Ku Hanya Hi Ripfalo Lerinene Swi Dzunisa Xikwembu

HI MUTSARI WA XALAMUKA! EUKRAINE

LOKO ndyangu wa ka Chibisov, lowu nga Timbhoni ta Yehovha wu ri endleleni wu vuya enhlanganweni wa Vukreste le Ukraine, wu kume xipaci lexi nga ni swilo swa nkoka, ku katsa ni layisense yo chayela, makhadi ya xikweleti ni mali leyi ringanaka R3 000. Eka ndyangu lowu wa vanhu va ntlhanu, a ko tirha nuna wa kona ntsena. A a hola kwalomu ka R420 hi n’hweti. Kutani mali leyi a yi ta va pfuna ngopfu. Xana va endle yini?

Mana wa kona u ri: “Vana va hina va vanhwanyana va sungule ku bula hi ndlela yo tlherisela xipaci lexi eka n’wini wa xona, loyi hi ku ya hi layisense yo chayela leyi a yi ri exipacini a a ri wansati. Mina ni nuna wanga hi tsake ngopfu ku vona ripfalo ra vana va hina leri leteriweke kahle. Hi xamundzuku xa kona ndzi n’wi bele riqingho wansati loyi a lahlekeriweke hi xipaci lexi. Hi ku tsaka, Olha u tile a ta hi byela leswaku yena ni nuna wakwe va ni switolo swi nga ri swingani edorobeni ra ka hina. Mali leyi a yi ri exipacini xexo a ku ri muholo wa n’hweti wa vatirhi va vona. Tlhandlakambirhi, rin’wana ra maphepha lawa a ma ri kwalaho a ri ri ra nkoka ngopfu eka tiakhawunti ta vona ta bindzu.

“Olha u hi vutisile leswaku hi xi kume kwihi xipaci lexi. Hi n’wi hlamuserile leswaku hi xi kume kwihi nileswaku hi hundze kwalaho hikuva a hi vuya enhlanganweni wa Vukreste. Loko hi n’wi nyika minkandziyiso ya Bibele, u yi amukele hi mandla mambirhi.

“Endzhaku ka mavhiki ma nga ri mangani, Mbhoni-kulorhi leyi hi nga swin’we na yona evandlheni yi hi byele leswaku loko yi ri karhi yi fambisa minkandziyiso leyi sekeriweke eBibeleni eka vahundzi va ndlela, wansati un’wana u yi byele leswaku khale a a nga ti yingisi Timbhoni ta Yehovha nikatsongo. Kambe sweswi wa ti yingisa a tlhela a amukela minkandziyiso ya tona. U vule leswaku leswi swi vangiwe hileswi Timbhoni ti vuyiseke xipaci eka n’wana wakwe.”

[Xifaniso lexi nga eka tluka 18]

Ndyangu wa ka Chibisov