Buku Leyi Ndhundhuzeriwaka Ngopfu Ya Vantshwa

NHLOKO ya Xikolo xa Vanhwanyana xa Tigoni le Limuru, eKenya, yi tsalele rhavi ra Timbhoni ta Yehovha etikweni rero yi kombela ku rhumeriwa tibuku leti nge Swivutiso Leswi Vantshwa Va Swi Vutisaka—Tinhlamulo Leti Tirhaka. Yi te: “Hilaha u tivaka hakona, ku tirhisana ni vantshwa swi nga ha tika. Hi ni tibuku ta n’wina timbirhi, leti pfuneke vadyondzisi ni swichudeni. Ti ni rungula ro tala naswona ti swi fanela kahle swilaveko swa hina ni swa vana va malembe ya kondlo-a-ndzi-dyi.”

Kutani nhloko ya xikolo yi te: “Valawuri va [xikolo] va lava ku tirhisa buku leyi, leyi pfunaka ku dyondzisa swichudeni swa hina. Swi yi tsakele ngopfu buku leyi. Vatswari va ma tlangela ngopfu matshalatshala hinkwawo lama endliwaka ku pfuna vana va vona. Swa sweswi, hi kombela tibuku ta 25.”

Buku leyi nge Vantshwa Va Vutisa yi kambisisa swiphiqo swa vantshwa swin’we ni ndlela leyi va titwaka ha yona. Yi bula hi tinhloko-mhaka to kota leti: “Ndzi Nga Endlisa Ku Yini Leswaku Vatswari Va Mina Va Ndzi Nyika Ntshunxeko Lowu Engetelekeke?,” “Xana Ndzi Fanele Ku Baleka eKaya?,” “Ndzi Nga Va Endlisa Ku Yini Vanghana Va Xiviri Ke?,” “I Ntirho-vutomi Wihi Lowu Ndzi Faneleke Ku Wu Hlawula?,” “Ku Vuriwa Yini Hi Rimbewu eMahlweni Ka Vukati?” ni leyi nge “Ndzi Swi Tivisa Ku Yini Loko Ri Ri Rirhandzu Ra Xiviri?”

Leti ko va tinhloko-mhaka ti nga ri tingani leti kumekaka ebukwini leyi. Eka tinhloko-mhaka ta yona ta 39, buku leyi yi vulavula ni hi timhaka tin’wana to tala. Leswaku u tikumela yona, hi kombela u tata xiphephana lexi kutani u xi rhumela eka adirese leyi kombisiweke eka xona kumbe eka leyi faneleke eka leti longoloxiweke eka tluka 5 ra magazini lowu.

□ Handle ka ku tiboha, ndzi kombela mi ndzi tisela buku leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka.

Kombisa ririmi ra kona.

□ Ndzi kombela mi tihlanganisa na mina malunghana ni dyondzo ya mahala ya Bibele.