Xihloko Xa Khale Xi Khumba Timbilu

EXIKOLWENI xa le Suwałki, le n’walungu-vuxa bya Poland, mudyondzisi u kombele swichudeni ku lunghiselela bulo hi nhloko-mhaka leyi vulavulaka hi ku humesa khwiri. Justyna la nga ni malembe ya 16 u hlengelete rungula leri kumekaka eminkandziyisweni ya Timbhoni ta Yehovha. Hi siku ra bulo, mudyondzisi u nyike swichudeni nkarhi wo tiphofula.

Justyna u ri: “Ndzi ye eka mudyondzisi kutani ndzi n’wi komba xihloko lexi nge ‘Dayari Ya N’wana La Nga Si Velekiwaka,’ lexi kandziyisiweke eka Xalamuka! (ya Xinghezi) ya May 22, 1980.” U byele mudyondzisi wakwe a ku: “Xiya leswaku xi tsariwe hi ku ya hi langutelo ra n’wana, mbungu, lowu nga ta dlayiwa. Ndzi ehleketa leswaku xa tsakisa.” Mudyondzisi u sungule ku xi hlayela ehenhla. Swichudeni a swi lo whii, un’wana ni un’wana a rhiye ndleve.

Mudyondzisi a nga si hlaya ni hafu ya rungula rero, a a nga ha swi koti ku ya emahlweni, kutani u kombele xichudeni xin’wana ku hlaya xi ya emahlweni. Mudyondzisi u tshame ehansi a sungula ku rila. Loko xichudeni xi heta ku hlaya, ku landzele bulo ro tsakisa, naswona swichudeni swin’wana swi kombele kopi ya xihloko lexi. Justyna u ri: “Tlilasi yi cince langutelo ra yona hi minkandziyiso ya Timbhoni ta Yehovha. Khale a va nga yi rhandzi minkandziyiso leyi, sweswi se va yi rhandza. Mufana un’wana u sungule ku hlaya Xalamuka! nkarhi ni nkarhi.”

Tanihi leswi Justyna a tirhiseke xihloko lexi a xi kumeke eka Xalamuka! leyi se a yi ri ni malembe yo tlula 20 hi vukhale, na wena u nga kuma “nkwama lowu teleke hi vutlhari” eminkandziyisweni ya khale ya magazini lowu. (Yobo 28:18) Loko u ri eminhlanganweni eHolweni ya Mfumo ya Timbhoni ta Yehovha, u nga ha kambisisa tivholumo ta Xalamuka! leti kumekaka elayiburari ya kwalaho. U ta swi tsakela ku hlaya swihloko leswi nga hundzeriwiki hi nkarhi leswi kumekaka kwalaho. U nga ha tlhela u kuma kopi ya sweswinyana ya Xalamuka! eka Timbhoni ta Yehovha endhawini ya ka n’wina.

[Xifaniso lexi nga eka tluka 18]

Justyna loko a ha nghena xikolo