‘Magazini Lowu Munhu A Faneleke A Anakanyisisa Hi Leswi A Swi Hlayeke Eka Wona’

DAVID i xichudeni lexi dyondzelaka vugqweta eYunivhesiti ya Obafemi Awolowo le Nigeria. Wa ha ku tsalela rhavi ra Timbhoni ta Yehovha ra kwalaho, a ku: “Nkarhi ni nkarhi ndzi yisa Xalamuka! eka profesa wa malembe ya 70 hi vukhale la dumeke wa ndzawulo yo endla milawu laha ndzi dyondzaka kona. Siku rin’wana, loko a ha ku kuma minkandziyiso leya ha ku humaka, u byele un’wana loyi a a n’wi endzerile ehofisini yakwe a ku: ‘Tibuku tin’wana ti lava leswaku u ti hlaya ntsena u hundza, kambe tin’wanyana ti lava leswaku u ti hlaya u tlhela u anakanyisisa hi leswi u swi hlayeke, kasi tin’wana ti lava u tinyika nkarhi wa ku anakanyisisa hi leswi u swi hlayeke eka tona. Xalamuka! i magazini lowu u faneleke u tinyika nkarhi wa ku anakanyisisa hi leswi u swi hlayeke eka wona.’”

Siku rin’wana, loko a huma ehofisini ya profesa loyi, David u vula leswaku u n’wi twele ekule a ri karhi a bumabumela Xalamuka! eka muendzi un’wana. “U vulavule ngopfu hi vulavisisi lebyikulu lebyi endliwaka loko ku lunghiseriwa Xalamuka! ni ndlela leyi yi vekaka swilo hi ku kongoma ha yona, kambe hi ndlela leyi faneleke. Ndzi n’wi twe a ku: ‘Ndzi ti hlaya hi rixaladza timagazini leti. Ku fanele ku ri Xikwembu lexi nyikaka vatsari lava vutlhari bya ku tsala swihloko swo tsakisa hi ndlela leyi.’”

Xalamuka! ya dyondzisa naswona yi bula hi timhaka to tala. Xa nkoka, yi endla leswaku vanhu va kholwa xitshembiso xa Muvumbi lexi kumekaka eBibeleni xa misava leyintshwa leyi nga ni ku rhula leyi nga ta siva mafambiselo lawa ya sweswi ya swilo. Broxara leyi ya matluka ya 32 leyi nge I Yini Leswi Xikwembu Xi Swi Languteleke Eka Hina? yi vulavula hi xikongomelo xexo xa Xikwembu, yi nyikela rungula leri humaka eBibeleni ku kombisa leswi hi faneleke hi swi endla leswaku hi amukeleka eka xona. U nga ha kombela kopi ya broxara leyi hi ku tata xiphephana lexi nga laha kutani u xi rhumela eka adirese leyi kombisiweke eka xona kumbe eka adirese leyi faneleke eka leti longoloxiweke eka tluka 5 ra magazini lowu.

□ Ndzi kombela mi ndzi tisela broxara leyi nge I Yini Leswi Xikwembu Xi Swi Languteleke Eka Hina?

Kombisa ririmi ra kona.

□ Ndzi kombela mi tihlanganisa na mina malunghana ni dyondzo ya mahala ya Bibele.