tluka 74 lexi nge: ‘Malunghana ni lava va faka, a yi kona ndhawu leyi hlayisekeke ku tlula ku va emianakanyweni ya Xikwembu.’” Mutsari wa le Alaska u titwa hi ndlela leyi fanaka u ri: “Yi ndzi khumbe mbilu lerova mihloti yi xiririka.” U ye emahlweni a ku: “Ndzi ta yi hlaya hakunene naswona nkarhi ni nkarhi ndzi ta ya eka yona loko ndzi lava swo karhi.”
Ha tshemba u ta titwa hi ndlela leyi fanaka loko u hlaya buku leyi. Endzhaku ka tindzima tinharhu to sungula, buku leyi yi ni swiyenge swa mune leswi nge “U Ni Ntamu Lowukulu,” “U Rhandza Vululami,” “Mbilu Yo Tlhariha,” ni lexi nge “Xikwembu I Rirhandzu.” Naswona yi gimeta hi ndzima leyi nge “Tshinelani Eka Xikwembu, Kutani Xi Ta Tshinela Eka N’wina.”
U nga ha endla xikombelo xa buku leyi ya matluka ya 320 hi ku tata thikithi leri landzelaka kutani u ri rhumela eka adirese leyi nga kwalaho kumbe eka adirese leyi faneleke leyi nga le ka tluka 5 ra magazini lowu.
□ Ndzi rhumeleni buku leyi nge Tshinela Eka Yehovha.
Kombisa ririmi leri u ri lavaka.
□ Ndzi kombela mi tihlanganisa na mina malunghana ni dyondzo ya mahala ya Bibele.