Buku Leyi Nga Hi Pfunaka Ku Sirhelela Vana Va Hina

N’wexemu wansati un’wana wa le Virginia le U.S.A., u tsale papila ro nkhensa buku leyi nge, Dyondza Eka Mudyondzisi Lonkulu, a ku: “Loko vatukulu va mina va nga si ya eku etleleni, va ri: ‘Kokwana, hi hlayele xitori ebukwini liya ya Yesu.’ Va ni malembe ya 4, 6 na 7 naswona va swi tsakela swinene switori leswi.”

Kokwana loyi u ri: “Ndzi hlaye ndzima 32 leyi nge ‘Ndlela Leyi Yesu A Sirheleriweke Ha Yona.’ A ndzi tsakile hakunene hikuva endzhaku ka loko yi hlamusele ndlela leyi Yehovha a sirheleleke Yesu ha yona, dyondzo leyi yi tlhela yi pfuna vana leswaku va nga tisirhelela njhani hi ku va nyika xitsundzuxo lexi tirhaka. Yi ri: ‘Loko munhu a ringeta ku ku endla leswi, huwelela u ku: “U nga ndzi khumbi ndzi ta ku pota!”’”

Le Mexico manana un’wana la nga ni xinhwanyetana xa malembe ya ntlhanu lexi vito ra xona ku nga Betsaida u vula leswaku se u yi hlaye ra vumbirhi ni n’wana wa yena buku leyi nge Mudyondzisi. Manana loyi u te: “Misava yi ya yi onhaka naswona vana va hina va langutana ni mintshikilelo yo tala. N’wananga u vula leswaku u swi tlangela swinene switsundzuxo swa mayelana ni ndlela leyi a nga tisirhelelaka ha yona eka minkucetelo yo biha, ku fana ni leyi boxiweke eka ndzima 32.”

Buku leyi nga ni swifaniso leswi dyondzisaka ya matluka ya 256 naswona yi ringanaka ni magazini lowu yi pfunile eka vatswari leswaku va landzela nkongomiso wa Bibele ku dyondzisa vana va vona. (Swivuriso 22:6) Tidyondzo ta kona leti sekeriweke etidyondzweni ta Yesu Kreste ti hlamuseriwa hi ndlela yo olova; kambe rungula ra kona ri nga pfuna vanhu hinkwavo. U nga ha tikumela buku leyi hi ku tata xiphephana lexi kutani u xi rhumela eka adirese leyi kombisiweke laha kumbe eka adirese leyi faneleke eka leti longoloxiweke eka tluka 5 ra magazini lowu.

□ Handle ka ku tiboha, ndzi kombela mi ndzi tisela buku leyi nge, Dyondza Eka Mudyondzisi Lonkulu.

Kombisa ririmi ra kona.

□ Ndzi kombela mi tihlanganisa na mina malunghana ni dyondzo ya mahala ya le kaya ya Bibele.