“Ya Hlamarisa”

Marito lawa ma vuriwe hi mpatswa wa le Georgia, eU.S.A., mayelana ni buku ya matluka ya 224 leyi nga ni swifaniso swo saseka naswona yi humesiweke hi 2005, leyi nge Xana Bibele Yi Dyondzisa Yini Hakunene? Va te: “Ya olova swinene lerova munhu un’wana ni un’wana a nga yi tirhisa. Hambiswiritano, yi ni vutivi lebyi enteke lebyi nga tsakisaka ni vanhu lava dyondzekeke.”

Xihloko xa yona xi tsakise vo tala, hilaha mpatswa wa le New Jersey, eU.S.A. wu swi voneke hakona. Endzhaku ko ya entsombanweni wa Timbhoni ta Yehovha le Florida laha wu kumeke kopi ya buku leyi, mpatswa lowu wu fambe hi xihaha-mpfhuka wu ya eBahamas wu ya wisa. Loko mutirhela-mfumo a ri karhi a kambela mpahla ya vona, u vone buku leyi kutani a ku, “I khale ndzi lava ku tiva nhlamulo ya xivutiso lexi.” Mutirhela-mfumo loyi u tsake ngopfu loko mpatswa lowu wa Timbhoni wu n’wi nyika kopi yin’wana leyi a wu ri na yona.

Hi siku leri landzelaka mpatswa wolowo a wu ri eku hlayeni ka buku leyi eribuweni ra lwandle loko wansati loyi a a ri eku xaviseni a yi vona. U vule leswaku a a ha ku khongela mpundzu wolowo eka Xikwembu leswaku xi n’wi nyika nhlamulo ya xivutiso xo tano—Xana Bibele yi dyondzisa yini hakunene? U vutise leswaku a nga yi kuma kwihi buku leyi, naswona u tsake ngopfu loko mpatswa lowu wu n’wi nyika kopi yin’wana leyi a wu sele na yona.

Buku leyi nge Xana Bibele Yi Dyondzisa Yini Hakunene? se ya kumeka hi tindzimi to tlula 145, naswona se ku kandziyisiwe tikopi ta yona leti tlulaka 40 wa timiliyoni. U nga ha kombela kopi ya wena hi ku tata xiphephana lexi nga laha hansi kutani u xi rhumela eka adirese leyi kombisiweke laha kumbe eka adirese leyi faneleke eka leti nga eka tluka 5 ra magazini lowu.

□ Handle ka ku tiboha, ndzi kombela mi ndzi tisela buku leyi kombisiweke laha.

Kombisa ririmi ra kona.

□ Ndzi kombela mi tihlanganisa na mina malunghana ni dyondzo ya mahala ya le kaya ya Bibele.