Vanhu Va Timiliyoni Va Ya Kona—Wena Ke?

◼ Ku yiwa kwihi? Ku yiwa eNtsombanweni wa Muganga wa Timbhoni ta Yehovha lowu nge, “Nkutsulo Wu Tshinele!” Ku ta va ni madzana ya mintsombano ya masiku manharhu, leyi sunguleke le United States hi vhiki ro hetelela ra May, naswona yi ta va kona eka tin’hweti leti nga ta landzela etindhawini to hambana-hambana emisaveni hinkwayo. Vanhu va kwalomu ka 11 wa timiliyoni va ve kona eka mintsombano ya 2 981 ya masiku manharhu ya n’wexemu!

Eka tindhawu to tala xiyimiso xi ta sungula hi 9:30 nimixo naswona xi ta sunguriwa hi vuyimbeleri. Hi Ravuntlhanu ku ta nyikeriwa tinkulumo to kota leyi nge “Yingisa Xitsundzuxo Xa Yehovha Xo Kutsula” ni nkulumo leyi nge “Ndlela Leyi Yehovha A Va Kutsulaka Ha Yona Lava Nga Enhlomulweni.” Nkulumo-nkulu yi ta va ni xihloko lexi nge, “Malunghiselelo Ya Yehovha Yo Hi ‘Kutsula Hilaha Ku Nga Heriki’” naswona hi yona yi nga ta gimeta xiyimiso xa nimixo.

Hi Ravuntlhanu xiyimiso xa ni ndzhenga xi ta va ni tinkulumo to kota leyi nge, “Ndlela Leyi Yehovha A Khathalelaka Vadyuhari Ha Yona” “Ku Kutsuriwa eMaxangwini Lama Dyisaka Mbitsi” ni leyi nge “Leswi Tintsumi Ti Swi Endlaka Loko Ti Endla ‘Ntirho Wa Le Rivaleni.’” Ku ta va ni nxaxamelo wa tinkulumo ta mune ehansi ka xihloko lexi nge, “Yehovha I ‘Muponisi’” leyi nga ta landzeriwa hi nkulumo yo gimeta leyi nge, “A Ku Na Tlhari Kumbe Munhu La Lwaka Na Hina La Nga Ta Humelela.”

Xiyimiso xa Mugqivela nimixo xi ta va ni nxaxamelo wa tinkulumo tinharhu leti nga ni xihloko lexi nge, “Mi ‘Nga Rhuteli’ eNtirhweni Wo Chumayela” ku katsa ni nkulumo leyi nge “Ku Kutsuriwa eXirimbaneni Xa Muphasi Wa Tinyenyana,” ni leyi nge “Lavisisa Swilo Leswi ‘Enteke Swa Xikwembu.’” Xiyimiso xa nimixo xi ta gimeta hi nkulumo ya nkhuvulo ni ku khuvuriwa ka lava va fanelekaka.

Tinkulumo ta Mugqivela nindzhenga hi leti landzelaka, “Khathalela Rihanyo Ra Wena Hi Ku Pfumelelana Ni Nkongomiso Wa Matsalwa,” “Vutomi Bya Wena Byi Lawuriwa Hi Moya Wihi?,” “Vukati Bya Wena A Byi Ve ‘Ntambhu Ya Miluko Yinharhu’” ni leyi nge, “Vantshwa, ‘Tsundzukani Mutumbuluxi Wa N’wina Lonkulu Sweswi.’” Kasi nkulumo yo hetelela yi ta ku, “Xana U Tshama U Ri Karhi U Ehleketa Hi Siku Ra Yehovha,” naswona yi ta nyikela switsundzuxo leswi tirhaka eminkarhini ya hina.

Xiyimiso xa Sonto nimixo xi ta va ni nxaxamelo lowu nga ni xihloko lexi nge, “Mfumo Wa Matilo Wu Fana Ni . . . ” Ku ta va ni tinkulumo ta mune leti nga ta bula hi swin’wana swa swifaniso swa Yesu.

Xiyimiso xa nimixo xi ta ya emahlweni hi nkulumo leyi nga ta va yi rhangela yinhla-nkulu ya ntsombano, ku nga drama ya le minkarhini ya Bibele, drama leyi yi sekeriwe eka Buku yo Sungula ya Tihosi ndzima 13. Xiyimiso xa Sonto ni ndzhenga xi ta va ni nkulumo ya le rivaleni leyi nge, “Ku Kutsuriwa Hi Mfumo Wa Xikwembu Ku Tshinele!”

Endla malunghiselelo sweswi, leswaku u ta va kona. Leswaku u ta kuma ndhawu leyi nga le kusuhi ni le ka n’wina, famba u ya vutisa eHolweni ya Mfumo ya Timbhoni ta Yehovha endhawini ya ka n’wina kumbe u tsalela vakandziyisi va magazini lowu.